སྲིད་སྐྱོང་མཆོག་གིས་ཨ་རིའི་གཞུང་གསར་བས་དམིགས་བསལ་བོད་འབྲེལ་མཐུད་པ་མགྱོགས་མྱུར་བསྐོ་གཞག་དང་བོད་དོན་དང་འབྲེལ་སྲིས་ཇུས་ཁག་ལག་བསྟར་གནང་རྒྱུ་དང་སྲིད་སྤྱི་གཉིས་ཀྱི་དངོས་གཞིའི་འོས་བསྡུའི་ལས་རིམ་ཁྲོད་བོད་མི་ཚོས་དྲིལ་བསྒྲགས་རིགས་གནང་སྐབས་བོད་ཀྱི་སྲོལ་རྒྱུན་བཟང་སྤྱོད་དང་མཐུན་པ་གནང་དགོས་པའི་འབོད་སྐུལ་ཞུས་གནང་གི་འདུག
འཛམ་གླིང་གི་ཡུལ་ལུང་གང་སར་གནས་སྡོད་བྱས་ཡོད་པའི་བཙན་བྱོལ་བོད་མི་རྣམས་ནས་བོད་མིའི་རང་དབང་སྒེར་ལངས་ཆེན་མོ་གསུམ་བཅུའི་དུས་དྲན་ཐེངས་ ༦༢ པ་རྣམ་པ་འདྲ་མིན་གྱི་ཐོག་ནས་སྲུང་གཙི་གནང་བཞིན་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༡༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་བོད་མིའི་རང་དབང་སྒེར་ལངས་ཐེངས་ ༦༢ གཞུང་འབྲེལ་མཛད་སྒོ་ཚོགས་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པའི་དབུས་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་དང་སྲི་ཞུའི་ལས་བྱེད། དྷ་སའི་ཉེ་འཁོར་གྱི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་དང་། གསར་འགོད་པ་ཁག་ཅིག་བཅས་ཁྱོན་འཛོམས་འདུག
མཛད་སྒོའི་ཐོག་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་སྤྱི་འཐུས་ཀྱི་གསུང་འཕྲིན་སྒྲོག་སྦྱངས་གནང་བའི་ནང་། རྒྱ་ནག་དམར་གཞུང་གི་བོད་ཐོག་འཛིན་པའི་དྲག་པོའི་སྲིད་བྱུས་ལ་བོད་མི་རྣམས་ནས་བཟོད་ཐབས་བྲལ་བའི་ངོ་རྒོལ་གྱི་རྣམ་འགྱུར་སྟོན་ཕྱིར། ཕྱི་ལོ་ ༢༠༠༩ ནས་བཟུང་ད་བར་རྩ་ཆེའི་རང་ལུས་མེར་བསྲེགས་གནང་མཁན་རྒྱལ་གཅེས་དཔའ་བོ་དཔའ་མོ་དངོས་སུ་ཤེས་རྟོགས་བྱུང་བ་གྲངས་ ༡༥༥ བྱུང་ཡོད། རྒྱ་ནག་གཞུང་གི་དྲག་སྤྱོད་འོག་ད་དུང་བོད་མི་མང་པོའི་ཚེ་སྲོག་ཤོར་བཞིན་ཡོད། དཔེར་ན་ཕྱི་ལོ་ ༢༠༡༩ ཟླ་ ༡༡ ཚེས་ ༡༩ ཉིན་འཛིན་བཟུང་བྱས་པའི་རྫ་དབོན་པོ་དགོན་པའི་དགེ་འདུན་པ་བསྟན་འཛིན་ཉི་མའམ་རྟ་མེ་ལགས་དང་། ཕྱི་ལོ་ ༢༠༡༣ ཟླ་ ༡༡ ཚེས་ ༨ ཉིན་འཛིན་བཟུང་བྱས་པའི་བོད་མདོ་ཁམས་ནག་ཆུ་འབྲི་རུ་རྫོང་ཆགས་རྩེ་གྲོང་ཚོ་ལྔ་པ་ནས་ཡིན་པའི་དཀོན་མཆོག་སྦྱིན་པ་ལགས་གཉིས་ལ་བཙོན་ཁང་དུ་རྡུང་རྡེག་མནར་གཅོད་ཚད་ལས་བརྒལ་བ་བཏང་རྐྱེན་ཁོང་གཉིས་ ༢༠༢༡།༡།༡༩ དང་ ༢༠༢༡།༢།༦ ཉིན་སོ་སོར་སྐུ་ཚེ་མ་ཟིན་པར་འདས་གྲོངས་སུ་གྱུར། དེ་བཞིན་རང་ལོ་ ༣༦ ལ་སོན་པའི་ཁམས་འབྲི་རུ་ནས་ཡིན་པའི་ལྷ་མོ་ལགས་ལ་མ་ཉེས་ཁག་གཡོགས་ཀྱིས་འཛིན་བཟུང་བཙོན་འཇུག་བྱས་རྗེས་འདྲི་རྩད་རྡུང་རྡེག་ཚད་ལས་བརྒལ་བ་བཏང་བར་བརྟེན་ཕྱི་ལོ་ ༢༠༢༠ ཟླ་ ༨ པའི་ནང་འདས་གྲོངས་སུ་གྱུར་ཡོད། འབྲི་རུ་རྫོང་ཤག་ཆུ་ཁ་ནས་ཡིན་པའི་ཤུར་མོ་ལགས་ནས་ཕྱི་ལོ་ ༢༠༡༥ ཟླ་ ༩ ཚེས་ ༡༧ ཉིན་རང་ལུས་མེར་སྲེག་བཏང་མ་ཐག་ས་གནས་རྒྱ་ནག་ཉེན་རྟོག་པས་འཛིན་བཟུང་གིས་ཤག་ཆུ་ཁ་ས་གནས་སྨན་ཁང་དུ་འཁྱེར་ཡོད་ཀྱང་ཉིན་དེར་སྐུ་ཚེ་མ་ཟིན་པར་འདས་གྲོངས་སུ་གྱུར་པའི་ཡིད་སྐྱོའི་གནས་ཚུལ་ཕྱི་ལོ་ ༢༠༢༡ ཟླ་ ༡ པོའི་ཟླ་མཇུག་ཙམ་ལ་མ་གཏོགས་ཤེས་རྟོགས་མ་ཐུབ་པ་དེས། རྒྱ་ནག་གཞུང་གིས་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་འོག་བོད་མིའི་འགྲོ་འདུག་སྤྱོད་གསུམ་ཐད་དམ་དྲག་ཧ་ཅང་ཆེན་པོ་ཡོད་པ་ས་རིས་ཐང་གསལ་ཡིན།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་དང་། བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་དམ་འཛིན་གྱིས་བོད་རྒྱ་འབྲེལ་མོལ་བསྐྱར་གསོ་ཡོང་ཐབས་ལ་འབད་བརྩོན་བྱེད་བཞིན་པ་ཡོངས་སུ་གྲགས་ཀྱང་། རྒྱ་གཞུང་གིས་ད་བར་ཚུལ་མཐུན་གྱི་ཡ་ལན་གང་ཡང་བྱུང་མེད་ཐོག མུ་མཐུད་བོད་མིའི་ཆོས་དད་རང་དབང་ལ་ཧ་ཅང་གི་གཏོར་བཤིག་དང་། དྲག་གནོན། འགོག་རྐྱེན་སོགས་ཀྱི་སྲིད་བྱུས་ལག་བསྟར་བྱེད་བཞིན་པ་མ་ཟད། སྨྲ་བརྗོད་རང་དབང་རྡོག་རོལ། བོད་མི་འཛིན་བཟུང་དང་ཁྲིམས་བཅད་བཏང་བ། མི་རིགས་དབྱེ་འབྱེད་བྱེད་པ། བོད་མི་མང་དག་ཅིག་ལ་དམག་མི་སྦྱོང་བརྡར་ཁང་ལྟ་བུའི་ནང་དུ་ངལ་རྩོལ་བསྒྱུར་བཀོད་བྱེད་དུ་བཅུག་པ་སོགས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་དང་གཏོང་མུས་ཡིན་སྟབས། འབྲེལ་ཡོད་འཛམ་གླིང་མཉམ་འབྲེལ་རྒྱལ་ཚོགས་དང་དེའི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་ནས་བོད་ནང་གི་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་སྲུང་སྐྱོབ་ཐོག་ཐུགས་ཁུར་ཆེ་བཞེས་ཀྱིས་རྒྱ་ནག་གཞུང་ལ་གདོང་ལེན་གནང་དགོས་ཇི་མཆིས་གནང་ཕྱོགས་ཡོང་བའི་འབོད་བསྐུལ་ཞུ་བ་དང་ཆབས་ཅིག བོད་ནང་གི་བོད་མི་ཉེས་མེད་བཙོན་བཅུག་འོག་ཚུད་པ་རྣམས་ཆ་རྐྱེན་གང་ཡང་མེད་པའི་ཐོག་ནས་མགྱོགས་ནས་མྱུར་དུ་གློད་བཀྲོལ་གཏོང་དགོས་པ་དང་། བཙོན་ཁང་ནང་སྡུག་སྦྱོང་མནར་གཅོད་ཀྱི་བྱ་སྤྱོད་ངན་པ་སོགས་སྤེལ་མཚམས་འཇོག་དགོས་པ། བོད་ཀྱི་སྐད་ཡིག་སྲུང་སྐྱོབ་ལས་འགུལ་བ་བཀྲ་ཤིས་དབང་ཕྱུག་ལགས་རྒྱ་ནག་གཞུང་གིས་བཙན་དབང་ཐོག་ལོ་ལྔའི་རིང་བཙོན་འཇུག་གི་ཁྲིམས་ཐག་བཅད་དེ་ཕྱི་ལོ་ ༢༠༢༡ ཟླ་ ༡ ཚེས་ ༢༨ ཉིན་དུས་ཡུན་གཙང་སྟེ་གློད་བཀྲོལ་ཐོབ་ཡོད་ནའང་། ཁོང་གི་གཟུགས་གཞིའི་གནས་སྟངས་དང་མ་འོངས་པར་འགྲོ་འདུག་སྤྱོད་གསུམ་རང་དབང་ཐོབ་ཐུབ་མིན་ཞུ་ཚོད་དཀའ་བའི་གནས་སྟངས་ལ་སོང་། རྒྱ་ནག་གཞུང་གིས་བཀྲ་ཤིས་དབང་ཕྱུག་ལགས་ལ་ཆ་རྐྱེན་གང་ཡང་མེད་པའི་ཐོག་ནས་རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱོད་འཇུག་དགོས་པ་མ་ཟད། བཀྲ་ཤིས་དབང་ཕྱུག་ལགས་དེ་སྔ་བཀག་སྐྱིལ་བྱེད་ཡུན་རིང་རྒྱ་ནག་གཞུང་གིས་སྡུག་སྦྱོང་མནར་གཅོད་གཏོང་མཁན་འབྲེལ་ཡོད་དཔོན་རིགས་ཚོར་རྟོག་ཞིབ་ངེས་པར་བྱེད་དགོས། དེ་བཞིན་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གིས་གཙོས་གར་སོང་ཆ་མེད་དུ་སོང་བའི་བོད་རིགས་ཆབ་སྲིད་བཙོན་པ་དང་བཙོན་ཟུར་རྣམས་ཀྱི་དངོས་ཡོད་གནས་སྟངས་ཐད་ལ་གསལ་བཤད་དགོས་པའི་མཉམ་འབྲེལ་རྒྱལ་ཚོགས་བརྒྱུད་རྒྱ་ནག་གཞུང་ལ་ནན་བརྗོད་ཞུ་རྒྱུ་ཡིན། ཞེས་གསུངས་སོང་།
གསུང་འཕྲིན་གྱི་མཇུག་ཏུ། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ ཡིས་རྐྱེན་བྱས་ནས་ཕྱི་ལོ་ ༢༠༢༠ འདི་བཞིན་སའི་གོ་ལ་ཧྲིལ་པོར་ལོ་ནག་ལྟ་བུ་ཞིག་ཏུ་གྱུར་ཏེ་རྒྱལ་ཁབ་སོ་སོར་མི་སེར་གྱི་འཕྲོད་བསྟེན་དང་། དཔལ་འབྱོར་འཛུགས་སྐྲུན། སྤྱི་ཚོགས་ཡར་རྒྱས་ལས་འཆར་སོགས་ཀྱི་ཐོག་ལ་གྱོང་གུད་ཧ་ཅང་ཆེན་པོ་ཕོག་པ་བཞིན། བོད་ཕྱི་ནང་གཉིས་སུ་གནས་པའི་བོད་མི་རྣམས་ལའང་དེ་དེ་བཞིན་གྱི་དཀའ་ངལ་འཕྲད་པ་བྱུང་ཡོད། འདི་ག་སྤྱི་འཐུས་ལྷན་ཁང་ལ་མཚོན་ན་འདས་ལོའི་ནང་གཞུང་འབྲེལ་ལས་དོན་མང་དག་ཅིག་སྔོན་རྩིས་བཀའ་འཁྲོལ་ལྟར་ཕྱག་བསྟར་མ་ཐུབ་པར་འགོག་རྐྱེན་བཟོས་ཡོད། སླད་ནས་ཏོག་དབྱིབས་གཉན་རིམས་འདི་བཞིན་མགྱོགས་ནས་མྱུར་དུ་ཞི་ཞིང་འཛམ་གླིང་ཁྱོན་ཡོངས་ལ་བདེ་སྐྱིད་ཀྱི་ཉི་མ་སྤྲིན་པའི་འོག་ནས་དྭངས་བའི་སྨོན་འདུན་ཞུ་བཞིན་ཡོད། བྱེས་འཁོད་བོད་མི་རྣམས་ནས་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོ་ལྷིང་འཇགས་གཟི་བརྗིད་ལྡན་པའི་ངང་ལེགས་གྲུབ་ཐུབ་པ་བྱུང་བར་དགའ་བསུ་བསྔགས་བརྗོད་དང་སྦྲགས། སླེབས་ཉེར་དངོས་གཞིའི་འོས་བསྡུ་སྐབས་སུའང་འོས་བསྡུའི་ལས་རིམ་རྣམས་དཀའ་ངལ་མེད་པར་ཞི་བདེ་བག་ཕེབས་ངང་ལེགས་འགྲུབ་ཡོང་བར་ཚང་མས་མུ་མཐུད་ཐུགས་འགན་བཞེས་གནང་ཡོང་བའི་འབོད་བསྐུལ་ཞུ་རྒྱུ་ཡིན། ཞེས་གསུངས་སོང་།
སྲིད་སྐྱོང་བློ་བཟང་སེང་གེ་མཆོག་ནས་བཀའ་ཤག་གི་དབྱིན་ཡིག་གསུང་འཕྲིན་སྒྲོག་སྦྱངས་གནང་བའི་ནང་། དེ་རིང་ནི་ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་ཆོལ་གསུམ་བོད་མི་སེར་སྐྱ་ཕོ་མོ་རྒན་གཞོན་ཁྲི་ཕྲག་བརྒལ་བས་མ་བགྲོས་བསམ་པ་གཅིག་མཐུན་གྱི་སྒོ་ནས་རྒྱ་གཞུང་གིས་བོད་ཡུལ་བཙན་བཟུང་དང་། བོད་མིར་མི་སྤྱོད་ལས་འདས་པའི་དྲག་གནོན་བྱས་པ་ལ་འཚེ་མེད་ཞི་བའི་ལམ་ནས་སྒེར་ལངས་བྱས་ཏེ་མི་ལོ་ ༦༢ འཁོར་བའི་དུས་དྲན་ཉིན་མོ་དེ་ཡིན་ཞིང་། བོད་མིའི་སྒྲིག་འཛུགས་ངོས་ནས་བོད་བསྟན་སྲིད་ཀྱི་སླད་དུ་རྩ་ཆེའི་ལུས་སྲོག་དོར་བའི་རྒྱལ་གཅེས་དཔའ་བོ་དཔའ་མོ་ཡོངས་ཀྱི་སྙིང་སྟོབས་དང་ཆོད་སེམས་ལ་ཡི་རང་བསྔགས་བརྗོད་དང་མྱ་ངན་གུས་འདུད་ཞུ་རྒྱུ་མ་ཟད། ད་ལྟ་བཙན་འོག་ཏུ་མནར་གཅོད་མྱངས་དང་མྱོང་བཞིན་པའི་ཉེས་མེད་བོད་མི་རྒྱལ་གཅེས་དཔའ་བོ་དཔའ་མོ་ཡོངས་ལ་གདུང་ཤུགས་དྲག་པོས་ཐུགས་གསོ་ཞུ་རྒྱུ་ཡིན།
ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་ཡིག་ནང་༸གོང་ས་མཆོག་གི་སྐུའི་ཡང་སྲིད་རྩད་གཅོད་གནང་རྒྱུ་༸མགོན་པོ་མཆོག་གི་ཐུགས་འདོད་ཇི་བཞིན་ལག་བསྟར་ཞུ་དགོས་པ་ལས། རྒྱ་གཞུང་དང་གཞུང་གཞན་སུས་ཐེ་བྱུས་བྱས་ན་བོད་མིའི་ཆོས་དད་རང་དབང་གི་ཐོབ་ཐང་རྩིས་མེད་བཏང་བ་ཡིན་པས། ཨ་རིའི་གཞུང་གིས་རྒྱ་གཞུང་གི་འགན་འཁྲི་ཡོད་པའི་དཔོན་རིགས་རྣམས་ལ་ཉེས་ཆད་དང་ཨ་རིར་ཡོང་མི་ཆོག་པ་བཟོ་རྒྱུ་དང་། བོད་ཀྱི་ཁོར་ཡུག་གི་གལ་གནད། བོད་མིིའི་སྒྲིག་འཛུགས་ལ་ངོས་འཛིན་ཡོད་པ་སོགས་ཀྱི་དོན་ཚན་མི་ཉུང་བ་ཁ་སྐོང་ཞུས་ཏེ། ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་བཏོན་པར་ཕྱི་ལོ་ ༢༠༢༠ ཟླ་ ༡༢ ཚེས་ ༢༡ ཉིན་ཨ་རིའི་གྲོས་ཚོགས་ནས་གཏན་འབེབས་གནང་ཡོད་པ་དང་། ཟླ་དེའི་ཚེས་ ༢༧ ཉིན་ཨ་རིའི་སྲིད་འཛིན་མཆོག་གིས་མཚན་རྟགས་བཀོད་ནས་ཁྲིམས་ཡིག་ཏུ་གྱུར་ཏེ། ཨ་རིའི་གཞུང་གིས་༸གོང་ས་མཆོག་དང་བོད་མིའི་སྒྲིག་འཛུགས་ལ་སྔར་ལས་ལྷག་པའི་རྒྱབ་སྐྱོར་གནང་རྒྱུའི་ཞལ་བཞེས་ཡོད་པ་ཆགས་ཡོད་སྟབས། དེ་རིང་གི་དུས་དྲན་དང་བསྟུན་ནས་བོད་མི་ཡོངས་ཀྱི་ཚབ་ཞུས་ཏེ་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམ་པ་དང་། ཁྲིམས་འཆར་འདོན་མཁན་དང་རྒྱབ་སྐྱོར་གནང་མཁན། ཨ་རིའི་སྲིད་འཛིན་ཟུར་པས་དབུ་ཁྲིད་པའི་སྲིད་གཞུང་བཅས་ལ་སླར་ཡང་ཐུགས་རྗེ་ཆེ་ཞུ་རྒྱུ་ཡིན།
