ཡུ་རོབ་མཐུན་ཚོགས་ཀྱི་སྨན་ལྷན་ནས་ཨེ་སི་ཊ་ཛེ་ནེ་ཁ་ (AstraZeneca) འགོག་ཁབ་ཀྱི་ཏོག་དབྱིབས་གཉན་རིམས་སྔོན་འགོག་གི་དགེ་མཚན་ནི་དེའི་ཟུར་སྐྱོན་དང་ཉེན་ཁ་ཁག་ལས་ཆེ་བ་ཡོད་པ་ཞིག་ཏུ་མཐོང་གི་ཡོད་སྟབས་མུ་མཐུད་འགོག་ཁབ་དེ་རྒྱག་དགོས་པའི་འབོད་སྐུལ་གནང་།
ཁ་སང་ཕྱི་ཚེས་ ༡༦ ཉིན་ཡུ་རོབ་སྤྱི་མཐུན་ཚོགས་པའི་སྨན་པའི་ལྷན་ཚོགས་ (European Medical Authority) ཀྱིས། ད་སྔ་བར་དུ་ཨེ་སི་ཊ་ཛེ་ནེ་ཁ་ (AstraZeneca) འགོག་ཁབ་བརྒྱབ་པ་ལ་བརྟེན་ནས་ཁྲག་རྡོག་པོར་གྱུར་ཏེ་ཁྲག་ལམ་འགག་པར་རྐྱེན་བྱས་པའི་བདེན་དཔང་གང་ཡང་མེད་པ་མ་ཟད། འགོག་ཁབ་ཚོད་ལྟའི་གྲུབ་འབྲས་ནང་དུའང་གནས་དོན་དེ་བྱུང་མེད་སྟབས། ཨེ་སི་ཊ་ཛེ་ནེ་ཁ་འགོག་ཁབ་ནི་འབྱུང་སྲིད་པའི་ཟུར་སྐྱོན་ཁོངས་སུ་མེད་སྐོར་བརྗོད་འདུག་ལ། ཡུ་རོབ་སྤྱི་མཐུན་ཚོགས་པའི་སྨན་པའི་ལྷན་ཚོགས་ཀྱི་ཚོགས་གཙོ་ཨི་མར་ཀུག་ (Emer Cooke) ཡིས། ཨེ་སི་ཊ་ཛེ་ནེ་ཁ་ (AstraZeneca) འགོག་ཁབ་ཀྱི་ཏོག་དབྱིབས་གཉན་རིམས་སྔོན་འགོག་གི་དགེ་མཚན་ནི་དེའི་ཟུར་སྐྱོན་དང་ཉེན་ཁ་ཁག་ལས་ཆེ་བ་ཡོད་པ་ཞིག་ཏུ་མཐོང་གི་ཡོད་སྟབས། ཡུ་རོབ་མཐུན་ཚོགས་ཀྱི་རྒྱལ་ཁབ་ཁག་གིས་མུ་མཐུད་འགོག་ཁབ་དེ་རྒྱག་དགོས་པའི་འབོད་སྐུལ་ཞུས་འདུག
ཡང་ཁ་སང་ཕྱི་ཚེས་ ༡༦ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱི་མགྲིན་ཚབ་པ་ཁི་རི་ཤན་ལིན་ཌི་མེར་ (Christian Lindmeier) གྱིས། ད་སྔ་བར་དུ་ཁྲག་རྡོག་པོར་གྱུར་བའི་གནད་དོན་དེ་ནི་འགོག་ཁབ་དེ་ལ་བརྟེན་ནས་བྱུང་བ་ཞིག་ཡིན་པའི་བདེན་དཔང་མེད་པ་དང་། འགོག་ཁབ་རྒྱག་པའི་ལས་གཞི་མུ་མཐུད་འགྲོ་རྒྱུ་ནི་ཚེ་སྲོག་སྐྱོབ་པ་དང་ནད་ཡམས་འགོས་ཁྱབ་སྔོན་འགོག་བྱེད་པར་གལ་ཆེའི་གནད་དོན་ཞིག་ཡིན་སྐོར་དང་། འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཆེད་མཁས་པ་ཁག་ཅིག་གི་ལྷན་ཚོགས་འཚོག་གི་ཡོད་ནའང་། མ་འོངས་པར་མུ་མཐུད་འགོག་ཁབ་དེ་རྒྱག་དགོས་པའི་ལམ་སྟོན་ལ་འགྱུར་བ་མེད་སྐོར་བརྗོད་འདུག
