དབུས་སའི་ལས་ཁུངས་ནང་བཅར་མཁན་ཚོས་ཀྱང་བོད་ཆས་གྱོན་ཞིང་བོད་སྐད་གཙང་མ་བཤད་པར་ཞེན་སྐུལ་དགོས་པའི་གྲོས་ཆོད་བཞག

བོད་མིའི་སྒྲིག་འཛུགས་ཀྱི་དབུས་སའི་ལས་བྱེད་ཕོ་མོ་ཁྱད་མེད་ཀྱིས་ཉིན་ལྟར་ལས་ཁུངས་ནང་དུ་བོད་ཆས་གྱོན་ཞིང་བོད་སྐད་གཙང་མ་བཤད་དགོས་པ་མ་ཟད་ལས་ཁུངས་ཁག་ནང་བཅར་མཁན་བོད་མི་སྐྱ་སེར་སུ་ཡིན་ལའང་དེ་བཞིན་ཞེན་སྐུལ་གནང་དགོས་པའི་གྲོས་ཆོད་གྲོས་འཆར་མང་མོས་གཏན་འབེབ་གནང་།

དེ་རིང་བོད་མི་མང་སྤྱི་འཐུས་ཀྱི་གྲོས་ཚོགས་ལས་ཉིན་ ༥ པའི་ཐོག་སྤྱི་འཐུས་མཁན་པོ་འཇམ་དཔལ་བསྟན་འཛིན་ལགས་ཀྱིས། ད་ཕན་རང་རེའི་བོད་མིའི་སྒྲིག་འཛུགས་ཀྱི་དབུས་ས་ཡན་ལག་དང་བཅས་པའི་ལས་བྱེད་བྱེ་བྲག་སུ་ཡིན་དང་། ཕོ་མོ་ཁྱད་མེད་ཀྱིས་ལས་ཁུངས་ནང་དུ་བོད་ཆས་ཁམས་གཙང་རེ་བསྐྱོན་དགོས་རྒྱུ། མ་ཟད་ལས་ཁུངས་ཁག་ལ་བཅར་མཁན་བོད་མི་སེར་སྐྱ་སུ་རུང་ལའང་དེ་བཞིན་ཞེན་སྐུལ་གནང་དགོས་པའི་སྤྱི་འཐུས་སྒེར་གྱི་གྲོས་ཆོད་གྲོས་འཆར་ཞིག་བཏོན་ཡོད་པ་དང། སྤྱི་འཐུས་ཁག་ཅིག་ནས་བོད་ཆས་ཁམས་གཙང་ཞེས་པར་དོགས་སློང་དང་། མཛད་གཙོ་རྣམ་པ་ཚུད་པའི་དབུས་སའི་ལས་བྱེད་ཚང་མས་བོད་ཆས་གྱོན་གལ་ཆེ་བ་དང་། བོད་སྐད་གཙང་མ་ཤོད་རྒྱུ་དེ་ཧ་ཅང་གལ་ཆེ་བ་སོགས་ཀྱི་དགོངས་ཚུལ་བྱུང་རྗེས་བསྐྱར་བཅོས་གནང་སྟེ་མང་མོས་གཏན་འབེབ་གནང་སོང་།

གྲོས་འཆར་དེར་སྤྱི་འཐུས་ཁག་ཅིག་གིས་དགོངས་ཚུལ་གསུང་སྐབས། སྤྱི་འཐུས་ཚེ་རིང་གཡུ་སྒྲོན་ལགས་ཀྱིས་གྲོས་ཆོད་ལ་རྒྱབ་སྐྱོར་དང་སྦྲགས། འབྲུག་སོགས་ཀྱི་དགོན་པ་ཁག་ནང་མཆོད་མཇལ་བ་ཚོར་ཆས་གོས་ཐད་སྒྲིག་ཁྲིམས་ཡོད་ཀྱང་། ང་ཚོ་བོད་པའི་དགོན་པ་ཁག་གི་ནང་གྱོན་གོས་འདྲ་མིན་སྣ་ཚོགས་གྱོན་ཏེ་མཐོང་བདེ་བོ་མེད་པ་མང་པོ་ཡོང་གི་ཡོད་སྟབས། མ་འོངས་པར་བོད་པའི་དགོན་པ་ཁག་ནང་བོད་ཆས་གྱོན་མེད་ན་ནང་དུ་འཛུལ་མི་ཆོག་པའི་སྦྱར་ཡིག་འཇོག་པ་སོགས་བྱས་ཏེ་སྒྲིག་ཁྲིམས་བཟོ་ཐུབ་ན་ཡག་པོ་ཡོད་སྐོར་གསུངས་བ་དང་། དེ་བཞིན་བོད་ཆས་ཁམས་གཙང་གསུང་དུས། བོད་ཀྱི་སྲོལ་རྒྱུན་རིང་བཞིན་ལྡན་པའི་བོད་ཆས་ཚད་ལྡན་ཞིག་ལ་གོ་ན་འགྲིག་གི་ཡོད་མེད་དང་། བོད་ཀྱི་ཆོས་བརྒྱུད་ཁག་དང་ཡུལ་ལུང་ས་ཁུལ་འདྲ་མིན་ལ་སོ་སོའི་སྲོལ་རྒྱུན་གཞིར་བཞག་གི་བོད་ཆས་རེ་ཡོད་ལ། ཡུལ་དུས་དང་བསྟུན་པའི་བོད་ཆས་གྱོན་རྒྱུ་གལ་ཆེན་ཡིན་སྐོར་སོགས་གསུངས་སོང་།

