ཁ་སང་འོས་བསྡུ་ལས་ཁང་ནས་སྲིད་སྤྱི་གཉིས་ཀྱི་འོས་བསྡུའི་གྲུབ་འབྲས་གསལ་བསྒྲགས་གནང་བ་དང་བསྟུན་ཨ་རིའི་གཞུང་དང་ལས་ཐོག་སྲིད་སྐྱོང་གཙོས་པའི་མི་མང་བཅས་ནས་སྲིད་སྐྱོང་གསར་བ་ཚོགས་ཟུར་སྤེན་པ་ཚེ་རིང་མཆོག་ལ་འཚམས་འདྲི་ཞུ་ཡི་འདུག
དེ་རིང་ཕྱི་ཚེས་ ༡༥ ཉིན་ཨ་རིའི་རྒྱལ་སྲིད་ལྷན་ཁང་གི་མགྲིན་ཚབ་པ་ནེལ་ཌི་པི་རཱ་སི་ལགས་ཀྱིས་ཊུ་ཝི་ཊར་བརྒྱུད། སྤྱི་འཐུས་ཚོགས་ཟུར་སྤེན་པ་ཚེ་རིང་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་གསར་བར་བདམས་ཐོན་བྱུང་བར་འཚམས་འདྲི་ཞུས་པའི་ནང་། ཨ་རིའི་གཞུང་གིས་སྤེན་པ་ཚེ་རིང་མཆོག་བོད་མིའི་སྒྲིག་འཛུགས་ཀྱི་སྲིད་སྐྱོང་གསར་བར་བདམས་ཐོན་བྱུང་བར་འཚམས་འདྲི་ཞུ་ཡི་ཡོད། ང་ཚོས་ཁོང་དང་བོད་མིའི་སྒྲིག་འཛུགས་ལྷན་དུ་འཛམ་གླིང་ཡུལ་གྲུ་གང་སར་ཁྱབ་པའི་བོད་མི་རྣམས་ལ་རྒྱབ་སྐྱོར་བྱེད་པར་རེ་ལྟོས་ཆེན་པོ་བྱེད་ཀྱི་ཡོད། ཅེས་བརྗོད་འདུག
ཁ་སང་ཕྱི་ཚེས་ ༡༤ ཉིན་བཙན་བྱོལ་བོད་མིའི་འོས་བསྡུའི་སྒྲིག་གཞིའི་དགོངས་དོན་ལྟར། སྐབས་བཅུ་བདུན་པའི་སྲིད་སྤྱི་གཉིས་ཀྱི་དངོས་གཞིའི་གྲུབ་འབྲས་གསལ་བསྒྲགས་གནང་བ་དང་བསྟུན། བོད་མིའི་སྒྲིག་འཛུགས་ཀྱི་ལས་ཐོག་སྲིད་སྐྱོང་བློ་སེང་གེ་མཆོག་གི་དབུས་པའི་སྲིད་སྐྱོང་གི་དངོས་གཞིའི་འོས་དམིགས་སྐལ་བཟང་རྡོ་རྗེ་ལགས་དང་མི་མང་བཅས་ནས་བདམས་ཐོན་སྲིད་སྐྱོང་སྤྱི་འཐུས་ཚོགས་ཟུར་སྤེན་པ་ཚེ་རིང་མཆོག་ལ་བརྒྱུད་ལམ་འདྲ་མིན་ཐོག་ནས་འཚམས་འདྲི་ཞུས་པ་དང་སྦྲགས་མ་འོངས་པའི་ལས་དོན་ལམ་ལྷུང་ཡོང་བ་བཅས་ཀྱི་འཚམས་འདྲི་དང་རྟེན་འབྲེལ་ཞུས་ཡོད་པ་རེད།
དེ་ཡང་སྲིད་སྐྱོང་བློ་བཟང་སེང་གེ་མཆོག་ནས་བོད་ཀྱི་བརྙན་འཕྲིན་བརྒྱུད་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་དང་སྐབས་བཅུ་བདུན་པའི་སྤྱི་འཐུས་རྣམ་པར་འཚམས་འདྲི་ཞུས་པའི་ནང་། ད་ལན་འོས་བསྡུ་ལས་ཁང་ནས་སྲིད་སྐྱོང་དང་སྤྱི་འཐུས་ཀྱི་འོས་བསྡུའི་གསལ་བསྒྲགས་འགྲུབ་པ་ཡིན་དུས། ངས་བཀའ་ཤག་གི་ཚབ་ཞུས་ཏེ་བདམས་ཐོན་སྲིད་སྐྱོང་དང་སྤྱི་འཐུས་རྣམ་པ་ཚང་མར་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་དང་འོས་བསྡུར་རྒྱལ་ཁ་འཐོབ་པར་བསྔགས་བརྗོད་ཞུ་ཡི་ཡོད། དེ་བཞིན། བདམས་ཐོན་སྲིད་སྐྱོང་སྤེན་པ་ཚེ་རིང་ལགས་སུ་ཞལ་པར་ཕུལ་ཏེ། བཀའ་ཤག་ངོས་ནས་འཚམས་འདྲི་ཞུ་རྒྱུ་དང་ཁོང་གི་ལས་ཡུན་སྐབས་ཕྱག་ལས་ལེགས་འགྲུབ་ཡོང་བར་ཤོག་ཅེས་སྨོན་འདུན་ཞུས་ཡོད། ཅེས་གསུངས་སོང་།
