བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དོན་ཚན་ ༨ སྤྱི་མོས་གཏན་འབེབ་གནང་།

ཕྱི་ལོ་ ༢༠༢༢ ལོའི་རྒྱལ་སྤྱིའི་དགུན་ཁའི་ཨོ་རྩལ་འགྲན་ཚོགས་དེ་རྒྱ་ནག་པེ་ཅིན་ཏུ་འཚོག་གཏན་འཁེལ་བ་དང་བོད་ཞི་བའི་བཅིངས་གྲོལ་བཏང་ནས་ལོ་ངོ་བདུན་བཅུ་འཁོར་ཡོད་ཟེར་བའི་དུས་དྲན་འཚོག་འཆར་ཡོད་པས་བོད་མི་རྣམས་ནས་ངོ་རྒོལ་དང་གདོང་ལེན་གྱི་རྣམ་འགྱུར་སྟོན་ཕྱིར་བོད་མིའི་སྒྲིག་འཛུགས་བཀའ་སྤྱི་གཉིས་ཀྱི་གཙོས་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་བཅས་ནས་འཛམ་གླིང་ཡོངས་ཁྱབ་ཏུ་ངོ་རྒོལ་གྱི་ལས་འགུལ་རྒྱ་ཆེ་ཞིག་སྤེལ་གལ་ཆེ་བའི་སྤྱི་མོས་གྲོས་ཆོད་བཞག་སོང་།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ལས་ཉིན་བཞི་པའི་སྔ་དྲོའི་ཚོགས་ཐུན་ནང་། སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་བོད་ནང་གི་ཛ་དྲག་གནས་སྟངས་ཐོག་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དོན་ཚན་༣ པའི་ཐོག་བཟོ་བཅོས་གྲོས་འཆར་ཞིག་ཁྱེར་ཡོང་བའི་ཐོག སྤྱི་འཐུས་ ༡༢ ལྷག་གིས་བགྲོ་གླེང་གནང་བ་བརྒྱུད། མཐར་བཟོ་བཅོས་གྲོས་འཆར་དེར་བཟོ་བཅོས་བྱས་པའི་གྲོས་འཆར་གཞན་དེར་མང་མོས་ཐོབ་རྗེས། སྤྱི་མོས་ཀྱི་ཐོག་ནས་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་ཡོངས་རྫོགས་གཏན་ལ་ཕབ་ཐུབ་པ་བྱུང་སོང་།

དེ་ཡང་ཁ་སང་གྲོས་ཚོགས་ཀྱི་སྔ་དྲོའི་ཚོགས་ཐུན་སྟེང། བོད་མི་མང་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས། བོད་དོན་འཐབ་རྩོད་ཀྱི་ཚད་མཐོ་རུ་གཏོང་ཐབས་དང་། གྲོས་ཚོགས་ངོས་ནས་རྒྱ་ནག་ལ་བརྡ་ལན་སྤྲོད་ཆེད། སྤྱི་འཐུས་རྒྱུན་ལས་ནས་བསྣམས་པའི་གདུང་སེམས་མཉམ་སྐྱེད་ཀྱི་གྲོས་ཆོད་དོན་ཚན་གསུམ་པ། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་དགོངས་དོན་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ལ་འབད་བརྩོན་བར་མ་ཆད་པར་གནང་བཞིན་པ་ལྟར། རྒྱ་གཞུང་གི་འགོ་ཁྲིད་རྣམས་ཀྱིས་གུ་དོག་མཁྲེགས་འཛིན་གྱི་ལྟ་བ་དོར་ནས། གཉིས་ཕན་མཉམ་གནས་གུ་ཡངས་བཅས་ཀྱི་ཐབས་ལམ་ལ་བརྟེན་ནས། བོད་རྒྱའི་འབྲེལ་མོལ་མྱུར་དུ་འགོ་འཛུགས་གནང་ཐབས་དགོས་རྒྱུ། ཅེས་པ་དེར་བཟོ་བཅོས་དགོས་པའི་གྲོས་འཆར་ཞིག་བསྣམས་ཡོད་པ་རེད།

