བོད་ཧིན་ས་མཚམས་ཉེན་རྟོག་པས་ཏོག་དབྱིབས་ནད་པར་མཐུན་འགྱུར་གནང་བ།

དེ་རིང་ཕྱི་ཚེས་ ༣ ཉིན་ནས་བཟུང་བོད་ཧིན་ས་མཚམས་ཉེན་རྟོག་ཁང་གིས་གཉེར་བཞིན་པའི་རྒྱ་གར་གྱི་རྒྱལ་ས་ལྡི་ལིའི་ཏོག་དབྱིབས་ནད་པའི་ལྟ་སྐྱོང་ལྟེ་གནས་(The Sardar Patel Covid Care Centre)ཀྱིས། ཏོག་དབྱིབས་ཀྱི་ཛ་དྲག་གནས་སྟངས་འོག་སྲོག་རླུང་ཡོས་ཆས་ ༥༠༠ དང་ཉལ་ཁྲི་བཅས་མཐུན་འགྱུར་གནང་སྟེ་དེ་རིང་གཅིག་པུར་ཉུང་མཐར་ཏོག་དབྱིབས་ནད་པ་ ༡༡༠ ལྟ་སྐྱོང་ནང་བླངས་ཡོད་འདུག

བོད་ཧིན་ས་མཚམས་ཀྱི་ཉེན་རྟོག་ཚན་པའི་དཔོན་པོ་གྷོ་ཡལ་ (D K Goyal) ལགས་ཀྱིས། ནད་པའི་སྲོག་རླུང་ཚད་གཞི་ ༨༥ དང་དེ་ལས་མང་བ་ཡོད་པ་རྣམས་ལྟེ་གནས་དེས་དྭང་ལེན་གནང་གི་ཡོད་ཀྱང་། དེ་ནི་ནད་པར་ལྟ་སྐྱོང་ལྟེ་གནས་ཤིག་ཡིན་པ་ལས་སྨན་ཁང་ཞིག་མིན་པས། ཛ་དྲག་ནད་པ་སྨན་བཅོས་ཀྱི་མཐུན་རྐྱེན་ཡག་ག་དགོས་མཁན་ཚོས་ཐད་ཀར་སྨན་ཁང་ལ་འབྲེལ་བ་བྱེད་དགོས་སྐོར་བརྗོད་འདུག་ལ། འདས་ལོར་རྒྱ་གར་ནང་ཏོག་དབྱིབས་འགོས་ཁྱབ་བྱུང་སྐབས་ཀྱང་། ལྟེ་གནས་ཁང་དེས་ནད་པ་ཉལ་ས་གཅིག་ཁྲི་ཙམ་མཁོ་སྤྲོད་བྱས་ཏེ་ནད་པ་སྟོང་ཕྲག་མང་པོ་དྲག་སྐྱེད་བྱུང་ཡོད་འདུག

ཏོག་དབྱིབས་ནད་པའི་ལྟ་སྐྱོང་ལྟེ་གནས་དེས་ནད་པའི་ལོ་དང་ཁ་བྱང་། ཁ་པར་ཨང་གྲངས། སྲོག་རླུང་གི་གནས་ཚད་དང་འཕར་རྩ་སོགས་ཀྱི་གནས་སྟངས་རྒྱུས་ལོན་བྱས་རྗེས་གཞི་ནས་ཚད་གཞི་ཟིན་པའི་ནད་པ་རྣམས་དྭང་ལེན་གནང་གི་ཡོད་འདུག་ལ། བོད་ཧིན་ས་མཚམས་ཀྱི་ཉེན་རྟོག་ཚན་པ་དང་མཐའ་སྲུང་དམག་མི། སྨན་པ། སྨན་ཞབས། དེ་བཞིན་རྒྱལ་ཁབ་སྲུང་སྐྱོབ་ཀྱི་ལས་བྱེད་པ་བཅས་ལ་ལྟེ་གནས་དེས་ཉལ་ཁྲི་མང་བ་མཁོ་སྤྲོད་གནང་གི་ཡོད་འདུག

ལྡི་ལིའི་བློན་ཆེན་ཨར་ཝིན་ཌི་ཀི་ཇི་རི་ཝལ་ (Arvind Kejriwal) ལགས་ཏོག་དབྱིབས་ནད་པའི་ལྟ་སྐྱོང་ལྟེ་གནས་དེར་ཡོང་སྟེ། སྲིད་གཞུང་དཀའ་ངལ་འཕྲད་པའི་སྐབས་སུ་མཐུན་འགྱུར་གནང་བར་ཐུགས་རྗེ་ཆེ་ཞུས་ཡོད་འདུག་ལ། ནད་པའི་འདྲུད་འཁོར་ཉལ་ཁྲི་ (ICU beds) ༢༠༠ གྲ་སྒྲིག་བྱེད་ཀྱི་ཡོད་སྐོར་བརྗོད་འདུག

འདས་པའི་ཆུ་ཚོད་ ༢༤ ནང་རྒྱ་གར་ནང་ཏོག་དབྱིབས་ནད་པ་འབུམ་གསུམ་(༣༩༢༤༨༨)ལྷག་བྱུང་ཡོད་པ་དང་། ནད་པ་ ༣༦༨༩ འདས་གྲོངས་སུ་ཕྱིན་ཡོད་འདུག རྒྱ་གར་ནང་དུ་ཏོག་ནད་ཅན་མང་དུ་ཕྱིན་པའི་རྐྱེན་གྱིས་མངའ་སྡེ་མང་པོའི་ནང་དུ་སྲོག་རླུང་གིས་མ་འདང་བར་ནད་པ་མང་པོ་འདས་གྲོངས་སུ་འགྲོ་ཡི་ཡོད་སྟབས། མུ་དྷི་གཞུང་ལ་སྐྱོན་བརྗོད་བྱེད་མཁན་ཧ་ཅང་མང་པོ་ཡོང་གི་ཡོད་འདུག ཉེ་སྔོན་ཕྱི་ཟླ་ ༤ ཚེས་ ༢༧ ཉིན་རྒྱ་གར་དབུས་འཕྲོད་བསྟེན་དང་ཁྱིམ་ཚང་བདེ་དོན་བློན་ཆེན་ལྷན་ཁང་གིས། སྲོག་རླུང་ཡོ་ཆས་ཁྲི་ ༥ (metric tonnes)ནང་འདྲེན་གནང་རྒྱུ་ཡིན་སྐོར་བསྒྲགས་ཡོད་ཀྱང་། གཞུང་དང་སྒེར་གྱི་སྨན་ཁང་ཁག་གི་ནང་སྲོག་རླུང་ཡོ་ཆས་དང་ཉལ་ཁྲིས་མ་འདང་བའི་དཀའ་ངལ་ཤུགས་ཆེན་ཡོང་གི་ཡོད་འདུག

གསར་འགོད་པ། བསྟན་འཛིན་ཕུར་བུ།