འདི་གའི་གསར་འགོད་པས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་སུ་འགོག་ཁབ་དེ་དང་འབྲེལ་ནས་རྒྱ་གར་གྱི་གནས་སྟངས་སྐོར་ལ་བཀའ་འདྲི་ཞུ་སྐབས་ཁོང་གིས། སྤྱིར་རྒྱ་གར་ནང་ཀོ་ཝི་ཤིལ་ཌི་ (Covidshield) ཞེས་མིང་བཏགས་ཡོད་པ་མ་གཏོགས་རྩ་བའི་ཨེ་སི་ཊ་ཛེ་ནེ་ཁ་(AstraZeneca) འགོག་ཁབ་དེ་ཡིན་པ་དང་། རྒྱ་གར་ནང་འགོག་ཁབ་དེ་དང་འབྲེལ་ནས་དམིགས་བསལ་དཀའ་ངལ་འཕྲད་མེད་སྟབས། སྨན་ཞབས་པ་དང་སྨན་པ། ཉེན་རྟོག་པ་སོགས་མང་ཤོས་ལ་བརྒྱབ་ཟིན་པ་དང་། མུ་མཐུད་རྒྱག་རྒྱུ་ཡིན་ལ། མ་འོངས་པར་ལམ་སྟོན་འཕར་མ་བྱུང་ཚེ་འཕྲལ་དུ་མི་མང་ལ་ཤེས་རྟོགས་ཡོང་གི་ཡོད་སྐོར། དེ་བཞིན་ཀང་རཱ་རྫོང་ཁོངས་སུ་ཉེ་བའི་བདུན་ཕྲག་གཅིག་ཙམ་གྱི་ནང་མི་གྲངས་སྟོང་ཕྲག་དྲུག་ཙམ་ལ་འགོག་ཁབ་དེ་བརྒྱབ་ཡོད་ནའང་སུ་གཅིག་ལ་དེ་འདྲའི་གནད་དོན་བྱུང་བའི་གནས་ཚུལ་མེད་པ་དང་། འགོག་ཁབ་ཀྱི་ལས་རིམ་དེ་སྲིད་གཞུང་གི་འགན་འཁུར་བྱེད་ཀྱི་ཡོད་སྟབས། འདས་གྲོངས་སུ་འགྲོ་བའི་གནས་སྟངས་ལྟ་བུ་བྱུང་ཚེ་རྒྱ་གར་གཞུང་གིས་འཕྲལ་དུ་མཚམས་འཇོག་བྱ་ངེས་ཡིན་སྐོར་འགྲེལ་བརྗོད་གནང་བྱུང་།
ཉེ་ལམ་ཌན་མག་ (Denmark) ནང་ཨེ་སི་ཊ་ཛེ་ནེ་ཁ་ (AstraZeneca) འགོག་ཁབ་བརྒྱབ་པའི་བུད་མེད་གཉིས་ཀྱི་ཁྲག་རྡོག་པོར་གྱུར་ཏེ་ཁྲག་ལམ་འགག་པར་བརྟེན་འདས་གྲོངས་སུ་ཕྱིན་ཡོད་པ་དང་། ནོར་ཝེ་ཡི་མི་གྲངས་ ༤ དང་ནའེ་དྷིར་ལན་ཌིའི་ (Netherlands) ནང་གི་མི་གྲངས་ ༡༠ ལའང་གཅིག་མཚུངས་ཀྱི་གནས་སྟངས་བྱུང་བར་བརྟེན། ཨོ་སི་ཁྲི་རི་ཡ་ (Austria) ཡིས་གནས་སྐབས་རིང་འགོག་ཁབ་དེ་རྒྱག་མཚམས་འཇོག་རྒྱུ་ཡིན་པ་བསྒྲགས་པ་དང་། དེར་མཐུད་ཨར་ལན་ཌི་དང་ནེའུ་ཌིར་ལན་ཌི། ཧྥ་རན་སི་དང་འཇར་མན། སི་པན་དང་ཨེ་ཊ་ལི། ཌན་མག་དང་སའེ་པེ་རས་ (Cyprus)། ལུ་སེམ་བྷག་ (luxembourg) དང་ལ་ཏི་ཝི་ཡ་ (Latvia)། སི་ཝི་ཌན་ (Sweden) སོགས་ཡུ་རོབ་ཀྱི་རྒྱལ་ཁབ་ཁག་ཅིག་གིས་འགོག་ཁབ་དེ་རྒྱག་རྒྱུ་ཕྱིར་འགྱངས་བྱས་ཡོད་པ་རེད། ཐའེ་ལན་ཌི་གཞུང་གིས་ཐོག་མར་ཕྱིར་འགྱངས་བྱ་རྒྱུ་ཡིན་པ་བསྒྲགས་ཡོད་ནའང་། ཁ་སང་ཕྱི་ཚེས་ ༡༦ ཉིན་སྲིད་བློན་ (Prayut Chan-o-cha) དང་ཁོང་གི་བཀའ་ཤག་གིས་འགོག་ཁབ་དེ་བརྒྱབ་ནས་རྒྱལ་ཡོངས་ནང་ཐོག་མ་དེ་ཆགས་ཡོད་འདུག་ལ། ཨོ་གླིང་དང་སྦེལ་ཇམ། པོ་ལན་ཌི་དང་ཧྥི་ལི་ཕིན་སོགས་རྒྱལ་ཁབ་ཁ་ཤས་ཤིག་གིས་འགོག་ཁབ་དེའི་བདེ་འཇགས་བརྟག་དཔྱད་གྲུབ་འབྲས་བྱུང་རིམ་བཞིན་འགོག་ཁབ་སྤྱོད་ཀྱི་ཡིན་སྐོར་བསྒྲགས་འདུག
ཟླ་འདིའི་ཕྱི་ཚེས་ ༡༤ ཉིན་ཨེ་སི་ཊ་ཛེ་ནེ་ཁ་ (AstraZeneca) བཟོ་ལས་ཁང་གིས་གསལ་བསྒྲགས་ཤིག་སྤེལ་བའི་ནང་། ཉེ་ལམ་འགོག་ཁབ་དང་འབྲེལ་ནས་གནད་དོན་ཞིག་བྱུང་ཡོད་པ་དང་འབྲེལ། བཟོ་ལས་ཁང་གིས་ཚན་རིག་གཞིར་བཞག་ཐོག་འགོག་ཁབ་དེ་བཞིན་བདེ་འཇགས་ཡིན་པ་བསྐྱར་དུ་ཁ་གསལ་བཟོ་འདོད་ཡོད་པ་དང་། འགོག་ཁབ་ཚོད་ལྟའི་ནང་ཞུགས་མཁན་མི་གྲངས་ཁྲི་ ༦ ལྷག་བྱུང་ཡོད་པའི་ཁྲོད་དུ་ཁྲག་རྡོག་པོར་གྱུར་བའི་གནད་དོན་ནི་འགོག་ཁབ་བརྒྱབ་པ་དག་ལ་དམིགས་བསལ་ཡོད་པ་ཞིག་མེད་སྐོར། དེ་བཞིན་འགོག་ཁབ་ཀྱི་བདེ་འཇགས་ནི་ཧ་ཅང་གལ་གནད་ཆེ་བ་དང་མུ་མཐུད་འགོག་ཁབ་དེའི་བདེ་འཇགས་ལ་རྟོག་ཞིབ་བྱེད་བཞིན་ཡོད་སྐོར་དང་། ཡུ་རོབ་མཐུན་ཚོགས་དང་དབྱིན་ཡུལ་གྱི་ནང་མི་གྲངས་ས་ཡ་ ༡༧ ལྷག་ལ་འགོག་ཁབ་དེ་བརྒྱབ་པའི་ཁྲོད་ཁྲག་ལམ་འགག་པའི་ཉེན་ཁ་ཡོད་པའི་དཔང་རྟགས་ཤིག་བྱུང་མེད་སྐོར་བཀོད་འདུག
ཨེ་སི་ཊ་ཛེ་ནེ་ཁ་འགོག་ཁབ་ (AstraZeneca vaccine) ནི་འདི་ལོའི་ཕྱི་ཟླ་ ༢ ནང་འཛམ་གླིང་འཕྲོད་བསྟེན་སྒྲིག་འཛུགས་ཀྱི་ཆོག་མཆན་འོག་རྒྱལ་ཁབ་མང་པོས་འགོག་ཁབ་དེ་རྒྱག་མགོ་བཙུགས་ཡོད་པ་དང་། གནད་དོན་དབྱེ་ཞིབ་པས་འགོག་ཁབ་དེའི་རིན་གོང་ཆུང་བ་དང་ཉར་ཚགས་སྟབས་བདེ་ཡིན་པའི་རྒྱུ་མཚན་ལ་བརྟེན། འཛམ་གླིང་གི་འགོག་ཁབ་རྒྱུག་ཆེ་ཤོས་སུ་འགྱུར་བའི་སྲིད་པའི་ཚོད་དཔག་བྱེད་ཀྱི་ཡོད་ནའང་། ཉེ་ལམ་གྱི་ཁྲག་ལམ་འགག་པའི་གནས་ཚུལ་ཁག་ཅིག་བྱུང་བ་ཡིས་འགོག་ཁབ་དེ་རྒྱག་པའི་གདེང་ཚོད་ལ་ཤུགས་རྐྱེན་ཐེབས་ཡོད་པའི་ཚོད་དཔག་བྱེད་ཀྱི་འདུག
གསར་འགོད་པ། པ་སངས་ཚེ་རིང་།
གནས་ཚུལ་བདེན་ལ་མི་བདེན་གང་བྱུང་མ་བཀོད་ན་ཡག་ལེ་རེད་དོ་།