སྦལ་ཏུག་ཁུལ་གྱི་གནད་ཡོད་མི་སྣ་ཁག་དང་ལྷན་དུ་ད་ལྟ་དང་མ་འོངས་པའི་ཡ་རབས་བཟང་སྤྱོད་སྐོར་གྱི་བགྲོ་གླེང་སྐབས་༧གོང་ས་མཆོག་གིས་གོ་ལ་ཚ་དྲོད་ཀྱི་རང་བྱུང་ཁོར་ཡུག་གི་དཀའ་ངལ་ཐོག་དམག་འཁྲུག་སོགས་ཀྱིས་དཀའ་ངལ་འཕར་མ་བཟོ་རྒྱུ་མེད་པའི་བཀའ་སློབ་སྩལ།
དེ་རིང་ཕྱི་ཚེས་ ༢ དང་ ༣ བཅས་ཉིན་གྲངས་གཉིས་རིང་༧གོང་ས་རྒྱལ་བ་རིན་པོ་ཆེ་མཆོག་གིས། སྦལ་ཏུག་མཚོ་རྒྱུད་རྒྱལ་ཁབ་ཁག་གི་གྲོས་ཚོགས་འཐུས་མི་དང་ཤེས་ཡོན་མི་སྣའི་སྐུ་ཚབ་ཁག་ཅིག་དང་ལྷན་དུ་ད་ལྟ་དང་མ་འོངས་པའི་ཡ་རབས་དང་སྤྱོད་བཟང་སྐོར་ལ་བགྲོ་གླེང་གི་མཛད་འཕྲིན་བཀའ་དྲིན་སྐྱོང་གི་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༩ སྟེང་བཞུགས་སྒར་རྒྱལ་བའི་ཕོ་བྲང་ནས་ཐད་གཏོང་བརྒྱུད་ཡ་རབས་བཟང་སྤྱོད་སྐོར་གྱི་བགྲོ་གླེང་དབུ་འཛུགས་སྐབས། ༧མགོན་པོ་གང་ཉིད་མཆོག་གིས། ངོས་རང་དེ་སྔོན་ལ་ཏི་ཝི་ཡ་ (Latvia) ནང་ཐེངས་ཁ་ཤས་རིང་ཕྱིན་ཏེ། ཨུ་རུ་སུའི་མི་མང་ལ་ཆོས་འབྲེལ་བྱས་པ་ཡིན། སྐབས་དེར་ཨུ་རུ་སུའི་ཆོས་ཞུ་བ་ཅིག་གིས་ཨུ་རུ་སུའི་མི་མང་པོས་ངོས་ཀྱི་སར་ནས་ཆོས་ཞུ་འདོད་ཡོད་ཀྱང་། ནམ་རྒྱུན་རྒྱ་གར་ནང་གསུང་ཆོས་ཞུ་བར་ཡོང་རྒྱུ་ནི་འགྲོ་གྲོན་ཆེན་པོ་ཡིན་སྟབས། ཨུ་རུ་སུའི་མང་ཚོགས་དཀྱུས་མ་མང་པོ་ཞིག་ཡོང་ཐུབ་ཀྱི་མེད་སྐོར་བརྗོད་སོང་བས། ངོས་ལ་སེམས་འགུལ་ཐེབས་ཏེ། ཨུ་རུ་སུའི་མི་མང་པོ་ཞིག་ལ་ཏི་ཝི་ཡའི་ནང་ཡོང་རྒྱུ་ལས་སླ་པོ་ཡིན་སྟབས། ངོས་ལ་ཏི་ཝི་ཡའི་ནང་ཐེངས་འགའ་ཤས་རིང་ཕྱིན་པ་ཡིན། ལ་ཏི་ཝི་ཡའི་མང་ཚོགས་ནས་ངོས་ལ་དགའ་མོལ་གནང་བ་དང་ས་གནས་གཞུང་གིས་ཆོས་འབྲེལ་གྱི་མཐུན་རྐྱེན་བསྐྲུན་གྱི་འདུག