རྒྱ་ནག་གི་རྒྱལ་ས་པེ་ཅིན་དང་བྱང་ཕྱོགས་ཀྱི་མངའ་སྡེ་ཕལ་ཆེ་བའི་ནང་བྱེ་རླུང་རྡུལ་འཚུབ་དྲག་པོ་བྱུང་སྟེ་མི་རྒྱུ་གཉིས་ལ་གནོད་སྐྱོན་ཐེབས་ཀྱི་ཡོད་པ་དང་དོ་དགོང་བྱེ་རླུང་རིམ་གྱིས་འཇགས་པ་ཡིན་ནའང་སང་ཉིན་སོགས་སུ་བསྐྱར་དུ་འབྱུང་སྲིད་པའི་ཉེན་བརྡ་བཏང་འདུག
དེ་རིང་སྔ་དྲོར་རྒྱ་ནག་གི་རྒྱལ་ས་པེ་ཅིན་གཙོས་པའི་བྱང་ཕྱོགས་ཀྱི་མངའ་སྡེ་ཕལ་ཆེ་བར་བྱེ་རླུང་རྡུལ་འཚུབ་ཀྱི་སྐྱོན་བྱུང་སྟེ། རྒྱ་ནག་གི་བཙན་བཟུང་འོག་ཡོད་པའི་ལྷོ་སོག་ནང་མི་གྲངས་ ༨ རྐྱེན་འདས་དང་། མི་གྲངས་ ༨༠ ལྷག་གར་སོང་ཆ་མེད་དུ་གྱུར་ཡོད་པ་དང་། པེ་ཅིན་མཁར་གྱི་གནམ་གྲུའི་ཞབས་ཞུ་རྣམས་ཕྱིར་འཐེན་བྱས་ཏེ་རྒྱལ་ཡོངས་གནམ་གཤིས་བརྟག་དཔྱད་ཁང་ནས་ཉེན་བརྡ་རིམ་པ་དང་པོ་བཏང་ཡོད་འདུག
རྒྱ་ནག་རྒྱལ་ཡོངས་གནམ་གཤིས་བརྟག་དཔྱད་ཁང་གིས་འགྲེལ་བརྗོད་བྱས་པ་ལྟར་ན། ད་ཐེངས་ཀྱི་བྱེ་རླུང་རྡུལ་འཚུབ་ཀྱི་གནོད་སྐྱོན་དེ་ལྷོ་སོག་ནང་ཡོད་པའི་གྷོ་བྷི་བྱེ་ཐང་དུ་རླུང་འཚུབ་དྲག་པོ་གཡུགས་པའི་རྐྱེན་གྱིས་བྱུང་བ་ཞིག་ཡིན་ཞིང་། འདས་པའི་ལོ་བཅུའི་ནང་རྒྱ་ནག་རྒྱལ་ཡོངས་ནང་བྱུང་མ་མྱོང་བའི་བྱེ་རླུང་དྲག་ཤོས་དེ་ཡིན་འདུག
རྒྱ་ནག་ལྷོ་བརྒྱུད་ཞོགས་པའི་ཆ་འཕྲིན་གསར་ཁང་གིས་གནས་ཚུལ་སྤེལ་བ་ལྟར་ན། ཐེངས་འདིའི་བྱེ་རླུང་རྡུལ་འཚུབ་ཀྱིས་པེ་ཅིན་གྱི་མཁའ་དབུགས་ཡོངས་རྫོགས་བཏུམ་སྟེ། སྤྱི་ལེ་གཅིག་གི་མཚམས་ལས་མཐོང་མི་ཐུབ་པ་དང་། མཁའ་རླུང་འབག་བཙོག་གི་ཚད་གཞི་དེ་ ༥༠༠ ལས་བརྒལ་བ་མ་ཟད། སྤྱིར་མཁའ་དབུགས་འབག་བཙོག་ཚད་འཇལ་གྱི་ཆ་རྐྱེན་གཙོ་བོ་ཞིག་ནི་མཁའ་དབུགས་ནང་ PM2.5 ཟེར་བའི་གནོད་འཚེ་ཅན་གྱི་རྡུལ་འཚུབ་ཇི་ཙམ་ཡོད་མེད་ལ་གཞི་འཛིན་གྱི་ཡོད་པ་ལྟར། འཛམ་གླིང་འཕྲོད་བསྟེན་སྒྲིག་འཛུགས་ངོས་ནས་འབག་བཙོག་ཚད་ ༢༥ (micrograms)ལས་བརྒལ་མི་ཉན་པའི་ལམ་སྟོན་ཡོད་ནའང་། དེ་རིང་སྔ་དྲོའི་ཆུ་ཚོད་ ༩ པའི་སྟེང་པེ་ཅིན་མཁར་དང་མངའ་སྡེ་ཕལ་ཆེ་བའི་མཁའ་དབུགས་འབག་བཙོག་ཚད་(micrograms)༧༣༢ ལ་འཕར་ཡོད་འདུག
རྒྱ་ནག་གི་གཞུང་འབྲེལ་གནས་ཚུལ་ལྟར་ན། ད་ལན་གྱི་བྱེ་རླུང་རྡུལ་འཚུབ་དེ་ལྷོ་སོག་ནས་ཤར་ཊུར་ཀི་སི་ཐན་དང་། ཧེ་ལོང་ཅང་། ཅི་ལིན། ལིའོ་ཉིང་། ཀན་སུའུ། ཉིང་ཤ། ཧྲན་ཤི། ཤན་ཤི། ཧུའུ་པེ། པེ་ཅིན། ཐན་ཅིན་བཅས་ཀྱི་ཕྱོགས་སུ་གཡུག་གི་ཡོད་པ་དང་། ཕལ་ཆེར་དེ་རིང་དགོང་མོ་ཙམ་ནས་རླུང་འཚུབ་རིམ་གྱིས་འཇགས་སྲིད་པའི་ཚོད་དཔག་བྱས་ཡོད་འདུག
གསར་འགོད་པ། པ་སངས་ཚེ་རིང་།
