དགེ་སློང་དགེ་འདུན་ཚེ་རིང་མཆོག་ཉིན་གྲངས་ ༣༨ རིང་ཐུགས་དམ་དུ་བཞུགས་ཡོད་པ་རེད།

སྔགས་རམས་པ་རྒན་དགེ་འདུན་ཚེ་རིང་མཆོག་ཉིན་གྲངས་ ༣༨ རིང་ཐུགས་དམ་དུ་བཞུགས་ཏེ་ཡོངས་གྲགས་ཐོག་ནས་ཐུགས་དམ་དུ་བཞུགས་མཁན་དུས་ཡུན་རིང་ཤོས་དེ་ཆགས་ཀྱི་ཡོད་འདུག

འདི་གའི་གསར་ཁང་ལ་རྒྱུད་སྟོད་གྲྭ་ཚང་གི་ཡིག་ཚང་ནས་མཁོ་སྤྲོད་གནང་བའི་གནས་ཚུལ་ལྟར་ན། རྒྱུད་སྟོད་གྲྭ་ཚང་གི་དགེ་སློང་སྔགས་རམས་པ་དགེ་འདུན་ཚེ་རིང་མཆོག་ཕྱི་ཟླ་ ༣ ཚེས་ ༡༠ ཉིན་དགོངས་པ་གཞན་དོན་དུ་གཤེགས་ཚུལ་བསྟན་ནས། ཟླ་འདིའི་ཕྱི་ཚེས་ ༡༦ བར་ཉིན་གྲངས་ ༣༨ རིང་ཐུགས་དམ་དུ་བཞུགས་ཡོད་པ་དང་། ཟླ་འདིའི་ཕྱི་ཚེས་ ༡༩ ཉིན་གྱི་སྔ་དྲོར་༧སྐྱབས་རྗེ་མཁན་བླ་རྣམ་གཉིས་དབུ་བཞུགས་ཀྱིས་འདུས་མང་ནས་དཔལ་རྗོ་རྗེ་འཇིགས་བྱེད་ལྷ་བཅུ་གསུམ་གྱི་སྒོ་ནས་སྐུ་ཕུང་ཞུགས་འབུལ་དང་སྨོན་ལམ་གསུང་འདོན་གནང་ཡོད་པ་རེད།

གནས་ཚུལ་ནང་། དགེ་སློང་དགེ་འདུན་ཚེ་རིང་དམ་པ་ཁོང་གིས་སྔ་ཕྱི་བར་གསུམ་དུ་རྒྱུད་སྟོད་གྲྭ་ཚང་གི་ཆོས་འབྱུང་དང་མཆོད་དཔེ་སོགས་གསར་སྒྲིག་དང་བསྐྱར་ཞིབ་ཀྱི་ལས་གཞི་མང་པོའི་ནང་ཐུགས་ཁུར་བླ་མེད་བཞེས་ཀྱི་ཡོད་སྟབས། ནམ་རྒྱུན་སྒོ་གང་ས་ནས་དགོན་པའི་ལམ་སྟོན་དང་བཀའ་འདྲི་ཞུ་ཡུལ་གྱི་ཀ་ཆེན་ལྟ་བུ་ཞིག་ཡིན་པ་དང་།  མདོར་ན་དམ་པ་ཁོང་གིས་སྐུ་ཚེ་ཧྲིལ་པོར་གྲྭ་ཚང་འདི་ལ་ཐུགས་བརྩེ་ཆེན་པོས་རྨད་དུ་བྱུང་བའི་ལེགས་སྐྱེས་བཞག་གནང་མཛད་པར་བརྟེན། འདི་ལོའི་ཕྱི་ཟླ་ ༡ ཚེས་ ༡༤ ཉིན་རྒྱུད་སྟོད་གྲྭ་ཚང་ནས་བཀའ་དྲིན་རྗེས་དྲན་གྱི་ཚུལ་དུ་དགེ་རྒན་ཆེན་མོའི་མཚན་བསྟོད་གཟེངས་རྟགས་འབུལ་བཞེས་མཛད་ཡོད་ཅིང་། ཁོང་ཐུགས་དམ་དུ་བཞུགས་རིང་སྐུ་ཕུང་གི་གཟི་མདངས་མ་ཉམས་པར་ཐ་མལ་གྱི་ཕུང་པོའི་དྲི་མ་གཏན་ནས་མེད་པར་གསོན་ཉམས་ལྡན་པ་བཅས་ངོ་མཚར་རྨད་དུ་བྱུང་སྟེ། ཡོངས་གྲགས་ཀྱི་ཐོག་ནས་ཐུགས་དམ་བཞུགས་མཁན་དུས་ཡུན་རིང་ཤོས་དེ་ཆགས་ཀྱི་ཡོད་སྐོར་སོགས་བརྗོད་འདུག

