ཀླུ་སྨྱོན་ཧེ་རུ་ཀ
དེ་དུས་ནི་སྤྱི་ལོ་༡༩༩༥ ལོའི་སྤྱི་ཟླ་དང་པོའི་ནང་ཙམ་ཞིག་ཡིན་ལ། ང་རང་རྒྱ་གར་ལྷོ་ཕྱོགས་མོན་གྷོ་ཊི་ས་གནས་ཀྱི་འབྲས་སྤུངས་དགོན་པར་བསྡད་ཡོད། ས་གནས་དེར་དགུན་དུས་སུ་ཟླ་བ་མང་པོའི་རིང་ལ་ཚ་བ་མེ་ལྟར་འབར་བཞིན་འདུག་ལ། དཔྱིད་ཀ་ཆར་དུས་མགོ་བཙུགས་པ་ནས་བཟུང་སྟེ་གནམ་གཤིས་ཇེ་སྐྱིད་དུ་འགྲོ་བ་ཡིན། སྟོན་དུས་སུ་ས་ཕྱོགས་གང་ནས་ཡོང་བ་མི་ཤེས་པའི་ར་ལུག་བརྒྱ་ཕྲག་འཚོ་མཁན་རེ་ཟུང་ཡང་གནས་འདིར་འབྱོར་ཏེ་ཞིང་བྲེགས་ཤུལ་དུ་ཟླ་ཤས་རིང་སྡོད་ཀྱིན་འདུག ཞིང་ཚིགས་དག་གི་བར་མཚམས་སུ་ཨ་མྲའི་ལྗོན་པ་ཆེན་པོ་རེ་སྐྱེས་ཡོད་པའི་ཡལ་ཀའི་སྟེང་གི་སྨིན་ཟིན་པའི་ཨ་མྲ་དག་ལ་རྡོ་ཡིས་གཞུས་ན་གང་ལ་གང་འདོད་ཅིག་ས་རུ་ཟགས་ཡོང་། མོན་གྷོ་ཊི་ས་གནས་སུ་བོད་པ་སྐྱབས་བཅོལ་བའི་གཞིས་ཆགས་བཅུ་གྲངས་ཤིག་ཡོད་པ་དང་། དགེ་ལུགས་པའི་གདན་ས་ཆེན་པོ་དགའ་ལྡན་དང་འབྲས་སྤུངས་གཉིས། ས་སྐྱའི་དགོན་པ་ཞིག་དང་རྙིང་མའི་དགོན་ཆུང་ཞིག་ཀྱང་ཡོད་པ་འདྲ་ཡང་དེ་ཙམ་གསལ་བོ་ཞིག་མི་དྲན། གང་ལྟར་གཞིས་གྲོང་དེ་ཚོས་དགོན་པ་དེ་དག་གི་མཐའ་བསྐོར་བའི་ཚུལ་ལམ་དགོན་པའི་ཐག་ཉེ་ཙམ་གྱི་ས་རུ་འདུག
དགའ་ལྡན་དང་འབྲས་སྤུངས་གཉིས་ལ་འདུ་ཁང་དང་ཆོས་ར་ཆེན་པོ་དེ་འདྲ་ཡོད་པ་མ་གཏོགས། མ་ཎི་འཁོར་ལོ་དང་དང་མཆོད་རྟེན་ཆེན་པོ་དེ་འདྲ་ལ་སྐོར་བ་བྱེད་ས་མེད་པས་ཡིན་ནམ། ཡང་ན་དགོན་པ་ཆེན་པོ་འདི་དག་གི་ནང་དུ་གཞིས་ཆགས་མི་སྐྱ་ཚོ་དང་ཁྱད་པར་དུ་རྒན་རྒོན་ཚོར་དམིགས་པའི་ཆོས་ཀྱི་ཉམས་ལེན་བཀོད་སྒྲིག་དེ་འདྲ་མེད་པས་ཡིན་ནམ། སྤྱིར་བཏང་གཞིས་ཆགས་ཀྱི་མི་དེ་ཚོ་སྤྱི་དང་ཁྱད་པར་དུ་རྒན་རྒོན་བགྲེས་སོང་རྣམ་པ་དགོན་པར་ཡོང་བ་ཧ་ཅང་ཉུང་བས། ང་ལ་དེ་ཚོའི་འཚོ་བར་རྒྱུས་ལོན་བྱེད་པའི་གོ་སྐབས་ཧ་ཅང་ཕྲ་བ་དང་། ལན་རེར་གཞིས་གྲོང་གསུམ་པར་འཆམ་འཆམ་ལ་བསྐྱོད་དུས་དེ་གར་རྒན་གསོ་ཁང་ཞིག་ཏུ་རྒན་རྒོན་ཁག་ཅིག་ཡོད་པར་རྒྱང་ལྟ་རེ་བྱེད་པ་ཡིན།
