ཟླ་འདིའི་ཕྱི་ཚེས་ ༡ ནས་ཟླ་གསུམ་རིང་ཐའེ་ཝན་གྱི་རྒྱལ་ས་ཐའེ་པེ་རུ་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་མཐུན་ཚོགས་ཀྱི་གོ་སྒྲིག་འོག་ནང་ཆོས་འཆད་སྤེལ་གནང་ཕྱོགས་སྐོར་གྱི་ཟབ་སྦྱོང་ཞིག་གནང་བཞིན་ཡོད་འདུག
ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་གནས་ཚུལ་མཁོ་སྤྲོད་གནང་བ་ལྟར་ན། མཁྱེན་བརྩེ་རིན་པོ་མཆོག་གི་ཐེབས་རྩ་ཚོགས་པས་དཔལ་འབྱོར་མཐུན་སྦྱོར་འོག ཐའེ་ཝན་གྱི་རྒྱལ་ས་ཐའེ་པེ་རུ། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པས་ཟླ་འདིའི་ཕྱི་ཚེས་ ༡ ནས་མ་འོངས་ཟླ་གསུམ་རིང་རིན་མེད་ཐོག་ནང་ཆོས་འཆད་སྤེལ་གྱི་ཟབ་སྦྱོང་ཞིག་དབུ་འཛུགས་གནང་ཡོད་པ་དང་། སྐབས་དེར་གནའ་དེང་རིག་པའི་གནས་ལ་མཁྱེན་རྒྱ་ཡངས་པའི་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཕྱག་བསྟར་ངེས་སྟོན་པ་དང་། དགའ་ལྡན་ཁྲི་ཐོག་ཁང་གི་དྲུང་ཆེ་ཤར་རྩེ་མཁན་ཟུར་བྱང་ཆུབ་ཆོས་ལྡན་མཆོག་གིས་དྲ་ལམ་བརྒྱུད་ནས་ཟབ་སྦྱོང་གི་བརྗོད་གཞི་དང་འབྲེལ་བའི་བཀའ་སློབ་གནང་བ་དང་། ཁྲོམ་ར་རིག་པའི་ཆེད་མཁས་པ་སེན་དིས་དང་། རྒན་ངག་དབང་འཕྲིན་ལས། མཁན་པོ་གཡུལ་རྒྱལ་བཅས་ཀྱིས་ཀྱང་ཟབ་སྦྱོང་དང་འབྲེལ་བའི་གསུང་བཤད་གནང་ཡོད་འདུག
ཟབ་སྦྱོང་དབུ་འབྱེད་ཐོག་རིས་སུ་མ་ཆད་པའི་མཁན་སྤྲུལ་དགེ་བའི་བཤེས་གཉེན་ ༤༠ ཙམ་འདུ་འཛོམས་གནང་ཡོད་འདུག ༧རྒྱལ་བའི་བསྟན་པ་རིན་པོ་ཆེའི་སྙིང་པོ་ཤེས་རབ་དང་སྙིང་རྗེའི་ཉམས་ལེན་འདི་དག་དེང་གི་དུས་འདིར་ཡང་འཛམ་གླིང་སྤྱི་ལ་མཁོ་བའི་ནོར་བུ་ཉིད་དུ་གྱུར་ཡོད་ན་ཡང་། དེ་ཉིད་ཡུལ་དུས་གནས་སྐབས་དང་འཚམས་པར་གདུལ་བྱ་རྣམས་ལ་ཡང་དག་པར་སྟོན་པར་བྱེད་པ་ལ་དམིགས་བསལ་འཆད་ཁྲིད་ཀྱི་ཐབས་ལམ་སོགས་དགོས་ངེས་ཡིན་སྐོར་གསུངས་འདུག་ལ། ཟབ་སྦྱོང་དེ་ཕྱི་ལོ་ ༢༠༢༠ ཟླ་ ༡༢ ཚེས་༡༣ ཉིན་ཐའེ་ཝན་དུ་༧སྐྱབས་རྗེ་རྫོང་སར་མཁྱེན་བརྩེ་རིན་པོ་ཆེ་དབུ་བཞུགས་ཀྱིས་འཚོགས་པའི་དམ་ཆོས་འཆད་སྤེལ་གནང་ཐབས་ཀྱི་ཟབ་སྦྱོང་གི་ཚོགས་འདུ་སོགས་བརྒྱུད་ནས་གྲོས་བསྡུར་དང་གཏན་ཁེལ་བྱུང་བའི་ཞིབ་འཇུག་ཚོགས་པའི་ལས་གཞི་གལ་ཆེན་ཞིག་ཆགས་ཀྱི་ཡོད་འདུག
འབྱུང་འགྱུར་ཟླ་བ་གསུམ་གྱི་ཟབ་སྦྱོང་ནང་ཐའེ་ཝན་དུ་བཞུགས་བཞིན་པའི་ཆོས་བརྒྱུད་སོ་སོའི་དགེ་འདུན་པའི་ཁོངས་ནས་ཟབ་སྦྱོང་ལ་དོ་སྣང་ཡོད་ཅིང་། འབྱུང་འགྱུར་ལག་ལེན་དུ་ཁེལ་ངེས་ཡིན་པར་ཡིད་ཆེས་ཞུ་ཆོག་པའི་ནང་ཆོས་ཀྱི་ཤེས་ཚད་མཁན་སློབ་དགེ་བཤེས་ཀྱི་གནས་རིམ་དུ་ཡོད་པ་གྲངས་གསུམ་ནས་བཞི་བསྡུས་ཏེ་རིན་མེད་ཐོག་ཟབ་སྦྱོང་གནང་རྒྱུ་དང་། ཟབ་སྦྱོང་གི་ཆེད་དུ་དམིགས་བསལ་ལས་རིགས་སོ་སོའི་ནང་བསྟན་ཁྲོམ་རའི་བརྗོད་གཞི་དང་འབྲེལ་བའི་མཁས་དབང་དང་ཆེད་མཁས་པ་བཅུ་ཙམ་སྔ་ཕྱིར་གདན་འདྲེན་གྱིས་བརྗོད་གཞི་དང་འབྲེལ་བའི་ཟབ་སྦྱོང་སྤྲོད་རྒྱུ་ཡིན་པ་དང་། ཟབ་སྦྱོང་གི་ནང་དོན་གཙོ་བོ་གསུམ་དུ་ཕྱེས་ཡོད་པ་ལས། དང་པོ་དྲ་རྒྱ་བཀོལ་ཚུལ། གཉིས་པ། ཁྲོམ་རའི་རིག་པ། གསུམ་པ། ལས་གཞི་དོ་དམ་བཅས་ཀྱི་ཐོག་ལ་ཟབ་སྦྱོང་སྤྲོད་ཀྱི་ཡོད་འདུག དེ་ལས་གཞན། གནའ་དེང་ཟུང་འབྲེལ་གྱི་ལམ་ནས་ནང་ཆོས་ངོ་སྤྲོད་བྱེད་སྟངས། འཚོ་བ་དངོས་དང་འབྲེལ་བའི་ནང་ཆོས་འཆད་སྟངས། མི་རིགས་དང་རིག་གཞུང་གི་འདུ་ཤེས་མི་འདྲ་བ་དང་འབྲེལ་ནས་ནང་ཆོས་འཆད་སྟངས། ལྟ་གྲུབ་དང་འབྲེལ་ནས་ནང་ཆོས་འཆད་སྟངས། ཚན་རིག་དང་འབྲེལ་ནས་ནང་ཆོས་འཆད་སྟངས། རོལ་རྩེད་དང་འབྲེལ་ནས་ནང་ཆོས་འཆད་སྟངས་སོགས་ཀྱི་ཐད་ལའང་ཟབ་སྦྱོང་གནང་གི་ཡོད་འདུག
