འདས་པའི་བདུན་ཕྲག་གཉིས་མ་ཟིན་ཙམ་གྱི་ནང་སྦེལ་ཇམ་གྱི་བོད་རིགས་ཁྱིམ་ཚང་ ༡༦ ཙམ་ལ་ཏོག་དབྱིབས་གཉན་རིམས་འགོས་པའི་གནས་ཚུལ་བྱུང་ཡོད་ཀྱང་བོད་མི་གཅིག་ལ་ཅུང་ཛ་དྲག་གི་དཀའ་ངལ་བྱུང་ཡོད་པ་ལས་གཞན་རྣམས་ལ་ཛ་དྲག་གི་གནས་སྟངས་བྱུང་མེད་འདུག
འདི་གའི་གསར་འགོད་པས་ཞལ་པར་བརྒྱུད་སྦེལ་ཇམ་བོད་རིགས་ཚོགས་པའི་ཚོགས་གཙོ་ཕུར་བུ་དོན་གྲུབ་ལགས་ལ་ས་གནས་ཀྱི་གནས་སྟངས་སྐོར་དྲིས་པར་ཁོང་གིས། སྤྱི་ཡོངས་ཀྱི་ཆ་ནས་ནད་པ་མང་པོ་མིན་ཡང་བོད་མིའི་སྤྱི་ཚོགས་ཀྱི་མི་འབོར་དང་དུས་ཡུན་ལ་ཆ་བཞག་ན་ནད་པའི་གྲངས་མང་པོ་ཡིན་སྐོར་དང་། འདས་ལོའི་ཕྱི་ཟླ་ ༤ ཙམ་ནས་ས་གནས་བོད་རིགས་ཚོགས་པས་ཡུལ་མིའི་ཁྲིམས་དང་སྐུ་ཚབ་དོན་གཅོད་ཀྱི་བཀའ་མངགས་བཞིན་བོད་རིགས་ཚོ་འཛོམས་འཛོམས་མི་བྱེད་པའི་སྐུལ་མ་ཞུས་དང་ཞུ་མུས་ཡིན་ནའང་། ཉེ་སྔོན་ལོ་སར་སྐབས་འཛོམས་འཛོམས་བྱས་པ་དང་། མཉམ་འཛོམས་ཀྱིས་ཞབས་བརྟན་བསྒྲུབས་པ། དཔེ་ཀློག་བྱས་པ་སོགས་ཀྱི་ཐོག་ནས་ཏོག་དབྱིབས་གཉན་རིམས་འགོས་ཁྱབ་བྱུང་བའི་གནས་ཚུལ་ཁ་ཤས་བྱུང་ཡོད་པ་གོ་རྒྱུ་འདུག་ཅེས་བརྗོད་བྱུང་།
བོད་མི་ཅི་ཙམ་ལ་ཏོག་དབྱིབས་གཉན་རིམས་འགོས་པ་གཏན་འཁེལ་བྱུང་ཡོད་པ་དང་དེའི་ཁྲོད་དུ་ཛ་དྲག་གི་ནད་པ་བྱུང་ཡོད་མེད་དྲིས་པར་ཁོང་གིས། ཡུལ་ཁྲིམས་ཀྱི་དབང་གིས་བོད་རིགས་ཚོགས་པས་མི་སུ་དང་སུ་ལ་འགོས་ཡོད་མེད་ཤེས་རྟོགས་དཀའ་བ་མ་ཟད། མི་གྲངས་ག་ཙམ་ལ་འགོས་ཡོད་མེད་ཤེས་རྟོགས་དཀའ་ནའང་། བོད་རིགས་ཁྱིམ་ཚང་ ༡༦ ལ་ཏོག་དབྱིབས་གཉན་རིམས་འགོས་ཡོད་པ་གཏན་འཁེལ་བྱུང་ཡོད་པ་དང་། དེའི་ཁྲོད་དུ་བོད་མི་གཅིག་ལ་ཅུང་ཛ་དྲག་གི་གནས་སྟངས་བྱུང་ཡོད་པའི་གནས་ཚུལ་གོ་ཐོས་བྱུང་ནའང་། ཡུལ་ཁྲིམས་ཀྱི་དབང་གིས་ཕར་ནད་པ་སུ་ཡིན་རྩད་གཅོད་མི་ཆོག་སྟབས། སུ་ཡིན་མིན་ཤེས་རྟོགས་མ་བྱུང་བ་དང་། ཛ་དྲག་གི་དཀའ་ངལ་རིགས་བྱུང་སྟེ་དོ་བདག་གིས་སྦེལ་ཇམ་བོད་རིགས་ཚོགས་པར་འབྲེལ་བ་བྱས་ཚེ། བོད་རིགས་ཚོགས་པས་རོགས་རམ་བྱས་དང་བྱེད་མུས་ཡིན་སྐོར་འགྲེལ་བརྗོད་གནང་བྱུང་།
སྦེལ་ཇམ་ནང་ཁྱོན་བོད་མི་གྲངས་བཞི་སྟོང་ནས་ལྔ་སྟོང་བར་གནས་སྡོད་བྱེད་ཀྱི་ཡོད་པ་དང་། ས་གནས་ཀྱི་བོད་རིགས་ཁྱིམ་ཚང་ནང་དུ་ནད་ཡམས་འགོས་ཁྱབ་ཆེན་པོ་ཡོད་པ་ཉིན་གསུམ་ཙམ་གྱི་གོང་ནས་ཤེས་རྟོགས་བྱུང་ཡོད་འདུག་ལ། ས་གནས་ཀྱི་བོད་མི་མང་པོར་ཏོག་དབྱིབས་གཉན་རིམས་འགོས་ཁྱབ་བྱུང་ཡོད་པ་དང་བསྟུན། བོད་རིགས་བུ་མོ་ཆོས་དབྱིངས་དང་མཚོ་མོ་ཞུ་བ་གཉིས་ཀྱིས་ས་གནས་ཀྱི་སྨན་པ་ཁག་ཅིག་ལ་རོགས་འདེགས་བྱས་ཏེ་བོད་རིགས་ཁྱིམ་ཚང་ཁག་ལ་ཏོག་དབྱིབས་གཉན་རིམས་དང་འབྲེལ་ལམ་སྟོན་གནང་གི་ཡོད་འདུག་པ་དང་། སྦེལ་ཇམ་ཏོག་དབྱིབས་གཉན་རིམས་ཚན་པའི་ངོས་ནས་སྦེལ་ཇམ་བོད་རིགས་ཚོགས་པས་ས་གནས་བོད་རིགས་རྣམས་ལ་ནད་ཡམས་སྔོན་འགོག་དང་སྟངས་འཛིན་བྱེད་དགོས་པའི་ལམ་སྟོན་གནང་ཡོད་འདུག
ཟླ་སྔོན་མའི་ཕྱི་ཚེས་ ༢༦ ཉིན་སྦེལ་ཇམ་གཞུང་གིས་ཡུལ་དེའི་ནང་ཏོག་དབྱིབས་གཉན་རིམས་བསྐྱར་དུ་འགོས་ཁྱབ་ཤུགས་ཆེ་རུ་འགྲོ་ཡི་ཡོད་པའི་ཉེན་བརྡ་བཏང་ཡོད་ཅིང་། སྦེལ་ཇམ་གྱི་བྷུ་རུ་སལ་དུས་བབ་ (The Brussels Times) གསར་ཁང་གི་གནས་ཚུལ་ལྟར་ན། ད་བར་སྦེལ་ཇམ་རྒྱལ་ཡོངས་ནང་ཏོག་དབྱིབས་གཉན་རིམས་ཕོག་པའི་མི་གྲངས་ ༧,༧༤,༣༤༤ ལྷག་བྱུང་ཡོད་ཅིང་། དེའི་ཁྲོད་ནས་མི་གྲངས་ ༢༢,༡༤༡ འདས་གྲོངས་ཕྱིན་ཡོད་འདུག གཞན་ཡང་སྦེལ་ཇམ་གཞུང་གིས་ཏོག་དབྱིབས་སྔོན་འགོག་སྨན་ཁབ་བགོ་འགྲེམ་གྱི་ལས་གཞི་མགོ་བརྩམས་ཏེ། ད་བར་ཁྱོན་མི་གྲངས་ ༣,༡༤,༣༡༩ ལ་འགོག་ཁབ་ཡོངས་སུ་བརྒྱབ་ཟིན་པ་དང་། དེའི་ཐོག་ད་དུང་མི་གྲངས་ ༥,༠༩,༩༤༨ ལ་འགོག་ཁབ་ཐེངས་དང་པོ་དེ་བརྒྱབ་ཚར་ཡོད་འདུག
གསར་འགོད་པ། པ་སངས་ཚེ་རིང་། ཀླུ་མགོན་ཐར།
