ཡེ་ཤུའི་ཆོས་དཔོན་ཕོབ་མཆོག་ཨེ་རག་ཏུ་ཕེབས།

ཡེ་ཤུའི་ཆོས་དཔོན་ཕོབ་མཆོག་ནས་ཉིན་གྲངས་ ༣ རིང་ཨེ་རག་ནང་གཟིགས་སྐོར་གནང་སྟེ་སྤུན་ཟླའི་མཛའ་བརྩེ་འཚོལ་བ་དང་ཆོས་ལུགས་འདྲ་མིན་བར་ཁྱིམ་ཚང་གཅིག་ལྟར་འཆམ་མཐུན་མཉམ་གནས་བྱེད་པར་སྐུལ་སློང་གནང་རྒྱུ་ཡིན་སྐོར་གསུངས་འདུག

དེ་རིང་ཉིན་རྒྱབ་ཏུ་ཡེ་ཤུའི་ཆོས་དཔོན་ཕོབ་(Pope Francis)མཆོག་ཨེ་རག་གི་རྒྱལ་ས་བྷག་ཌཱད་ (Baghdad)ཡི་རྒྱལ་སྤྱིའི་གནམ་ཐང་དུ་འབྱོར་ཡོད་པ་དང་། སྐབས་དེར་ཨེ་རག་གི་སྲིད་བློན་ (Mustafa Al-Kadhimi)ལགས་སོགས་ཕེབས་བསུར་བཅར་ཡོད་པ་དང་། ཕོབ་མཆོག་ནས་ཡེ་ཤུའི་ཆོས་དཔོན་གྱི་ཐུགས་འགན་བཞེས་རྗེས་ཨེ་རག་ནང་ཕེབས་པ་ཐེངས་དང་པོ་དེ་ཆགས་ཡོད་འདུག ཕྱི་ལོ་ ༢༠༠༠ ལོར་སྐབས་དེའི་ཡེ་ཤུའི་ཆོས་དཔོན་ཕོབ་ཇོན་ཕོལ་(Pope John Paul II) ཨེ་རག་ནང་གཟིགས་སྐོར་དུ་ཕེབས་རྩིས་གནང་ཡོད་ཀྱང་། སྐབས་དེའི་སྲིད་འཛིན་སཱ་ཌམ་ཧོ་སིན་(Saddam Hussein)ལགས་ནས་དྭང་ལེན་གནང་མེད་པ་རེད།

ཨེ་རག་ནི་ཕོབ་ཧྥན་སེ་སི་མཆོག་གཟིགས་སྐོར་དུ་ཕེབས་སའི་རྒྱལ་ཁབ་ ༥༢ པ་དེ་ཡིན་ཞིང་། རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱིས་འཛམ་གླིང་ཡུལ་ལུང་གང་སར་བཀག་སྡོམ་དང་འཕྲོད་བསྟེན་བདེ་འཇགས་ཐད་ཉེན་ཁ་ཆེ་བའི་དུས་སྐབས་འདིར། ཆོས་དཔོན་མཆོག་ཡུལ་དེའི་ནང་གཟིགས་སྐོར་དུ་ཐོག་མར་ཕེབས་པ་དེ་ལོ་རྒྱུས་རང་བཞིན་གྱི་གནས་ཚུལ་ཞིག་ཏུ་ངོས་འཛིན་བྱེད་ཀྱི་འདུག་ལ། ཆོས་དཔོན་མཆོག་གིས་ང་རང་ཞི་བའི་ཐོག་ནས་གནས་བསྐོར་ལ་འགྲོ་དགོས་དོན་ནི། སྤུན་ཟླའི་མཛའ་བརྩེ་འཚོལ་རྒྱུ་དང་། ཆོས་ལུགས་གཞན་གྱི་གཅེན་གཅུང་ཚོ་དང་ལྷན་དུ་སྨོན་ལམ་འདེབས་པ་དང་གོམ་པ་ལྷན་དུ་བརྒྱབ་སྟེ། ཁ་ཆེ་དང་འཇིའུ། ཡེ་ཤུ་རྣམས་ནང་མི་ལྟར་འཆམ་མཐུན་ངང་གནས་བར་སྐུལ་སློང་གནང་ཆེད་གཟིགས་སྐོར་དུ་ཕེབས་པ་ཡིན་སྐོར་གསུངས་འདུག