སྐབས་དེའི་ཚ་གདུག་མེ་ལྟར་འབར་བའི་ཉིན་ཞིག ཁོ་བོ་མཚོ་ཆུང་ནོར་བུར་འབོད་པའི་མཚེའུ་ཞིག་དང་རྡོ་བརྐོས་མ་ཎི་ཡོད་སའི་རི་ཆུང་དེའི་ཕྱོགས་སུ་འཆམ་འཆམ་ལ་འགྲོ་བཞིན་པའི་ལམ་བར་དུ། རྒྱང་ཐག་རིང་པོར་བསྲིངས་པའི་ལམ་སྟེང་ནས་ནག་ཡོར་ཡོར་ཞིག་འགུལ་བཞིན་འདུག་པ་མཐོང་། ཚ་གདུག་ཆེ་བའི་ཉིན་གུང་འདིར་སྨིག་རྒྱུ་རབ་རིབ་ཅིག་གིས་ཕྱོགས་བཞི་མཚམས་བརྒྱད་ཡོངས་སུ་བཏུམས་འདུག་པས། ནག་ཡོར་དེ་མི་ཞིག་གམ་བ་གླང་ཞིག ཡང་ན་གླང་ཆེན་ཞིག་གང་ཡིན་ཡང་བདག་གིས་རེ་ཞིག་རྟོགས་ཐབས་བྲལ། ང་རང་མུ་མཐུད་དུ་མདུན་ཕྱོགས་སུ་བསྐྱོད་པ་དང་། ད་གིན་མཐོང་བའི་སྨིག་རྒྱུའི་ཁྲོད་ཀྱི་ནག་ལིང་ལིང་བ་དེ་ཡང་ཚུར་ཡོང་བཞིན་འདུག་པས། མཐའ་མཇུག་ཏུ། ང་རང་བོད་རིགས་ཨ་མ་ལགས་བགྲེས་སོང་ཕར་བལྟས་ཚོད་ཀྱིས་དགུང་ལོ་བདུན་ཅུར་སོན་ཡོད་འདུག་བསམ་པ་ཞིག་དང་འཕྲད་བྱུང་། ཉིན་གུང་འདིར་ཚ་གདུག་ཧ་ཅང་ཆེ་བས། ཁོ་བོས་ལག་ཏུ་ཉི་གདུགས་ནག་པོ་ཞིག་ཐོགས་ཤིང་ཕལ་ཆེར་མིག་ཤེལ་ཡང་ཇ་མདོག་ཅིག་གྱོན་ཡོད་བསམས། ཡིན་ན་ཡང་། ཨ་མ་ལགས་བགྲེས་སོང་འདིས་མོས་ཕར་ཕྱོགས་ཀྱི་ནགས་ཁྲོད་ནས་བཏུས་པའི་ཤིང་སྡོང་གི་ཡལ་ག་ཕོན་ཆེན་པོ་སྟེ་འབུད་ཤིང་ཆེ་ཐག་ཆོད་ཅིག་ཁུར་ནས་དབུགས་ཧལ་ཞོར་གདོང་ཡོངས་རྔུལ་ནག་གིས་འཚོས་ཏེ་ཚུར་ཡོང་བཞིན་འདུག ཁོང་མོའི་གདོང་གི་དཀའ་སྡུག་གི་མི་ཚེ་རིང་མོས་བྲིས་པའི་གཉེར་རིས་ཟབ་མོ་དེ་དག་ལས། ངའི་སེམས་སུ་ཧྥ་རན་རིའི་རྩོམ་པ་པོ་གྲགས་ཅན་མོ་པ་སན་ཊིའི་Maupassant གི་སྒྲུང་ཐུང་གྲགས་ཅན་བདག་གི་ཁུ་བོ་ཡུ་ལི་<< My Uncle Jules>>ཞེས་པ་དེ་དྲན་ཡོང་།