དེ་བཞིན་ཨ་རིའི་སྲིད་འཛིན་སྐུ་ཞབས་ཇོའོ་བཻ་ཌེན་སྲིད་གཞུང་གི་ཕྱི་སྲིད་དྲུང་ཆེ་སྐུ་ཞབས་ཨན་ཊོ་ནེ་ བྷི་ལིན་ཀེན་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་རྒྱུའི་ཆོད་སེམས་བརྟན་པོ་ཡོད་པ་གསུངས་པར་བོད་མིའི་སྒྲིག་འཛུགས་ཀྱི་ངོས་ནས་གཞིས་བྱེས་བོད་མིའི་ཡོངས་ཀྱི་ཚབ་ཞུས་ནས་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་སྦྲགས། ཨ་རིའི་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་གཞག་གནང་སྐྱོང་ཡོང་བ་ཞུ་རྒྱུ་མ་ཟད། ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་ཡིག་དང་། བོད་ལ་ཕར་འགྲོ་ཚུར་འོང་གི་ཁྲིམས་ཡིག་བཅས་ལག་བསྟར་དོན་འཁྱོལ་ཡོང་བའི་ཡིད་ཆེས་དང་བཅས་དེ་ལྟར་གནང་སྐྱོང་ཡོང་བའི་རེ་སྐུལ་ནན་པོ་ཞུ་རྒྱུ་ཡིན།
ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ ༢༠༢༠ ལོའི་སྙན་ཐོའི་ནང་། ༸གོང་ས་མཆོག་གི་སྐུ་ཚབ་དང་རྒྱ་གཞུང་གི་དབར་གཞུང་འབྲེལ་འབྲེལ་མོལ་ཐོག་ཡར་རྒྱས་ཕྱིན་མེད་པ་དང་། རྒྱ་གཞུང་གིས་༸གོང་ས་མཆོག་དང་ལྷན་དུ་འབྲེལ་མོལ་བསྐྱར་མཐུད་བྱེད་དགོས་པའི་རེ་སྐུལ་བཏོན་ཡོད་པ་བཞིན། གལ་ཏེ་རྒྱ་གཞུང་ལ་བོད་ཀྱི་དཀའ་རྙོག་སེལ་རྒྱུའི་ཆབ་སྲིད་ཀྱི་འདུན་པ་ཡོད་ན། ང་ཚོའི་ངོས་ནས་གཉིས་སྨན་དབུ་མའི་ལམ་གྱི་སྲིད་བྱུས་བརྒྱུད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་བྱེད་རྒྱུའི་ཆོད་སེམས་ལ་འགྱུར་བ་གཏན་ནས་མེད་ཅིང་། བོད་རིགས་ཡོངས་རྫོགས་ཆབ་སྲིད་ཀྱི་གོང་བུ་གཅིག་གི་ནང་ཚུད་དགོས་པའི་དགོས་འདུན་བཏོན་པ་ནི། མི་རིགས་ཀྱི་དཀའ་རྙོག་ཡོངས་རྫོགས་དུས་གཅིག་ཏུ་སེལ་ཐུབ་པ་ཁོ་ནའི་ཆེད་དུ་ཡིན། དེར་བརྟེན་རྒྱ་གཞུང་གི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཟུང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་འཕྲལ་དུ་འབྲེལ་མོལ་འགོ་འཛུགས་བྱེད་དགོས་པའི་རེ་སྐུལ་བསྐྱར་ནན་ཞུ་རྒྱུ་ཡིན།
