ཁ་རས་མ་གྱོན་ན་ཞབས་ཕྱིའི་རིགས་མེད་པའི་བཀའ་རྒྱ་བསྒྲགས།

རྒྱ་གར་ནང་ཏོག་དབྱིབས་ནད་པ་ཇེ་མང་དུ་འགྲོ་བཞིན་ཡོད་པས་ཧི་མ་ཅལ་མངའ་སྡེ་གཞུང་ནས་དོན་ཚན་ ༡༠ ཅན་གྱི་བཀོད་ཁྱབ་ཅིག་གནང་སྟེ་སྤྱི་སྤྱོད་རླངས་འཁོར་དང་སློབ་གྲྭ་སྨན་ཁང་སོགས་སུ་ཁ་རས་མ་གྱོན་ན་ཞབས་ཕྱི་གནང་རྒྱུ་མིན་པ་སོགས་ཀྱི་གསལ་བརྡ་སྤེལ་འདུག

ཁ་སང་ཕྱི་ཚེས་ ༢༡ ཉིན་ཧི་མ་ཅལ་མངའ་སྡེའི་གཞུང་གིས་ཏོག་དབྱིབས་གཉན་རིམས་དང་འབྲེལ་བའི་བཀོད་ཁྱབ་ཞིག་བཏང་བའི་ནང་། མངའ་སྡེའི་མི་མང་གི་འཕྲོད་བསྟེན་གནས་སྟངས་ད་ལྟའང་ཛ་དྲག་གི་གནས་སྟངས་འོག་ཡོད་པ་དང་། མུ་མཐུད་གཉན་རིམས་སྔོན་འགོག་ཆེད་དགོས་ངེས་ཀྱི་ལས་དོན་བྱེད་དགོས་ཀྱི་ཡོད་སྐོར་བསྒྲགས་ཡོད་པ་དང་། བཀོད་ཁྱབ་ལམ་སྟོན་དོན་ཚན་བཅུ་ཡོད་པའི་ནང་། སྤྱི་སྤྱོད་རླངས་འཁོར་དང་གླ་འཁོར། སྨན་ཁང་དང་ལྷ་ཁང་། སློབ་གྲྭ་དང་གཞུང་ལས་ཁང་། དེ་བཞིན་གཞུང་སྒེར་གཉིས་ཀྱི་ཚོང་ཁང་ཁག་གི་ནང་། ཁ་རས་གྱོན་མེད་ཚེ་ཞབས་ཕྱི་མི་བྱེད་པའི་ (No mask, No service) སྲིད་ཇུས་འཕྲལ་དུ་ལག་བསྟར་བྱ་རྒྱུ་ཡིན་པ་དང་། ཕྱི་ཟླ་ ༣ ཚེས་ ༢༣ ཉིན་ནས་ཚོང་འདུས་ཀྱི་རིགས་འཚོག་མི་ཆོག་པ་དང་། ཟླ་འདིའི་ཕྱི་ཚེས་ ༢༥ ཉིན་ནས་སྤྱི་ཚོགས་དང་ཆོས་ལུགས། ཆབ་སྲིད་དང་རིག་གཞུང་སོགས་དང་འབྲེལ་བའི་འདུ་འཛོགས་ཀྱི་རིགས་ལ་ས་གནས་སྲིད་གཞུང་གི་ཆོག་མཆན་མེད་པར་འཚོག་མི་ཆོག་པ་དང་། ཚོགས་ཁང་སོགས་ཀྱི་ནང་མི་མང་འདུ་འཛོམས་མང་ཤོས་ཀྱི་ཚད་གཞི་ནི་བརྒྱ་ཆའི་ལྔ་བཅུའམ་མི་གྲངས་ ༢༠༠ ལས་ལྷག་འཛོམས་མི་ཆོག་པ་དང་། ཁོད་ཡངས་པའི་རྩེད་ཐང་སོགས་སུ་སྤྱིའི་ཤོང་ཚད་གྱི་བརྒྱ་ཆའི་ལྔ་བཅུ་ལས་ལྷག་འཛོམས་མི་ཆོག་པ་བཀོད་འདུག

