ཁ་སང་ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ལགས་ནས་ཉེ་ལམ་རྒྱ་ནག་གཞུང་གིས་ཐའེ་ཝན་མཚོ་གླིང་ཁུལ་དུ་ཐའེ་ཝན་ལ་དམིགས་ཏེ་དྲག་ཤུགས་ཅན་གྱི་བྱ་འགུལ་སྤེལ་བཞིན་པ་ནི་བློ་འཚབ་རང་བཞིན་ཅན་ཞིག་ཡིན་པ་མ་ཟད་དྲག་ཤུགས་ཀྱིས་ཞི་བདེ་རྒྱ་མཚོའི་ནུབ་ཁུལ་གྱི་གནས་བབ་བསྒྱུར་ཐབས་བྱེད་པ་ནི་ནོར་འཁྲུལ་ཆེན་པོ་ཞིག་ཡིན་པའི་ཉེན་བརྡ་བཏང་འདུག
འདས་པའི་ཟླ་ཤས་ནས་བཟུང་རྒྱ་ནག་གཞུང་གིས་ཐའེ་ཝན་མཚོ་འགག་དང་ཞི་བདེ་རྒྱ་མཚོའི་ཁུལ་དུ་དྲག་དམག་འགྲེམས་འཇོག་ཤུགས་ཆེ་རུ་བཏང་སྟེ་དམག་སྦྱོང་བྱེད་བཞིན་ཡོད་པ་མ་ཟད། ཟླ་འདིའི་ཕྱི་ཚེས་ ༧ ཉིན་ཐའེ་ཝན་གྱི་མཚོ་གླིང་ (Pratas Islands) ཐོག་ཏུ་རྒྱ་ནག་གི་དྲག་ཆས་གནམ་གྲུ་ ༡༥ སིམ་འཛུལ་བྱས་ཡོད་སྟབས། ཐའེ་ཝན་གཞུང་གིས་རྒྱ་ནག་གི་གནམ་གྲུ་བསྐྱར་དུ་སླེབས་ཚེ་གས་གཏོར་གཏང་རྒྱུ་ཡིན་སྐོར་གྱི་ཉེན་བརྡ་བཏང་ཡོད་པ་དང་། གལ་སྲིད་རྒྱ་ནག་གིས་ཐའེ་ཝན་ལ་བཙན་འཛུལ་བྱས་ཚེ། དམག་འཁྲུག་རྒྱག་དགོས་བྱུང་ནའང་ཐའེ་ཝན་གྱིས་ཐེ་ཚོམས་ཅི་ཡང་མེད་པའི་ཐོག་ནས་ཐའེ་ཝན་མཚོ་གླིང་རང་ནུས་གང་ཡོད་ཀྱིས་སྲུང་རྒྱུ་ཡིན་སྐོར་བསྒྲགས་ཡོད་པ་ལྟར། ཨ་རིའི་གཞུང་ནས་ཀྱང་སྲིད་ཇུས་གསར་པ་བཟུང་སྟེ་ཐའེ་ཝན་ལ་སྲུང་སྐྱོབ་བྱ་རྒྱུ་ཡིན་སྐོར་བརྗོད་འདུག
ཁ་སང་ཕྱི་ཚེས་ ༡༡ ཉིན་གྱི་ཨ་རི་གཞུང་གིས་གསར་འགོད་གསལ་བསྒྲགས་ཐོག རྒྱ་ནག་གཞུང་གིས་ཐའེ་ཝན་མཚོ་འགག་ཏུ་དམག་སྦྱོང་བྱེད་བཞིན་པ་དང་ཐའེ་ཝན་གྱི་ནང་དུ་མཁའ་དམག་གཏོང་བཞིན་པ་དང་འབྲེལ། ཨ་རི་གཞུང་གིས་རྒྱ་ནག་ལ་དམག་དོན་གྱིས་རྒོལ་ལན་སློག་རྒྱུ་ཡིན་མིན་དྲིས་པར། ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) ལགས་ཀྱིས། ད་ལྟ་ངས་བཤད་ཐུབ་པ་ཞིག་ནི་ང་ཚོར་ཐའེ་ཝན་དེ་བཞིན་རྒྱལ་སྲུང་རང་སྐྱ་འཕེལ་བ་ཞིག་ཡོང་ཐུབ་པར་ཆོད་སེམས་བརྟན་པོ་ཡོད་པ་མ་ཟད། ཞི་བདེ་རྒྱ་མཚོའི་ནུབ་ཁུལ་གྱི་ཞི་བདེ་དང་བདེ་འཇགས་ཀྱི་ཐད་ལའང་ཆོད་སེམས་བརྟན་པོ་ཡོད། ཨ་རིའི་ཐའེ་ཝན་ཕྱི་འབྲེལ་ཁྲིམས་གཞི་ (Taiwan Relations Act) ཀྱི་འོག་ཨ་རི་ནི་ཐའེ་ཝན་གྱི་ཐོག་ལ་ལངས་ཕྱོགས་བརྟན་པོ་ཡིན། ཞེས་གསུངས་འདུག