སྤྱི་འཐུས་ཚེ་རིང་གཡུ་སྒྲོན་ལགས་ཀྱི་རྒྱབ་སྐྱོར་འོག་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་བཏོན་པའི་བཟོ་བཅོས་ཁྲིམས་འཆར་དེའི་ནང་། སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་དགོངས་དོན་བོད་ས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ལ་འབད་བརྩོན་བར་མ་ཆད་པར་གནང་ཡོད་ནའང་། རྒྱ་ནག་གཞུང་གིས་༧གོང་ས་མཆོག་ལ་མཚན་སྨད་དང་བོད་ནང་དམ་དྲག་ཆེ་རུ་བཏང་ནས་གྲོས་མོལ་ལམ་ལྷོང་མ་བྱུང་བ་དེའི་འགན་ཡོངས་རྫོགས་རྒྱ་ནག་གཞུང་ལ་ཡོད་པ་མ་ཟད། ངོ་རྒོལ་མཐའ་གཅིག་ཏུ་ཡོད། རྒྱ་ནག་ནང་འགྱུར་བ་ཆེན་པོ་ཞིག་འགྲོ་རྒྱུར་ང་ཚོས་འཐབ་རྩོད་མ་བྱས་ཚེ་ད་ལྟའི་རྒྱ་ནག་གཞུང་གི་མགོ་ཁྲིད་ཚོའི་མཉམ་དུ་གྲོས་མོལ་དོན་ཕན་ལྡན་པའི་གྲུབ་འབྲས་ཡོང་རྒྱུར་ཡིད་ཆེས་རྩ་བ་ཉིད་ནས་མེད། ཅེས་འཁོད་ཡོད་པ་དང་། བཟོ་བཅོས་གྲོས་འཆར་དེར་སྤྱི་འཐུས་ ༡༧ གྱིས་དགག་བྱ་དང་། སྤྱི་འཐུས་ ༡༩ ཡིས་རྒྱབ་སྐྱོར་གནང་འདུག

སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་བཟོ་བཅོས་གྲོས་འཆར་དེས་གཞི་རྩའི་དབུ་མའི་ལམ་གྱི་ལྟ་གྲུབ་ལ་འགྱུར་བ་གཏོང་ཐབས་བྱེད་ཀྱི་ཡོད་སྐོར་གསུངས་ཏེ་དགག་པ་གནང་རྗེས། གྲོས་འཆར་འདོན་མཁན་སྤྱི་འཐུས་རྡོ་རྗེ་ཚེ་བརྟན་ལགས་ཀྱིས། ད་ལན་གྱི་བཟོ་བཅོས་གྲོས་འཆར་འདི་དུས་རྒྱུན་གྱི་རེ་སྐུལ་གྱི་རྣམ་པ་ལས་བརྒལ་ཏེ་དམིགས་བསལ་གྱི་ཚོར་བ་སྟོན་དགོས་པ་དང་། གྲོས་འཆར་འདིས་ཐབས་བྱུས་ཀྱི་ཐོག་ནས་བོད་དོན་འཐབ་རྩོད་ཀྱི་ཚད་མཐོ་རུ་གཏོང་བ་ལས། དབུ་མའི་ལམ་བརྩི་མེད་གཏོང་ཐབས་བྱས་མེད་སྐོར་དང་། རྒྱ་ནག་གཞུང་གི་མགོ་འཁྲིད་ལ་ཡིད་ཆེས་མེད་པ་དེ་ཁ་གཅིག་གྲགས་ཡིན་སྟབས། གྲོས་འཆར་དེས་རྒྱ་ནག་གཞུང་ལ་རྣམ་འགྱུར་ཤུགས་ཆེན་པོ་སྟོན་ཐབས་ཤིག་ཡིན་སྐོར་འགྲེལ་བརྗོད་གནང་སོང་ལ། བཟོ་བཅོས་གྲོས་འཆར་ཡིག་ཆའི་ཚིག་ཕྲེང་མཐའ་མར་འཁོད་པའི་རྒྱ་ནག་གཞུང་ལ་ཡིད་ཆེས་རྩ་བ་ཉིད་ནས་མེད་ཅེས་པའི་ཚིག་བརྗོད་དེར་སྤྱི་འཐུས་ཁག་ཅིག་ནས་དགག་པ་དང་དགོངས་ཚུལ་མི་འདྲ་བ་བསླེབས་སོང་།

སྤྱི་འཐུས་ཙ་ནེ་ཚང་དོན་གྲུབ་བཀྲ་ཤིས་ལགས་ཀྱིས། བཟོ་བཅོས་གྲོས་འཆར་འདོན་མཁན་དང་རྒྱབ་སྐྱོར་བྱེད་མཁན་གྱིས་དོན་དུ་རྒྱ་ནག་གཞུང་ལ་ཡིད་ཆེས་མེད་པ་བཤད་འདོད་ཡོད་ཀྱང་། ཚིག་བརྗོད་ནང་ང་ཚོས་འཐབ་རྩོད་མ་བྱས་ཚེ་རྒྱ་ནག་གཞུང་ལ་ཡིད་ཆེས་མེད་ཅེས་འཁོད་ཡོད་པ་དེ་འགྲིག་གི་མེད་པ་མ་ཟད། དེས་རྒྱ་ནག་ལ་བཤད་ཀྱི་མེད་སྐོར་གྱི་དགག་བྱ་བཏོན་ཡོད་པ་མ་ཟད། དེའི་ཐད་འཛིན་སྐྱོང་བཀའ་ཤག་ངོས་ནས་འགྲེལ་བརྗོད་གསལ་པོ་ཞིག་དགོས་ངེས་ཡིན་སྐོར་གསུངས་པ་ལྟར། སྲིད་སྐྱོང་བློ་བཟང་སེང་གེ་མཆོག་གིས། གྲོས་ཆོད་ཀྱི་ཚིག་མཐའ་མ་ཡིད་ཆེས་རྩ་བ་ཉིད་ནས་མེད་ཅེས་པ་དེས་ཕྱིའི་ལྟ་ཚུལ་ལ་ང་ཚོར་གྲོལ་མོལ་བྱ་རྒྱུའི་འདོད་པ་མེད་པའི་གོ་བ་ནོར་འཁྲུལ་ཅན་ཞིག་འགྲོ་རྒྱུའི་ཉེན་ཁ་ཡོད་པས། ཚིག་དེ་ཕྱིར་འཐེན་དགོས་པའི་དགོངས་ཚུལ་གསུངས་སོང་།

བཟོ་བཅོས་གྲོས་འཆར་དེར་རྒྱབ་སྐྱོར་གནང་མཁན་སྤྱི་འཐུས་གསེར་རྟ་ཚུལ་ཁྲིམས་ལགས་ཀྱིས། གྲོས་འཆར་ནང་གསལ་རྒྱ་ནག་གཞུང་གིས་༧གོང་ས་མཆོག་ལ་མཚན་སྨད་ཚད་ལས་བརྒལ་བྱེད་ཀྱི་ཡོད་པ་དང་། བོད་ནང་དམ་དྲག་བྱེད་ཀྱི་ཡོད་པ་ཚང་མས་ངོས་འཛིན་བྱེད་ཀྱི་ཡོད་ལ། དེ་བཞིན་བོད་རྒྱ་གྲོས་མོལ་ལམ་ལྷོངས་མ་བྱུང་བའི་འགན་དེ་རྒྱ་ནག་ལ་ཡོད་པ་ལས་ང་ཚོར་མེད་སྟབས། གྲོས་འཆར་ནང་འཁོད་པའི་གནད་དོན་རྣམས་དངོས་བདེན་ཡིན་པ་ལས། གྲོས་འཆར་འདིས་ང་ཚོ་རང་བཙན་གཙང་མ་ཡི་ལམ་ལ་འགྲོ་དགོས་པ་བཤད་ཀྱི་མེད་སྐོར་འགྲེལ་བརྗོད་གནང་ཡོད་པ་དང་། དེ་བཞིན་གྲོས་འཆར་དེར་རྒྱབ་སྐྱོར་གནང་མཁན་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ཀྱིས། གྲོས་འཆར་ནང་འཁོད་པའི་གནད་དོན་རྣམས་གལ་ཆེ་པོ་ཤ་སྟག་ཡིན་པ་མ་ཟད། ད་ལྟའི་རྒྱལ་སྤྱིའི་ཆབ་སྲིད་ཀྱི་ཁོར་ཡུག་ལ་གཞིགས་ཏེ་གྲོས་ཚོགས་ངོས་ནས་རྣམ་འགྱུར་ཞིག་བསྟན་རྒྱུ་གལ་ཆེན་པོ་ཡིན་སྐོར་གསུངས་སོང་།

