རྒྱལ་ཁབ་བཞིའི་ཕྱོགས་ཁག (THE QUAD)

བློ་བཟང་ལུང་རྟོགས། ཨོ་གླིང་།

ཉེ་བའི་ཆར་རྒྱལ་སྤྱིའི་ཆབ་སྲིད་གླེང་སྟེགས་ཁྲོད་རྒྱབ་ཁབ་བཞིའི་ཕྱོགས་ཁག་ (THE QUAD) ཟེར་བ་ཞིག་ཐོན་བཞིན་ཡོད་པ་དང་། དེ་ཡང་མ་འོངས་པར་རྒྱ་གར་དང་ཞི་བདེ་རྒྱ་མཚོའི་མངའ་ཁུལ་གྱི་བདེ་འཇགས་ཐད་གནད་འགག་ཧ་ཅང་ཆེ་ཞིང་ཐབས་ཇུས་ལ་འབྲེལ་བ་དམ་ཟབ་ཅན་ཞིག་ཡིན་འདུག

 ཉིན་ཤས་སྔོན་རྒྱལ་ཁབ་བཞིའི་ཕྱོགས་ཁག་སྟེ། ཨ་མེ་རི་ཀ་དང་། རྒྱ་གར། ཉི་ཧོང་། ཨོ་སི་ཊོ་ལི་ཡ་བཅས་ཀྱི་ཆེས་མཐོའི་དབུ་ཁྲིད་རྣམ་པས་དྲ་ལམ་བརྒྱུད་ཚོགས་འདུ་ཞིག་བསྡུ་སྐོང་གནང་ཡོད་པ་དང་། སྲིད་དོན་མཁས་དབང་དང་གསར་ལམ་ཁག་ནས་ད་ཐེངས་ཀྱི་ཚོགས་འདུ་དེ་ནི་རྒྱལ་ཁབ་བཞིའི་མ་འོངས་པའི་བདེ་འཇགས་ལ་གོམ་སྟོབས་གསར་པ་ཞིག་སྤོས་པར་ངོས་འཛིན་བྱེད་བཞིན་འདུག རྒྱལ་ཁབ་བཞིའི་ཚོགས་ཁག་བཟོ་དགོས་དོན་ནི་ཨེ་ཤེ་ཡའི་ཁུལ་དུ་རྒྱ་ནག་གི་བྱ་སྤྱོད་ལ་གདོང་ལེན་ཆེད་ཡིན་སྐོར་མངོན་གསལ་དོད་པོའི་ཐོག་ནས་བརྗོད་ཀྱི་མེད་ཀྱང་། རྒྱལ་ཁབ་དེ་རྣམས་ཀྱིས་ཕྱོགས་ཁག་སྒྲིག་ན་རང་ཉིད་ལ་ཁེ་ཕན་གང་ཡོད་དམ་ཟེར་བའི་དྲི་བ་ཞིག་རང་བཞིན་གྱིས་སླེབས་ཀྱི་ཡོད།

༢༠༡༧ ལོར་རྒྱལ་ཁབ་བཞིའི་ཕྱོགས་ཁག་སྐོར་ལ་གསར་འགྱུར་བརྒྱུད་ལམ་ཁག་ཏུ་གནས་ཚུལ་མང་པོ་ཞིག་ཐོན་ཡོད་ཀྱང་། དོན་དངོས་ཐོག་ཕྱི་ལོ་༢༠༠༤ ནང་རྒྱ་གར་རྒྱ་མཚོའི་མངའ་ཁུལ་དང་ལྷོ་ཤར་ཨེ་ཤེ་ཡའི་ནང་དུ་རྒྱ་མཚོའི་རྦ་རླབས་འཁྲུག་པའི་གོད་ཆག་བྱུང་སྐབས་ནས་མཉམ་ལས་གནང་བ་འགོ་ཚུགས་པ་ཞིག་ཡིན་པ་ལས། རྒྱལ་ཁབ་ཁག་བཞིའི་ཕྱོགས་ཁག་དེ་རྒྱ་ནག་ལ་ཆེད་དུ་དམིགས་ནས་བཙུགས་པ་ཞིག་མིན་ཚུལ་བརྗོད་ཀྱི་ཡོད། འོན་ཀྱང་། རྒྱ་ནག་གཞུང་གིས་ཕྱོགས་ཁག་དེའི་སྐོར་ལ་བློ་འཚབ་ཆེན་པོ་དང་བཅས་དོ་སྣང་བྱས་ཡོད་པར་མ་ཟད། རང་ནུས་གང་ཡོད་ཀྱིས་ཚོགས་ཁག་དེ་ལམ་ལྷོངས་མི་ཡོང་བའི་ཆེད་ཞུ་གཏུགས་ཀྱི་ལས་འགུལ་སྤེལ་ཡོད།

ཕྱི་ལོ་༢༠༡༥ དང་ ༢༠༡༦ ནས་བཟུང་རྒྱ་ནག་གི་འགོ་འཁྲིད་ཞི་ཅིང་ཕིན་གྱིས་གདེང་ཚོད་ཆེན་པོའི་སྒོ་ནས་ཕྱི་སྲིད་ཀྱི་ལས་དོན་སྤེལ་པར་བརྟེན་ནས། ཕྱོགས་ཁག་དེའི་གྲོས་བསྡུར་ཡང་སྔར་ལས་རྒྱ་ཆེ་རུ་དང་གཏིང་ཇེ་ཟབ་ཏུ་ཕྱིན་ཡོད་པ་དང་། སྐབས་དེའི་ཉི་ཧོང་གི་སྲིད་བློན་ཞིན་ཛོ་ཨ་སྦེ་མཆོག་ནས་དེའི་སྐོར་ལ་དམིགས་བསལ་གྱི་ཕྱག་ལས་གནང་ཡོད་འདུག

རྒྱལ་ཁབ་རྣམས་ཀྱི་ཆེས་མཐོའི་དབུ་ཁྲིད་རྣམས་ཀྱི་ཚོགས་འདུ་དེ་མ་བསྡུས་པའི་སྔོན་དུ་ཕྱི་འབྲེལ་བློན་ཆེན་རྣམས་པའི་ཚོགས་འདུ་ཞིག་བསྐོང་ཚོགས་ཀྱིས་ནང་མོལ་བགྲོ་གླེང་ལྷུག་པོ་བྱུང་ཡོད་ཅིང་། ད་ཐེངས་ཀྱི་མཛད་སྒོ་ལྟ་བུའི་ཆེས་མཐོའི་དབུ་འཁྲིད་རྣམ་པའི་ཚོགས་འདུའི་རྗེས་སུ་ནང་མོལ་གྱི་གནས་ཚུལ་རྣམས་རིམ་བཞིན་བརྒྱུད་ལམ་ཁག་ལ་ཐོན་བཞིན་ཡོད་པ་རེད།

ཉིན་ཤས་སྔོན་ཨོ་སི་ཊོ་ལི་ཡའི་སྲིད་བློན་མོ་རེ་སི་མཆོག་གིས་ “སྒྲིག་འཛུགས་དེ་བཞིན་མངའ་ཁུལ་འདིའི་ནང་ཞི་བདེ་བསྐྲུན་པའི་རྩིག་རྨང་ཡིན་པ་དང་། དམིགས་ཡུལ་ནི་མང་གཙོའི་རྒྱལ་ཁབ་རྣམས་ཀྱི་གུ་ཡངས་དང་། བདག་དབང་བཅས་ལ་སྲུང་སྐྱོབ་བྱེད་པ་མ་ཟད། ཕན་ཚུན་འབྲེལ་གཏུགས་བྱས་པ་བརྒྱུད་རྒྱལ་ཁབ་རྣམས་ཀྱི་སྤྱི་དམངས་ལ་ཕན་ཞིང་། མངའ་ཁུལ་དེའི་ཞི་བདེ་དང་འཕེལ་རྒྱས་ལའང་ཕན་པ་ཡོད་” ཅེས་གསུངས་འདུག

དབུ་ཁྲིད་རྣམ་པའི་ལྷན་ཚོགས་སྟེང་ཏོག་དབྱིབས་རིམས་ནད་དང་། གོ་ལའི་གནམ་གཤིས་འགྱུར་ལྡོག འཕྲུལ་རིགས་ལ་གནད་འགག་ཆེ་བའི་རྒྱུ་ཆ་མཁོ་འདོན་སྐོར་དང་། རྒྱ་གར་ནས་བཟོ་སྐྲུན་བྱས་པའི་ཏོག་དབྱིབས་རིམས་ནད་སྔོན་འགོག་གི་སྨན་ཁབ་རྣམས་རྒྱ་གར་དང་ཞི་བདེའི་རྒྱ་མཚོའི་མངའ་ཁུལ་ལ་འགྲེམས་གཏོང་བཅས་ཀྱི་སྐོར་མུ་མཐུད་གྲོས་བསྡུར་གནང་རྒྱུ་ཡིན་འདུག

