བོད་མིའི་སྒྲིག་འཛུགས་ཀྱི་བུད་མེད་རོགས་རམ་འབྲེལ་མཐུད་ལས་ཁུངས་ཀྱིས་བོད་པའི་བུད་མེད་སུ་རུང་ལ་ཁྱིམ་གྱི་དྲག་སྤྱོད་སོགས་ཀྱི་གནོད་འཚེ་བྱུང་ཚེ་ལས་ཁུངས་དེར་བཅར་བའམ་ཁ་པར་སོགས་བརྒྱུད་འབྲེལ་བ་བྱས་ན་བརྒྱ་ཆ་ ༡༠༠ རོགས་རམ་བྱ་མ་ཐུབ་ནའང་བརྒྱ་ཆ་ ༩༩ བྱ་ངེས་ཡིན་སྐོར་བརྗོད་བྱུང་།
དེ་རིང་སྔ་དྲོའི་ཆུ་ཚོད་ ༡༡ སྟེང་བཞུགས་སྒར་དྷ་སའི་མེག་གྷན་ཁྲོམ་གཞུང་དུ། དབུས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག་རྒྱལ་སྤྱིའི་བུད་མེད་ཉིན་མོ་སྲུང་གཙི་གནང་བ་དང་བསྟུན། འདས་ལོར་འཛམ་གླིང་ཡོངས་ནང་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་སྐབས། ས་གནས་བོད་ཀྱི་བུད་མེད་ལྷན་ཚོགས་རྣམས་ཀྱིས་མ་སྐུལ་དྭང་བླངས་ཐོག་ནས་བོད་མི་གཙོས་པའི་ས་གནས་ཡུལ་མི་རྣམས་ལ་སྐམ་ཟས་བགོ་འགྲེམ་ལ་སོགས་པའི་སྤྱི་ཚོགས་ཞབས་ཞུའི་ལས་འགུལ་སྤེལ་བ་ཁག་གསལ་འདོན་གནང་སོང་།
དབུས་བུད་མེད་ལྷན་ཚོགས་ཀྱི་ཚོགས་གཙོ་སྒྲོལ་མ་དབྱངས་ཅན་ལགས་ཀྱིས་འདི་གའི་གསར་འགོད་པར། ལོ་ ༡༠༠ ཡར་སྔོན་དང་བསྡུར་ན་ད་ལྟའི་བུད་མེད་རྣམས་ཀྱི་གནས་སྟངས་ལ་ཁྱད་པར་ཞེ་དྲག་ཕྱིན་ཡོད། དེང་སང་སོ་སོས་བྱས་པ་ཡིན་ན་དེར་འགོག་མཁན་དང་གནོན་མཁན་ཡོད་པ་མ་རེད། དཔེར་ན་མི་ཚང་ཞིག་ལ་ཆ་མཚོན་ན། འགའ་ཤས་མ་གཏོགས་འདྲ་འདྲ་བྱ་རྒྱུའི་གོ་སྐབས་རག་གི་ཡོད་པ་རེད། དེ་བཞིན་སློབ་གྲྭ་དང་ལས་ཀ་བྱེད་སའི་ནང་དུའང་དཀའ་ངལ་ཕྲན་བུ་ཡོད་ན་མ་གཏོགས། ལོ་ ༡༠༠ ཡི་སྔོན་དང་བསྡུར་ན། ད་ལྟའི་བུད་མེད་རྣམས་ཀྱི་གནས་སྟངས་ཡག་ཐག་ཆོད་ཡོད་པ་རེད། ཅེས་དང་། ༢༠༢༠ ལོར་ཏོག་དབྱིབས་གཉན་རིམས་ཀྱི་སྐབས་ས་གནས་ཀྱི་བུད་མེད་ལྷན་ཚོགས་རྣམས་ཀྱིས་རང་གི་སྲོག་ཉེན་ལ་མ་ལྟོས་པར། སོ་སོའི་སྤྱི་ཚོགས་ཁྲོད་ཀྱི་མི་ཚང་སྐྱོ་པོ་དང་ཁ་ཟས་མེད་མཁན། ནད་པ་དང་རྒན་འཁོགས་རྣམས་དང་། དེ་བཞིན་གཡས་གཡོན་གྱི་རྒྱ་གར་མི་སེར་རྣམས་ལ་ཞལ་ལག་སོགས་སྤྲད་དེ་གཟིགས་རྟོག་གནང་ཡོད་པ་རེད། ཅེས་འགྲེལ་བརྗོད་གནང་བྱུང་།
