བླ་མ་བློ་བཟང་ལགས་ནས་བོད་ཀྱི་ས་མཚམས་ནས་ཡོང་བའི་བྱིས་པ་ཁག་ཅིག་ལ་རོགས་རམ་གནང་གི་འདུག

བླ་མ་བློ་བཟང་ལགས་ནས་བོད་ཀྱི་ས་མཚམས་ནས་ཡོང་བའི་བྱིས་པ་ཁག་ཅིག་ལ་ཁ་ཡོད་ལག་ཡོད་ཀྱིས་རོགས་རམ་གནང་གི་ཡོད་པ་མ་ཟད། བཞུགས་སྒར་ཁུལ་གཙོས་པའི་མི་རིགས་རིས་མེད་ཀྱིས་དཀའ་ངལ་ཅན་ཚང་མར་གང་ཐུབ་ཅི་ཐུབ་ཀྱིས་རོགས་རམ་གནང་གི་ཡོད་འདུག

དེ་རིང་ཁ་སང་རྒྱ་གར་ནང་ཉིན་རེར་མི་གྲངས་འབུམ་གཉིས་ལྷག་ལ་ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་འཕྲད་བཞིན་ཡོད་པའི་སྐབས་འདིར། བོད་དང་བལ་ཡུལ་གྱི་ས་མཚམས་ཙོམ་ནས་བོད་ཁྱིམ་སློབ་གྲྭར་སློབ་འཇུག་སླད་ཡོང་བའི་བྱིས་པ་དྲུག་དང་ཁོ་ཚོ་སྐྱེལ་མཁན་པ་ལགས་གཉིས་བཅས་ཁྱོན་མི་ ༨ བལ་ཡུལ་ནས་བཞུགས་སྒར་དྷ་སར་འབྱོར་བ་དང་ཏོག་དབྱིབས་གཉན་རིམས་འགོས་ཁྱབ་དང་དཔལ་འབྱོར་ཐོག་ནས་དཀའ་ངལ་འཕྲད་ཡོད་ནའང་། སྟབས་ལེགས་པ་ཞིག་ལ་ཏོག་དབྱིབས་གཉན་རིམས་ཁྱབ་བརྡལ་བྱུང་བ་ནས་ད་ལྟའི་བར་བཞུགས་སྒར་ཁུལ་གཙོས་པའི་བོད་མི་དཀའ་ངལ་ཅན་ཡོངས་ལ་གང་ཐུབ་ཅི་ཐུབ་ཀྱིས་རོགས་རམ་གནང་བླ་མ་བློ་བཟང་དར་རྒྱས་ལགས་ཀྱིས་ཁོ་ཚོར་རོགས་རམ་གནང་གི་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ཡོངས་གྲགས་སུ་བླ་མ་བློ་བཟང་ཞེས་འབོད་པའི་གྲྭ་བ་གྲྭ་རྐྱང་དཀྱུས་མ་ཁོང་ལ་བྱིས་པ་ཚོའི་སྐོར་ནས་བཀའ་འདྲི་ཞུས་སྐབས། བོད་ཁྱིམ་སློབ་གྲྭས་སློབ་འཇུག་གི་ཞལ་བཞེས་གནང་བ་ལྟར། པ་ལགས་གཉིས་ཀྱིས་བྱིས་པ་དེ་ཚོ་ཙོམ་ནས་བོད་ཁྱིམ་སློབ་གྲྭ་སློབ་འཇུག་བྱེད་སླད་སྐྱེལ་ཡོང་བ་རེད་འདུག ལམ་ནས་བུ་གཉིས་ལ་ཏོག་དབྱིབས་གཉན་རིམས་འགོས་འདུག ཅེས་བརྗོད་བྱུང་བ་དང་། ད་ལྟ་ཏོག་ནད་བྱུང་བའི་བུ་གཉིས་དེ་བླ་མ་བློ་བཟང་ལགས་ཀྱིས་འཕྲོད་བསྟེན་ལས་ཁུངས་ལ་སྙན་ཞུ་ཕུལ་བ་བརྒྱུད་དབུས་སྣེ་ལེན་ཁང་གི་འགོག་དབྱེ་ཟུར་འཇོག་ཁང་དུ་འཇུག་ཐུབ་ཡོད་པ་རེད།

