བྱིས་པའི་ཁེ་དབང་སྲུབ་སྐྱོབ་ཀྱི་ཁྲིམས་སྒྲིག་སྐོར་གྱི་བྱུང་རབས། 

——བྱིས་པའི་སྟེང་དུ་དྲག་སྤྱོད་བཀོལ་བའི་གནས་ཚུལ་དང་བྱིས་པའི་ཁེ་དབང་སྲུབ་སྐྱོབ་ཀྱི་ཁྲིམས་སྒྲིག་སྐོར་གྱི་བྱུང་རབས།

གཡག་རྒོད་རྩོམ་སྒྲིག་ཚོགས་ཆུང་།

ཉེ་ཆར་འབྲོག་མོ་དཀྱུས་མ་ཞིག་གིས་སློབ་གྲྭའི་ཁོར་ཡུག་དང་འབྲེལ་བའི་དགོངས་ཚུལ་གསུངས་པའི་སྒྲ་སྒམ་ཞིག་དང་བུ་མོ་འགས་སློབ་གྲོགས་བུ་མོ་ཞིག་ལ་བརྙས་བཅོས་བྱས་པའི་བརྙན་ཐུང་ཞིག་དྲ་ལམ་དུ་རིམ་པར་ཐོན་པ་དང་། དེ་འབྲེལ་གྱི་འཚོ་གནས་དང་ལས་གནས་མི་འདྲ་བའི་སྐྱེས་ཕོ་མོ་མང་བོས་རང་རང་གི་ལྟ་ཚུལ་དང་བསམ་ཚུལ་གསུངས་ཏེ་བོད་པའི་སྐད་འཕྲིན་ཚོགས་པ་མང་པོ་ཟང་ཟིང་དུ་གྱུར། སློབ་གསོའི་བྱ་བཞག་གོང་འཕེལ་གྱི་བྱ་བཞག་ལ་གཞོལ་བཞིན་པའི་དགེ་རྒན་མང་པོས་ཀྱང་འབྲོག་མོའི་སྐད་ཆ་ལ་ཉན་དགོས་པའི་རྒྱུ་མཚན་དང་གནས་ལུགས་གསུངས་ཤིང་། སློབ་གྲྭའི་ཁོར་ཡུག་ཏུ་བྱུང་བའི་དོན་རྐྱེན་ལ་སློབ་གསོའི་སྡེ་ཁག་དང་སློབ་གྲྭའི་འཛིན་སྐྱོང་། དགེ་རྒན་བཅས་ཀྱིས་ཞིབ་འཇུག་བྱས་ཏེ་འཕྲལ་ཕུགས་བར་གསུམ་ལ་ཕན་པའི་ཐག་གཅོད་དང་བཅོས་བསྒྱུར་གཏོང་དགོས་པའི་ལེགས་བཤད་ཅ་ནོམ་པ་གནང་ཞིང་། ལྷག་པར་དུ་མཛད་རྗེས་ཅན་དང་ཉམས་མྱོང་ཅན་གྱི་དགེ་རྒན་ཚོས་བྱིས་པའི་སྟེང་དུ་དྲག་སྤྱོད་བཀོལ་ཏེ་སྒྲིག་ལམ་འཇོག་པའི་དུས་ཚོད་ཡོལ་ཟིན་པའི་གནས་ཚུལ་དཔེ་དོན་ལ་སྦྱར་ཏེ་གསུངས། ཡིན་ནའང་། བསམ་པ་བཟང་ཡང་སློབ་གསོའི་བྱེད་ཐབས་ལ་རྨོངས་པའི་དགེ་རྒན་རེ་ཟུང་ཞིག་གིས་བོད་པའི་སྤྱི་ཚོགས་ནི་དྲག་སྤྱོད་བཀོལ་མི་དགོས་པར་བྱིས་པར་སློབ་གསོ་སྤྲོད་པའི་ཚད་ཐིག་ལ་སླེབས་མེད་པ་དང་། གལ་སྲིད་ང་ཚོས་བྱིས་པ་ཚོར་གཅར་རྡུང་མྱོང་མི་དགོས་པའི་ཁེ་དབང་དང་ཁྲིམས་ལུགས་ཤེས་སུ་བཅུག་ན་བྱིས་པར་སྒྲིག་ལམ་འཇོག་མི་ཐུབ་པ་དང་། དེང་སང་གི་ཆེད་མཁས་པ་ཚོས་བྱིས་པའི་སྟེང་དུ་དྲག་སྤྱོད་བཀོལ་ན་མཇུག་འབྲས་ངན་པ་ཡོད་པའི་ཞིབ་འཇུག་གི་སྙན་ཐོ་དག་བྱིས་པ་ལ་ཤེས་སུ་འཇུག་མི་ཉན་པའི་བསམ་ཚུལ་དང་། གལ་སྲིད་བྱིས་པ་ཚོས་གནས་ཚུལ་དེ་དག་ཤེས་པ་ཡིན་ན། མ་འོངས་པར་བྱིས་པ་ཚོས་ཕ་མ་དང་དགེ་རྒན་ལ་ངོ་རྒོལ་བྱེད་པའི་ལག་ཆ་རུ་བཀོལ་མི་སྲིད་པ་མིན་པས་གཟབ་དགོས་བ་ཚོར་ཤུགས་ཆེན་པོས་བཤད། དེ་ལྟར་ན་གཤམ་དུ་བྱིས་པའི་སྟེང་དུ་དྲག་སྤྱོད་བཀོལ་མི་ཉན་པའི་གནས་ཚུལ་གླེང་དུས་བོད་མི་རེ་ཟུང་གིས་སེམས་ཚོར་དང་ངོ་རྒོལ་བྱེད་པའི་རིག་ལམ། འཛམ་གླིང་ཁྱོན་ཡོངས་ཀྱི་ནང་དུ་བྱིས་པ་ཚོ་དྲག་སྤྱོད་ཀྱི་སྡུག་བསྔལ་མྱོང་བཞིན་པའི་གནས་ཚུལ་མདོར་བསྡུས་དང་། བྱིས་པའི་ཁེ་དབང་སྲུབ་སྐྱོབ་ཀྱི་ཁྲིམས་ལུགས་ཀྱི་བྱུང་རིམ་དང་འཕེལ་རྒྱས་ཀྱི་སྐོར་ལ་རགས་ཙམ་གླེང་བར་འདོད་དོ།།