དམ་པའི་ལྷ་ཆོས་ཀྱི་འགྲོ་ལུགས་ལོས་ཡིན་ཏེ་འཇིག་རྟེན་མི་ཆོས་ཀྱི་བཀོད་སྒྲིག་ལ་བསམས་ན་ཡང་། བདག་གིས་ལམ་སེང་ཕར་བརྒྱུགས་ནས་ཨ་མ་བགྲེས་པོ་དེའི་རྒྱབ་ཀྱི་ཁུར་ཙ་ལྗིད་ཁོག་ཆེན་པོ་ཅན་དེ་རང་གི་རྒྱབ་ཏུ་འཁུར་དགོས་པ་ཞིག་ཡིན་མོད། སྐབས་དེའི་ཁོ་བོ་ནི་དཔེ་ཆར་བལྟས་ཏེ་གཞུང་ལུགས་རབ་འབྱམས་ལ་སྦྱོང་དགོས་པ་མ་གཏོགས་གཞན་གྱི་ཚེ་སྲོག་ལ་སྙིང་རྗེ་དང་བརྩི་བཀུར་བྱེད་དགོས་པའི་འདུ་ཤེས་དེ་དག་ལས་རྦད་དེ་རྒྱང་རིང་དུ་གྱུར་ཡོད་པས། ཨ་མ་རྒན་མོ་དེར་གཅིག་བྱས་ན་མཐོང་ཆུང་གི་རྣམ་པས་ཁྱད་གསོད་ཀྱང་བྱས་ཡོད་སྲིད། གང་ལྟར་ཡང་ངས་ཕོ་ལོ་ཉི་ཤུའི་ནང་གི་གསར་བུ་ཞིག་ལ་ཡོད་པའི་ཁེངས་དྲེགས་ཀྱི་ཉམས་འགྱུར་ཞིག་བསྟན་ནས། ཨ་མ་རྒན་མོ་དེར་བཀྲ་ཤིས་བདེ་ལེགས་ཙམ་ཞིག་ཞུས་རྗེས་ཤར་རེར་རང་གི་མདུན་ཕྱོགས་སུ་ཡོད་པའི་ཡུལ་ལྗོངས་དེའི་ཀློང་དུ་བསྐྱོད། ངས་ད་དུང་ཡང་དྲན་པ་ཞིག་སྟེ། དགོང་མོ་དེར་ངས་ཉལ་སའི་ནང་ནས་དེ་རིང་མཇལ་བའི་ཨ་མ་རྒན་མོ་དེའི་ལུས་ཀྱི་ལྭ་བ་དང་གདོང་གི་ཉམས་འགྱུར། རྒྱབ་ཀྱི་ཁུར་བོ་དང་འཁྱར་འཁྱོར་གྱི་གོམ་འགྲོས་སོགས་ལ་བསམ་བློ་ཡང་ཡང་བཏང་ནས་ནམ་སྨད་ཅིག་ལ་མ་གཏོགས་གཉིད་མ་ཁུག དེ་ནི་རྟོག་གེའི་གཞུང་ལུགས་ལ་སྦྱངས་ཁུལ་བྱས་ནས་དད་པ་དང་སྙིང་རྗེ། དག་སྣང་དང་གཞན་ཕན་སོགས་ཀྱི་རྩ་དེ་དག་ཡོངས་སུ་བསྐམས་ཟིན་པས། སངས་རྒྱས་ནམ་མཁར་འཕུར་ཡང་དད་པ་མེད་པ་དང་། སེམས་ཅན་རྒྱུ་མ་ལུག་ཀྱང་སྙིང་རྗེ་བོར་བའི་རང་ཉིད་ལ་མཚོན་ན། རྣག་ཐོག་ལ་ཁབ་གཙག་དང་མཚང་ཐོག་ལ་གདམས་ངག་ཐེངས་ཤིག་ཐོབ་པ་འདྲ་བོ་ཞིག་བྱུང་།
ད་ནི་བརྗོད་བྱ་དངོས་ལ་དབབ་པར་བྱ་སྟེ། བོད་ཀྱི་དུས་བབ་གསར་ཁང་གི་གསར་འགོད་པ་པ་སངས་ཚེ་རིང་གིས་ལོ་གསར་ཚེས་གཅིག་ཉིན་ཡུལ་དངོས་སུ་བསྐྱོད་དེ་བགྲེས་སོང་ཁེར་འདུག་ཨ་མ་སྒྲོལ་མ་ལྷ་མོ་ལགས་སུ་བཅར་འདྲི་བྱས་པའི་བརྙན་ཐུང་དེ་ལ་བལྟས་པའི་མྱོང་ཚོར་ཕྲན་བུ་ཞིག་ཞུས་ན།
