ཟླ་འདིའི་ཕྱི་ཚེས་ ༡༨ ཉིན་ཨ་རིའི་སྲིད་གཞུང་གསར་པས་རྒྱ་ནག་གི་ཕྱི་སྲིད་བློན་ཆེན་སོགས་ལ་ཐུག་འཕྲད་གནང་རྒྱུ་ཡིན་པ་མ་ཟད་མ་འོངས་ཨ་རྒྱ་གཉིས་ཀྱི་འབྲེལ་ལམ་ག་འདྲ་ཞིག་ཆགས་མིན་ད་ལན་གྱི་གྲོས་མོལ་དེར་རག་ལས་ཡོད་པར་བཤད།
ཁ་སང་ཨ་རིའི་ཕྱི་སྲིད་ལས་ཁུངས་ཀྱིས་བསྒྲགས་པ་ལྟར་ན། ཟླ་འདིའི་ཕྱི་ཚེས་ ༡༨ ཉིན་ཨ་རིའི་མངའ་སྡེ་ཨ་ལ་སི་ཀའི་གྲོང་ཁྱེར་ཨེན་ཁོ་ར་ཇི་ (Anchorage, Alaska) ནང་། ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) དང་བདེ་སྲུང་སློབ་སྟོན་པ་ཇེག་སུ་ལི་ཝན་ (Jake Sullivan) རྣམ་གཉིས་ཀྱིས། རྒྱ་ནག་གི་ཕྱི་སྲིད་བློན་ཆེན་ཝང་དབྱི་ (Wang Yi) དང་རྒྱ་ནག་གི་དབུས་ཕྱི་འབྲེལ་ལས་དོན་ཁང་གི་འགན་འཛིན་ཡང་ཅི་ཁྲི་ (Yang Jiechi) གཉིས་དང་ཐུག་འཕྲད་བྱས་ཏེ་ཨ་རྒྱའི་གནད་དོན་ཐོག་གོ་བསྡུར་བྱ་རྒྱུ་ཡིན་འདུག་ལ། ཐུག་འཕྲད་དེ་ནི་བྷའེ་ཌིན་གཞུང་དང་རྒྱ་ནག་གི་ཆེས་མཐོའི་མགོ་འཁྲིད་བར་དངོས་སུ་ཐུག་པ་ཆེས་ཐོག་མ་དེ་རེད་ལ། ཨ་རྒྱའི་མ་འོངས་འབྲེལ་ལམ་ཡང་ད་ཐེངས་ཀྱི་གྲོས་མོལ་དེར་རག་ལས་ཡོད་སྐོར་བརྗོད་འདུག
ད་ལྟའི་ཆར་ཨ་རིའི་གཞུང་ངོས་ནས་ཐུག་འཕྲད་སྐབས་གནད་དོན་ག་རེ་གླེང་སློང་བྱ་རྒྱུ་ཡིན་མིན་ཕྱིར་བསྒྲགས་བྱས་མེད་ནའང་། རྒྱལ་སྲིད་དྲུང་ཆེ་བྷི་ལིན་ཀན་ལགས་ཀྱིས་སྒེར་གྱི་ཊུ་ཝི་ཊར་དྲ་ལམ་དུ། ཐུག་འཕྲད་སྐབས་གནད་དོན་མང་དག་ཐད་གོ་བསྡུར་བྱ་རྒྱུ་ཡིན་པ་མ་ཟད། ཕྱོགས་གཉིས་བར་གྱི་ཆེས་མི་མཐུན་སའི་གནད་དོན་དག་ཀྱང་གླེང་སློང་བྱ་རྒྱུ་ཡིན་སྐོར་བརྗོད་ཡོད་ལ། དེ་བཞིན་ཁོང་གིས་གྲོས་ཚོགས་ཀྱི་ཉན་ཞིབ་སྐབས། ད་ཐེངས་ཀྱི་ཐུག་འཕྲད་འདིའི་རྐྱེན་པས་མ་འོངས་པར་ཕྱོགས་གཉིས་བར་གྲོས་མོལ་རིམ་པར་ཡོང་རྒྱུ་ངེས་པ་མེད་སྟབས། རྒྱ་ནག་ངོས་ནས་ཨ་རིའི་ཕྱོགས་ལ་ཁ་ཡོད་ལག་ཡོད་ཀྱི་ཡར་རྒྱས་ཀྱི་རྣམ་པ་དང་གྲུབ་འབྲས་འདོན་དགོས་སྐོར་དང་། ད་ཐེངས་ཀྱི་ཐུག་འཕྲད་དེ་ནི་ཨ་རིར་མཚོན་ན་བློ་འཚབ་ཅན་གྱི་རྒྱ་ནག་གི་བྱ་སྤྱོད་ཁག་ཁ་གསང་པོའི་ཐོག་ནས་བཤད་རྒྱུའི་སྡིངས་ཆ་ཞིག་ཡིན་སྐོར་བརྗོད་ཡོད་འདུག
