བོད་ཀྱི་འབྲས་ནད་ཚོགས་པས་རང་ཉིད་བློ་གཏོང་གིས་ཏོག་དབྱིབས་ནད་རིམས་ཀྱི་ཛ་དྲག་གནས་སྟངས་ལ་ཐུག་པའི་བོད་མི་མང་པོར་རོགས་རམ་གནང་བཞིན་པར་དགའ་ལྡན་ཕོ་བྲང་གིས་བསྔགས་བརྗོད་གནང་བ་དང་འབྲེལ་ཞལ་འདེབས་གནང་འདུག
ད་ལྟ་ཆར་རྒྱ་གར་ནང་ཏོག་དབྱིབས་གཉན་རིམས་ཀྱི་ཛ་དྲག་གནས་སྟངས་འོག བོད་ཁྲི་ཕྲག་མང་པོར་དཀའ་ངལ་འཕྲད་བཞིན་ཡོད་པ་དང་བསྟུན། རྒྱ་གར་རྒྱལ་ས་ལྡི་ལི་རུ་རྟེན་གཞི་བྱས་པའི་བོད་ཀྱི་འབྲས་ནད་ཚོགས་པས། ལྡི་ལི་བསམ་ཡས་གླིང་གི་བོད་མི་རྣམས་གཙོ་བྱས་པའི་ཏོག་དབྱིབས་ཛ་དྲག་གནས་སྟངས་འོག་དཀའ་ངལ་ཅན་ཚོར་རོགས་རམ་གནང་གི་ཡོད་པར། དགའ་ལྡན་ཕོ་བྲང་ནས་ལེགས་གསོལ་བསྔགས་བརྗོད་གནང་བ་དང་སྦྲགས་ཧིན་སྒོར་ ༡༡༠༠༠༠ ཞལ་འདེབས་གནང་ཡོད་འདུག
དགའ་ལྡན་ཕོ་བྲང་གི་བསྔགས་བརྗོད་ཡི་གེ་ནང་། ༧གོང་ས་མཆོག་ནས་དགོས་ངེས་ཆེ་བའི་མིར་རོགས་སྐྱོར་བྱེད་པ་ནི་བྱམས་བརྩེ་ལག་ལེན་དུ་བསྟར་བ་ཡིན་གསུངས་ཡོད་པ་ལྟར། ཁྱེད་ཀྱི་ཚོགས་པའི་ངོས་ནས་སྤྱི་ཚོགས་ཞབས་ཞུ་ལེགས་པོ་སྒྲུབ་བཞིན་ཡོད་པ་དང་། དམིགས་བསལ་ཏོག་དབྱིབས་གཉན་རིམས་ཀྱི་ཛ་དྲག་གི་དུས་སྐབས་འདིར་དགོས་ངེས་ཆེ་བའི་ནད་པ་མང་པོར་རོགས་རམ་གནང་བཞིན་པར་ང་ཚོས་ཡི་རངས་བསྔགས་བརྗོད་ཞུ་ཡི་ཡོད་པ་མ་ཟད། དགའ་ལྡན་ཕོ་བྲང་གི་ཐེབས་རྩ་ནས་ལེགས་གསོལ་བསྔགས་བརྗོད་མཚོན་སླད་ཧིན་སྒོར་ ༡༡༠༠༠༠ ཞལ་འདེབས་གནང་རྒྱུའི་ཐུགས་ཐག་བཅད་སོང་། ང་ཚོས་ཁྱེད་དང་ཁྱེད་ཀྱི་ཚོགས་པའི་ཚོགས་མི་ཡོངས་ལ་འཚམས་འདྲི་ཞུ་ཡི་ཡོད། ཅེས་བརྗོད་ཡོད་པ་རེད།
