ཕྱི་ལོ་༢༠༢༡ལོའི་ཟླ་༢ཚེས་༢༥་ཉིན། བྲག་མགོ་རྫོང་གཙང་སྟོད་ཡུལ་ཚོ་ནས་ཡིན་པའི་གངས་བུ་རིག་རྒྱས་ཉི་མ་ལགས་ཀྱི་བཙོན་འཇུག་དུས་ཡུན་ལོ་དགུ་ཚང་ནས་ཀློད་གྲོལ་བཏང་ཡོད་ཀྱང་ནད་པ་ཆགས་འདུག
ད་ལྟ་ཁོང་བཙོན་གྲོལ་ཐོབ་སྟེ་རང་ཁྱིམ་དུ་འབྱོར་ཡོད་ཀྱང་། ཆབ་སྲིད་བཙོན་པ་གཞན་དག་དང་འདྲ་བར་རྒྱ་གཞུང་ནས་ལྟ་རྟོག་ནན་པོ་བྱས་ཏེ། གཉེན་ཉེ་དང་གྲོགས་པོ་སོགས་ལ་ཁོང་བསུ་རུ་མ་བཅུག་པར་མ་ཟད། མི་མང་འདུ་འཛོམས་དང་། བསང་གཏོང་བ། གུར་ཕུབ་པ། བརྙན་དང་པར་བླངས་ནས་དྲྭ་ལམ་སོགས་སུ་སྤེལ་བའི་གནས་ཚུལ་བྱུང་ཚེ་ཁྲིམས་འགལ་ཡིན་ཚུལ་གྱི་བཀའ་བཏང་འདུག
རང་ལོ་ 30་ཡིན་པའི་གངས་བུ་རིག་རྒྱས་ཉི་མ་ལགས་ནི་དཀར་མཛེས་ཁུལ་བྲག་མགོ་རྫོང་། གཙང་སྟོད་ཡུལ་ཚོ་གཙང་སྟོད་སྡེ་བ་ནས་ཡིན་ཞིང་། ཁོང་གི་ཕ་མིང་ལ་དབྱེར་མེད་དང་མ་མིང་ལ་སྐལ་བཟང་མཚོ་ཟེར། ཁོང་ནི་དབྱེར་མེད་ཚང་གི་བུ་གཅིག་པོ་དེ་ཡིན་ལ། བཙོན་དུ་མ་སོང་བའི་སྔོན་ལ་རྫོང་གི་ཆུ་གློག་དང་འབྲེལ་བའི་ལས་ཁུངས་ཤིག་གི་ནང་དུ་ལས་ཀ་བྱས་ཡོད་འདུག
ཕྱི་ལོ ༢༠༡༢ ལོར་བོད་ཀྱི་ལོ་སར་སྐབས་བྲག་མགོ་དང་གསེར་རྟའི་ཕྱོགས་ནས་མི་མང་གིས་རྒྱ་ནག་གི་བཙན་གནོན་ལ་ཞི་བའི་ངོ་རྒོལ་གྱི་སྐད་འབོད་གནང་སྐབས། གངས་བུ་རིག་རྒྱས་ཉི་མ་ཁོང་དང་བྲག་མགོ་དགོན་པའི་དགེ་འདུན་པ་བཀྲ་ཤིས་དར་རྒྱས། རྣམ་རྒྱལ། ཅེས་བེ་སོགས་ཡུལ་མི་བཅུ་ལྷག་ལ་སྤྱི་ཚོགས་ལ་གཏོར་བརླག་དང་། མི་རིགས་ཁ་བྲལ་གཏོང་ཐབས་བྱས་པའི་ཉེས་མིང་འོག་འཛིན་བཟུང་བྱས་ཏེ། མི་སྤྱོད་ལས་འདས་པའི་མནར་གཅོད་ཚད་མེད་བཏང་མཐར། ཁོང་ཚོར་མི་ལོ་བཅུ་གཉིས་ནས་བཅུ་བཞིའི་བར་གྱི་ཁྲིམས་འཇུག་བཙོན་ཐག་བཅད།
ཁོང་བཙོན་ཁང་དུ་ཡོད་སྐབས། ཁོང་གིས་ཉམ་ཆུང་བའི་བཙོན་མའི་ལས་དབང་ལ་སྲུང་སྐྱོབ་དང་། ཚད་ལས་འདས་པའི་མནར་གཅོད་སོགས་ལ་ངོ་རྒོལ་དང་གདོང་གཏུག་ཡང་ཡང་བརྒྱབ་པས་ཐེངས་དུ་མར་བཙོན་ནག་ཏུ་ཡུན་རིང་བཅུག་པར་བརྟེན། ད་ལྟ་ཁོང་གི་མིག་གིས་གསལ་བོ་མི་མཐོང་བ་དང་། གློ་བ་ནད་པར་གྱུར་བ། མགོ་ནད་བྱུང་བ། སྒལ་ཚིགས་ནད་པར་གྱུར་བ་སོགས་མདོར་ན་ཁོང་གི་ལུས་སེམས་གཉིས་ལ་རྒྱུན་ལྡན་མིན་པའི་ནད་གཞི་མང་པོ་བྱུང་ཡོད་པའི་གནས་ཚུལ་ཐོན་འདུག