གཞན་ཡང་། ཁ་སང་ཨ་རིའི་ཕོ་བྲང་དཀར་པོའི་གསར་འགོད་དྲུང་ཆེ་ཇེན་སཱ་ཀི་ (Jen Psaki) ལགས་ཀྱིས། ད་ལྟའི་འཛིན་སྐྱོང་ལ་མཚོན་ན་རྒྱ་ནག་གི་གཞུང་འབྲེལ་མི་སྣ་དང་ཐུག་འཕྲད་དང་པོ་དེ་ཨ་རིའི་ས་ཐོག་རང་ལ་འབྱུང་དགོས་པ་མ་ཟད། དེ་ཡང་དང་པོ་ཨེ་ཤ་ཡ་དང་ཡུ་རོབ་ནང་ཡོད་པའི་ཨ་རིའི་མཐུན་གྲོགས་རྒྱལ་ཁབ་ཚོའི་བསམ་ཚུལ་ལ་ཉན་ཏེ་ཐུག་འཕྲད་བྱ་རྒྱུ་དེ་རེད། ཅེས་བརྗོད་ཡོད་འདུག་ལ། སང་ཉིན་ཕྱི་ཚེས་ ༡༢ ཉིན་སྲིད་འཛིན་བྷའེ་ཌིན་མཆོག་ཨ་རི་དང་། ཨོ་གླིང་། ཉི་ཧོང་། རྒྱ་གར་བཅས་རྒྱལ་ཁབ་བཞི་ལས་གྲུབ་པའི་མཐུན་ཚོགས་(The Quad) ཀྱི་མགོ་འཁྲིད་ཀྱི་དྲ་ལམ་ཚོགས་འདུར་ཞུགས་གཏན་ཁེལ་ཡོད་ལ། ཡང་ཨ་རྒྱའི་ཐུག་འཕྲད་ཀྱི་སྔོན་ཏག་ཏག་དེར་སྐུ་ཞབས་བྷི་ལིན་ཀན་དང་ཨ་རིའི་བདེ་སྲུང་དྲུང་ཆེ་ལོ་ཝེཌ་ཨོ་སི་ཊིན་ (Lloyd Austin) གཉིས་ཉི་ཧོང་དང་། ལྷོ་ཀོ་རི་ཡའི་ནང་གཞུང་འབྲེལ་ཕྱོགས་སྐྱོད་གནང་རྒྱུ་ཡིན་པ་རེད། རྒྱལ་ཁབ་དེ་གཉིས་ནི་ཨ་རིའི་ཨེ་ཤ་ཡའི་ཁུལ་གྱི་མཐུན་གྲོགས་རྒྱལ་ཁབ་གནད་འགག་ཅན་ཙམ་དུ་མ་ཟད། རྒྱ་ནག་གི་ཞི་བདེ་རྒྱ་མཚོའི་ཁུལ་གྱི་བྱེད་ཐབས་ལ་བྱ་ར་དང་འགོག་རྒོལ་བྱེད་པའི་རྨང་གཞི་ལྟ་བུ་ཆགས་ཡོད།
ཇོ་བྷའེ་ཌིན་སྲིད་གཞུང་གིས་སྲིད་འཛིན་འོས་བསྡུའི་དྲིལ་བསྒྲགས་སྐབས་ནས་རྒྱ་ནག་ལ་སྲིད་ཇུས་མཁྲེགས་པོ་འཛིན་རྒྱུའི་རྣམ་འགྱུར་བསྟན་ཡོད་ལ། འདས་པའི་ཟླ་བ་ ༢ མ་ཟིན་ཙམ་གྱི་རིང་ཡུ་གུར་མི་རིགས་དང་། བོད་དོན། ཧོང་ཀོང་སོགས་ཀྱི་སྐོར་ནས་རྒྱ་ནག་ལ་སྐྱོན་བརྗོད་ཀྱི་བསྒྲགས་གཏམ་དང་། འབྲེལ་ཡོད་རྒྱ་ནག་གི་མགོ་འཁྲིད་ཚོར་དཔལ་འབྱོར་གྱི་ཉེས་ཆད་ཀྱང་བཅད་ཡོད་པ་རེད། དེ་བཞིན་བྷའེ་ཌིན་སྲིད་གཞུང་གིས་ཊོམ་ཕུ་སྲིད་གཞུང་ནས་རྒྱ་ནག་གི་ཚོང་ཟོག་ཐོག་བཀལ་བའི་སྒོ་ཁྲལ་རྣམས་ད་དུང་ཡང་ཕྱིར་འཐེན་མ་བྱས་པར་བསྐྱར་ཞིབ་བྱེད་མུས་ཡིན་པ་མ་ཟད། ཉེ་ཆར་རྒྱལ་སྲིད་དྲུང་ཆེ་བྷི་ལིན་ཀན་གྱིས་སྤེལ་བའི་གཏམ་བཤད་དང་། ཕོ་བྲང་དཀར་པོའི་བདེ་སྲུང་ཐབས་ཇུས་ཀྱི་ཡིག་ཆའི་ནང་རྒྱ་ནག་དེ་ཨ་རིར་ཉེན་ཁ་ཆེ་ཤོས་ཀྱི་རྒྱལ་ཁབ་དང་། རྒྱལ་སྤྱིའི་གུ་ཡངས་དང་སྲ་བརྟན་གྱི་ལམ་ལུགས་ལ་དོ་ཕོག་གཏོང་མཁན་གྱི་རྒྱལ་ཁབ་གཅིག་ཁོ་ན་དེར་ངོས་འཛིན་བྱས་ཡོད་འདུག
ཆབ་སྲིད་དབྱེ་ཞིབ་པས་ཨ་རིས་ད་ཐེངས་ཀྱི་ཐུག་འཕྲད་དང་པོ་བརྒྱུད་ནས་སྲིད་འཛིན་ཊོམ་ཕུའི་སྐབས་བཞག་པའི་ཨ་རྒྱའི་ཚོང་དོན་གྲོས་ཆོད་རིམ་པ་དང་པོ་གཞིར་བཟུང་། རྒྱ་ནག་ངོས་ནས་ཨ་རིའི་ཐོན་ཟོག་ནང་འདྲེན་བྱ་རྒྱུ་དང་། རྒྱལ་སྤྱིའི་ངལ་རྩོལ་ལྷན་ཚོགས་ཀྱིས་གཏན་འབེབ་བྱས་པའི་བཙན་བཀོལ་ངལ་རྩོལ་འགོག་རྒོལ་གྱི་སྒྲིག་ཁྲིམས་བརྩི་སྲུང་དགོས་པའི་རེ་བ་འཆང་གི་ཡོད་སྐོར་དང་། ཡང་ཐེངས་འདིའི་ཐུག་འཕྲད་དེ་དུས་རབས་བཅུ་དགུ་པའི་རོལ་རྩེད་ཆེན་མོ་ (The Great Game) ལྟར་རང་གི་ཤུགས་རྐྱེན་སྤེལ་ཐབས་ཀྱི་རྣམ་པ་གསར་པ་ཞིག་ལས། དེ་སྔ་བཤད་བཞིན་པ་ལྟར་གྱི་གྲང་དམག་གི་རྣམ་པ་ཞིག་མིན་སྐོར་བརྗོད་འདུག་ལ། འདས་པའི་ལོ་ ༥ ལྟར་ཨ་རྒྱའི་འབྲེལ་ལམ་འདི་སྔར་རྒྱུན་བཞིན་ཛ་དྲག་ཏུ་གནས་སྲིད་པའི་ཚོད་དཔག་བྱེད་ཀྱི་འདུག་ཀྱང་། ཨ་རིའི་རྒྱལ་སྲིད་དྲུང་ཆེས་བསླེབ་ལ་ཉེ་བའི་ཐུག་འཕྲད་སྐབས་ཨ་རྒྱའི་སྐུ་ཚབ་རྣམས་ཀྱིས་གོ་ལའི་གནམ་གཤིས་འགྱུར་ལྡོག་གིས་མཚོན་པའི་མཉམ་ལས་ཀྱི་ཕྱོགས་ལའང་གོ་བསྡུར་བྱ་རྒྱུ་ཡིན་སྐོར་བཤད་འདུག
གསར་འགོད་པ། པ་སངས་ཚེ་རིང་།
ཨ་རིར་དགོས་པ་རྒྱ་ནག་རེད་ལ་་རྒྱ་ནག་ལ་དགོས་པ་ཨ་རི་རེད་།