ང་ཚོས་དུས་རྟག་ཏུ་སེམས་འཚབ་བྱེད་ཡུལ་ནི། གཞིས་བཞུགས་བོད་མི་ཡོངས་དང་། ལྷག་པར་དུ་ཆབ་སྲིད་བཙོན་པ་ཁག་ཆགས་ཀྱི་ཡོད། ཉེ་ཆར་རྒྱ་གཞུང་གིས་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་ཀྱི་བཙོན་འཇུག་དུས་ཡུན་རྫོགས་ནས་གློད་བཀྲོལ་ཐོབ་པར་དགའ་ཚོར་དང་བཅས། ༸ཀུན་གཟིགས་པཎ་ཆེན་རིན་པོ་ཆེ་མཆོག་གིས་གཙོས་པའི་བོད་མིའི་ཆབ་སྲིད་བཙོན་པ་རྣམས་གང་མགྱོགས་གློད་བཀྲོལ་གཏོང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། ད་རེས་གོ་སྐབས་འདི་བརྒྱུད་སྐབས་བཅུ་དྲུག་པའི་བཀའ་ཤག་གི་སྲིད་སྐྱོང་དང་། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་བཅས་ཀྱི་དངོས་གཞིའི་འོས་བསྡུ་ཆེན་མོ་དེ་ཉིད་ཟླ་ ༤ ཚེས་ ༡༡ ཉིན་གནང་གི་ཡོད་སྟབས། སྲིད་སྤྱིའི་དངོས་གཞིའི་འོས་མིར་ཚུད་པ་རྣམས་དང་རྒྱབ་སྐྱོར་བ་རྣམས་ཀྱིས་འོས་བསྡུའི་དྲིལ་བསྒྲགས་གནང་སྐབས་བོད་ཀྱི་སྲོལ་རྒྱུན་བཟང་སྤྱོད་དང་མཐུན་པ་གནང་དགོས་ཤིང་། འོས་འཕེན་མཁན་རྒྱ་ཆེ་མི་མང་གིས་ཀྱང་བརྟག་དཔྱད་འཐུས་ཚང་གནང་ནས་འོས་ཤོག་འཕེན་དགོས། དེ་དང་ཆབས་ཅིག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་ནས་དུས་སུ་ཆོལ་གསུམ་བོད་མི་ཡོངས་རྫོགས་རྡོག་རྩ་ཆིག་སྒྲིལ་དགོས་པའི་བཀའ་སློབ་ཕེབས་དོན་བཞིན། བོད་མི་ཡོངས་ཀྱིས་སྤྱི་དོན་སླད་དུ་ནུས་པ་མཉམ་སྤུངས་དང་རྡོག་རྩ་ཆིག་སྒྲིལ་སྔར་ལྷག་གནང་དགོས། དེ་མིན་སྤྱི་ཚོགས་དྲྭ་ལམ་བེད་སྤྱོད་ལོག་པར་བཏང་ནས་བོད་མིའི་ཆིག་སྒྲིལ་ལ་གནོད་པའི་འཆལ་གཏམ་དང་། དཀྲུག་ཤིང་། འཐེན་འཁྱེར་སོགས་ཀྱི་གཏམ་རྙོག་སྤེལ་མཁན་རིགས་ཤེས་རྟོགས་བྱུང་ཚེ། བོད་མིའི་སྒྲིག་འཛུགས་ངོས་ནས་ངན་པ་རྒྱ་ཡན་དུ་མ་སོང་བར་ཐེར་འདོན་བྱ་རྒྱུ་དང་། མི་མང་བྱིངས་ཀྱིས་ཀྱང་དེ་འདྲའི་མགོ་སྐོར་འོག་ལ་མ་ཚུད་པར་ཡིད་གཟབ་གནང་དགོས་པའི་དྲན་སྐུལ་ཞུ་རྒྱུ་ཡིན།
