བཙན་བྱོལ་བོད་མི་ཚོས་རྒྱ་གར་གཞུང་མང་ལ་རོགས་དངུལ་ཧིན་སྒོར་ས་ཡ་ ༥༠ ཙམ་ཕུལ་ཡོད་འདུག

ཁ་སང་ཕྱི་ཚེས་ ༡༢ ཉིན་ས་ག་ཟླ་བའི་ཚེས་གཅིག་དང་རེས་གཟའ་ལྷག་པ། རྒྱལ་སྤྱིའི་སྨན་ཞབས་པའི་ཉིན་མོ་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྨན་ཞབས་པ་གཙོ་བོར་གྱུར་བའི་འཕྲོད་བསྟེན་གྱི་ལས་བྱེད་ཡོངས་ལ་བཀྲ་ཤིས་བདེ་ལེགས་དང་རྗེས་སུ་ཡི་རང་ཞུས་པ་དང་སྦྲགས། བཀའ་ཤག་གིས་རྒྱ་བལ་འབྲུག་གསུམ་ལ་ཡོད་པའི་བོད་མི་དང་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་ཚོར། རྒྱ་གར་ནང་ཏོག་དབྱིབས་གཉན་རིམས་འགོས་ཁྱབ་ཀྱི་ཚ་རླབས་གཉིས་པ་འཕྱུར་ཏེ་ཛ་དྲག་ཆགས་པ་དེར་རོགས་དངུལ་ཞལ་འདེབས་གང་ཐུབ་གནང་དགོས་པའི་འབོད་སྐུལ་ཞུས་ཡོད་པ་ལྟར། རྒྱ་གར་གྱི་སྲིད་བློན་གྱི་ཏོག་དབྱིབས་རོགས་སྐྱོར་ཐེབས་རྩར་ (PM-CARE FUND)བོད་མི་ཚོས་ཞལ་འདེབས་ཧིན་སྒོར་ས་ཡ་ ༥༠ ཙམ་ཕུལ་ཐུབ་པ་བྱུང་སྐོར་གསལ་བསྒྲགས་གནང་འདུག

སྲིད་སྐྱོང་མཆོག་གི་གསལ་བསྒྲགས་གནང་། ཨ་རི་དོན་ཁང་གི་ཁྱབ་ཁོངས་ནས་ཧིན་སྒོར་ས་ཡ་ ༢༠ ་དང་། སུད་སི་དོན་ཁང་གི་ཁྱབ་ཁོངས་ནས་ཧིན་སྒོར་ས་ཡ་ ༡༠། སྦིལ་ཛིལ་ (Brazil)དོན་ཁང་གི་ཁྱབ་ཁུངས་ནས་འབུམ་ ༣༧། དེ་བཞིན་ཐའེ་ཝན་ནས་འབུམ་ ༣༠ དང་། ཨོ་སི་ཊོ་ལི་ཡ་དང་ནེའུ་ཛེ་ལན་ཌི་ནས་འབུམ་ ༢༧ བཅས་ཕྱི་རྒྱལ་ཁག་ནས་ཞལ་འདེབས་ཁྱོན་བསྡོམས་ཧིན་སྒོར་ས་ཡ་ ༤༠ གནང་ཡོད་པ་དང་། རྒྱ་བལ་འབྲུག་གསུམ་ལ་ཡོད་པའི་བོད་མི་ཚོས་འབུམ་ ༨༠ དང་སྲི་ཞུ་ལས་བྱེད་པའི་ཉིན་གཅིག་གི་ཕོགས་བཅས་བསྡོམས་ནས་རྒྱ་གར་གྱི་སྲིད་བློན་མཆོག་གི་ཏོག་དབྱིབས་རོགས་སྐྱོར་ཐེབས་རྩ་ (PM-CARE FUND) ལ་ཞལ་འདེབས་ཧིན་སྒོར་ས་ཡ་ ༥༠ ཙམ་ཕུལ་ཐུབ་པ་བྱུང་བ་དེ་ཡག་པོ་བྱུང་སོང་བསམ་གྱི་འདུག  རྒྱུ་མཚན་ནི་རྒྱ་གར་གཞུང་མང་གཉིས་ལས་བཀའ་དྲིན་ཆེ་བ་ང་ཚོ་བོད་མིར་ཡོད་པ་མ་རེད། ང་ཚོ་ཆུང་དུས་ནས་སྐྱེས་ས་དང་འཚར་ས། བོད་ནས་ལུང་པ་ཤོར་བའི་གནས་སྟངས་ཀྱི་སྐབས་སུ་རྒྱ་གར་གྱིས་བདག་པོ་བརྒྱབ་སྟེ་གཞིས་ཆགས་དང་འཕྲོད་བསྟེན། སློབ་གྲྭ་སོགས་གང་ཅིའི་ཐད་ནས་རོགས་སྐྱོར་གནང་ཡོད་པ་རེད། ད་ལན་ཛ་དྲག་གནས་སྟངས་སྐབས་སུ་རྒྱ་གར་གཞུང་ལ་རོགས་སྐྱོར་ཆེད་ཞལ་འདེབས་བརྒྱབ་ཐུབ་པ་དེ་ཡག་པོ་བྱུང་སོང་། བཀའ་ཤག་ངོས་ནས་འབོད་སྐུལ་ཞུས་པ་ལྟར་བོད་མི་སྤྱི་ཡོངས་ནས་གང་ཐུབ་ཅི་ཐུབ་གནང་སྟེ་ཞལ་འདེབས་བརྒྱབ་པ་དེ་ལ་སྙིང་ཐག་པ་ནས་ཐུགས་རྗེ་གནང་ཞུ་ཡི་ཡོད། རྒྱ་གར་གཞུང་གི་གནད་ཡོད་མི་སྣ་ཚོས་གསན་པ་ཡིན་ནའང་དགའ་ཚོར་བྱུང་སྟེ། བོད་པ་ཟེར་བ་དེ་༧གོང་ས་མཆོག་གིས་གསུངས་པ་ལྟར་བཀའ་དྲིན་བསམ་མཁན་ཞིག་རེད་འདུག  རྒྱ་གར་ལ་དཀའ་ངལ་འཕྲད་པའི་སྐབས་སུ་གདུང་སེམས་མཉམ་སྐྱེད་བྱེད་པའི་ཐོག་ནས་མཉམ་དུ་ལངས་ཀྱི་འདུག  ཅེས་བརྡ་ལན་བཟང་པོ་ཞིག་སྤྲོད་ཐུབ་ཀྱི་རེད་བསམ་གྱི་འདུག  ཅེས་གསུངས་སོང་།

