མ་འོངས་པ་ལའང་རྒྱ་ནག་དམར་ཤོག་ཚོགས་པ་ནི་ཆོས་དད་རང་དབང་ཐད་ཉེན་ཁ་ཆེ་ཤོས་ཤིག་ཡིན་པའི་སྙན་ཐོ་བཏོན།

ཨ་རི་གཞུང་གིས་ཕྱི་ལོ་ ༢༠༢༠ ལོའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་བཏོན་པའི་ནང་བོད་ནང་མུ་མཐུད་ཆོས་ལུགས་དད་མོས་རང་དབང་ཐོག་དམ་དྲག་ཤུགས་ཆེན་བྱེད་ཀྱི་ཡོད་པ་དང་་རྒྱ་ནག་གཞུང་གིས་བོད་བརྒྱུད་ནང་བསྟན་སོགས་ཆོས་ལུགས་གཞན་དང་གྲངས་ཉུང་མི་རིགས་ཁག་ལ་རྩ་མེད་གཏོང་བའི་སྲིད་ཇུས་འཛིན་བཞིན་ཡོད་སྐོར་བཀོད་འདུག

ཁ་སང་ཕྱི་ཚེས་ ༡༢ ཉིན་ཨ་རིའི་རྒྱལ་སྲིད་ལྷན་ཁང་གིས་ཕྱི་ལོ་ ༢༠༢༠ ལོའི་བོད་དང་ཧོང་ཀོང་། ཤིན་ཅང་། མཱ་ཀོ་སོགས་ཚུད་པའི་འཛམ་གླིང་གི་རྒྱལ་ཁབ་དང་ཡུལ་ལུང་ཁག་ ༢༠༠ མ་ཟིན་ཙམ་གྱི་ནང་གི་ཆོས་དད་རང་དབང་སྐོར་ལ་དཔྱད་ཞིབ་སྙན་ཐོ་ཞིག་ཡོངས་བསྒྲགས་གནང་བའི་ནང་། རྒྱ་ནག་གཞུང་གིས་བོད་ནང་མུ་མཐུད་ཆོས་ལུགས་དད་མོས་རང་དབང་ཐོག་དམ་དྲག་ཤུགས་ཆེན་བྱེད་ཀྱི་ཡོད་པ་དང་་རྒྱ་ནག་གཞུང་གིས་བོད་བརྒྱུད་ནང་བསྟན་སོགས་ཆོས་ལུགས་གཞན་དང་གྲངས་ཉུང་མི་རིགས་ཁག་ལ་རྩ་མེད་གཏོང་བའི་སྲིད་ཇུས་འཛིན་བཞིན་ཡོད་སྐོར་བཀོད་འདུགནང་མུ་མཐུད་ཆོས་ལུགས་དད་མོས་རང་དབང་ཐོག་དམ་དྲག་ཤུགས་ཆེན་བྱེད་ཀྱི་ཡོད་པ་དང་་རྒྱ་ནག་གཞུང་གིས་བོད་བརྒྱུད་ནང་བསྟན་སོགས་ཆོས་ལུགས་གཞན་དང་གྲངས་ཉུང་མི་རིགས་ཁག་ལ་རྩ་མེད་གཏོང་བའི་སྲིད་ཇུས་འཛིན་བཞིན་ཡོད་སྐོར་བཀོད་འདུག

སྙན་ཐོའི་ནང་། བོད་བརྒྱུད་ནང་བསྟན་དང་ཡེ་ཤུ་ཆོས་ལུགས། ཁ་ཆེ་ཆོས་ལུགས་ཀྱི་རྗེས་འཇུག་པ་དང་། ཆོས་འཁོར་རྩ་རླུང་སྒོམ་སྒྲུབ་པ་བཅས་ཀྱིས་ལས་ཀ་འཚོལ་བ་དང་མགྲོན་ཁང་སོགས་གླ་སྐབས་དང་། དཔལ་འབྱོར་འཚོལ་སྒྲུབ་སོགས་ཀྱི་སྐབས་དབྱེ་འབྱེད་ཀྱི་གནད་དོན་ཡང་ཡང་ཡོང་གི་ཡོད་པ་དང་། རྒྱ་ནག་གཞུང་གིས་བོད་ནང་མུ་མཐུད་བོད་ཀྱི་སྐད་ཡིག་དང་རིག་གཞུང་ལ་དྲག་གནོན་བྱས་ཏེ། ས་གནས་ཀྱི་ཆབ་སྲིད་དང་དཔལ་འབྱོར། རིག་གཞུང་སོགས་ཀྱི་ལས་དོན་ནང་རྒྱ་རིགས་འཇོག་ཐབས་བྱེད་ཀྱི་ཡོད་པ་བཀོད་འདུག་ལ། ཉེན་རྟོག་པས་མུ་མཐུད་དགོན་སྡེ་ཁག་གི་ནང་འཛིན་བཟུང་དང་བཀག་ཉར་བྱེད་ཀྱི་ཡོད་པ་མ་ཟད། གཅར་རྡུང་མནར་གཅོད་གཏོང་བ་དང་། ཆོས་ལུགས་ལ་ཁ་གཡར་ནས་དོན་མེད་བཙོན་འཇུག་དང་ཁྲིམས་ཆད་གཅོད་ཀྱི་ཡོད་པ་བཀོད་འདུག

ཡང་ཨ་རིའི་གཞུང་གི་སྙན་ཐོ་དེའི་ནང་། འདས་ལོའི་ཕྱི་ཟླ་ ༩ པའི་ནང་རྒྱ་ནག་ཧྲན་ཏུང་ཞིང་ཆེན་གྱི་ཅི་ནན་གྲོང་ཁྱེར་ (Jinan City) ནང་མི་ཞིག་གིས་མཁན་པོ་བསོད་དར་རྒྱས་ཀྱི་བཀའ་སློབ་འོད་སྡེར་ནང་ཡོད་པ་ཞིག་མི་གྲངས་བརྒྱ་ལྷག་ལ་སྦྲག་ཁང་བརྒྱུད་གཏོང་སྐབས། ས་གནས་ཉེན་རྟོག་པས་མི་དེ་འཛིན་བཟུང་བྱས་ཡོད་པ་མ་ཟད། འོད་སྡེར་གཏོང་སའི་མི་དེ་དག་ཀྱང་ས་གནས་ཉེན་རྟོག་ཁང་དུ་འབོད་འགུག་བྱས་ཏེ་འདྲི་གཅོད་བྱས་ཡོད་པ་བཀོད་འདུག དེ་བཞིན་འདི་ལོའི་ལོ་འགོར་རྒྱ་ནག་གཞུང་གིས་སི་ཁྲོན་ཞིང་ཆེན་ནང་མཁན་པོ་བསོད་དར་རྒྱས་དང་གསེར་རྟ་བླ་རུང་སྒར་ལ་འབྲེལ་བ་ཡོད་པའི་དགོན་པ་ཁག་ཅིག་གིས་ཁྲིམས་མཐུན་མིན་པའི་བྱེད་སྒོ་སྤེལ་གྱི་ཡོད་ཚུལ་བསྒྲགས་ཏེ་སྒོ་བརྒྱབས་ཡོད་པ་དང་། རྒྱ་ནག་གཞུང་གིས་དགོན་པ་དེ་དག་སྒོ་བརྒྱབས་པའི་དམིགས་ཡུལ་གཙོ་བོ་ནི་མཁན་པོ་བསོད་དར་རྒྱས་ཀྱི་ཤུགས་རྐྱེན་ཆུང་དུ་གཏོང་ཐབས་བྱེད་ཀྱི་ཡོད་སྐོར་དང་། བླ་རུང་སྒར་དུ་ཞུགས་པར་ངེས་པར་དུ་རྒྱ་ནག་གཞུང་གི་རྒྱབ་གཉེར་གྱི་ཡིག་ཆ་ཁག་དགོས་པ་བཟོས་ཐོག བླ་རུང་སྒར་གྱི་ཡིག་རྒྱུགས་ཁག་གི་ནང་དུ་དགེ་འདུན་པ་ཚོར་ཆབ་སྲིད་ཀྱི་གནད་དོན་ཡོད་མེད་དང་། ཆབ་སྲིད་ཀྱི་ཐོག་བློ་འགེལ་ཆོག་མིན་གྱི་ར་སྤྲོད་བྱ་དགོས་པ་སོགས་བཅུག་ཡོད་པའི་ཐད་སྐྱོན་བརྗོད་བྱས་འདུག