བཟོ་བཅོས་གྲོས་འཆར་གྱི་ཚིག་བརྗོད་ཀྱི་ཐད་སྤྱི་འཐུས་བསྟན་པ་ཡར་འཕེལ་ལགས་དང་། སྤྱི་འཐུས་སྨོན་ལམ་མཐར་ཕྱིན་ལགས། སྤྱི་འཐུས་བསོད་ནམས་བསྟན་འཕེལ་བཅས་ཀྱིས་གཙོས་སྤྱི་འཐུས་མི་ཉུང་བས་བཟོ་བཅོས་གྲོས་འཆར་ཨང་ ༢༥ དེར་བསྐྱར་དུ་བཟོ་བཅོས་དགོས་པའི་དགོངས་ཚུལ་བཏོན་སོང་། མཐར་སྤྱི་འཐུས་བསྟན་པ་ཡར་འཕེལ་ལགས་ཀྱིས་བཏོན་པའི་བཟོ་བཅོས་གྲོས་འཆར་ཏེ། སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱ་གཉིས་སྨན་དབུ་མའི་ལམ་གྱི་སྲིད་བྱུས་དགོངས་དོན་བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ལ་འབད་བརྩོན་བར་མ་ཆད་པར་གནང་ཡོད་ནའང་། རྒྱ་ནག་གཞུང་གིས་༧གོང་ས་མཆོག་ལ་མཚན་སྨད་དང་བོད་ནང་དམ་དྲག་ཆེ་རུ་བཏང་བ་དང་། བོད་རྒྱ་འབྲེལ་མོལ་ལམ་ལྷོངས་མ་བྱུང་བ་དེའི་འགན་ཡོངས་རྫོགས་རྒྱ་ནག་གཞུང་ལ་ཡོད་པ་མ་ཟད། བྱ་སྤྱོད་དེར་ངོ་རྒོལ་མཐའ་གཅིག་ཏུ་ཡོད། རྒྱ་ནག་ནང་འགྱུར་བ་ཆེན་པོ་ཞིག་འགྲོ་རྒྱུར་ང་ཚོའི་འཐབ་རྩོད་ཀྱི་སྟོབས་ཤུགས་སྔར་ལས་ཆེ་བ་ཡོང་ཐབས་སུ་གཞུང་མང་གཉིས་ནས་ནུས་པ་མཉམ་སྤུངས་བྱ་རྒྱུ། ཞེས་པ་དེར་སྤྱི་འཐུས་ ༣༡ གིས་རྒྱབ་སྐྱོར་ཐོག་མང་མོས་གཏན་འབེབ་གནང་ཐུབ་སོང་།

ད་ཐེངས་ཀྱི་གྲོས་ཚོགས་ཚོགས་དུས་འདིར་བོད་མི་མང་སྤྱི་འཐུས་རྒྱུན་ལས་ནས་བོད་ནང་གི་ཛ་དྲག་གནས་སྟངས་དང་འབྲེལ་བའི་ཐོག་ལ་གདུང་སེམས་མཉམ་སྐྱེད་ཀྱི་གྲོས་ཆོད་དོན་ཚན་ ༦ བཏོན་ཡོད་པའི་ནང་ནས། དོན་ཚན་ ༡ དང་། ༤། ༥། ༦ པ་བཅས་ལ་འགྱུར་བཅོས་མེད་པར་སྤྱི་མོས་ཀྱིས་གཏན་འབེབ་གནང་ཡོད་ཅིང་། གྲོས་ཆོད་ཀྱི་སྔོན་གླེང་དང་། གྲོས་ཆོད་དོན་ཚན་ ༢ པའི་ནང་འཁོད་པའི་ཚིག་བརྗོད་རེ་ཟུང་དང་། དོན་ཚན་ ༣ པར་བཟོ་བཅོས་བྱས་ཡོད་པ་མ་ཟད། སྔར་ཡོད་དོན་ཚན་ ༦ གི་སྟེང་དོན་ཚན་གསར་པ་གཉིས་ཁ་སྣོན་བྱས་ཏེ་སྤྱི་མོས་ཀྱི་ཐོག་ནས་དོན་ཚན་ ༨ གཏན་འབེབ་བྱུང་སོང་།