ཕྱོགས་ཁག་དེའི་ཐབས་ཇུས་ཀྱི་དམིགས་ཡུལ་གསལ་སྟོན་བྱས་མིན་ལ་མ་བལྟས་པར། ཕྱོགས་ཁག་འདི་ལྟ་བུ་ཞིག་འཛུགས་དགོས་པའི་དམིགས་གཏད་ནི་རྒྱ་ནག་གཞུང་ཡིན་པ་སྲིད་དོན་མཁས་པ་མང་པོས་ངོས་འཛིན་ཞུ་བཞིན་ཡོད་པར་མ་ཟད། རིམ་བཞིན་ཨེ་ཤེ་ཡའི་ནེ་ཊོ་ཆིངས་དོན་སྒྲིག་འཛུགས་(ASIAN NATO) ལྟ་བུ་ཞིག་ཏུ་འགྱུར་སྲིད་པའི་ཚོད་དཔག་བྱེད་ཀྱི་ཡོད། འདས་པའི་ལོ་ཤས་རིང་རྒྱ་གར་དང་ཞི་བདེའི་རྒྱ་མཚོའི་མངའ་ཁུལ་དུ་ཨ་རི་དང་ཉི་ཧོང། རྒྱ་གར་བཅས་ནས་དམག་སྦྱོང་བྱས་པར་ཨོ་སི་ཊོ་ལི་ཡ་མཉམ་ཞུགས་བྱས་མེད་ཀྱང་། ད་ལོ་ཨོ་སི་ཊོ་ལི་ཡའི་དམག་དཔུང་ཀྱང་དམག་སྦྱོང་དེར་མཉམ་ཞུགས་བྱས་ཡོད་འདུག

ཨོ་སི་ཊོ་ལི་ཡའི་སྲིད་བློན་མཆོག་གིས་རྒྱ་ནག་ནས་མཆེད་པའི་ཏོག་དབྱིབས་རིམས་ནད་ཀྱི་འབྱུང་ཁུངས་སྐོར་ལ་རང་དབང་ལྡན་པའི་ཚོགས་པ་ཞིག་གིས་ཞིབ་འཇུག་གནང་གལ་ཆེ་སྐོར་གསུང་བཤད་གནང་བར་བརྟེན། རྒྱ་གཞུང་དང་ཨོ་སི་ཊོ་ལི་ཡའི་གཞུང་གཉིས་ཀྱི་འབྲེལ་བར་ཉམས་ཆག་ཆེན་པོ་བྱུང་ཡོད་པར་མ་ཟད། རྒྱ་མིའི་སློབ་ཕྲུག་ཨོ་སི་ཊོ་ལི་ཡར་མི་གཏོང་བ་དང་། འབྲུ་རིགས་དང་ཤ་རིགས། རྒུན་ཆང་། རྡོ་སོལ་སོགས་ཕྱིར་གཏོང་ལ་ཚད་བཀག་བཟོས་ཏེ་དཔལ་འབྱོར་གྱི་དམག་འཁྲུག་བརྒྱབ་ཡོད་པ་རེད།

བརྒྱུད་རིམ་དེའི་ཁྲོད་རྒྱལ་ཁབ་མང་པོའི་གཞུང་དམངས་གཉིས་ཀྱིས་མ་བགྲོས་བསམ་པ་གཅིག་མཐུན་ལྟ་བུར་རྒྱ་གཞུང་གི་ཁ་གཏད་གཅོག་ཆེད་ཐབས་ཇུས་ཀྱི་ཁ་ཕྱོགས་བསྒྱུར་བཞིན་པའི་རྣམ་པ་ཆེན་པོ་ཐོན་བཞིན་པ་དང་། ཉེ་ཆར་ཨ་རི་དང་རྒྱ་ནག་གི་མཐོ་རིམ་དབུ་འཁྲིད་ཀྱི་གྲོས་མོལ་སྐབས་ཀྱང་ཕྱོགས་གཉིས་དབར་འགལ་བ་ཤུགས་ཆེན་པོ་ཡོད་པ་སོགས་རྒྱལ་སྤྱིའི་ཆབ་སྲིད་ལ་འཕོ་འགྱུར་ཆེན་པོ་ཞིག་འབྱུང་བཞིན་ཡོད་པར་བརྟེན་འགྱུར་བ་འདིའི་ཁྲོད་བོད་ཀྱི་རྩ་དོན་འཐབ་རྩོད་ལ་གོ་སྐབས་ངེས་ཅན་ཞིག་ཡོད་པ་ཡང་ཟུར་བལྟས་ལེབ་མཐོང་ལྟ་བུ་ལགས།

གནས་ཚུལ་ཡོངས་ཁུངས།

ཨོ་སི་ཊོ་ལི་ཡའི་གསར་འགྱུར་བརྒྱུད་ལམ་ཁག་དང་སྲིད་བློན་གྱི་གསུང་བཤད་བཅས་ལ་གཞིར་བཞག་པའོ།།

ནེ་ཊོ།

ནེ་ཊོ་ཆིངས་དོན་སྒྲིག་འཛུགས་ནི། ཕན་ཚུན་དམག་དོན་རོགས་སྐྱོར་ཆེད་བཙུགས་པའི་ཨ་རི་དང་ཡུ་རོབ་ཁུལ་གྱི་རྒྱལ་ཁབ་དུ་མའི་མཐུན་ཚོགས་ཤིག