སྙན་ཐོ་དང་འབྲེལ་ནས་ཨ་རིའི་རྒྱལ་སྲིད་དྲུང་ཆེ་ཨེན་ཊོ་ནི་བྷི་ལིན་ཀན་ (Antony Blinken) མཆོག་ནས་གསུང་བཤད་གནང་བའི་ནང་། ཁྲིན་ཏུའི་དབུས་ཆོས་ལུགས་སྔོན་འགོག་དང་དོ་དམ་ཁང་ (Central Leading Group Preventing and Dealing with Heretical Religions) གི་འགན་འཛིན་ཡུ་ཧུའེ་ (Yu Hui) ཡིས་འགྲོ་བ་མིའི་ཐོབ་ཐང་རྡོག་རོལ་བཏང་བ་དང་། ཆོས་འཁོར་རྩ་རླུང་སྒོམ་སྒྲུབ་ཉམས་ལེན་པ་གང་བྱུང་བཙོན་འཇུག་བྱས་པ་ལ་བརྟེན། ཡུ་ཧུའེ་ (Yu Hui) དང་ཁོའི་ཁྱིམ་མི་རྣམས་ལ་ཨ་རིའི་ནང་འཛུལ་མི་ཆོག་པའི་ཉེས་ཆད་བཀལ་པ་ཡོངས་བསྒྲགས་གནང་ཡོད་པ་དང་། རྒྱ་ནག་གཞུང་གིས་ཆོས་དད་རང་མོས་ནི་ཁྲིམས་འགལ་ཞིག་རྩིས་ཐོག མུ་མཐུད་འགྲོ་བ་མིའི་རིགས་ཀྱི་བཟང་སྤྱོད་དང་འགལ་བའི་བྱ་སྤྱོད་སྤེལ་བ་དང་ཡུ་གུར་ཁ་ཆེ་བ་དང་ཆོས་ལུགས་གཞན་དང་གྲངས་ཉུང་མི་རིགས་ཚོ་རྩ་མེད་གཏོང་བའི་སྲིད་ཇུས་སྤེལ་བཞིན་ཡོད་པའི་སྐྱོན་བརྗོད་བྱས་འདུག

དེ་བཞིན་ཨ་རིའི་རྒྱལ་སྤྱིའི་ཆོས་དད་རང་དབང་གི་འགན་འཛིན་ཌེ་ནི་ན་ཌལ་ (Daniel Nadel) གྱིས་སྙན་ཐོ་དང་འབྲེལ་ནས་གསར་འགོད་གསལ་བསྒྲགས་ཤིག་གནང་སྐབས། རྒྱ་ནག་གཞུང་གིས་བོད་བརྒྱུད་ནང་བསྟན་སོགས་ཀྱི་ཐོག་འཛིན་པའི་སྲིད་ཇུས་ལ་སྣང་མེད་འཇོག་ཐབས་མེད་པ་དང་། དེ་ནི་རྒྱ་ནག་གཞུང་གིས་ཆོས་ལུགས་རྩ་མེད་གཏོང་བའི་སྲིད་ཇུས་ཤིག་ཡིན་སྐོར་བརྗོད་འདུག་ལ། སྐབས་དེར་གསར་འགོད་པས་ཉེ་ལམ་ཨ་རིའི་རྒྱལ་སྤྱིའི་ཆོས་དད་རང་དབང་གིས་ཨ་རིའི་འཛིན་སྐྱོང་ལ་རྒྱ་ནག་གཞུང་གིས་ཆོས་ལུགས་དད་མོས་རང་དབང་རྡོག་རོལ་གཏོང་བཞིན་ཡོད་པར་བརྟེན། པེ་ཅིན་དུ་འཚོག་འཆར་ཡོད་པའི་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་ལ་མི་ཞུགས་པའི་འབོད་སྐུལ་ཞུས་ཡོད་ནའང་། ཐེངས་འདིའི་སྙན་ཐོའི་ནང་དེའི་སྐོར་བཀོད་མེད་པར་བརྟེན་དེའི་ཐད་ལ་གསལ་བཤད་ཅི་ཡོད་དྲིས་པར། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་དུ་གཏོང་བཞིན་པའི་གནས་སྟངས་སྣང་མེད་དུ་འཇོག་ཐབས་མེད་པ་དང་། དེ་ནི་ཡུ་གུར་མི་རིགས་ཙམ་མ་ཡིན་པར་བོད་མི་དང་ཧོང་ཀོང་བ་སོགས་ཀྱི་གནད་དོན་ཞིག་ཀྱང་ཡིན་སྐོར་དང་། ཨོ་རྩལ་འགྲན་ཚོགས་ལྟ་བུར་ཆ་མཚོན་ན། ཚོགས་པ་གཅིག་གཉིས་ཀྱི་ནུས་པ་འདོན་ཐུབ་ཐབས་མེད་པར་བསམ་བློ་མཐུན་པའི་མཐུན་གྲོགས་ཚོ་དང་མཉམ་འབྲེལ་བྱས་ཚེ་ནུས་པ་འདོན་ཐུབ་པས། ད་ལྟའི་དུས་སྐབས་སུ་པེ་ཅིན་གཞུང་གིས་ཨོ་རྩལ་འགྲན་ཚོགས་སྤྱད་དེ་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་དང་སྲིད་གཞུང་གི་སྣང་བརྙན་དེ་ཇེ་ཡག་གཏོང་བཞིན་པར། ཆོས་དད་རང་དབང་ཚོགས་པས་གདོང་ལེན་བྱེད་ཐབས་སུ་གདམ་ཀ་ཅི་ཡོད་ཀྱི་ཐད་བསྐྱར་ཞིབ་བྱེད་བཞིན་ཡོད་པ་དང་། དེ་ལ་བརྟེན་ནས་ད་ལྟ་ཨ་རིའི་གྲོས་ཚོགས་འོག་མ་དང་མཐུན་ཕྱོགས་གཅིག་པའི་ཚོགས་སྡེ་ཁག དེ་བཞིན་ཨོ་རྩལ་འགྲན་ཚོགས་ཀྱི་སྦྱིན་བདག་ཆེ་ཁག་ལ་ལམ་སྟོན་ཞུ་བཞིན་ཡོད་སྐོར་བརྗོད་དེ། རྒྱལ་སྤྱིའི་ཆོས་དད་རང་དབང་ཚོགས་པས་ཨོ་རྩལ་འགྲན་ཚོགས་ནང་ཨ་རི་མི་ཞུགས་པའི་འབོད་སྐུལ་མུ་མཐུད་ཞུ་རྒྱུ་ཡིན་པ་བཀོད་འདུག

ཡང་ཨ་རིའི་གཞུང་གི་སྙན་ཐོ་དེའི་ནང་། ཉེ་བའི་དུས་ཀྱི་རིང་རྒྱ་ནག་ནང་བཅའ་སྡོད་ཨ་རིའི་གཞུང་ཚབ་ཁང་དང་དོན་ཁང་བཅས་ཀྱིས་ཡང་དང་བསྐྱར་དུ་རྒྱ་ནག་གཞུང་གིས་བོད་ནང་དང་རྒྱ་ནག་ནང་དུ་ཆོས་དད་རང་དབང་རྡོག་རོལ་གཏོང་བཞིན་པའི་ཐད་བློ་འཚབ་ཡོད་པ་བརྗོད་ཀྱི་ཡོད་པ་མ་ཟད། ཁྲིན་ཏུའི་ཨ་རིའི་དོན་ཁང་སྒོ་མ་བརྒྱབས་སྔོན་དུ་བོད་ནང་གི་བོད་རིགས་ཆོས་ལུགས་ཀྱི་མགོ་ཁྲིད་དང་ཚོགས་སྡེ་ཁག་གི་འཐུས་མི་སོགས་ལ་ཐུག་འཕྲད་བྱས་ཏེ་ཨ་རིའི་གཞུང་གིས་ཆོས་དད་རང་དབང་ལ་རྒྱབ་སྐྱོར་བྱེད་ཀྱི་ཡོད་པ་གཙོ་འདོན་བྱས་ཡོད་པ་དང་། ཆོས་ལུགས་ཀྱི་དུས་ཆེན་ཁག་གི་སྐབས་ཨ་རིའི་གཞུང་ཚབ་དང་དོན་ཁང་གིས་དུས་ཆེན་གོ་སྒྲིག་བྱས་ཏེ་སྲུང་གཙི་བྱེད་པ་དང་ཆོས་ལུགས་ཀྱི་མགོ་ཁྲོད་ཚོར་ཆོས་དད་རང་མོས་དགོས་གལ་ཆེ་སྐོར་སོགས་ཀྱི་ཐད་གླེང་མོལ་བྱེད་ཀྱི་ཡོད་པ་སོགས་དང་། འདས་ལོའི་ཕྱི་ཟླ་ ༡༠ ནང་ཨ་རིའི་རྒྱལ་སྲིད་དྲུང་ཆེ་མཆོག་ཨིན་རྡུ་ནི་ཤི་ཡའི་ནང་གཏམ་བཤད་གནང་སྐབས། མ་འོངས་པའི་ཆོས་དད་རང་དབང་གི་ཉེན་ཁ་ཆེ་ཤོས་ནི་རྒྱ་ནག་དམར་ཤོག་ཚོགས་པས་ཁ་ཆེ་ཆོས་ལུགས་དང་། ནང་བསྟན་ཆོས་ལུགས། ཡེ་ཤུ་ཆོས་ལུགས། ཆོས་འཁོར་རྩ་རླུང་སྒོམ་སྒྲུབ་ཐད་དམག་འཐབ་གྱི་གཡུལ་གཤོམ་བཞིན་པ་དེ་རེད་ལ། དམར་ཤོག་ཚོགས་པས་རྒྱ་ནག་ནང་གི་ཆོས་ལུགས་ཚང་མའི་ཐོག་ཡང་ཡང་གཏོར་བཤིག་གཏོང་གི་ཡོད་པ་རེད། ཅེས་བརྗོད་དེ་རྒྱ་ནག་གཞུང་གིས་ཆོས་དད་རང་དབང་རྡོག་རོལ་གཏོང་བཞིན་པར་བསྐྱོན་བརྗོད་བྱེད་ཀྱི་ཡོད་པ་ལུང་འདྲེན་གནང་འདུག

ཨ་རིའི་རྒྱལ་སྤྱིའི་ཆོས་དད་རང་དབང་གི་སྙན་ཐོ་ལྟར་ན། བོད་སོགས་ཚུད་པའི་རྒྱ་ནག་རྒྱལ་ཡོངས་ནང་སངས་རྒྱས་ཆོས་ལུགས་ཀྱི་རྗེས་འཇུག་པ་བརྒྱ་ཆའི་ ༡༨།༢ དང་། ཡེ་ཤུ་ཆོས་ལུགས་པ་བརྒྱ་ཆའི་ ༥།༡། ཁ་ཆེ་བ་བརྒྱ་ཆའི་ ༡།༨། ས་གནས་ཀྱི་ཡུལ་ལྷ་འདྲ་མིན་ལ་ཆོས་བྱེད་མཁན་བརྒྱ་ཆའི་ ༢༡།༩། ཆོས་ཁས་མི་ལེན་མཁན་ནམ་ཆོས་ཁས་ལེན་མཁན་ཡིན་པའི་ཁོངས་སུ་མེད་མཁན་བརྒྱ་ཆའི་ ༥༢།༢ ཡིན་འདུག་ལ། ཧིན་རྡུ་བ་དང་ཇེའུ་ཆོས་ལུགས་པ། ཏའོ་ཆོས་ལུགས་པ་བཅས་གསུམ་ནི་བརྒྱ་ཆའི་གཅིག་ཀྱང་མེད་པ་བཀོད་འདུག དེ་བཞིན་ཕྱི་ལོ་ ༢༠༡༨ ལོར་ཆོས་ལུགས་ཀྱི་ས་གནས་ཁག་ཁྲི་ ༡༤ ལྷག་རྒྱ་ནག་དམར་ཤོག་ཚོགས་པར་དེབ་སྐྱེལ་བྱས་ཡོད་པའི་ཁྲོད། བོད་བརྒྱུད་ནང་བསྟན་དང་འབྲེལ་བའི་དགོན་པ་དང་གནས་གྲངས་ ༣༨༠༠ ཙམ་དང་། རྒྱ་བརྒྱུད་ནང་བསྟན་གྱི་གནས་གྲངས་ ༢༨༠༠༠། སིང་གྷ་ལ་སོགས་སུ་དར་བའི་ནང་བསྟན་གྱི་དགོན་པ་གྲངས་ ༡༧༠༠ དང་། ཊའོ་དགོན་པའམ་གནས་གྲངས་ ༩༠༠༠། ཁ་ཆེ་ལྷ་ཁང་གྲངས་ ༣༥༠༠༠། ཡེ་ཤུའི་ལྷ་ཁང་ཁྱོན་ཁྲི་ ༦ ལྷག་ཡོད་པ་བཀོད་འདུག