ཁ་སང་ཕྱི་ཚེས་ ༥ ཉིན་རྒྱ་གར་དབུས་གཞུང་གི་རྒྱང་འཕྲིན་ལས་ཁུངས་ (Department of Telecom) ངོས་ནས་རྒྱ་གར་གྱི་རྒྱང་འཕྲིན་བཟོ་གྲྭ་བཞི་ལ། རྒྱ་གར་ནང་ཐོན་རིམ་ ༥ པའི་སྐུད་མེད་དྲ་ལམ་ (5G network) འཛུགས་སྐྲུན་གྱི་ཚོད་ལྟའི་ལས་གཞི་དངོས་སུ་མགོ་རྩོམ་པའི་ཆོག་མཆན་སྤྲད་ཡོད་ནའང་། ཚོད་ལྟའི་ལས་གཞིའི་ནང་རྒྱ་ནག་གི་འཕྲུལ་རིག་བཟོ་གྲྭ་ཧྭ་ཝེ་ (Huawei) དང་ཛི་ཊི་ཨི་ (ZTE) རྒྱང་འཕྲིན་བཟོ་གྲྭ་གཉིས་ཚུད་མེད་པར་རྒྱ་ནག་གཞུང་གིས་དགག་བྱ་ཆེན་པོ་བཏོན་ཡོད་འདུག
དབུས་རྒྱང་འཕྲིན་ལས་ཁུངས་ངོས་ནས་ཐོན་རིམ་ ༥ པའི་སྐུད་མེད་དྲ་ལམ་འཛུགས་སྐྲུན་གྱི་ཚོད་ལྟའི་ལས་གཞི་དེ། རྒྱ་གར་གྱི་སྒེར་གཉེར་ཨེར་ཊལ་ (Airtel) རྒྱང་འཕྲིན་བཟོ་གྲྭ་དང་། རི་ལན་སི་ཇིའོ་ (Reliance Jio)། དེ་བཞིན་ཝོ་ཌ་ཧྥོན་ཨའེ་ཌི་ཡ་ (Vodafone Idea) དང་། གཞུང་གཉེར་མ་ཧཱ་ན་གྷར་རྒྱང་འཕྲིན་བཟོ་གྲྭ་ (Mahanagar Telephone Nigam Limited,MTNL) བཅས་ལ་ཆོག་མཆན་སྤྲད་ཡོད་ཅིང་། སྒེར་གཉེར་བཟོ་གྲྭའི་ཁྲོད་ནས་ཇིའོ་ཡིས་རང་གིས་བཟོ་སྐྲུན་བྱས་པའི་འཕྲུལ་རིག་མ་ལག་བཀོལ་སྤྱོད་བྱ་རྒྱུ་དང་། གཞན་གསུམ་གྱིས་སེ་ཝེ་ཌན་ལ་རྟེན་གཞི་བྱས་པའི་ཨེ་རིག་སན་ (Ericsson) བཟོ་གྲྭ་དང་། ཧྥིན་ལན་ཌིའི་ནོ་ཀི་ཡ་(Nokia)། ལྷོ་ཀོ་རི་ཡའི་སེམ་སང་ (Samsung) བཟོ་གྲྭ་བཅས་དང་མཉམ་འབྲེལ་བྱ་རྒྱུ་ཡིན་འདུག
དེ་འབྲེལ་ཐད་རྒྱ་ནག་གཞུང་ཚབ་ཁང་གི་མགྲིན་ཚབ་པས། རྒྱ་ནག་གི་རྒྱང་འཕྲིན་བཟོ་ལས་ཁང་རྣམས་རྒྱ་གར་གྱི་བཟོ་སྐྲུན་ཁང་དང་མཉམ་འབྲེལ་ཐོག་ཐོན་རིམ་ ༥ པའི་སྐུད་མེད་དྲ་ལམ་གྱི་ཚོད་ལྟའི་ལས་གཞིའི་ནང་བཅུག་མེད་པ་དེར་བློ་འཚབ་དང་བློ་འགྱོད་ཆེན་པོ་བྱུང་། ཞེས་དང་། འདས་པའི་ལོ་དུ་མའི་རིང་རྒྱ་གར་ནང་རྟེན་གཞི་བྱས་པའི་རྒྱ་ནག་གི་བཟོ་གྲྭ་ཁག་གིས་རྒྱ་གར་ནང་ལས་ཀ་མཁོ་འདོན་དང་། རྒྱ་གར་གྱི་འཛུགས་སྐྲུན་དང་རྒྱང་འཕྲིན་ཚན་པར་ཕན་ཐོགས་གང་འཚམ་བྱས་ཡོད། ད་ཐེངས་རྒྱ་ནག་གི་བཟོ་གྲྭ་རྣམས་རྒྱ་གར་གྱི་སྐུད་མེད་དྲ་ལམ་ཚོད་ལྟའི་ལས་གཞི་ནས་ཕུད་པ་དེས་ཁོ་ཚོའི་ཐོབ་ཐང་དང་ཁེ་དབང་ལ་དོ་ཕོག་གཏོང་གི་ཡོད་པ་མ་ཟད། རྒྱ་གར་གྱི་ཚོང་གི་ཁོར་ཡུག་ཡར་རྒྱས་ཐད་གྱོད་གུད་ཆེན་པོ་ཐེབས་རྒྱུ་རེད། ཅེས་བློ་ཕམ་ཡོད་སྐོར་བརྗོད་འདུག
སྤྱིར་རྒྱ་གར་གཞུང་གིས་གཞུང་འབྲེལ་ཐོག་ནས་རྒྱ་གར་གྱི་རྒྱང་འཕྲིན་བཟོ་གྲྭ་རྣམས་ཀྱིས་ཧྭ་ཝེ་དང་ཛི་ཊི་ཨི་ཡིས་མཚོན་པའི་རྒྱ་ནག་གི་བཟོ་ལས་ཁང་གི་འཕྲུལ་རིག་བཀོལ་སྤྱོད་མི་ཆོག་པའི་བཀའ་རྒྱ་བཏང་མེད་ལ། ལྷག་པར་དུ་ཕྱི་ལོ་ ༢༠༡༩ ལོའི་ཟླ་ ༡༢ པའི་ནང་རྒྱ་གར་གྱི་དབུས་རྒྱང་འཕྲིན་ལས་ཁུངས་ཀྱིས་ཧྭ་ཝེ་དང་ཛི་ཊི་ཨི་ཚུད་པའི་བཟོ་གྲྭ་ཚང་མ་རྒྱ་གར་གྱི་ཐོན་རིམ་ ༥ པའི་སྐུད་མེད་དྲ་ལམ་འཛུགས་སྐྲུན་གྱི་ཚོད་ལྟའི་ལས་གཞིར་ཞུགས་ཆོག་སྐོར་བརྗོད་ཡོད། འོན་ཀྱང་། ད་ལན་ཚོད་ལྟའི་ལས་གཞི་གཉེར་མཁན་གྱི་རྒྱ་གར་གྱི་རྒྱང་འཕྲིན་བཟོ་གྲྭ་རྣམས་ཀྱིས་རྒྱ་ནག་གི་བཟོ་ལས་ཁང་གཅིག་ལའང་མཉམ་འབྲེལ་བྱས་མེད་ལ། དེ་དག་གི་འཕྲུལ་རིག་བཀོལ་སྤྱོད་བྱ་རྒྱུའི་ཆོག་མཆན་ཡང་ཞུས་མེད་པར་བརྟེན། རྒྱ་ནག་གི་བཟོ་གྲྭ་གཅིག་ཀྱང་ལས་གཞི་དེའི་ནང་ཚུད་མེད་པ་རེད།
ཕྱོགས་གཅིག་ནས་འདས་ལོའི་ཕྱི་ཟླ་ ༡༢ ནང་རྒྱ་གར་གཞུང་གིས་རྒྱང་འཕྲིན་ཚན་པའི་བདེ་འཇགས་སོགས་ལ་དམིགས་ཏེ། འདི་ལོའི་ཕྱི་ཟླ་ ༧ ནས་བཟུང་རྒྱ་གར་གྱི་རྒྱང་འཕྲིན་བཟོ་གྲྭ་རྣམས་ཀྱིས་ཕྱིའི་བཟོ་གྲྭ་ཁག་གི་འཕྲུལ་རིག་བཀོལ་སྤྱོད་ཀྱི་ཐད་ལ་ཚོད་འཛིན་བྱ་རྒྱུ་ཡིན་པ་མ་ཟད། གཞུང་ངོས་ནས་ཡིད་ཆེས་འཕེར་བའི་ཕྱིའི་བཟོ་སྐྲུན་ཁང་ཁག་གི་ཐོ་གཞུང་ཞིག་བཟོས་ཏེ། རྒྱ་གར་གྱི་བཟོ་གྲྭ་རྣམས་ཀྱིས་ཐོ་གཞུང་དེའི་ནང་ཡོད་པའི་བཟོ་སྐྲུན་ཁང་མ་གཏོགས་གཞན་གྱི་འཕྲུལ་རིག་སྤྱོད་མི་ཆོག་པ་བཟོ་རྒྱུ་ཡིན་སྐོར་བསྒྲགས་ཡོད་ཅིང་། དབྱེ་ཞིབ་པ་རྣམས་ཀྱིས་ད་ཐེངས་རྒྱ་གར་གྱི་སྒེར་གཉེར་བཟོ་གྲྭ་དག་གིས་ཀྱང་རྒྱ་ནག་གི་བཟོ་སྐྲུན་ཁང་གི་འཕྲུལ་རིག་སྤྱོད་རྒྱུའི་ཆོག་མཆན་ཞུས་མེད་པའི་རྒྱུ་མཚན་དེ་རང་ལ་ཐུག་གི་ཡོད་སྐོར་བརྗོད་འདུག
