རྒྱ་ནག་གཞུང་གིས་ཧོང་ཀོང་གི་འོས་འདེམས་འཐུས་ཚོགས་དང་གྲོས་ཚོགས་འཐུས་མིའི་གྲངས་འབོར་ཇེ་མང་དུ་གཏོང་བའི་སྲིད་ཇུས་གཏན་འབེབ་བྱས་པར་ཧོང་ཀོང་སྤྱི་ཁྱབ་པ་ཁེ་རི་ལམ་གྱིས་དགའ་བསུ་དང་སྦྲགས་གྲོས་ཚོགས་ནང་གི་རྩོད་རྙོག་སེལ་བར་ཕན་ཐོགས་རྒྱུ་ཡིན་སྐོར་བཤད།
རྒྱལ་སྤྱིའི་གསར་ཁང་རོའུ་ཊུར་སོགས་ཀྱིས་གནས་ཚུལ་སྤེལ་བ་ལྟར་ན། དེ་རིང་ཕྱི་ཚེས་ ༡༡ ཉིན་རྒྱ་ནག་གི་སྐབས་ ༡༣ པའི་རྒྱལ་ཡོངས་མི་མང་འཐུས་མི་ཚོགས་ཆེན་ཐོག ཧོང་ཀོང་གི་གྲོས་ཚོགས་འཐུས་མིའི་གྲངས་ ༧༠ ཡོད་པའི་ཐོག་འཐུས་མི་ ༢༠ གསར་སྣོན་དང་། འོས་འདེམས་འཐུས་ཚོགས་ (Electoral committee) ལ་མི་གྲངས་ ༡༢༠༠ ཡོད་པའི་ཐོག་ ༣༠༠ ཁ་སྣོན་བྱ་རྒྱུ་སོགས་ཧོང་ཀོང་གི་འོས་བསྡུར་འགྱུར་བ་གཏོང་ཐབས་ཀྱི་སྲིད་ཇུས་ཤིག་གཏན་འབེབ་བྱས་ཡོད་འདུག
ཐག་གཅོད་དེ་བྱས་མ་ཐག་ཧོང་ཀོང་གི་སྤྱི་ཁྱབ་པ་ཁེ་རི་ལམ་ (Carrie Lam) གྱིས། རྒྱལ་ཡོངས་མི་མང་འཐུས་མི་རྣམས་ཀྱིས་པེ་ཅིན་གྱི་ཧོང་ཀོང་གི་འོས་བསྡུ་དང་འབྲེལ་ནས་བསྒྱུར་བཅོས་བྱ་བར་རྒྱབ་སྐྱོར་བྱས་པར་ཧོང་ཀོང་གཞུང་གིས་སྙིང་ཐག་པ་ནས་ཐུགས་རྗེ་ཆེ་ཞུ་འདོད་བྱུང་སྐོར་དང་། འོས་བསྡུའི་བསྒྱུར་བཅོས་དེ་ཡིས་ཉེ་ལམ་ནས་ཧོང་ཀོང་གྲོས་ཚོགས་ནང་གནད་དོན་ཡོད་ཚད་ཆབ་སྲིད་ལ་བསྒྱུར་ཐབས་བྱེད་པའི་གནད་དོན་དེ་སེལ་ཐུབ་པ་མ་ཟད། ནང་ཁུལ་གྱི་རྩོད་རྙོག་གིས་ཧོང་ཀོང་དུམ་བུར་གཏོང་བཞིན་པ་ལ་གདོང་ལེན་བྱེད་ཐུབ་སྐོར་དང་། དེ་ལ་བརྟེན་ནས་པེ་ཅིན་གྱི་རྒྱབ་སྐྱོར་འོག་ཧོང་ཀོང་གི་དཔལ་འབྱོར་དང་མི་མང་གི་འཚོ་བ་ཡར་རྒྱས་གཏོང་ཐུབ་ངེས་ཡིན་སྐོར་སོགས་བརྗོད་འདུག
