དེ་རིང་སྔ་དྲོར་བཞུགས་སྒར་རྒྱལ་བའི་ཕོ་བྲང་ནས་༧གོང་ས་རྒྱལ་བ་རིན་པོ་མཆོག་གིས། ཨུ་རུ་སུའི་གཙུག་ལག་སློབ་གཉེར་ཁང་ལྔ་ཡིས་མཉམ་འབྲེལ་ཐོག་གསོལ་འདེབས་ཞུས་པ་བཞིན། དྲ་ལམ་བརྒྱུད་འགྱུར་ལྡོག་དུས་རིམ་ཁྲོད་ཀྱི་ང་ཚོའི་འཛམ་གླིང་ཞེས་པའི་བརྗོད་གཞིའི་ཐོག་བཀའ་སློབ་དང་བཀའ་འདྲི་བཀའ་ལན་གནང་སྐབས། བྱམས་བརྩེ་ནི་མིའི་རིགས་ཐུན་མོང་གིས་ངོས་འཛིན་བྱེད་པའི་མཛེས་པ་དེ་ཡིན་སྐོར་གསུངས་འདུག
སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས། ང་ཚོ་ཚང་མ་འགྲོ་བ་མིའི་རིགས་གཅིག་རེད། ང་ཚོ་ཚང་མས་བདེ་སྐྱིད་ལྡན་པའི་མི་ཚེ་ཞིག་བྱུང་ན་འདོད་ཀྱི་ཡོད། ཐ་ན་འབུ་སྲིན་ཚུན་ཆད་ཀྱིས་ཀྱང་བདེ་སྐྱིད་འདོད་ཀྱི་ཡོད། མིའི་རིགས་ལ་མཚོན་ན་གཞན་དང་མི་འདྲ་བའི་རྣམ་དཔྱོད་ཀྱི་ཤེས་རབ་དེ་ཡོད་པ་རེད། ང་ཚོས་རང་ཉིད་ཀྱི་མི་ཚེའི་ནང་བདེ་སྐྱིད་ཡོང་ཆེད་རྣམ་དཔྱོད་ཀྱི་ཤེས་རབ་དེ་བེད་སྤྱོད་གཏོང་གི་ཡོད། འོན་ཀྱང་མཚམས་རེར། ང་ཚོར་རྣམ་དཔྱོད་དེ་ཡོད་ནའང་མཐོང་རྒྱ་ཆུང་དྲགས་པ་དང་བསམ་བློའི་གུ་དོག་དྲགས་པའི་རྐྱེན་གྱིས། དཔེར་ན་དུས་རབས་སྔོན་མའི་ནང་འཛམ་གླིང་གི་དམག་ཆེན་དང་པོ་དང་གཉིས་པ་བྱུང་བ་རེད་ལ། དེ་དག་ཚང་མ་མིས་བཟོས་པ་ཤ་སྟག་རེད། དུས་རབས་སྔོན་མའི་ནང་ང་ཚོས་རྣམ་དཔྱོད་འདི་བེད་སྤྱོད་བྱས་ཏེ་ཚན་རིག་ཡར་རྒྱས་ཆེན་པོ་བཏང་ཡོད་ནའང་། ཚན་རིག་གི་ཤེས་བྱ་ཁྱད་དུ་འཕགས་པ་དེ་དག་ང་ཚོས་གཏོར་བཤིག་དང་དམག་དོན་གྱི་ཆེད་དུ་བཀོལ་སྤྱོད་བྱས་པ་རེད། དཔེར་ན་རྡུལ་ཕྲན་མཚོན་ཆ་དང་མེ་ཤུགས་འཕུར་མདེལ་ལྟ་བུ་བཟོ་རྒྱུར་བཀོལ་ཡོད། དེ་དག་ཚང་མ་ང་ཚོ་དང་ང་ཞེས་པའི་རང་གཅེས་འཛིན་གྱི་བསམ་བློའི་འདུ་ཤེས་ཀྱི་ཐོག་ནས་བྱུང་བ་རེད། ཅེས་གསུངས་སོང་།
༧མགོན་པོ་གང་ཉིད་ཀྱིས་མུ་མཐུད། འོན་ཀྱང་ད་ལྟ་ང་ཚོས་རྒྱལ་ཁབ་ཀྱི་མཚམས་ལས་བརྒལ་ཏེ་མིའི་རིགས་སྤྱི་ལ་བསམ་བློ་གཏོང་རྒྱུའི་དུས་ལ་བབས་ཡོད། གང་ཡིན་ཟེར་ན། ང་ཚོ་ཚང་མ་གོ་ལ་ཆུང་ཆུང་འདིའི་ནང་མཉམ་གནས་བྱ་དགོས་ལ། ང་ཚོ་མིའི་རིགས་དུང་ཕྱུར་ ༧༠ དབར་དབྱེ་བ་འབྱེད་རྒྱུའི་གཞི་རྩ་གང་ཡང་མེད། ང་ཚོ་དང་ཁྱོད་ཚོ་ཟེར་ནས་འཁྲུག་པ་རྒྱག་ཚུལ་དེ་དངོས་ཡོད་གནས་སྟངས་དང་འགལ་ཞིང་བསམ་བློ་གཏོང་སྟངས་རྙིང་པ་རེད། དེར་བརྟེན་བདེ་སྐྱིད་ལྡན་པའི་འཇིག་རྟེན་ཞིག་དང་། བདེ་སྐྱིད་ལྡན་པའི་མིའི་རིགས་འཛུགས་སྐྲུན་ཀྱི་ཆེད་དུ། ང་ཚོ་ཚང་མས་རྒྱལ་ཁབ་དང་ཆོས་ལུགས། རིག་གཞུང་བཅས་ཀྱི་ཁྱད་པར་དེ་དག་ཕར་ལ་བཞག་སྟེ། གཙོ་ཆེ་ཤོས་ཚང་མ་མིིའི་རིགས་གཅིག་ཡིན་པ་དང་ཚང་མ་གོ་ལ་འདིའི་སྟེང་མཉམ་གནས་དགོས་པའི་བསམ་བློ་འཛིན་དགོས། ཞེས་བཀའ་སློབ་བསྩལ་གནང་འདུག
བཀའ་སློབ་སྩལ་གནང་གྲུབ་རྗེས། ཨུ་རུ་སུའི་ཁཱལ་མིག་གཙུག་ལག་སློབ་གྲྭ་ཆེན་མོའི་སློབ་ཕྲུག་ཅིག་གིས། ཏོག་དབྱིབས་གཉན་རིམས་དང་འབྲེལ་ནས་བྱམས་བརྩེའི་ཆེད་དུ་རང་སྲོག་བློས་གཏོང་བྱ་འོས་པ་ཞིག་ཡིན་མིན་ཐད་བཀའ་འདྲི་གནང་བའི་བཀའ་ལན་དུ་༧གོང་ས་མཆོག་གིས། གལ་ཏེ་ཁྱེད་ཀྱིས་དོན་དམ་པའི་བྱམས་སྙིང་རྗེ་ལག་བསྟར་བྱེད་ཀྱི་ཡོད་ཚེ། ཁྱེད་ཀྱིས་རང་ཉིད་ལས་གཞན་གྱི་བདེ་དོན་དེ་གཙིགས་ཆེར་འཛིན་དགོས་པ་དང་། ངས་སྨན་པ་དང་སྨན་ཞབས་པ་རྣམས་ཀྱིས་ནད་གཞི་གསར་པ་འདིར་ཐུགས་འཁུར་ཆེན་པོ་བཞེས་པ་བཞིན་ཡི་རངས་ཞུ་ཡི་ཡོད། ཁོང་ཚོས་ཉེན་ཁ་ལ་འཛེམ་པར་གཞན་ལ་རོགས་འདེགས་བྱེད་ཀྱི་ཡོད། དེ་ནི་དོན་དམ་པའི་བྱམས་སྙིང་རྗེ་རེད། གཞན་ལ་ཕན་ཐོགས་བྱ་ཆེད་རང་གི་ཚེ་སྲོག་ཡིན་ནའང་བློས་གཏོང་བྱ་རྒྱུ་དེ་བྱ་འོས་པ་ཞིག་རེད། ཅེས་བཀའ་སློབ་བསྩལ།
༧གོང་ས་མཆོག་གིས་སློབ་མ་རྣམས་ཀྱི་བཀའ་འདྲི་གཞན་ཁག་ལ་བཀའ་ལན་གནང་སྐབས། མི་རིགས་དང་རིག་གཞུང་འདྲ་མིན་ནང་མཛེས་པའི་ངོས་འཛིན་འདྲ་མིན་ཡོད་ཀྱང་། ཚང་མས་ངོས་ལེན་གཅིག་མཚུངས་སུ་བྱེད་པའི་མཛེས་པ་དེ་བྱམས་བརྩེ་ཡིན་སྐོར་དང་། ཁོང་ནས་ནམ་ཡང་ནང་ཆོས་དེ་ལེགས་ཤོས་རེད་ཅེས་བརྗོད་མྱོང་མེད། ཆོས་ལུགས་ཞེས་པ་དེ་སྒེར་གྱི་གནད་དོན་ཞིག་ཡིན་སྟབས། མི་འགའ་ཤས་ལ་ཡེ་ཤུའི་ཆོས་དེ་ཕན་ནུས་ཆེ་བ་དང་འཚམ་ཤོས་དེ་ཡིན་སྲིད་དང་། ཨུ་རུ་སུའི་མི་འབོར་ནང་ཕ་མེས་ཡང་མེས་ནས་ནང་པ་ཡིན་མཁན་མང་པོ་ཡོད་སྟབས། ཞལ་འདོན་དང་ཆོ་ག་ཕྱག་ལེན་ལས་བརྒལ་ཏེ་ནང་པའི་གཞུང་ལུགས་ལ་སློབ་སྦྱོང་བྱ་དགོས་སྐོར་གྱི་བཀའ་སློབ་བསྩལ་གནང་སོང་།
གསར་འགོད་པ། པ་སངས་ཚེ་རིང་།