ཡང་སྲིད་སྐྱོང་མཆོག་ནས་བོད་མིའི་སྒྲིག་འཛུགས་ཀྱི་ཕོགས་རིམ་ཚོགས་ཆུང་གི་སྙན་ཐོ་གཞིར་བཟུང་། ཕྱི་ལོ་ ༢༠༡༦ ནས་ ༢༠༢༡ བར་དུ་ལོ་ལྔ་ཆགས་ཀྱི་ཡོད་སྟབས། གྲོས་ཚོགས་ནས་བཀའ་འཁྲོལ་ཐོབ་ཡོད་ལ། ལས་བྱེད་དམའ་རིམ་གྱི་ཕོགས་བརྒྱ་ཆ་ ༡༨ སྤར་བ་དང་ལས་བྱེད་མཐོ་བའི་ཕོགས་བརྒྱ་ཆ་ ༡༠ སྤར་བ་ལྟ་བུ་ཆགས་ཡོད་སྐོར་དང་། འཕྲོད་བསྟེན་ཐོག་ནས་སྨན་ཞབས་པ་གཙོ་བོ་ཆགས་ཀྱི་ཡོད་པས་ (B.Sc Nurse) ལ་བརྒྱ་ཆ་ ༡༠ དང་ (Staff Nurse) ལ་བརྒྱ་ཆ་ ༡༥། (Auxiliary Nurse) ལ་བརྒྱ་ཆ་ ༢༠ བཅས་སྤར་བ་དང་། འཕྲོད་བསྟེན་རང་ཁུངས་ཀྱི་ཁ་ལོ་བ་ལ་ཕྱི་ལོ་ ༢༠༡༡ ལོར་ཕོགས་སྟོང་ཕྲག་དྲུག་ཡིན་པ་དང་ད་ལོ་སྟོང་ཕྲག་ ༡༨ ལ་སྤར་ཡོད་སྐོར་དང་གསུངས་བ་དང་འབྲེལ། ད་ལན་སྨན་ཞབས་པ་ཚོ་ནད་པ་དང་ཐད་ཀར་འབྲེལ་བ་བྱེད་ཀྱི་ཡོད་པས་སྟོང་མིན་ཙམ་གྱིས་ནང་སྲིད་དང་འཕྲོད་བསྟེན། ཤེས་རིག་ལྷན་ཁང་གསུམ་གྱི་སྨན་ཞབས་པ་ཚང་མ་ལ་སྟོང་ཕྲག་ལྔ་རེ་ཐུགས་རྗེ་ལེགས་འབུལ་དུ་གནང་རྒྱུ་ཡིན་དང་། དེ་བཞིན་སྨན་ཞབས་པའི་ནང་མི་ཚོར་ནད་ཡམས་དང་འབྲེལ་བའི་ན་ཚ་འགོས་པ་དེ་འདྲ་བྱུང་ན། བཀའ་ཤག་གི་ངོས་ནས་འཕྲོད་བསྟེན་ལས་ཁུངས་བརྒྱུད་དེ་མཐུན་འགྱུར་གང་ཐུབ་ཅི་ཐུབ་གནང་གི་ཡིན། ང་ཚོས་སྨན་ཞབས་པའི་ནང་མི་འགའ་ཤས་སྙུང་མཁན་ལ་མཐུན་རྐྱེན་སྦྱར་ཐུབ་པ་བྱུང་སོང་། སྨན་ཞབས་པ་ཡོངས་ལ་ནད་ཡམས་དང་འབྲེལ་ནས་སྐུ་ལས་ལ་མུ་མཐུད་བདག་སྐྱོང་གནང་རོགས་གནང་ཞུ་ཡི་ཡིན། ཞེས་དང་། ནང་སྲིད་ལས་ཁུངས་ཀྱི་ཁྱབ་ཁོངས་དབུས་བོད་མིའི་ངལ་སེལ་ཚོགས་པ་(Central Tibetan Relief Committee) དང་རང་ཁུངས་ཀྱི་ཕོགས་འདྲ་བོ་ཆགས་ཡོད་པ་དང་། དེ་བཞིན། སམ་བྷོ་ཊའི་ཁྱབ་ཁོངས་ལ་ཡོད་པའི་ལས་བྱེད་ཀྱི་ཕོགས་སྤར་ཐུབ་ཡོད་སྐོར་གསུངས་འདུག

གསར་འགོད་པ། བསྟན་འཛིན་ཕུར་བུ།