ཉེ་ལམ་ནས་ཐའེ་ཝན་མཚོ་འགག་ཏུ་རྒྱ་ནག་གཞུང་གིས་དྲག་ཤུགས་ཆེ་རུ་གཏོང་བཞིན་པ་དང་བསྟུན། ཟླ་འདིའི་ཕྱི་ཚེས་ ༩ ཉིན་ཨ་རིའི་ཕྱི་སྲིད་ལྷན་ཁང་གིས་ལམ་སྟོན་ཡིག་ཆ་གསར་པ་ཞིག་སྤེལ་ཏེ་ཨ་རི་དང་ཐའེ་ཝན་གྱི་འབྲེལ་བ་ཇེ་ཟབ་ཏུ་གཏོང་ཐབས་སུ་ཐའེ་ཝན་གྱི་མགོ་ཁྲིད་དང་ཕོ་བྲང་དཀར་པོའི་མགོ་ཁྲིད་གཉིས་སྔར་ལྷག་རང་དབང་གིས་ཐུག་འཕྲད་བྱས་ཆོག་པ་བཀོད་ཡོད་འདུག་ལ། དེ་དང་འབྲེལ་ནས་རྒྱལ་སྲིད་ལྷན་ཁང་གི་མགྲིན་ཚབ་པ་ནེཌ་པ་རའེ་སི་ (Ned Price) ལགས་ཀྱིས། ལམ་སྟོན་ཡིག་ཆ་དེར་མཐུད་གྲོས་ཚོགས་ཀྱིས་ཀྱང་དགོས་ངེས་ཀྱི་བསྐྱར་ཞིབ་བྱེད་ཀྱི་ཡོད་པ་དང་། ཨ་རིའི་རྒྱ་ནག་གཅིག་གི་སྲིད་ཇུས་ལག་བསྟར་བྱེད་ཕྱོགས་དང་འབྲེལ། ཨ་རི་གཞུང་གིས་ཡུན་རིང་གཞུང་འབྲེལ་ཐོག་ནས་རྒྱ་ནག་ནི་པེ་ཅིན་གཞུང་ལ་ངོས་འཛིན་བྱས་པ་དང་འབྲེལ་ནས་གསལ་བཤད་ཞིག་བྱ་སྲིད་སྐོར་དང་། ཐའེ་ཝན་མཚོ་འགག་ཏུ་རྒྱ་ནག་གི་དམག་དོན་བྱ་འགུལ་ཤུགས་ཆེ་རུ་འགྲོ་བཞིན་པའི་ཐད་གཟབ་ནན་ངང་ལྟ་ཞིབ་བྱེད་བཞིན་ཡོད་སྐོར་བརྗོད་འདུག
རྒྱ་ནག་གཞུང་ཕྱོགས་ནས་ཐའེ་ཝན་མཚོ་འགག་ཏུ་རྒྱ་ནག་གཞུང་གིས་དྲག་ཆས་མཚོ་དམག་དང་མཁའ་དམག་གི་དམག་སྦྱོང་བྱེད་བཞིན་ཡོད་པ་དེ་ནི་འཆར་ཅན་གྱི་དམག་སྦྱོང་ཞིག་ཡིན་སྐོར་བརྗོད་ཀྱི་ཡོད་ནའང་། ཐའེ་ཝན་གཞུང་གིས་རྒྱ་ནག་གི་དྲག་དམག་རྣམས་ཉིན་ལྟར་ཐའེ་ཝན་གྱི་མཚོ་ཁོངས་སུ་འཛུལ་ཏེ་དཔུང་འཇུག་བྱེད་ཀྱི་ཡོད་སྐོར་ཀྱི་བསྐྱོན་བརྗོད་བྱེད་བཞིན་ཡོད་པ་དང་། ཟླ་འདིའི་ཕྱི་ཚེས་ ༧ ཉིན་ཐའེ་ཝན་མཚོ་འགག་ཏུ་ཨ་རི་གཞུང་གིས་མེ་ཤུགས་འཕུར་མདེལ་གཏོར་བའི་མཚོ་དམག་གྲུ་གཟིངས་ཞིག་གིས་ཐའེ་ཝན་མཚོ་ཁོངས་སུ་དམག་སྦྱོང་བྱས་ཡོད་པ་རེད། ཨ་རིའི་དམག་སྦྱོང་དེ་དང་འབྲེལ་རྒྱ་ནག་གི་ཕྱི་སྲིད་མགྲིན་ཚབ་པ་ཀྲོ་ལི་ཅན་ (Zhao Lijian) གྱིས། ཨ་རིའི་མཚོ་དམག་དེ་ཡིས་ཐའེ་ཝན་རང་བཙན་ཤོག་ཁག་ལ་བརྡ་ལན་ནོར་བ་ཞིག་སྤྲོད་ཀྱི་ཡོད་པ་མ་ཟད། ཐའེ་ཝན་མཚོ་འགག་གི་ཞི་བདེ་དང་བརྟན་རླིང་ཉེན་ཁའི་གནས་སུ་སྐྱེལ་བཞིན་ཡོད་སྐོར་གྱི་སྐྱོན་བརྗོད་བྱས་འདུག
གསར་འགོད་པ། ཀླུ་མགོན་ཐར།
