བོད་རང་སྐྱོང་ལྗོངས་ཟེར་བའི་གཞིས་ཀ་རྩེ་དང་རྫོང་ཁག་ལྔ་ཡི་འབྲོག་ས་རྣམས་རིམ་གྱིས་དམག་སར་བསྒྱུར་བཞིན་ཡོད་པ་དང་། ས་གནས་བོད་མི་ཨ་ཁུ་ཕུན་ཚོགས་ཞེས་པ་ཞིག་གིས། སོ་སོའི་ས་ཆ་གཞུང་ལ་མ་སྤྲད་པའི་རྐྱེན་གྱིས་འཛིན་བཟུང་བྱས་ཡོད་འདུག
ཕྱི་ལོ་༢༠༡༡་ནས་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་གཞིས་ཀ་རྩེ་དང་རྫོང་ཁག་ལྔ་ཡི་འབྲོག་ས་རྣམས་རིམ་གྱིས་དམག་སར་བསྒྱུར་བཞིན་ཡོད་པ་ལྟར། དིང་རུ་རྫོང་ཁོངས་ཀྱི་འབྲོག་པ་རྣམས་རྫོང་ཐོག་ཏུ་ཕབ་རྗེས། ད་ལྟ་བར་ཏུ་ས་ཆ་མང་པོ་སྟོང་པར་ལྷག་ཡོད་ཀྱང་། འབྲོག་མི་ཨ་ཁུ་ཕུན་ཚོགས་ལགས་ནས་ཁོམ་སྐབས་ནམ་ཡོད་ལ་ཁོང་རང་གི་ས་ཆར་ལྟ་རུ་འགྲོ་ཡི་ཡོད་པ་མ་ཟད། ཁོང་གིས་ངའི་མི་ཐོག་མང་པོའི་རང་གི་ས་ཆ་དེ་དམག་སྒར་དུ་བསྒྱུར་འདོད་མེད་ལ། གཞུང་ཡང་སྤྲད་འདོད་མེད་ཟེར་ནས་ས་གནས་ཉེན་རྟོག་པར་ཐེངས་ཁ་ཤས་ཞིག་ལ་ཡར་ཞུ་བྱས་ཡོད་པས་དང་། ཉེ་སྔོན་ཁོང་གར་སོང་ཆ་མེད་དུ་གྱུར་ནས་ཉིན་བཞི་ཙམ་སོང་རྗེས། ཁོང་སྟོང་པར་ལྷག་པའི་རང་གི་ས་ཆ་དེར་སོང་ནས་བསྡད་ཡོད་པ་ཤེས་བྱུང་། དེ་མ་ཐག་ཉེན་རྟོག་པ་སོང་ནས་ཁོང་འཛིན་བཟུང་བྱས་ཡོད་འདུག
ཁོང་ནི་ད་ལྟ་དགུང་ལོ་༦༦ཡིན་ཞིང་།
ཁོང་ནི་དིང་རུ་རྫོང་སྒང་དཀར་ཤར་གྲོང་ཚོ་གཉིས་པ་ནད་ཡིན་ལ། ཁོང་གི་བུ་མོ་དང་མག་པ་གཉིས་ལ་ཕྲུ་གུ་གཉིས་ཡོད་འདུག
ཟླ་སྔོན་མའི་ཚེས་ ༢༩ཉིན་གྱི་ཞོགས་པར་བོད་ནང་ནས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། བོད་རང་སྐྱོང་ལྗོངས་གཞིས་ཀ་རྩེ་དང་། གམ་པ་རྫོང་། དིང་རི་རྫོང་། ངམ་རིང་རྫོང་། རུ་ཐོག་རྫོང་། གཉའ་ལམ་རྫོང་བཅས་ཀྱི་ནང་ཕྱི་ལོ་༢༠༡༡་ནས་བཟུང་རྒྱ་ནག་གཞུང་གི་བཀོད་ཁྱབ་འོག འབྲོག་པ་རྣམས་རྫོང་ཁག་སོ་སོའི་ནང་གྲོང་རྡལ་ཅན་དུ་བསྒྱུར་ཏེ། ལོ་བཅུ་ཙམ་རིང་འབྲོག་པ་དུད་ཁྱིམ་དེ་ཚོར་རྩྭ་རིན་ཆུ་རིན་སྤྲད་ཡོད་པ་དང་། འབྲོག་པའི་ས་སྟོང་དེ་དག་རྒྱལ་ཁབ་བདེ་འཇགས་ཨུ་ཡོན་ལྷན་ཁང་ཟེར་བར་སྤྲད་དེ། དམིགས་བསལ་དམག་གི་ས་གནས་ཤིག་ཏུ་སྒྱུར་བཞིན་ཡོད་པ་མ་ཟད། གལ་སྲིད་གནས་ཚུལ་དེ་དང་འབྲེལ་ནས་སྤྱི་ཚོགས་ནང་དཀྲོག་གཏམ་བརྒྱུད་སྐུར་བྱས་པ་སོགས་བྱུང་ན། གཞུང་གི་རོགས་སྐྱོར་ཚང་མ་མེད་པ་བཟོ་རྒྱུ་དང་ཁྲིམས་ཆད་ནན་མོ་གཅད་རྒྱུ་ཡིན་སྐོར་བརྗོད་དེ་འཇིགས་སྐུལ་དང་། སྤུན་མཆེད་ཕྱི་རྒྱལ་གང་དུ་ཡོད་ནའང་ངེས་པར་དུ་སྐད་བཏང་ན་ཡག་པོ་ཡོད་པ་དང་། གལ་སྲིད་ཕྱིར་མ་ལོག་ན་ཁྱིམ་ཐོའི་ནང་ནས་ཕྱིར་འབུད་གཏང་སྟེ། ཐོབ་སྐལ་ཞིང་ཁའི་ནང་དུ་ས་གནས་ཉེན་རྟོག་ཁང་གིས་འབྲས་འདེབས་རྒྱུ་ཡིན་སྐོར་བརྗོད་ཡོད་པ་དང་། ལས་གཞི་དེ་འདི་ལོའི་ཕྱི་ཟླ་༢པ་ནས་བཟུང་། ས་གནས་ཉེན་རྟོག་པ་དང་འབྲོག་མི་རྒན་པ་ཚོ་དངོས་སུ་ས་གནས་ས་ཐོག་ཏུ་ཡོང་ནས་ཞིབ་འཇུག་བྱེད་དུ་བཅུག་ཡོད་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