བོད་ཀྱི་འབྲས་ནད་ཚོགས་པར་དགའ་ལྡན་ཕོ་བྲང་གི་བཀའ་ཡིག་དེ་འབྱོར་བ་དང་བསྟུན། དེ་རིང་ཉིན་རྒྱབ་ཁོ་ཚོས་ངོ་དེབ་སྟེང་། ༧གོང་ས་མཆོག་ནས་བོད་ཀྱི་འབྲས་ནད་ཚོགས་པར་ཐུགས་བརྩེའི་བཀའ་ཡིག་གནང་སྟེ། སྤྱིར་འབྲས་ནད་ཀྱི་ནད་པ་དང་། ཡང་སྒོས་ད་ལྟའི་དུས་ཚོད་གཉན་འཕྲང་གི་སྐབས་འདིར། རང་གི་ལུས་སྲོག་ལ་ཇི་མི་སྙམ་པར་སྙིང་སྟོབས་ཞུམ་མེད་ཀྱི་ཐོག་ནས་ཉེ་འཁོར་གྱི་ཏོག་ནད་ ༡༩ ཅན་གྱི་བོད་པའི་ནད་པ་རྣམས་སྐྱོབ་གང་ཐུབ་གནང་བར་དགའ་ལྡན་ཕོ་བྲང་གི་ཡིག་ཚང་བརྒྱུད་བསྔགས་བརྗོད་ཀྱི་མེ་ཏོག་དང་སེམས་ཤུགས་ཀྱི་མེ་ལྕེ་རབ་ཏུ་སྤར་ཞིང་། བོད་ཀྱི་འབྲས་ནད་ཚོགས་པ་འདི་གཞུང་འབྲེལ་མིན་པའི་ཚོགས་པ་ཆུང་ཆུང་ཞིག་ཡིན་ཡང་། བུང་བ་གསེར་གཟིགས་ཀྱིས་འབྲས་ནད་ཚོགས་པར་ཐུགས་བརྩེའི་བཀའ་ཡིག་གནང་བ་དེ་ལ་བརྟེན་ནས། ངེད་འབྲས་ནད་ཚོགས་པའི་ཚོགས་མི་ཡོངས་ལ་བརྗོད་མི་ཤེས་པའི་དགའ་སྤྲོ་འབུམ་གྱིས་ཁེངས་ཡོད་སྐོར་སོགས་བརྗོད་འདུག
གཞན་ཡང་། ཁ་སང་ཕྱི་ཚེས་ ༦ ཉིན་དགའ་ལྡན་ཕོ་བྲང་གིས་གསལ་བསྒྲགས་ཤིག་སྤེལ་བའི་ནང་། ཧི་མ་ཅལ་མངའ་སྡེའི་ནང་ཏོག་དབྱིབས་རིམས་ནད་ཁྱབ་བརྡལ་གྱི་ཛ་དྲག་གནས་སྟངས་སྔོན་འགོག་གི་ཆེད་དུ་མངའ་སྡེ་གཞུང་གིས། ཟླ་འདིའི་ཕྱི་ཚེས་་༦ ནས་ ༡༦ བར་ཉིན་གྲངས་བཅུའི་རིང་ལ་ཐེམ་སྤང་བཀའ་རྒྱ་གནང་རྒྱུའི་བཀོད་ཁྱབ་བཏང་འདུག་པ་ལྟར། དགའ་ལྡན་ཕོ་བྲང་ཡིག་ཚང་གི་སྐྱབས་ཞུ་ཁང་ཚེས་ ༦ ནས་ཉིན་གྲངས་བཅུའི་རིང་སྒོ་འབྱེད་རྒྱུ་མིན་པའི་དགོངས་འཇགས་ཞུ་དགོས་སྐོར་བཀོད་པ་ལ་ལྟར། དེ་རིང་འདི་གའི་གསར་འགོད་པས་ཞལ་པར་བརྒྱུད་དགའ་ལྡན་ཕོ་བྲང་གི་གསར་འགོད་འབྲེལ་མཐུད་པ་ཚེ་བརྟན་བསམ་འགྲུབ་ལགས་སུ་བཀའ་འདྲི་ཞུས་སྐབས། ཧི་མ་ཅལ་མངའ་སྡེ་གཞུང་གི་ཐེམ་སྤང་བཀོད་ཁྱབ་འོག་དགའ་ལྡན་ཕོ་བྲང་ཡིག་ཚང་གི་སྐྱབས་ཞུ་ཁང་ཉིན་བཅུའི་རིང་སྒོ་བརྒྱབ་ཡོད་པ་དང་། ཉིན་གྲངས་དེ་དག་རིང་སྐྱབས་ཞུའི་ལམ་ཁ་གཞན་མེད་སྐོར་གསུངས་བྱུང་།
གསར་འགོད་པ། སྐལ་བཟང་སྦྱིན་པ།
དགོས་ངེས་ཆེ་བའི་མིར་རོགས་སྐྱོར་བྱེད་པ་ནི་བྱམས་བརྩེ་ལག་ལེན་དུ་བསྟར་བ་ཡིན།