དེར་བརྟེན། ངོས་རང་ལོ་གཉིས་གསུམ་ཞིག་རིང་ལོ་རེར་ལ་ཏི་ཝི་ཡའི་ནང་ཕྱིན་ཏེ་ཆོས་འབྲེལ་བྱེད་ཀྱི་ཡོད་ལ། ས་གནས་གཞུང་གི་མཐུན་རྐྱེན་ཡག་པོ་ཡོད་སྟབས་ཨུ་རུ་སུའི་མི་མང་དང་སོག་པོའི་མི་མང་པོ་ཞིག་གསུང་ཆོས་ཞུ་བར་ཡོང་ཐུབ་པ་བྱུང་ཡོད། ད་ལྟ་ངོས་ནས་ལ་ཏི་ཝི་ཡ་དང་འབྲེལ་བའི་འདས་པའི་གནས་ཚུལ་རྣམས་དྲན་གསོ་བྱས་དུས་ཧ་ལས་པའི་ཡག་པོ་བྱུང་འདུག་པས། དེ་སྔོན་ངོས་རང་ལ་ཏི་ཝི་ཡར་སླེབས་སྐབས་གོ་སྒྲིག་ཞུ་མཁན་གྱི་འབྲེལ་ཡོད་ཚང་མར་ཐུགས་རྗེ་ཆེ་ཞུ་རྒྱུ་ཡིན།
དེ་རིང་གི་བརྗོད་གཞི་ནི་བཟང་སྤྱོད་ཡིན་པ་དང་ཆོས་ལུགས་མང་པོའི་གཞུང་ལུགས་ལྟར་ན། བཟང་སྤྱོད་ནི་ཆོས་ལུགས་ཀྱི་དད་པ་དང་འབྲེལ་བ་ཡོད་པ་ཞིག་ཡིན། འོན་ཀྱང་། ངོས་ནས་ནམ་རྒྱུན་ཆོས་དད་ཡོད་མེད་ཀྱི་ཁྱད་པར་ཙམ་མ་ཡིན་པར་རྒྱ་གར་གྱི་གནའ་རབས་ཆོས་ལུགས་ལྟར་ཡ་རབས་བཟང་སྤྱོད་ནི་ངེས་པར་ཆོས་ལུགས་ཀྱི་དད་པ་དང་འབྲེལ་བ་དགོས་པ་ཞིག་ཡིན་དགོས་ཟེར་གྱི་མེད། ད་ལྟ་ང་ཚོས་འགྲོ་བ་མིའི་གནས་སྟངས་སྐོར་བཤད་ཀྱི་ཡོད་པ་དང་། དངོས་ཡོད་གནས་ཚུལ་ལ་འཛམ་གླིང་འདིའི་ནང་མི་འབོར་ཐེར་འབུམ་བདུན་ཡོད་པ་ཚང་མ་འགྲོ་བ་མི་ཡིན་པ་གཅིག་གྱུར་དང་མཉམ་རུབ་ཀྱི་ཐོག་ནས་གོ་ལ་འདིའི་ནང་འཚོ་དགོས་ཀྱི་ཡོད་པ་རེད། འདས་པའི་འགྲོ་བ་མིའི་ལོ་རྒྱུས་ནང་དྲག་རྩུབ་དང་དམག་འཁྲུག་གི་དཀའ་ངལ་མང་དག་ཅིག་བྱུང་བ་ཡོད། གོ་མཚོན་བཟོ་བའི་དོན་དུ་དུས་ཚོད་དང་དཔལ་འབྱོར་གྱི་འགྲོ་གྲོན་ཕོན་ཆེན་བཏང་བ་ནི་ཧ་ཅང་ཐབས་སྐྱོ་བོ་རེད། ང་ཚོ་འགྲོ་བ་མི་ནི་གཞི་རྩའི་ཆ་ནས་སྤྱི་ཚོགས་ལ་བརྟེན་པའི་སེམས་ཅན་ཡིན། ཚན་རིག་པས་ང་ཚོ་སྤྱི་ཚོགས་ལ་བརྟེན་པའི་སེམས་ཅན་ཞིག་ཡིན་པ་དང་སྤྱི་ཚོགས་གང་དེའི་ཁོངས་གཏོགས་ཀྱི་སེམས་ཅན་ལ་བརྟེན་ནས་འཚོ་དགོས་ཀྱི་ཡོད་པར་བཤད་ཡོད། ཐོག་མར་སྐྱེས་པ་ནས་བཟུང་གཞན་ལ་བརྟེན་ནས་འཚོ་དགོས་ཀྱི་ཡོད་པ་ལྷས་སྐྱེས་སུ་ཡོད། དཔེར་ན་ཐོག་མར་ནང་མི་དང་སྤྲུན་མཆེད། དེ་ནས་སོ་སོའི་སྤྱི་ཚོགས་བཅས་ཆགས་ཀྱི་ཡོད། ང་ཚོར་ཆུང་བྱིས་པའི་དུས་ནས་བཟུང་སོ་སོའི་སྤྱི་ཚོགས་དང་གྲོགས་པོ་འདུ་ཤེས་ཡོད་པ་རེད། མཚམས་རེར་ང་ཚོས་སྤྱི་ཚོགས་ལ་བརྟེན་པའི་འགྲོ་བ་མིའི་རང་བཞིན་གྱི་འདུ་ཤེས་ཆུང་དྲགས་པའི་རྐྱེན་གྱིས། ང་ཚོ་དང་ཁྱེད་ཚོ། ང་དང་ཁོ་སོགས་ཕྱོགས་རིས་ལ་བསྙད་དེ་ཕན་ཚུན་གསོད་རེ་ཡོང་གི་ཡོད་ལ། དེའི་རིགས་ནི་ཀླ་ཀློའི་རིགས་ཀྱི་བསམ་བློ་ཆགས་ཀྱི་ཡོད། ང་ཚོ་ཚང་མ་སྤྱི་ཚོགས་ལ་བརྟེན་པའི་སེམས་ཅན་ཡིན་པ་དང་། དམིགས་བསལ་ཁ་སང་དེ་རིང་འཛམ་གླིང་འདིར་གནས་པའི་འགྲོ་བ་མི་ཐེར་འབུམ་བདུན་ཡོད་པ་ཚང་མའི་མ་འོས་པ་ཕན་ཚུན་གཅིག་ལ་གཅིག་བརྟེན་ཆགས་བསྡད་ཡོད་པ་རེད། ཅེས་གསུངས།
ཡང་མགོན་པོ་གང་ཉིད་མཆོག་གིས། ད་ལྟ་ང་ཚོར་གོ་ལའི་ཚ་དྲོད་ཇེ་མཐོར་ཕྱིན་པའི་དཀའ་ངལ་འཕྲད་ཀྱི་ཡོད། དཀའ་ངལ་དེ་ནི་མིའི་སྤྱི་ཚོགས་སྤྱི་ལ་འཕྲད་པའི་དཀའ་ངལ་ཡིན་དུས། རང་བྱུང་ཁོར་ཡུག་གི་དཀའ་ངལ་ཐོག་དམག་འཁྲུག་སོགས་ཀྱིས་དཀའ་ངལ་འཕར་མ་བཟོ་རྒྱུ་མེད་པ་རེད། ང་ཚོ་ཚང་མས་འཛམ་གླིང་ཞི་བདེ་ཅན་ཞིག་འདོད་ཀྱི་ཡོད་པས་འགྲོ་བ་མི་ཐེར་འབུམ་བདུན་རྣམས་གཅིག་གྱུར་གྱི་འདུ་ཤེས་བཅངས་ཐུབ་ན་བདེ་ཞིང་སྐྱིད་པ་ཡོང་ཐུབ་ཀྱི་རེད། ཁྱེད་རང་ཚོ་བྷལ་ཊིག་མངའ་ཁུལ་གྱི་རྒྱལ་ཁབ་ཨེ་སི་ཊོ་ནེ་ཡ་(Estonia) དང་ལ་ཏི་ཝི་ཡ། ལི་ཐའོ་ནི་ཡཱ་ (Lithuania) བཅས་ཀྱི་མང་ཚོགས་ཀྱི་གོ་ལ་གཅིག་གྱུར་གྱི་འདུ་ཤེས་གོང་འཕེལ་གཏོང་བའི་ནུས་པ་ཆེན་པོ་ཡོད་པ་རེད། ངོས་རང་ལོ་ན་ཆུང་དུས་སྐབས་ནས་པར་རིས་དང་འབྲེལ་བའི་དེབ་ཀློག་པར་དགའ་པོ་ཡོད། ལྷག་པར་དུ་འཛམ་གླིང་དམག་ཆེན་གཉིས་པའི་གནས་ཚུལ་དེ་འདྲའི་ཐོག་ཤེས་རྟོགས་ཡོང་གི་ཡོད། སྦལ་ཏིག་ཁུལ་གྱི་རྒྱལ་ཁབ་དེ་དག་སྐོར་ཤེས་ཀྱི་ཡོད། སྐབས་དེ་དུས་རྒྱལ་ཁབ་ཆེ་བས་ཆུང་བར་མཐོང་ཆུང་ངམ་མི་བརྩི་བའི་དཀའ་ངལ་འདུག ཕྱིས་སུ་ཁྱེད་རང་ཚོར་རང་དབང་ཐོབ་ནས་ངོས་རང་ས་གནས་སུ་བསླེབས་སྐབས་སེམས་ནང་ཧ་ཅང་དགའ་པོ་བྱུང་སོང་ལ། ང་ཚོ་འགྲོ་བ་མི་སྤྱི་ཡོངས་ལ་མཐར་ཐུག་གི་བདེ་སྐྱིད་ཅིག་གཅིག་གྱུར་གྱི་འདུ་ཤེས་ཐོག་ནས་ཡོང་གི་རེད། ཅེས་གསུངས།