བླ་མ་བློ་བཟང་ལགས་ཀྱིས་ཁོ་ཚོར་ནད་ཡམས་དང་དཔལ་འབྱོར་གཉིས་ཐད་ནས་དཀའ་ངལ་འཕྲད་ཀྱི་ཡོད་སྐོར་ལ་བརྗོད་དོན། ཁོ་ཚོར་དྷ་སར་འབྱོར་བ་དང་བྱིས་པ་ཚོ་བོད་ཁྱིམ་སློབ་གྲྭ་སློབ་འཇུག་བྱེད་པར་ཏོག་ནད་མེད་པའི་བརྟག་དཔྱད་གྲུབ་འབྲས་སྟོན་དགོས་ཀྱི་ཡོད་པ་དང་། མགྲོན་ཁང་དུ་བསྡད་དེ་ན་ཚ་དང་དཔལ་འབྱོར་གཉིས་ཀྱི་ཐོག་ནས་དཀའ་ངལ་འཕྲད་ཀྱི་འདུག དེར་བརྟེན། སྐུ་ངོ་ཟླ་བ་ཚེ་རིང་ལགས་སུ་ཞུ་བ་འཐེན་པ་བརྒྱུད་ངས་ཡོངས་གླིང་སློབ་གྲྭའི་འོག་ཏུ་སྡོད་ཁང་དང་ཟ་རྒྱུ་འཐུང་རྒྱུ་ཚང་མ་གྲ་སྒྲིག་བྱས་ནས་བཞག་ཡོད། འོན་ཀྱང་། ཁ་སང་དང་དེ་རིང་བཅས་བུ་གུ་ཚོར་ཉིན་རེ་བཞིན་ཚ་བ་རྒྱས་ཏེ་ན་ཡི་ཡོད་པ་དང་ང་ཚོས་བཟོད་མ་ཐུབ་པར་བརྟེན། ད་ལྟ་དྷ་རམ་ས་ལའི་གཞུང་གི་སྨན་ཁང་རྫོང་ན་རུ་སླེབས་ཡོད། ཅེས་བརྗོད་བྱུང་བ་དང་། གལ་སྲིད་བྱིས་པ་དེ་ཚོར་ཏོག་ནད་འགོས་ཡོད་པའི་གྲུབ་འབྲས་འཐོན་ཚེ་འཕྲོད་བསྟེན་ལས་ཁུངས་བརྒྱུད་འགོག་དབྱེ་ཟུར་འཇོག་ཁང་དུ་འཇུག་ཐུབ་པའི་སྐྱབས་འཇུག་ཞུ་རྒྱུ་དང་གལ་སྲིད་ནད་རྟགས་མེད་ཚེ་ཁ་ཐུག་བོད་ཁྱིམ་སློབ་གྲྭར་འཇུག་ཐུབ་པའི་རེ་བ་རྒྱག་གི་ཡོད་པ་རེད།

གཞན་ཡང་གསར་འགོད་པས་ད་ལྟ་རྒྱ་གར་ནང་ནད་ཡམས་འགོས་ཁྱབ་ཤུགས་ཆེན་འགྲོ་བཞིན་ཡོད་པ་དང་བསྟུན། བོད་མི་དཀའ་ངལ་ཅན་གཞན་ཡོད་མེད་བཀའ་འདྲི་ཞུས་སྐབས་བླ་མ་བློ་བཟང་ལགས་ཀྱིས། ད་ལྟའི་ཆར་དྷ་ས་ས་གནས་མགོ་འཛིན་ལས་ཁུངས་སུ་ཧིན་སྒོར་འབུམ་གཅིག་ཞལ་འདེབས་གནང་རྒྱུ་གཏན་འཁེལ་བྱས་པ་ཡིན། གང་ཡིན་ཟེར་ན། དྷ་ས་དེ་ཁ་འཐོར་གཞིས་ཆགས་ཡིན་པ་དང་གཞུང་ནས་རོགས་སྐྱོར་མེད་པར་ས་གནས་མགོ་འཛིན་རང་གིས་ཐབས་ཤེས་གནང་དགོས་ཀྱི་ཡོད་སྟབས། ངས་སྨན་ཞབས་པ་གཅིག་གི་གླ་ཆ་ཚང་མ་སྤྲོད་རྒྱུ་ཡིན་པའི་ཁས་ལེན་ཞུས་ཡོད། ན་ནིང་ཟླ་བཞི་དང་ལྔའི་རིང་ངས་སྨན་ཞབས་པ་གཉིས་ཀྱི་གླ་ཆ་ཚང་མ་ཕུལ་ཡིན། ཞེས་བརྗོད་བྱུང་ལ། བླ་མ་བློ་བཟང་ལགས་ནས་བོད་མི་ཙམ་མིན་པར་བཞུགས་སྒར་ཁུལ་གྱི་རྒྱ་གར་བ་དང་མི་རིགས་གཞན་ལའང་རོགས་རམ་གནང་གི་ཡོད་འདུག

ཡང་དེ་རིང་ཉིན་རྒྱབ་ཏུ་བླ་མ་བློ་བཟང་ལགས་ཀྱི་ངོ་དེབ་ཐད་གཏོང་བརྒྱུད། བྱིས་པ་དེ་ཚོའི་འཕྲོད་བསྟེན་གནས་སྟངས་སྐོར་ལ་རྒྱུས་ལོན་བྱེད་བཞིན་པའི་བརྙན་ཞིག་སྤྱི་ཚོགས་བརྒྱུད་ལམ་ཁག་ཏུ་བརྒྱུད་སྐུར་དང་མཆན་སོགས་མང་པོ་བྲིས་ཡོད་པའི་ནང་། མི་ཁག་ཅིག་གིས་བླ་མ་བློ་བཟང་ལགས་སུ་ཐུགས་ཆེ་གནང་ཞུས་པ་དང་ཁག་ཅིག་གིས་ཁོང་བྱང་ཆུབ་སེམས་དཔའ་དངོས་རེད་ཅེས་མཆན་འབྲི་མཁན་ཡང་འདུག

གསར་འགོད་པ། སྐལ་བཟང་སྦྱིན་པ།