སྤྱི་ལོ་ ༡༩༥༩ ལོ་ནས་བཟུང་སྟེ་བོད་པ་སྐྱབས་བཅོལ་བ་རྒྱ་བོད་འབྲུག་གསུམ་དང་ནུབ་ཕྱོགས་སུ་ཡོང་མཁན་ཚོའི་ཁྲོད་དུ་རང་རང་གི་ནང་མི་དང་མཉམ་དུ་ཡོང་མཁན་རིགས་གཅིག་དང་། སྤུན་མཆེད་དང་མཉམ་དུ་ཡོང་མཁན་རིགས་གཅིག ཡང་སོ་སོ་ཁེར་རྐྱང་དུ་ཡོང་མཁན་རིགས་གཅིག་བཅས་ཡོད་པ་དང་། གོང་གསལ་རིགས་འདི་གསུམ་པོའི་གང་གི་ཁོངས་སུ་གཏོགས་མིན་ལ་མ་ལྟོས་པར། འདས་པའི་ལོ་རྒན་དྲུག་ཅུའི་རིང་ལ་དེ་དག་ཚང་མ་སྐྱེ་རྒ་ན་འཆིའི་ཆུ་བོ་ཆེན་པོ་འདི་བཞིའི་ཀློང་དུ་འཁོར་རྒྱུགས་དྲག་པོ་ཞིག་བྱེད་དགོས་པ་དང་། ནམ་ཡང་འཁོར་མཚམས་མི་འཇོག་པའི་སྤྱི་འགྲོའི་འདིའི་ཀློང་དུ། གཉེན་ཉེ་གྲོགས་པོ་ལ་ལ་ཞིག་འཇིག་རྟེན་ཕྱི་མར་བཞུད། ལ་ལ་ཞིག་རྒྱལ་ཁབ་གཞན་དུ་སྤོས། ལ་ལ་ཞིག་ཁེར་རྐྱང་དུ་ལུས། ལ་ལ་ཞིག་ཕྱིར་བོད་དུ་ལོག ཨ་མ་སྒྲོལ་མ་ལ་མཚོན་ན་གོང་གསལ་བཅར་འདྲི་འདིའི་ནང་དུ་མོ་རང་ནམ་ཞིག་ལ་སྐྱབས་བཅོལ་དུ་འབྱོར་བ་ཡིན་མིན་མ་གསུངས་ཀྱང་། མོ་རང་ལ་རྒྱ་བལ་འབྲུག་གསུམ་དང་དེ་མིན་ཕྱི་རྒྱལ་གང་དུ་ཡང་སྤུན་མཆེད་དེ་འདྲ་སུ་ཡང་མེད་ལུགས་གསུངས་སོང་།
རྒན་རྒོན་འདི་ཚོའི་ཁྲོད་ཀྱི་མང་ཤོས་ཤིག་གིས་ཆེས་ཐོག་མའི་དུས་སུ་རྒྱ་གར་གཞུང་དམངས་གཉིས་ཀྱི་གཡོག་པོར་བརྒྱུགས་པ་སྟེ། ཚིག་སྙན་པོར་བཅོས་ན་དང་བླངས་ལམ་བཟོར་ཕྱིན་པ་རེད། ལམ་བཟོའི་དུས་རབས་དེའི་དཀའ་སྡུག་ནི་བཤད་ན་མི་ཚར་ཞིང་ཉན་ན་མི་འདོད་པའི་སྐྱོ་སྡུག་གི་གཏམ་རྒྱུད་སྟོང་ཕྲག་ལས་གྲུབ་པ་ཞིག་རེད། དུས་སྐབས་དེར་བོད་ནང་དུ་ཡང་བོད་རིགས་བཙོན་པ་ཚོས་ལམ་བཟོ་ཡུར་བཟོ་སོགས་ཀྱི་སྡུག་ལས་མྱོང་བཞིན་ཡོད། ལམ་བཟོའི་རྗེས་སུ་གཞིས་ཆགས་ལམ་ལུགས་ཤིག་ལག་ལེན་དུ་བསྟར་ནས་ཤིང་གཅོད་ཞིང་འདེབས་ཀྱི་དཀའ་སྡུག་མྱོང་དགོས་བྱུང་ཡོད་པ་དང་། ཁོ་ཚོའི་ཁྲོད་ཀྱི་ཅུང་ཟད་བློ་ཁོག་ཆེ་བའི་གྲས་ཀྱིས་རྒྱ་གར་གྱི་ས་ཆ་འདྲ་མིན་དུ་བསྐྱོད་ནས་བལ་གོས་བཙོང་ནས་འཚོ་བའི་ཁ་སྣོན་བཙལ།