དེ་རྗེས་དྲི་བ་དྲིས་ལན་སྐབས། ནད་ཡམས་ཀྱི་དུས་སྐབས་འདིར། ལེགས་སྐྱེས་དང་བསླབ་བྱ་ཆེ་ཤོས་ག་རེ་བྱུང་ཡོད་སྐོར་དྲིས་པར་༧གོང་ས་མཆོག་གིས། ནད་ཡམས་འདིའི་རྐྱེན་གྱིས་མི་མང་པོ་སྡུག་བསྔལ་གྱིས་མནར་བ་བྱུང་བ་རེད། ངོས་རང་འགྲོ་བ་མི་ཞིག་ཡིན་པ་དང་ངའི་གཅེན་གཅུང་རྣམས་ལ་སྡུག་བསྔལ་བྱུང་དུས་ངོས་རང་ལ་སེམས་འཚབ་ཆེན་པོ་ཡོང་གི་འདུག དུས་ཚོད་འདི་འདྲ་ཞིག་གི་སྐབས་སུ་སྨན་པ་དང་སྨན་ཞབས་མང་པོས་ལྷག་བསམ་ཟོལ་མེད་ཀྱིས་འགྲོ་བ་མིའི་རིགས་ཀྱི་སྡུག་བསྔལ་སེལ་ཐབས་ཀྱི་ཕྱག་ལས་གནང་བར་ངོས་ནས་རྗེས་སུ་ཡི་རངས་ཞུ་ཡི་ཡོད། ངོས་རང་ནང་པའི་དགེ་སློང་ཡིན་པའི་ཆ་ནས་ནད་ཀྱིས་མནར་བའི་སེམས་ཅན་ཉམས་ཐག་ཚོའི་ཆེད་དུ་རྒྱུན་དུ་གསོལ་བ་སྨོན་ལམ་བྱེད་བཞིན་པ་ཡིན། ནད་ཡམས་ཟློག་ཐབས་སུ་རྗེ་བཙུན་སྒྲོལ་མའི་ཟུང་སྔགས་བགྲང་ན་ཡག་པོ་ཡོད་པ་རེད། ཅེས་གསུངས།
བཟོད་པ་སྒོམ་པ་དེ་དཀའ་ལས་ཁག་པོ་ཡོད་པས་ང་ཚོས་བཟོད་པ་སྒོམ་པར་ཐབས་ཤེས་ག་རེ་ཡོད་སྐོར་དྲིས་པར། ༧གོང་ས་མཆོག་གིས། དཀའ་ངལ་འཕྲད་པའི་སྐབས་སུ་དཀའ་ངལ་གྱི་གཞི་རྩར་དཔྱད་པ་གཏོང་དགོས་རྒྱུ་གལ་ཆེན་པོ་རེད། དཀའ་ངལ་དེར་སེལ་ཐབས་ཡོད་ན་གདོང་ལེན་བྱེད་དགོས་པ་དང་། གལ་སྲིད་དཀའ་ངལ་དེ་སེལ་ཐབས་མེད་ཚེ་སེམས་སྡུག་བྱས་ན་ཕན་ཐོགས་མེད། ཕྱིའི་སྣང་ཚུལ་ལ་གཞི་མི་བཅོལ་བར་ནང་གི་རྣམ་དཔྱོད་བེད་སྤྱད་དེ་དཔྱད་པ་བྱ་དགོས་པ་དེ་གལ་ཆེན་པོ་ཡིན། མིའི་ཀླད་པ་དེ་གལ་ཆེན་པོ་ཡིན་པ་མ་ཟད་སེམས་ཀྱང་གལ་ཆེན་པོ་ཡིན། དེ་བཞིན་སེམས་ཁམས་རིག་པའི་སྐོར་ལ་སློབ་སྦྱོང་བྱས་ན་ཕན་ཐོགས་ཡོད། ཁོང་ཁྲོ་ལ་མི་དགེ་བའི་བློ་གཉེན་པོ་བསྟེན་སྟངས་དང་བྱམས་པའི་བློ་རྣམས་སེམས་ཁམས་རིག་པ་ནས་ཤེས་ཀྱི་ཡོད། ཅེས་བཀའ་ལན་གནང་།
གསར་འགོད་པ། བསྟན་འཛིན་ཕུར་བུ།