བཀའ་ཤག་སྐབས་བཅུ་བཞི་པ་དང་བཅོ་ལྔ་པའི་རིང་ལ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཕྱྭ་སྲུང་སྐྱོབ་ཞུ་རྒྱུ་དེ་ཉིད་གལ་འགངས་ཆེ་ཤོས་སུ་བརྩིས་ནས་སྐུ་ཕྱྭའི་སྲུང་སྐྱོབ་ཐད་ལ་འབད་བརྩོན་གང་ཐུབ་ཅི་ཐུབ་ཞུས་ཡོད་པ་མ་ཟད། གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཟུང་བོད་མིའི་འཐབ་རྩོད་རྒྱུན་གནས་ཐུབ་ཐབས་སུ་རྒྱལ་སྤྱིའི་ཁྱོན་ཡོངས་སུ་བོད་དོན་ཞུ་སྐུལ་དང་། བཙན་བྱོལ་བོད་མིའི་ཁྲོད་དུ་ཤེས་ཡོན་དང་། ཆོས་རིག་སྲུང་སྐྱོབ། གཞིས་ཆགས་སྲ་བརྟན། མང་ཚོགས་ཀྱི་འཚོ་རྟེན་དང་འཕྲོད་བསྟེན། སྲི་ཞུ་བའི་མཐུན་རྐྱེན་སོགས་ཡར་རྒྱས་གཏོང་ཐབས་སུ་འབད་བརྩོན་གང་ཐུབ་ཞུས་པ་བཞིན་ཡར་རྒྱས་མི་དམན་ཙམ་བྱུང་ཡོད་པ་ནི། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་སྟབས། ༸གོང་ས་མཆོག་ལ་ཐུགས་རྗེ་བཀའ་དྲིན་བླ་མེད་དུ་ཆེ་ཆེ་ཆེ་ཞུ་རྒྱུ་དང་། མང་ཚོགས་ལའང་རྒྱབ་སྐྱོར་གང་ལེགས་གནང་བར་ཐུགས་རྗེ་ཆེ་ཞུ་རྒྱུ་ཡིན།
དེ་རིང་གི་གོ་སྐབས་འདི་བརྒྱུད་བོད་མི་རྣམས་ལ་བཀའ་དྲིན་ཤིན་ཏུ་ཆེ་བའི་རྒྱ་གར་དབུས་སའི་གཞུང་མང་གཉིས་དང་། བོད་དང་བོད་མིའི་བདེན་དོན་ལ་རྒྱབ་སྐྱོར་གནང་མཁན་གྱི་རྒྱལ་ཁབ་ཁག་གི་གཞུང་དང་དབུ་འཁྲིད། གྲོས་ཚོགས་དང་གྲོས་ཚོགས་ཀྱི་འཐུས་མི། ཚོགས་སྒེར་བཅས་ལ་བོད་མི་ཡོངས་ཀྱི་ཚབ་ཞུས་ནས་ཐུགས་རྗེ་ཆེ་ཞུ་བ་དང་སྦྲགས། ཁྱེད་རྣམ་པས་ཇི་སྲིད་བོད་གཞིས་བྱེས་གཉིས་མཉམ་འཛོམས་མ་བྱུང་བར་དུ་རྒྱབ་སྐྱོར་མུ་མཐུད་གནང་སྐྱོང་ཡོང་བའི་རེ་སྐུལ་ནན་པོ་ཞུ་རྒྱུ་ཡིན། ཞེས་གསུངས་སོང་།
གཞན་ཡང་། དེ་རིང་འཛམ་གླིང་ཡུལ་གྲུ་གང་སར་བོད་མིའི་རང་དབང་སྒེར་ལངས་ཐེངས་ ༦༢ སྲུང་གཙི་གནང་གི་ཡོད་པ་ལྟར། སྔ་དྲོའི་ཆུ་ཚོད་ ༡༡། ༢༠ ཙམ་ལ་བཞུགས་སྒར་དུ་བོད་ཀྱི་གཞུང་འབྲེལ་མིན་པའི་ཚོགས་སྡེ་ཁག་ ༥ གོ་སྒྲིག་འོག སེར་སྐྱ་མི་མང་གིས་དྷ་ས་གཙུག་ལག་ཁང་གི་ཉེ་འགྲམ་ནས་དྷ་ཤོད་ཀ་ཅ་རིའི་བར་དུ་གོམ་བགྲོད་ཀྱིས་སྐད་འབོད་ལས་འགུལ་སྤེལ་གནང་སོང་།
གསར་འགོད་པ། ཀླུ་མགོན་ཐར། སྐལ་བཟང་སྦྱིན་པ།