གང་ལྟར་ལོ་ཟླ་ཞག་གསུམ་དལ་ལ་བྲེལ་བའི་སྒོ་ནས་འདས་པ་དང་། དེ་དུས་ཀྱི་ཕོ་རྒོད་མོ་གཞོན་དག་གི་ཡང་གཟུགས་གཞི་སྒུར་ཞིང་རྒས་གཉེར་གྱོན། སོ་སོར་བུ་རབས་ཚ་བརྒྱུད་ཡོད་པ་ཚོའི་ལས་དབང་ཕྲན་བུ་བཟང་བ་སྟེ། ན་བ་ཚ་བ་དང་རོགས་རམ་ཕྲན་བུ་རེ་དགོས་དུས་ལུས་སེམས་བརྟེན་ས་དང་ངག་གིས་བཤད་ས་ཞིག་ཡོད་པ་རེད། ཡིན་ན་ཡང་ཨ་མ་སྒྲོལ་མ་ལྟ་བུའི་བགྲེས་སོང་ཁེར་ཧྲེང་ཚོའི་ཉིན་རེའི་འཚོ་བའི་ཁྲོད་དུ། ལག་འོག་ལ་མེ་འབུད་མཁན་དང་ལག་སྟེང་དུ་ཆུ་ལྡུག་མཁན་ཞིག་གང་དུ་ཡོད། ལྟོགས་དུས་ཟ་མ་བཟོ་མི་དང་ན་དུས་གཅིན་སྐྱག་སྐྱེལ་མི་ཞིག་གང་དུ་ཡོད། གལ་སྲིད་ཁྱོད་རང་ཨ་མ་སྒྲོལ་མ་ཡིན་ན་ཁྱོད་ཀྱི་ལོ་གསར་ཚེས་པ་གཅིག་ཉིན་གྱི་ཁྱོད་རང་གི་སེམས་ཁམས་དེ་ཇི་འདྲ་ཞིག་ཡིན་རྒྱུ་རེད། ཚུར་ལོ་གསར་རྟེན་འབྲེལ་ཞུ་བར་ཡོང་མཁན་མེད་ལ། ཕར་ལོ་གསར་ལེགས་སྐྱེས་འབུལ་དུ་འགྲོ་ས་ཡང་མེད། མོ་རང་ལོ་ན་ཆུང་དུས་ཀྱི་ཕ་མ་སོགས་ནང་མི་ལྷན་འཛོམས་ཀྱི་ལོ་གསར་ཉིན་མོའི་རྣམ་པ་རེ་རེ་བཞིན་སེམས་ཁོང་དུ་ཤར་ཡོང་། སྐབས་འདིར་གསར་འགོད་པ་པ་སངས་ཚེ་རིང་ལ་ཐུགས་རྗེ་ཆེ་ཞུ་འདོད་ཅིག་ཀྱང་སྐྱེས་ལ། ཨ་མ་སྒྲོལ་མ་ལྷ་མོས་ཀྱང་གསར་བུ་སེམས་བཟང་འདིས་མོ་དང་ལྷན་དུ་དགུ་ཐུག་བཏུངས་ཤིང་ལོ་གསར་ལ་རོལ་བའི་ཉི་མ་དེ་ནམ་ཡང་བརྗེད་སྲིད་ཀྱི་མ་རེད།
གསར་འགོད་པས་ཨ་མ་སྒྲོལ་མར་ནམ་རྒྱུན་ཁྱིམ་མཚེས་དེ་འདྲའི་ནང་དུ་འགྲོ་གི་ཡོད་མེད་དྲིས་སོང་བར། མོས་འགྲོ་གི་མེད་ལ་འགྲོ་ས་ཡང་ཡོད་པ་མ་རེད་གསུང་ཞོར་དབུགས་རིང་ཞིག་ཕྱུངས་སོང་། ཨ་མ་སྒྲོལ་མས་སྔོན་ཆད་ཆང་ས་བརྒྱབ་པ་དང་དེ་ནས་ཁྱོ་བོ་གྲོངས་པའམ། ཡང་ན་ཨ་མ་སྒྲོལ་མས་མི་ཚེ་གང་བོར་མོ་ཧྲེང་གི་འཚོ་བ་བསྐྱལ་ནས་ཡོང་བ་གང་ཡིན་བཅར་འདྲི་འདིའི་ཁྲོད་དུ་མི་འདུག་ཅིང་། ང་ཚོས་བརྙན་མིག་ལས་མཐོང་བ་དག་ནི། ཨ་མ་སྒྲོལ་མའི་གནས་ཁང་དེའི་བཀོད་པ་སྟེ། གནམ་གཅལ་ཧྲལ་ཧྲུལ་དང་སྒེའུ་ཁུང་ཆུང་བས་མུན་པ་འཐིབ་ཡོད་པ། ཕལ་ཆེར་ཐབ་ཚང་དང་ཉལ་ཁང་མཆོད་ཁང་ཚང་མ་ཁང་མིག་གཅིག་གི་ནང་དུ་ཡོད་པ་འདྲ་བ་ཞིག་རེད། ཡིན་ན་ཡང་ཨ་མ་སྒྲོལ་མའི་མཆོད་བཤམས་ཀྱི་ནང་དུ་ཞལ་རས་འཛུམ་གྱིས་ཁེངས་པའི་སྐུ་པར་འགའ་མཇལ་དུ་ཡོད་པ་དང་། སྐུ་པར་དེ་དག་གིས་བྱིན་རླབས་ལ་བརྟེན་ནས་ཨ་མ་སྒྲོལ་མའི་གདོང་ལས་ཀྱང་གང་ཐུབ་ཅི་ཐུབ་ཀྱིས་བབ་ཆགས་དང་འདོད་ཆུང་ཆོག་ཤེས། རང་སྟོབས་རང་སྤེལ་དང་གཟུགས་གཞི་བདེ་ཐང་སོགས་མཚོན་པའི་འཛུམ་མདངས་ཤིག་མངོན་ཡོང་བ་དེ་རེད།
འདི་གར་ངའི་གྲོགས་པོ་ཞིག་གི་ཆུང་མས་རྒན་གསོ་ཁང་རིམ་པ་མཐོ་གྲས་དེ་འདྲ་ཞིག་ཏུ་ལས་ཀ་བྱེད་བཞིན་ཡོད་ལ། མོས་བརྗོད་པ་ལྟར་ན། རྒན་རྒོན་དེ་ཚོའི་མང་ཆེ་བ་ཁྱིམ་ཚང་ཕྱུག་པོ་དེ་འདྲ་ནས་ཡིན་པས། རྒན་རྒོན་གཅིག་གི་ཟླ་བ་གཅིག་གི་འགྲོ་སོང་དེ་ཨ་སྒོར་ལྔ་སྟོང་ཡིན་པས། རྒན་རྒོན་ཚོའི་སྡོད་ཁང་དང་ཟ་མ། ལུས་རྩལ་དང་ཞབས་ཞུ་སོགས་ཀྱི་མཐུན་རྐྱེན་ཧ་ཅང་ལེགས་མོད་ཀྱང་། རྒན་རྒོན་དེ་ཚོའི་སྡུག་བསྔལ་བཤད་ན་ངོ་མ་ཉན་མི་བཟོད་པ་ཞིག་རེད། དཔེར་ན་རྒན་རྒོན་ལ་ལས་སོ་སོ་ལོ་ན་གཞོན་དུས་མཛེས་མ་ཡིན་པའི་འདྲ་པར་དེ་འདྲ་བསྟན་ནས། ལྟོས་དང་། ང་ལོ་ན་གཞོན་དུས་འདི་འདྲའི་མཛེས་མ་ཞིག་ཡིན་མོད། ད་ལྟ་འདི་འདྲའི་གཉེར་མས་ཁེངས་པའི་རྒན་རྒོན་རང་ངོ་ཡང་རང་གིས་མི་ཤེས་པ་བལྟ་ན་མི་འདོད་པ་ཞིག་ཏུ་གྱུར་འདུག་པ་ཀྱེ་མ་ཀྱེ་ཧུད་ཅེས་ངུ་འབོད་བྱེད་པ་དང་། ཡང་རྒན་རྒོན་ལ་ལའི་ཤག་རོགས་ལ་བུ་རབས་ཚ་བརྒྱུད་སོགས་ནང་མི་ཡོད་པ་དེ་ཚོས་ཡེ་ཤུའི་འཁྲུངས་སྐར་སོགས་དུས་ཆེན་སྐབས་སུ་མེ་ཏོག་སྐྱེལ་ཡོང་བ་དང་། རྟེན་འབྲེལ་ཤོག་བྱང་དང་ལེགས་སྐྱེས་འདྲ་མིན་ཁྱེར་ཡོང་བའམ་བསྐུར་ཡོང་བའི་སྐབས་སུ། གཉེན་ཉེ་གྲོགས་པོ་མེད་པའི་རྒན་རྒོན་དག་གི་སེམས་ཧ་ཅང་མི་སྐྱིད་པར་འགྱུར་བས། ཅོག་ཙེ་དང་རྩིགས་པ་སོགས་ལ་མགོ་བོར་བརྡུངས་ཏེ་རང་ཤི་རྒྱག་མཁན་མང་པོ་ཞིག་འདུག་ཟེར། ཡང་ལ་ལས་མི་ཚེ་གང་བོར་ཚགས་པར་ཀློག་པ་དང་བརྙན་འཕྲིན་ལ་བལྟ་བ་སོགས་ཀྱི་འཚོ་བར་གོམས་དྲགས་པས། རྒན་རྒོན་ཆགས་ཏེ་མིག་གིས་གསལ་བོ་མི་མཐོང་བ་དང་རྣ་བས་ཀྱང་གསལ་བོ་ཞིག་མི་གོ་བས། སྔོན་ཆད་ལྟར་ཚགས་པར་ཀློག་འདོད་ཀྱང་མིག་གིས་མི་མཐོང་བས་ཚགས་པར་རེ་གཅུས་རིལ་བརྒྱབ་སྟེ་མཆན་ཁུང་དུ་བཅུག་ནས་ཉིན་གང་བོར་སྡོད་ཀྱི་འདུག་ཟེར།
ང་ཚོའི་ཨ་མ་སྒྲོལ་མ་ལྟ་བུའི་རྒན་རྒོན་ལས་དག་པ་ཚོར་གཙུག་ལག་ཁང་དང་དེ་ལས་གཞན་པའི་དགོན་པར་སྐོར་བ་འགྲོ་ས་ཞིག་ཡོད་པས། གལ་སྲིད་ལུས་ངག་ཡིད་གསུམ་རྣམ་པར་དག་ན་ཕྱོགས་གཅིག་ནས་ཚོགས་བསག་དགེ་སྒྲུབ་རླབས་ཆེན་ཞིག་བྱེད་ཐུབ་ལ། གལ་སྲིད་དེ་ལྟར་མ་བྱུང་ན་ཡང་རྒན་རྒོན་གྱི་ཁེར་རྐྱང་གི་སྐྱོ་གདུང་སངས་པར་བྱེད་པ་ལ་ཡང་སྐོར་བར་འགྲོ་བ་འདི་ཧ་ཅང་གལ་ཆེ་བ་ཞིག་རེད། སྐོར་ལམ་དུ་ངོ་ཤེས་པ་དང་མི་ཤེས་པའི་རྒན་དར་གཞོན་གསུམ་མང་པོ་ཞིག་ལ་ཁ་བརྡ་ཐུང་ངུ་རེ་བྱེད་ཆོག་ལ། སྐོར་ལམ་གྱི་མཁའ་དབུགས་སོས་པ་དེས་རང་རང་གི་སྡོད་ཁང་གི་མཁའ་རླུང་བཙོག་པ་དེའི་ཚབ་ཀྱང་བྱེད་ཆོག་པ་རེད་ཨང་། གལ་སྲིད་རྐང་པ་མི་བདེ་བས་སྐོར་བར་འགྲོ་མི་ཐུབ་པའི་རྒན་རྒོན་ཚོས་ཀྱང་མ་ཎི་ལག་འཁོར་བསྐོར་པ་དང་ཉིན་གང་ཁ་འདོན་བྱེད་པའི་ལུགས་སྲོལ་བཟང་པོ་ཞིག་བོད་པ་ཚོར་ཡོད་པས། གཞིས་ཆགས་དང་རྡ་ས་སོགས་ཀྱི་རྒན་རྒོན་བགྲེས་སོང་འདི་ཚོར་ཁེར་རྐྱང་ཡུལ་བོའི་སྡུག་བསྔལ་འདི་ཡུལ་གྲུ་གཞན་པའི་རྒན་རྒོན་ཚོ་དང་བསྡུར་ན་ཧ་ཅང་ཆུང་ཆུང་ཞིག་ལས་