ཡང་འདུ་འཛོམས་སོགས་ཀྱི་སྐབས་སྤྱི་པའི་ཐབ་ཚང་དུ་ཇ་མ་དང་དེ་འབྲེལ་གྱི་ལས་ཀ་བྱེད་མཁན་རྣམས་ཀྱིས་འདུ་འཛོམས་སྔོན་གྱི་ཆུ་ཚོད་ ༩༦ ནང་ཚུད་དུ་ནད་ཡམས་ཡོད་མེད་ཀྱི་བརྟག་དཔྱད་བྱེད་དགོས་པ་མ་ཟད། ཟ་མ་བཟོ་སྐབས་ངེས་པར་དུ་ཁ་རས་དང་ལག་ཤུབ། སྐྲ་ཁེབས་གྱོན་དགོས་པ་དང་། ཆོས་ལུགས་ཀྱི་ཟས་སྦྱིན་ (langars) ཁག་རླུང་ཁམས་ཡངས་སར་བྱེད་པ་ལས་སྒེའུ་ཁུང་སོགས་མེད་པའི་ཁང་པའི་ནང་བྱེད་མི་ཆོག་པ་དང་། བརྟག་དཔྱད་བྱས་ཟིན་པའི་ཇ་མ་ཁོ་ནས་ཟ་མ་བཟོ་ཆོག་པ། འདུ་འཛོམས་གང་རུང་གི་སྐབས་སུ་ས་གནས་ཀྱི་སྡེ་དཔོན་དང་གྲོང་བརྡལ་གྱི་མགོ་བ་སོགས་ཀྱིས་ཁ་རས་གྱོན་པ་དང་། ཕན་ཚུན་བར་རྒྱང་ཐག་འཛིན་པ་སོགས་ཀྱི་ཐད་ལམ་སྟོན་ཁག་ལག་ལེན་དུ་འཁེལ་བར་རམ་འདེགས་བྱེད་དགོས་པ། ས་གནས་རྫོང་རིམ་པས་འདུ་འཛོམས་ཀྱི་ཆོག་མཆན་སྤྲོད་སྐབས། ནད་ཡམས་སྔོན་འགོག་ཆེད་ལམ་སྟོན་འདིའི་ཐོག་ཆ་རྐྱེན་ཁ་སྔོན་བྱེད་ཆོག་སྐོར་སོགས་བཀོད་འདུག

འདས་པའི་ཉིན་གཅིག་གི་རིང་ཧི་མ་ཅལ་མངའ་སྡེའི་ནང་ཏོག་དབྱིབས་གཉན་རིམས་ཀྱི་ནད་པ་གྲངས་ ༡༤༡ བྱུང་ཡོད་པ་དང་། རྐྱེན་འདས་སུ་ཕྱིན་པ་གྲངས་ ༡ བྱུང་ཡོད་འདུག་ལ། ད་བར་མངའ་སྡེའི་ནང་ཁྱོན་ནད་པ་གྲངས་ ༦༠༦༧༨ བྱུང་ཡོད་པའི་ཁྲོད་ནད་པ་གྲངས་ ༥༨༣༩༨ དྲག་བསྐྱེད་བྱུང་ཡོད་པ་དང་། མི་གྲངས་ ༡༢༥༦ ནད་མནར་འོག་ཡོད་པ་མ་ཟད། མི་གྲངས་ ༡༠༠༥ རྐྱེན་འདས་སུ་ཕྱིན་ཡོད་འདུག དེ་བཞིན་འདས་པའི་ཆུ་ཚོད་ ༢༤ རིང་རྒྱ་གར་རྒྱལ་ཡོངས་སུ་ནད་པ་གྲངས་ ༤༦༩༥༡ བྱུང་ཡོད་འདུག་ལ། དེ་ནི་འདས་ལོའི་ཕྱི་ཟླ་ ༡༡ ཚེས་ ༧ ཉིན་རྗེས་ཀྱི་ནད་པ་མང་ཤོས་དེ་ཆགས་ཡོད་པ་མ་ཟད། རྒྱལ་ཡོངས་སུ་འདས་པའི་བདུན་ཕྲག་གཅིག་གི་རིང་ཏོག་དབྱིབས་གཉན་རིམས་ཀྱི་ནད་པའི་གྲངས་ཡར་འཕར་ཡོད་པ་རེད།

གསར་འགོད་པ། ཀླུ་མགོན་ཐར།