དེ་བཞིན། སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་བོད་མིའི་སྒྲིག་འཛུགས་ཀྱི་དབུས་ས་ཡན་ལག་དང་བཅས་པའི་ལས་བྱེད་བྱེ་བྲག་སུ་ཡིན་ཞེས་པའི་ནང་། དབུས་ས་ཡན་ལག་དང་བཅས་པའི་མཛད་གཙོ་རྣམ་པ་དང་ལས་བྱེད་བྱེ་བྲག་པ་སུ་ཡིན་ཚང་མས་བོད་ཆས་གྱོན་དགོས་ཞེས། མཛད་གཙོ་རྣམ་པས་བོད་ཆས་གྱོན་རྒྱུ་གལ་ཆེན་ཡིན་སྐོར་གསུངས་པ་དང་། དེ་བཞིན་སྤྱི་འཐུས་ཀ་བྲག་བསོད་ནམས་ལགས་ནས་བོད་སྐད་གཙང་མ་ཤོད་རྒྱུ་དེ་བོད་ཆས་ལས་ཀྱང་གལ་ཆེ་སྐོར་སོགས་ཀྱི་དགོངས་ཚུལ་གསུངས་མཐར།  ད་ཕན་རང་རེའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་ཚོ་གཙོས་དབུས་དང་ས་གནས་ཡན་ལག་དང་བཅས་པའི་ལས་བྱེད་བྱེ་བྲག་སུ་ཡིན་དང་། ཕོ་མོ་ཁྱད་མེད་ཀྱིས་ཉིན་ལྟར་ལས་ཁུངས་ནང་དུ་བོད་ཆས་གྱོན་དགོས་རྒྱུ། དེ་བཞིན་བོད་སྐད་གཙང་མ་བརྒྱབ་དགོས་རྒྱུ། ལས་ཁུངས་ཁག་ལ་བཅར་མཁན་བོད་མི་སྐྱ་སེར་སུ་རུང་ལའང་དེ་བཞིན་ཞེན་སྐུལ་གནང་དགོས་པའི་བསྐྱར་བཅོས་དེར་སྤྱི་འཐུས་ ༢༡ གིས་རྒྱབ་སྐྱོར་གནང་སྟེ་མང་མོས་ཐོག་གཏན་འབེབ་གནང་སོང་།

སྲིད་སྐྱོང་བློ་བཟང་སེང་གེ་མཆོག་ནས་སྤྱི་འཐུས་སྒེར་གྱི་གྲོས་ཆོད་གྲོས་འཆར་དེར་རྒྱབ་སྐྱོར་གནང་བ་དང་སྦྲགས། བཀའ་ཤག་ངོས་ནས་ཕྱི་ལོ་ ༢༠༡༣ ནས་འབད་བརྩོན་ཞུས་ཏེ། གངས་སྐྱིད་ཡོངས་རྫོགས་ནང་སྲོལ་རྒྱུན་གྱི་འཛུགས་སྐྲུན་ཕྲན་བུ་གནང་ཐུབ་ཡོད་སྐོར་དང་། སྲིད་སྐྱོང་སྒེར་ལྟ་བུ་ཡིན་ནའང་རེས་གཟའ་ལྷག་པ་ནམ་ཡིན་ལ་དབྱར་དུས་སུའང་བོད་བཟོས་སྟོད་ཐུང་གྱོན་གྱི་ཡོད་པ་དང་། ལས་བྱེད་ནང་བུད་མེད་ཚོས་བོད་ཆས་ཆ་ཚང་ཞིག་གྱོན་གྱི་ཡོད་པར་བསྔགས་བརྗོད་དང་། བུའི་ནང་ལའང་བོད་ཆས་གྱོན་མཁན་ཇེ་མང་དུ་འགྲོ་ཡི་ཡོད་ལ། དེ་བཞིན་ཉེ་སྔོན་གཞིས་ཆགས་ཁག་ཏུ་བསྐྱོད་སྐབས་བོད་ཆས་གྱོན་མཁན་མང་པོ་ཡོང་གི་ཡོད་སྟབས། གྲོས་ཆོད་དེ་ནི་དུས་དང་རན་པའི་གྲོས་ཆོད་ཅིག་ཡིན་པ་དང་། བོད་མི་སྤྱི་ཡོངས་ལ་བརྡ་ལན་ཡག་པོ་ཞིག་སྤྲོད་ཀྱི་ཡོད་སྐོར་སོགས་གསུངས་སོང་།

གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།