ཧྭ་ཝེ་ནི་རྒྱ་ནག་ཙམ་དུ་མ་ཟད་འཛམ་གླིང་གི་རྒྱང་འཕྲིན་འཕྲུལ་རིག་བཟོ་སྐྲུན་ཁང་ཆེ་ཤོས་དེ་ཡིན་ནའང་། འདས་པའི་ལོ་ཤས་ནང་ཨ་རི་གཙོས་པའི་ནུབ་གླིང་རྒྱལ་ཁབ་མི་ཉུང་བས་རྒྱ་ནག་དམར་ཤོག་གཞུང་གིས་ཧྭ་ཝེ་ཡི་འཕྲུལ་རིག་བརྒྱུད་མི་མང་ལ་སོ་ལྟ་བྱེད་ཀྱི་ཡོད་སྲིད་པའི་སྐྱོན་འཛུགས་བྱས་ཏེ། སྲིད་འཛིན་ཟུར་པ་ཊོམ་ཕུ་ཡིས་ཕྱི་ལོ་ ༢༠༡༩ ལོར་ཨ་རིའི་བཟོ་གྲྭ་རྣམས་ཀྱིས་ཧྭ་ཝེའི་འཕྲུལ་རིག་བཀོལ་སྤྱོད་མི་ཆོག་པར་བཟོས་ཡོད་པ་མ་ཟད། ཨ་རིའི་མཐུན་གྲོགས་རྒྱལ་ཁབ་རྣམས་ཀྱིས་ཧྭ་ཝེ་བཀག་སྡོམ་བྱ་རྒྱུའི་ལམ་སྟོན་བྱས་པ་ལྟར། ཨོ་གླིང་དང་ནེའུ་ཛི་ལན་ཌི། དབྱིན་ཡུལ་བཅས་ཀྱིས་ཧྭ་ཝེ་རང་གི་ཐོན་རིམ་ ༥ པའི་སྐུ་མེད་དྲ་ལམ་འཛུགས་སྐྲུན་ལས་གཞིའི་ནང་ཞུགས་མི་ཆོག་པར་བཟོས་ཡོད།
ཨ་རིའི་གཞུང་གིས་ཧྭ་ཝེ་དེ་རྒྱ་ནག་གཞུང་གི་ལག་ཆར་བཀོལ་སྤྱོད་བྱེད་སྲིད་པའི་རྒྱུ་མཚན་དུ། ཧྭ་ཝེ་གསར་འཛུགས་བྱེད་མཁན་རན་ཀྲེང་ཧྥེ་ (Ren Zhengfei) ཟེར་བ་དེ་ཕྱི་ལོ་ ༡༩༨༣ བར་ལོ་དགུའི་རིང་རྒྱ་ནག་མི་དམངས་བཅིངས་གྲོལ་དམག་ཟེར་བའི་ཁོངས་མི་ཡིན་པ་མ་ཟད། ཁོ་པ་རྒྱ་ནག་དམར་ཤོག་ཚོགས་པའི་ཚོགས་མི་ཡང་ཡིན་པ་རེད། གཞན་ཡང་ཨ་རིའི་གཞུང་གིས་རྒྱ་ནག་གི་ཕྱི་ལོ་ ༢༠༡༧ ལོའི་རྒྱལ་ཁབ་ཀྱི་གསང་བའི་ཁྲིམས་ཡིག་ (National Intelligence Law) ནང་། ཚོགས་པ་སྒྲིག་འཛུགས་དག་གིས་རྒྱལ་ཁབ་ཀྱི་གསང་བའི་གནད་དོན་དང་འབྲེལ་བའི་ཐད་ལ་གཞུང་ལ་རྒྱབ་སྐྱོར་དང་རམ་འདེགས་བྱེད་དགོས་སྐོར་བཀོད་ཡོད་པ་ལྟར། རྒྱ་ནག་གཞུང་གིས་ཁྲིམས་ཡིག་དེའི་འོག་ནས་ཧྭ་ཝེ་ལ་སོ་མྱུལ་གྱི་ལས་ཀ་བྱ་རུ་འཇུག་སྲིད་པ་ཞིག་ཡིན་སྐོར་བརྗོད་ཡོད། འོན་ཀྱང་ཧྭ་ཝེ་འཕྲུལ་རིག་བཟོ་སྐྲུན་ཁང་ངོས་ནས་ད་བར་རྒྱ་ནག་གཞུང་གིས་ཁོ་ཚོར་སོ་ལྟ་བྱ་རུ་བཅུག་མེད་སྐོར་འགྲེལ་བརྗོད་བྱས་ཡོད་པ་རེད།
གསར་འགོད་པ། པ་སངས་ཚེ་རིང་།