རྒྱལ་སྤྱིའི་བུད་མེད་ཉིིན་མོ་དང་བསྟུན། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བུད་མེད་ནུས་སྟོབས་གོང་འཕེལ་ཚན་པ་དང་། དབུས་བུད་མེད་ལྷན་ཚོགས་གཉིས་ཀྱི་ཟུང་འབྲེལ་ཐོག་མགོ་འཛུགས་གནང་བའི་བོད་ཀྱི་བུད་མེད་རོགས་རམ་འབྲེལ་མཐུད་ལས་ཁུངས་ (Tibetan Women Helpline) ཀྱི་ལམ་སྟོན་པ་སྐལ་བཟང་སྒྲོལ་མ་ལགས་སུ། རང་རེའི་སྤྱི་ཚོགས་ཁྲོད་བུད་མེད་རྣམས་ལ་ཁྱིམ་གྱི་དྲག་སྤྱོད་ (Domestic Violence) ཀྱིས་མཚོན་པའི་འཚེ་སྤྱོད་ཕོག་མཁན་ཅི་ཙམ་བྱུང་ཡོད་མེད་དང་། འབྲེལ་མཐུད་ལས་ཁུངས་ངོས་ནས་ད་བར་དངོས་སུ་བུད་མེད་ཅི་ཙམ་ལ་རོགས་རམ་གནང་ཐུབ་ཡོད་མེད་བཀའ་འདྲི་ཞུས་པར་ཁོང་གིས། རྒྱ་ནག་ནས་དར་བའི་ཏོག་དབྱིབས་གཉན་རིམས་ཀྱི་རྐྱེན་པས་འདས་ལོར་འཛམ་གླིང་ཁྱོན་ཡོངས་ནང་བུད་མེད་ཐོག་འཚེ་སྤྱོད་སྤེལ་བའི་བརྒྱ་ཆ་དེ་ཡར་འཕར་ཡོད་ལ། བོད་པའི་སྤྱི་ཚོགས་ཁྲོད་དུ་དེ་ལྟར་བྱུང་མེད་ཅེས་བཤད་ཐུབ་ཐབས་མེད་པ་མ་ཟད། ད་བར་བུད་མེད་ ༡༥ ལ་རོགས་སྐྱོར་བྱས་ཐུབ་ཡོད་ཅིང་། དེའི་ཁྲོད་ནས་ཀྱང་བུད་མེད་ ༡༠ ལ་ཁ་ཡོད་ལག་ཡོད་ཀྱིས་ཕན་ཐོགས་པ་བྱུང་ཡོད། བུད་མེད་གཞན་ ༥ ལ་ཁ་པར་དང་གློག་འཕྲིན་སོགས་བརྒྱུད་ནས་འབྲེལ་བ་བྱས་ཐུབ་ཡོད། ཅེས་བརྗོད་བྱུང་།
ཡང་ཁོང་མོས། བོད་པའི་སྤྱི་ཚོགས་འདི་མཐོང་རྒྱ་ཐོས་རྒྱ་ཉུང་དྲགས་པའམ། སྐབས་རེར་བུད་མེད་རྣམས་ལ་ཁྱིམ་ཚང་གི་སྐད་ཆ་ཕྱི་ལ་བཤད་མི་ཆོག་པའི་གནོན་ཤུགས་སླེབས་པའི་རྐྱེན་གྱིས་རོགས་རམ་འབྲེལ་མཐུད་ལས་ཁུངས་ལ་འབྲེལ་བ་བྱ་ཐུབ་ཀྱི་མེད་པ་དང་། རོགས་རམ་འབྲེལ་མཐུད་ལས་ཁུངས་ངོས་ནས་གནོད་འཚེ་ཕོག་པའི་བུད་མེད་རྣམས་ཀྱི་གནས་ཚུལ་གསང་རྒྱ་དམ་པོ་བྱེད་ཀྱི་ཡོད་སྟབས། བོད་པའི་བུད་མེད་སུ་རུང་ལ་ཁྱིམ་གྱི་དྲག་སྤྱོད་སོགས་པའི་གནོད་འཚེ་བྱུང་ཚེ། དེ་གའི་ལས་ཁུངས་ལ་བཅར་བའམ་ཁ་པར་སོགས་བརྒྱུད་འབྲེལ་བ་ཞུ་དགོས་པ་དང་། ལས་ཁུངས་ངོས་ནས་བརྒྱ་ཆ་ ༡༠༠ རོགས་རམ་བྱ་མ་ཐུབ་ནའང་བརྒྱ་ཆ་ ༩༩ བྱ་ངེས་ཡིན་སྐོར་བརྗོད་བྱུང་།
གསར་འགོད་པ། པ་སངས་ཚེ་རིང་།