ཁོང་རང་ཁྱིམ་དུ་འབྱོར་ཏེ་ཁྱིམ་མི་དང་སྤུན་མཆེད་ཚོར་སེམས་གཏམ་བཤད་སྐབས། འདིར་ཕེབས་པའི་ཤ་ཉེ་རིང་རྣམས་དང་། རིགས་དང་ཚོར་བ། འདུ་ཤེས་དང་ལས་དབང་གཅིག་པའི་སྤུན་གྲོགས་རྣམ་པ། ཁྱེད་ཅག་ཡུན་རིང་བོར་སེམས་ཁུར་དང་འོ་བརྒྱལ་ལ་གཏད་སོང་། ང་རིག་རྒྱས་ཉི་མ་དེ་རིང་བཙོན་གྲོལ་བྱུང་བ་དང་སླར་ཕ་ཡུལ་གངས་ལྗོངས་ཀྱི་པང་ཁུག་འདི་ནས་ཁྱེད་ཅག་དང་མཇལ་ཐུབ་པའི་བསྐལ་བ་བྱུང་བར་སེམས་གཏིང་ནས་དགའ་འུ་ཡོད་བཀའ་དྲིན་ཆེ་ཞེས་དང་། ང་དེ་རིང་སྔོན་མའི་ན་གཞོན་དེ་ཡང་མིན་ལ་ངའི་དྲན་པ་ཡང་དེ་འདྲའི་གསལ་བོ་ཞིག་མ་རེད་དེ། ངས་ཁྱེད་ཚོར་ཞུ་ཆོག་ཆོག་ཅིག་ལ་ང་རང་སྔར་བཞིན་འགན་ཁུར་ཡོད་པའི་བོད་མི་ཞིག་ཡིན་པ་གཏན་ནས་བརྗེད་མེད། ད་རུང་མ་ཤི་དམྱར་བར་ལན་མང་འཁྱམས་དགོས་ཀྱང་། གཏན་ནས་བརྗེད་ཀྱང་མི་སྲིད་ལ། ཁྱེད་ཚོས་ཀྱང་རང་ཉིད་བོད་མི་ཞིག་ཡིན་པ་དུས་ནམ་ཡང་སེམས་ནས་བོར་མི་ཉན། རང་རང་གི་དཔའ་སྤོབས་མ་ཞུམ། ནང་ཁུལ་ལ་མཐུན་སྒྲིལ་བྱོས། ལྷག་ཏུ་རང་གི་སྐད་ཡིག་དང་ཆོས་ལུགས་ལ་སློབ་སྦྱོང་བྱོས། ང་ཚོ་ཚང་མ་རྨོངས་གཉིད་ལས་སད་དགོས། མནར་གཅོད་ལས་གྲོལ་དགོས། སྐད་ཆ་འདི་དག་ནི་ང་དེ་རིང་གསོན་པོ་ཡིན་པའི་རྟགས་དང་། ཡུན་རིང་ཡིད་ལ་བཅངས་པའི་སེམས་གཏམ་དམར་དམར་ཡིན་པས་ཚང་མས་ཐུགས་ལ་འཛིན་པར་ཞུ། ཞེས་བརྗོད་ཡོད་འདུག
ཁོང་གི་བཙོན་གྲོགས་བཀྲ་ཤིས་དར་རྒྱས་དང་། རྣམ་རྒྱལ་གཉིས་ད་དུང་བཙོན་ཁང་དུ་ལུས་ཡོད་ལ། བཙོན་གྲོགས་གཞན་འགའ་རེ་བཙོན་གྲོལ་ཐོབ་ཡོད་ཀྱང་ལུས་སེམས་གཉིས་ལ་གནོད་སྐྱོན་ཐེབས་ཡོད་འདུག
ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ནས་གནས་ཚུལ་མཁོ་སྤྲོད་གནང་།
བོད་ཀྱྱི་དཔའ་བོ་ཁྱྱེད་འདྲྲ་བ་བོད་མི་འབུམ་གཅིག་ཙམ་བྱྱུང་ན་བསྟྟན་དགྲྲ་རྒྒྱྱ་དམར་ལ་དཀའ་ངལ་དང་བོད་མའི་གཅེས་ནོར་སྲྲུང་ཐུབ་།་་ཁྱྱེད་ཀྱྱི་དགོངས་པ་རྡྫྫོགས་པ་ཤོག།