ཨ་ཧྥེ་རི་ཁའི་རྒྱལ་ཁབ་མ་ལི་ནས་ཡིན་པའི་བུད་མེད་ཅིག་ལ་ཕྲུ་གུ་དགུ་མཉམ་དུ་སྐྱེས་ཏེ་འཛམ་གླིང་གི་སྐྱེ་ཐེངས་གཅིག་ལ་བྱིས་པ་མང་ཤོས་སྐྱེས་མཁན་བུད་མེད་ཆགས་ཡོད་འདུག
དེ་རིང་ཕྱི་ཚེས་ ༧ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། འཛམ་གླིང་གི་རྒྱལ་ཁབ་སྐྱོ་ཤོས་ཀྱི་གྲས་སུ་གཏོགས་ཀྱི་ཡོད་ཅིང་ནུབ་ཨ་ཧྥི་རི་ཁའི་རྒྱལ་ཁབ་མཱ་ལེ་ (Mali) ཡི། ལོ་ན་ ༢༥ ཡིན་པའི་ཧ་ལི་མཱ་ (Halima Cissé) ཞུ་བའི་བུད་མེད་ཅིག་གིས་ཁྱོན་བྱིས་པ་ ༩ སྐྱེས་ཏེ། སྐྱེ་ཐེངས་གཅིག་ལ་བྱིས་པ་མང་ཤོས་སྐྱེས་མཁན་གྱི་འཛམ་གླིང་ཇེ་ནེ་སི་ཟིན་ཐོ་ (World Guinness Record) གསར་པ་ཞིག་བཀོད་ཡོད་པ་རེད་ལ། སྐྱེས་མ་ཐག་པའི་ཕྲུ་གུ་རྣམས་ཟླ་བདུན་ཙམ་ཡིན་པས་གློག་འོད་དྲོད་ཁང་ (incubator)་དུ་ཟླ་བ་གཉིས་སམ་གསུམ་རིང་བཞག་དགོས་ཀྱི་ཡོད་འདུག
མོ་རོ་ཁོ་སྨན་ཁང་གི་དབུ་འཛིན་ཡུས་སི་ཧྥི་ཨེ་ལོབ་ (Youssef Alaoui) ལགས་ཀྱིས། གནས་ཚུལ་འདི་དམིགས་བསལ་ཞིག་དང་དཀོན་པོ་རེད། ཕྲུ་གུའི་ཨ་མ་ཧ་ལི་མཱ(Halima Cisse)ལགས་ཀྱི་ཕྲུ་གུ་དགུ་ལས་ལྔ་བུ་མོ་དང་བཞི་བུ་ཡིན་ལ། མ་བུ་ཚང་མ་བདེ་པོ་དང་ཐང་པོ་རེད་ལ། ཕྲུ་གུ་དེ་དག་སྐྱེས་པའི་སྐབས་སུ་ལྗིད་ཚད་ ༥༠༠ གྷ་རམ་དང་ཀེ་ལོ་གཅིག་བར་རེད་འདུག ཅེས་བརྗོད་ཡོད་པ་རེད།
ཡང་ཁོང་གིས། ཧ་ལི་མྰར་མངལ་ཆགས་ནས་བདུན་ཕྲག་ ༢༥ སྐབས་སྨན་ཁང་དུ་འབྱོར་ཞིང་། དེ་ནས་བདུན་ཕྲག་ ༣༠ བར་འཕར་འགྱངས་བྱེད་ཐུབ་ཡོད་སྐོར་དང་། སྨན་པ་ ༡༠ དང་ཛ་དྲག་གི་སྨན་ཞབས་པ་ ༢༥ ཡི་རོགས་སྐྱོབ་འོག་ཕྲུ་གུ་རྣམས་སྐྱེས་ཐུབ་ཡོད་པ་དང་། དང་ཐོག་ཁྲག་མང་པོ་ཐོན་ནས་མོའི་གནས་སྟངས་དེ་ཛ་དྲག་ཆེན་པོ་ཆགས་ཡོད་ཀྱང་། ད་ལྟའི་ཆར་ཁོ་མོ་ཉེན་ཁ་ལས་ཐར་ཡོད་པ་དང་ཁོ་མོའི་གཟུགས་པོའི་གནས་སྟངས་ཡག་པོ་ཆགས་ཡོད་པ་རེད། ང་ཚོའི་རེ་བ་ལ་ཨ་མ་དང་ཕྲུ་གུ་རྣམས་མགྱོགས་མྱུར་དྲག་སྐྱེད་ཡོང་བའི་སྨོན་འདུན་ཡོད། ཅེས་བརྗོད་འདུག
དང་ཐོག་མཱ་ལིན་སྨན་ཁང་གིས་སྦྲུམ་བུར་ (ultrasound) བརྟག་དཔྱད་བྱེད་སྐབས་ཕྲུ་གུ་བདུན་ཡོད་པའི་བརྟག་འབྲས་བཏོན་ཡོད་ཀྱང་། ཕྱིས་སུ་མཐུན་རྐྱེན་ལེགས་པའི་མོ་རོ་ཁོ་ (Morocco) ་སྨན་ཁང་ནས་བརྟག་དཔྱད་བྱེད་སྐབས་ད་དུང་ཕྲུ་གུ་གཉིས་ལྷག་ལུས་བྱུང་ཡོད་པའི་གནས་ཚུལ་ཐོན་ཡོད་པ་དང་། ཧ་ལི་མཱ་སྨན་ཁང་དེར་འབྱོར་ནས་བདུན་ཕྲག་ལྔའི་རྗེས་སུ་ཕྲུ་གུ་རྣམས་སྐྱེས་ཡོད་འདུག
ཕྲུ་གུའི་པ་ལགས་ཁ་ཌིར ཨར་བྷའེ་ (Adjudant Kader Arby) ནི་ད་ལྟའང་མཱ་ལི་ལ་ཡོད་པ་དང་ཁོང་གིས། ངའི་བཟའ་ཟླ་མོ་རོ་ཁོ་རུ་ཡོད་ཀྱང་རྒྱུན་དུ་འབྲེལ་བ་བྱེད་ཀྱི་ཡོད། ངའི་ནང་མིའི་མ་འོངས་པའི་མི་ཚེ་ལ་སེམས་ཁྲལ་མེད། ལྷ་ཡིས་ང་ཚོ་ལ་ཕྲུ་གུ་རྣམས་གནང་བ་རེད། ཅེས་སེམས་ཁྲལ་མེད་སྐོར་བརྗོད་འདུག
ཕྲུ་གུ་མཚེ་མ་དང་མཚེ་གསུམ། ཡང་ན་དེ་ལས་མང་བ་སྐྱེས་པའི་གནས་ཚུལ་གང་ཙམ་ཡོང་གི་ཡོད་པ་རེད། ཕྱི་ལོ་ ༡༩༧༡ ལོར་ཨོ་སི་ཊོ་ལི་ཡའི་བུད་མེད་གཅིག་ལ་ཕྲུ་གུ་དགུ་སྐྱེས་ཡོད་པ་དང་གཞན་ཡང་ཕྱི་ལོ་ ༡༩༩༩ ལོར་མ་ལ་ཞེ་ཡའི་བུད་མེད་གཞན་ཞིག་ལ་ཕྲུ་གུ་དགུ་སྐྱེས་ཡོད་པ་རེད། འོན་ཀྱང་ཕྲུ་གུ་གཅིག་ཀྱང་གསོན་པོར་གནས་ཐུབ་མེད་པ་རེད། ཕྱི་ལོ་ ༢༠༠༩ ལོར་ཨ་རིའི་བུད་མེད་ཅིག་ལ་ཕྲུ་གུ་བརྒྱད་སྐྱེས་ཏེ་གསོན་པོར་གནས་ཐུབ་ཡོད་འདུག
གསར་འགོད་པ། བསྟན་འཛིན་ཕུར་བུ།