རྒྱ་ནག་གཞུང་གི་བརྒྱུད་ལམ་དུ་མི་མང་འཐུས་མི་ ༢༨༩༥ ཡིས་རྒྱབ་སྐྱོར་དང་དགག་བྱ་བྱེད་མཁན་གཅིག་ཀྱང་མ་བྱུང་སྐོར་བརྗོད་པའི་སྲིད་ཇུས་གསར་པ་དེའི་ནང་། ཧོང་ཀོང་གི་གྲོས་ཚོགས་འཐུས་མི་དང་འོས་འདེམས་འཐུས་ཚོགས་ (Electoral committee) ཀྱི་གྲུབ་ཆར་འགྱུར་བ་ཆེན་པོ་ཞིག་བཏང་ཡོད་པ་དང་། དེ་ཡིས་པེ་ཅིན་ལ་དགའ་ཞེན་ཆེ་བའི་ཧོང་ཀོང་གི་སྤྱི་ཁྱབ་ཅིག་འདེམས་རྒྱུར་ནུས་པ་ཆེན་པོ་ཐོན་ཐུབ་པའི་གནས་སྟངས་ཆགས་ཡོད་པ་དང་། འོས་འདེམས་འཐུས་ཚོགས་ཀྱིས་གྲོང་ཁྱེར་གྱི་འཐུས་མི་འདེམས་པ་དང་། གྲོས་ཚོགས་འཐུས་མིའི་འོས་མི་དང་འོས་འདེམས་བྱུང་མཁན་རྣམས་རྒྱལ་ཞེན་ཡོད་མེད་ལ་དག་ཐེར་བྱེད་ཆོག་གི་ཡོད་འདུག
གནད་དོན་དབྱེ་ཞིབ་པས་ཧོང་ཀོང་གི་འོས་འདེམས་འཐུས་ཚོགས་ལ་བསྒྱུར་བཅོས་བྱས་པ་ལ་བརྟེན། དམངས་གཙོར་ཡིད་ཆེས་བྱེད་མཁན་དག་གི་ཁོར་ཡུག་གཞི་རྒྱ་ཆུང་དུ་བཏང་སྟེ། ཧོང་ཀོང་གི་གནས་སྟངས་ལྡོག་ཕྱོགས་སུ་ཁ་ཕྱོགས་ཡོད་སྐོར་དང་། ཕྱི་ལོ་ ༡༩༩༧ ལོར་རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྲིད་ཇུས་འོག་ཧོང་ཀོང་རྒྱ་ནག་ལ་རྩིས་སྤྲོད་བྱས་པ་ནས་བཟུང་འོས་བསྡུའི་ཐད་ཚོད་འཛིན་ཆེ་ཤོས་དང་། མ་འོངས་པར་ཧོང་ཀོང་གྲོས་ཚོགས་ནང་དགག་བྱ་བྱས་པ་ལ་མཇུག་འབྲས་ཅི་ཡོང་དང་། གྲོས་ཚོགས་འཐུས་མིའི་བསམ་ཚུལ་ཡར་བསླེབས་པར་རྒྱལ་ཞེན་ཇི་ཙམ་དགོས་མིན་སོགས་གསལ་ཁ་མེད་སྐོར་བརྗོད་ཀྱི་འདུག
དབྱིན་ཡུལ་གྱི་ཕྱི་སྲིད་བློན་ཆེན་ཌོ་མི་ནིག་རཱབ་ (Dominic Raab) ལགས་ཀྱིས། རྒྱ་ནག་གཞུང་གི་བྱེད་ཐབས་དེ་ནི་རང་གི་དམ་བཅའ་དང་འགལ་ནས་ཧོང་ཀོང་ནང་གི་དམངས་གཙོའི་བགྲོ་གླེང་གི་མཁའ་དབུགས་དོག་ཏུ་གཏོང་ཐབས་ཤིག་ཡིན་པ་མ་ཟད། བྱེད་ཐབས་དེས་རྒྱ་ནག་རང་ཉིད་འཛམ་གླིང་གི་སྣེ་འཁྲིད་རྒྱལ་ཁབ་ཅིག་ཡིན་པའི་ཆ་ནས། རྒྱལ་སྤྱིའི་སྒྲིག་སྲོལ་ལ་བརྩི་སྲུང་དང་འགན་འཁྲི་ལེན་རྒྱུའི་ཐད་མང་ཚོགས་ཁྲོད་ཡིད་ཆེས་དང་གདེང་ཚོད་སླེབས་རྒྱུར་འགོག་རྐྱེན་བཟོ་ངེས་ཡིན་སྐོར་སྐྱོན་བརྗོད་གནང་ཡོད་འདུག
གསར་འགོད་པ། ཀླུ་མགོན་ཐར།