རྒྱུད་སྟོད་གྲྭ་ཚང་གི་དགེ་བའི་བཤེས་གཉེན་ཆེན་མོ་རྒན་དགེ་འདུན་ཚེ་རིང་མཆོག་ནི། ཕྱི་ལོ་ ༡༩༣༥ ལོར་མདོ་སྟོད་སྨར་ཁམས་སུ་སྐུ་འཁྲུངས་ཤིང་། དགུང་གྲངས་ ༡༡ ལ་ཀླུ་རཱ་དགོན་པའི་སྒྲིག་ཁོངས་སུ་ཞུགས་ཏེ་དགེ་བའི་བཤེས་གཉེན་བྱམས་པ་རིན་པོ་ཆེ་ལས་དགེ་ཚུལ་སྡོམ་པ་བཞེས། དགུང་གྲངས་ ༡༩ ལ་འབྲས་བློ་གླིང་གྲྭ་ཚང་དུ་ཞུགས་ཏེ་སློབ་གཉེར་མཛད། དེ་ནས་རྒྱུད་སྟོད་གྲྭ་ཚང་དུ་སྒྲིག་ཞུགས་གནང་སྟེ་དགེ་བའི་བཤེས་གཉེན་དུ་མའི་དྲུང་ནས་མཐོང་བརྒྱུད་ཀྱི་ཕྱག་བཞེས་བཟང་པོ་དང་གྲྭ་ཚང་གི་ཆོ་ག་ཕྱག་ལེན། ཐིག་རྡུལ་ཚོན། དེ་བཞིན། མཆོད་བཟོ་དཀར་རྒྱན་བཅས་ལ་སྦྱངས་པ་མཐིལ་ཕྱིན་མཛད། དགུང་གྲངས་ ༢༡ ལ་སྐུའི་ཡོངས་འཛིན་༧སྐྱབས་རྗེ་གླིང་སྤྲུལ་རྡོ་རྗེ་འཆང་ཆེན་པོའི་ཞལ་སྔ་ནས་བསྙེན་རྫོགས་ཀྱི་སྡོམ་པ་བཞེས།

ཕྱི་ལོ་ ༡༩༥༩ ལོར་རྒྱ་གར་དུ་ཕེབས་ཏེ་ཐོག་མར་ཌལ་ཧོར་དང་དེ་ནས་བསྟན་འཛིན་སྒང་། དྷ་རམ་ས་ལ་བཅས་སུ་གྲྭ་ཚང་རིན་པོ་ཆེ་སྙིང་བཅངས་ཀྱིས་གལ་ཆེའི་ལས་འགན་མང་པོའི་འགན་ཁུར་བཞེས་པ་དང་། ལྷག་པར་དུ་རྒྱུད་ཆེན་གོང་མའི་ཕྱག་བཞེས་ཀྱི་རྒྱུན་བཟང་པོ་ཡི་དམ་གསང་བདེ་འཇིགས་གསུམ་གྱི་སྒྲུབ་མཆོད་རིམ་པ། འདོན་ལྟ་དབྱངས། དཀྱིལ་འཁོར་བྲི་བཞེངས། མཆོད་བཟོ་དཀར་རྒྱན་སོགས་རང་ཉིད་ཀྱིས་ཉམས་འོག་ཏུ་ཆུད་པའི་སྒོ་ནས་གདན་ས་ཆེན་མོ་ནས་ཕེབས་པའི་ཆོས་ཐོག་དགེ་བཤེས་རྣམ་པ་དང་རྒྱུད་པའི་སྐྱེད་རིམ་པ་རྣམས་ལ་འཆད་ཁྲིད་རྒྱ་ཆེར་གནང་འདུག དེ་བཞིན་༧གོང་ས་མཆོག་དང་སྐུའི་ཡོངས་འཛིན་རྣམ་གཉིས་གཙོས་གྲྭ་ཚང་གི་མཁན་ལས་ཟུར་པ་དུ་མའི་དྲུང་ནས་རྒྱུད་ཀྱི་འཆད་ཉན་དང་དབང་ལུང་མན་ངག་གི་རྒྱུན་བཟང་པོ་རྣམས་ཆད་ལུས་མེད་པ་གསན་བཞེས་མཛད། རྒྱུན་དུ་དམ་སྡོམ་མིག་འབྲས་བཞིན་སྲུང་བའི་ཐོག་ཐུགས་དམ་ཉམས་བཞེས་ལ་རྟག་ཏུ་གཞོལ་བར་མཛད་པ་མ་ཟད་དྷ་སར་གནས་སྤོས་ཏེ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་གྱི་གཞི་བསྙེན་ཆེན་མོ་ཡང་བཞུགས་གནང་མཛད།

གསར་འགོད་པ། བསྟན་འཛིན་ཕུར་བུ།