ཡོད་ཀྱི་མ་རེད་བསམས། རྒྱ་གར་གྱི་བོད་པའི་གཞིས་ཆགས་མང་པོ་ཞིག་གི་ནང་དུ་ན་གཞོན་དང་དར་མ་ཚོ་ཕྱི་རྒྱལ་དུ་ཕྱིན་ཚར་ནས་ཤུལ་དུ་རྒན་རྒོན་མང་པོ་ཞིག་ལྷགས་འདུག་ཅེས་བརྗོད་མཁན་གང་འཚམ་ཞིག་བྱུང་སོང་བས། གལ་སྲིད་དེ་བདེན་པ་ཡིན་ན་ཤུལ་ལུས་རྒན་རྒོན་དེ་ཚོར་མ་མཐའ་ཡང་ཟླ་བ་རེ་རེར་སེམས་གསོའི་སྐད་ཆ་རེ་བཤད་མཁན་ངེས་པར་དུ་དགོས་གལ་ཆེ།
ངས་སྔོན་ཆད་རྒྱ་གར་ལྷོ་ཕྱོགས་ནས་མཐོང་བའི་རྒན་རྒོན་དེ་དག་ལས་འབྲས་སྤུངས་དགོན་པའི་གྲྭ་པ་བགྲེས་སོང་དེ་དག་གི་འཚོ་བ་ལས་སྐྱིད་པ་ཞིག་མ་མཐོང་། ཁོང་ཅག་གིས་ཟ་མ་ཐེངས་གསུམ་སྤྱི་ཐབ་ལས་ལེན་ཆོག་པ་དང་། མང་པོ་ཞིག་ལ་ཤག་གི་དགེ་ཕྲུག་གམ་གྲྭ་པ་ཞིག་གིས་ཟ་མ་འཁྱེར་ཡོང་གི་ཡོད་པ་དང་། སྡོད་གནས་སྤུས་ཀ་ཞན་ན་ཡང་ཧ་ཅང་གཙང་མ་དང་སྣང་བ་དྭངས་པ། ཉིན་མཚན་གཉིས་ཀར་དམ་པའི་ཆོས་ཀྱི་སྒྲ་དབྱངས་རྒྱུན་མི་ཆད་པར་ཐོས་ཐུབ་པ། རང་ཚོད་ཀྱིས་ཐོས་བསམ་སྒོམ་གསུམ་དང་བསྐྱེད་རྫོགས་ཏིང་འཛིན་གང་ཞིག་གི་ལས་ལ་འཇུག་ཀྱང་དེ་ལ་མཐུན་རྐྱེན་ཚང་བ། གལ་སྲིད་འཇིག་རྟེན་འདི་ནས་ཕྱི་མར་ཆས་པ་ཡིན་ན་ཡང་དགེ་འདུན་འདུས་པ་རྒྱ་མཚོས་སྨོན་ལམ་གསུང་རྒྱུ་ཡིན་པ་སོགས། ཕྱིར་སྡོད་བོད་མིའི་རྒན་རྒོན་དག་གི་ཚེ་མཇུག་གི་འཚོ་བ་གླེང་བའི་རྩོམ་ཐུང་འདི་རེ་ཞིག་མཇུག་བསྡུ་བར་བྱའོ།།
ཨ་མ་སྒྲོལ་མ་ལྷ་མོར་བཅར་འདྲི་ཞུས་པའི་ལེ་ཚན་ལ་གཟིགས་ན་གཤམ་དུ་ཡོད།
ཨ་མ་སྒྲོལ་མ་ལྷ་མོ་ལགས་ཀྱི་ཁེར་རྐྱང་གི་ལོ་སར། – བོད་ཀྱི་དུས་བབ། (tibettimes.net)
འབྲུག་འདྲ་ཞིག་གྲགས་ནས་ཆར་གང་ཡང་བབས་མི་འདུག
སྔོན་ཆད་ཨ་ཁུ་ཀླུ་སྨྱོན་གྱི་བྲིས་རྩོམ་ལབ་ན་དེ་འདྲ་ཞིག་མིན་མོད། དེང་སང་ཉོག་རེད། དགོན་པའི་བླ་རྒན་ཚོ་སྐྱིད་པོ་རེད་ཟེར་སྟངས་ལ་བལྟས་ན། དེང་སང་བླ་རྒན་ཁྱོས་ཀྱང་རྒྱ་གྲོང་ན་དཀའ་གི་ཡོད་ནི་མ་ར།