ཡང་བདམས་ཐོན་སྲིད་སྐྱོང་མཆོག་གི་དམ་འབུལ་ཐད་སྲིད་སྐྱོང་མཆོག་གིས། བཀའ་ཤག་ནས་ཕྱི་ཟླ་ ༥ ཚེས་ ༢༦ ཉིན་དམ་འབུལ་ཞུ་རྒྱུ་ཐག་གཅོད་བླངས་ཟིན་པ་ཡིན། གང་ཡིན་ཟེར་ན། བཅའ་ཁྲིམས་ཀྱི་དགོངས་དོན་བཞིན་ཚེས་ཉེར་དྲུག་ནི་བཀའ་ཤག་གི་ལོ་ལྔའི་རིང་གི་ཉིན་མཐའ་མ་དང་། ས་ག་ཟླ་བའི་ཚེས་བཅོ་ལྔ། དེ་བཞིན། རེས་གཟའ་ལྷག་པ་བཅས་ཆགས་ཀྱི་ཡོད་སྟབས། ཚེས་བཟང་དུས་བཟང་ལ་དམ་བཅའ་ཕུལ་བ་ཡིན་ན་རྟགས་རྟེན་འབྲེལ་གང་ཅིའི་ཐད་ནས་ཡག་པོ་ཡོང་གི་རེད་བསམ་པའི་ཐོག་ནས་ཉིན་དེར་དམ་བཅའ་འབུལ་རྒྱུ་དང་། གལ་ཏེ་རྒྱ་གར་རྒྱལ་ཡོངས་སུ་དམ་བསྒྲགས་དང་ཧི་མ་ཅལ་ནང་མི་ལྔ་ལས་ལྷག་འཛོམས་མི་ཆོག་པའི་དམ་རྒྱུ་མུ་མཐུད་གནས་ཀྱི་ཡོད་ཚེ། བཀའ་ཤག་ངོས་ནས་དྲ་ལམ་ཐད་གཏོང་བརྒྱུད་དམ་འབུལ་ཞུ་བར་གང་ཐུབ་ཅི་ཐུབ་ཀྱིས་གྲ་སྒྲིག་གནང་གི་ཡིན་ཞེས་ཞུས་བཞག་ཡོད། བདམས་ཐོན་སྲིད་སྐྱོང་ཆགས་པ་དང་བཀའ་ཤག་ངོས་ནས་སྒེར་དྲུང་ཞིག་དང་སྐུ་སྲུང་བ་འཇོག་དགོས་ཀྱི་ཡོད་པ་ལྟར་བཞག་ཡོད་ལ། གཞན་མཐུན་འགྱུར་ག་རེ་ཞུ་དགོས་བྱུང་ཡང་བཀའ་དྲུང་དང་སྒེར་དྲུང་བརྒྱུད་བདམས་ཐོན་སྲིད་སྐྱོང་ནས་འབྲེལ་བ་གནང་རོགས་ཞེས་ཞུས་བཞག་ཡོད། འབྲེལ་བ་གནང་བ་ཡིན་ན་བཀའ་ཤག་ནས་གང་ཐུབ་ཅི་ཐུབ་ཀྱིས་མཐུན་འགྱུར་སྤྱོར་གྱི་ཡིན་ཞེས་ཞུས་བཞག་ཡོད། ཅེས་གསུངས་སོང་།
དེ་བཞིན། ཉེར་གཅིག་ལོའི་སྲིད་སྐྱོང་གི་དངོས་གཞིའི་འོས་དམིགས་སྐལ་བཟང་རྡོ་རྗེ་ལགས་ཀྱིས་ངོ་དེབ་སྟེང་མཇུག་བསྡོམས་གསལ་བསྒྲགས་ཤིག་སྤེལ་བའི་ནང་། རང་ཉིད་ལ་ཐེངས་འདིའི་སྲིད་སྐྱོང་གི་འོས་བསྡུའི་ཁྲོད་འོས་ཤོག་བརྒྱ་ཆ་ ༤༦% མ་ཟིན་ཙམ་ཐོབ་ཡོད་པར་། རྒྱ་བལ་འབྲུག་གསུམ་གྱི་གཞིས་ཆགས་ཆེ་གྲས་ཁག་གཙོས་པའི་འབྲེལ་ཡོད་རྒྱལ་སྐྱོར་བ་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། བདམས་ཐོན་སྲིད་སྐྱོང་གསར་པ་སྐུ་ངོ་སྤེན་པ་ཚེ་རིང་ལགས་སུ་འཚམས་འདྲི་བཀྲ་ཤིས་བདེ་ལེགས་ཞུས་པ་དང་བསྟུན། དཀའ་རྙོག་དང་འགྱུར་འགྲོས་ཆེ་བའི་དུས་སྐབས་འདིར་སྲིད་སྐྱོང་གསར་བའི་ལས་དོན་ལེགས་འགྲུབ་ཡོང་བ་དང་སྐུ་གཟུགས་བདེ་ཐང་དང་བྱ་བ་ལམ་འགྲོ། དཀའ་ཐུབ་ལྷུར་ལེན་གནང་ཐུབ་པའི་སྨོན་འདུན་གྲངས་མེད་ཞུ་ཡི་ཡོད་སྐོར་སོགས་བརྗོད་འདུག
གསར་འགོད་པ། སྐལ་བཟང་སྦྱིན་པ།