ཁ་སྣོན་བྱས་པའི་གྲོས་ཆོད་གཉིས་ནི། དོན་ཚན་ ༧ པ། ཕྱི་ལོ་ ༢༠༢༢ ལོའི་རྒྱལ་སྤྱིའི་དགུན་ཁའི་ཨོ་ལུམ་ཕིག་རྩེད་འགྲན་གྱི་རྒྱས་འཛོམས་དེ་བཞིན་ཕྱི་ལོ་ ༢༠༢༢ ལོའི་ཟླ་ ༢ ཚེས་ ༤ ནས་ ༢༠ བར་རྒྱ་ནག་པེ་ཅིན་ཏུ་བྱ་གཏན་འཁེལ་བ་དེ་དང་། ཡང་རྒྱ་ནག་དམར་གཞུང་གིས་བོད་ཞི་བའི་བཅིངས་གྲོལ་བཏང་ནས་ལོ་ངོ་བདུན་བཅུ་འཁོར་ཡོད་ཟེར་བའི་དུས་དྲན་ཞིག་ཕྱི་ལོ་ ༢༠༢༡ ཟླ་ ༥ ཚེས་ ༢༡ ཉིན་འཚོག་འཆར་ཡོད་པ་བཅས་ལ་བོད་མི་རྣམས་ནས་ངོ་རྒོལ་དང་གདོང་ལེན་གྱི་རྣམ་འགྱུར་སྟོན་ཕྱིར་བོད་མིའི་སྒྲིག་འཛུགས་བཀའ་སྤྱི་གཉིས་ཀྱི་གཙོས་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་བཅས་ནས་འཛམ་གླིང་ཡོངས་ཁྱབ་ཏུ་ངོ་རྒོལ་གྱི་ལས་འགུལ་རྒྱ་ཆེ་ཞིག་སྤེལ་གལ། ཞེས་པ་དང་། དོན་ཚན་ ༨། ཕྱི་ལོ་ ༢༠༡༩ ཟླ་ ༡༢ ཙམ་ནས་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ ༡༩ འཛམ་གླིང་ནང་ཁྱབ་གདལ་དུ་སོང་སྟེ། འཛམ་གླིང་རྒྱལ་ཁབ་མང་པོའི་མི་རྒྱུ་གཉིས་ལ་ཚད་ལས་འདས་པའི་དཀའ་ངལ་བཟོས་པ་མ་ཟད། མང་པོ་ཞིག་དུས་ད་ལྟའང་དཀའ་ངལ་མྱོང་བཞིན་ཡོད། ཏོག་དབྱིབས་གཉན་རིམས་དེ་ཉིད་རྒྱ་ནག་གཞུང་གིས་འཛམ་གླིང་རྒྱལ་ཁབ་གཞན་རྣམས་རང་གི་དབང་འོག་ཏུ་བསྡུ་ཐབས་སླད་ཆེད་མངགས་བཟོས་པ་ཞིག་ཡིན་པར་འཛམ་གླིང་རྒྱལ་ཁབ་མང་པོས་ངོས་འཛིན་བྱེད་བཞིན་པ་ལྟར། རྒྱ་ནག་གཞུང་གིས་དེར་ངོས་ལེན་ཞུ་དགོས་པ་མ་ཟད། རྒྱལ་སྤྱིའི་འཕྲོད་བསྟེན་ལྷན་ཁང་གི་ཆེད་འཛུགས་ཚོགས་ཆུང་ནས་ནད་ཡམས་དང་འབྲེལ་བའི་ཞིབ་འཇུག་ཚད་ལྡན་དང་མཐིལ་ཕྱིན་ཡོང་བར་རྒྱ་ནག་གཞུང་ནས་མཐུན་འགྱུར་ངོས་ཞུ་དགོས་པའི་འཛམ་གླིང་མཉམ་འབྲེལ་རྒྱལ་ཚོགས་ནས་གནོན་ཤུགས་སྤྲད་དགོས་པའི་འབོད་སྐུལ་ཞུ་རྒྱུ། བཅས་བཀོད་འདུག

གསར་འགོད་པ། པ་སངས་ཚེ་རིང་། ཀླུ་མགོན་ཐར།