བརྒྱུད་ལམ་གྱི་གནས་ཚུལ་ལྟར་ན། དེ་རིང་ཆོས་དཔོན་མཆོག་ནས་རྒྱལ་སྤྱིའི་གནམ་ཐང་ནས་ཐད་ཀར་སྲིད་འཛིན་ཕོ་བྲང་དུ་ཕེབས་ཏེ་སྲིད་འཛིན་བྷར་ཧམ་སཱ་ལི་(Barham Salih)ལགས་ལ་མཇལ་མོལ་དང་། གནད་ཡོད་མི་སྣའི་འདུ་ཚོགས་ཤིག་གི་ཐོག་ཕེབས་ཏེ་གསུང་བཤད་གནང་གི་ཡོད་འདུག་ལ། ཕྱི་ཚེས་ ༦ ཉིན་ཁ་ཆེའི་ཤེ་ཡ་ལུགས་ཀྱི་གནས་སྐོར་ལྟེ་གནས་ཆེ་གྲས་གྲོང་ཁྱེར་ནཱ་ཇིབ་(Najaf)དུ་བཞུགས་ཡོད་པའི་ཤེ་ཡ་ལུགས་ཀྱི་ཆོས་དཔོན་ཆེན་མོ་ (Grand Ayatollah Ali al-Sistani) མཆོག་ལ་མཇལ་འཕྲད་གནང་རྒྱུ་དང་། དེ་བཞིན་འཇིའུ་དང་ཡེ་ཤུ། ཁ་ཆེའི་ཆོས་ལུགས་ཀྱི་བླ་ཆེན་ཨབ་རཱ་ཧམ(Abraham)འཁྲུང་ཡུལ་ཨེ་རག་ལྷོ་ཕྱོགས་ཀྱི་ཨོར་(Ur)འཚོག་རྒྱུ་ཡིན་པའི་ཆོས་ལུགས་འདྲ་མིན་བར་གྱི་ཚོགས་འདུ་(interreligious meeting) ལ་ཕེབས་ཏེ་གསུང་བཤད་གནང་འཆར་ཡོད་འདུག ཉིན་མཐའ་མ་དེར་གྲོང་ཁྱེར་མོ་སོལ་(Mosul)ནང་ཁ་ཆེ་དང་ཡེ་ཤུའི་ཆོས་ལུགས་ཀྱི་ལྟ་བ་མཁྲེགས་འཛིན་པའི་འཁྲུག་རྩོད་ཁྲོད་ཚེ་སྲོག་ཤོར་བའི་འདས་པོ་ཚོར་རྗེས་དྲན་གནང་རྒྱུ་ཡིན་འདུག

ཨེ་རག་ནང་ཆོས་ལུགས་ཀྱི་འཁྲུག་རྩོད་རྒྱུན་མ་ཆད་པར་བྱུང་དང་འབྱུང་བཞིན་ཡོད་ལ། ཕྱི་ལོ་ ༢༠༡༠ ལོར་རེས་གཟའ་ཉི་མའི་རོ་མན་ཁེ་ཐོ་ལིག་གི་ཆོས་ལུགས་འདུ་འཛོམས་ཐོག་ཁ་ཆེའི་དྲག་སྤྱོད་པས་གཏོར་རྒོལ་ཐེབས་ཏེ་མི་གྲངས་ ༥༠ ལྷག་གིས་ཚེ་སྲོག་ཤོར་ཡོད་པ་དང་།  ཕྱི་ལོ་ ༢༠༡༩ ཟླ་ ༡༠ པར་ས་གནས་ཀྱི་ཡེ་ཤུའི་ལྷ་ཁང་ཞིག་ཏུའང་མི་གྲངས་ ༤༨ རྐྱེན་འདས་སུ་བཏང་། དེ་བཞིན་ཡེ་ཤུའི་ཆོས་དཔོན་གཉིས་དམར་གསོད་བཏང་བ་དང་ཆོས་བྱེད་པ་ ༡༠༠ ལྷག་འཛིན་བཟུང་བྱས་པ་སོགས་ཆོས་བྱེད་པར་དྲག་པོའི་གཏོར་རྒོལ་དོན་རྐྱེན་བསྟུད་མར་བྱུང་ཡོད་འདུག

གསར་འགོད་པ། བསྟན་འཛིན་ཕུར་བུ།