དེང་སང་བོད་པའི་སྤྱི་ཚོགས་དྲ་ལམ་དུ་བྱིས་པའི་སྟེང་དུ་དྲག་སྤྱོད་བཀོལ་མི་ཉན་པའི་གནས་ཚུལ་སྤེལ་བ་དང་གླེང་བའི་སྐབས་སུ་བོད་མི་རེ་ཟུང་གིས་དེ་མ་ཐག་ཁོང་ཁྲོ་ལངས་ཤིང་། གཅར་རྡུང་མི་བྱེད་པར་བྱིས་པ་ལ་སྒྲིག་ལམ་འཇོག་ཚུལ་ཞིག་ཡོད་པ་མ་རེད་ཅེས་ཁ་རྡུང་གཏོང་བ་དང་ཁ་ཚོད་གཅོད་ཀྱི་ཡོད། ཁོ་ཚོ་རེ་ཟུང་ཞིག་གིས་བྱིས་པར་གཅར་རྡུང་བྱས་ན་མི་སྐྱོན་པའི་སྒྲུབ་བྱེད་དུ་སྔོན་ཆད་བདག་ཅག་གི་སྟོན་པ་བཅོམ་ལྡན་འདས་ཞལ་བཞུགས་པའི་སྐབས་སུ་དེད་དཔོན་སྙིང་རྗེ་ཅན་གྱིས་མི་ནག་མདུང་ཐུང་ཅན་བསད་དེ་དག་པའི་ཞིང་དུ་སྐྱེས་པའི་ལོ་རྒྱུས་གསུངས་ཏེ་བསམ་པ་བཟང་ན་བྱིས་པའི་སྟེང་དུ་དྲག་སྤྱོད་བཀོལ་ན་ཡག་པོ་ཡོད་པ་རེད་ཅེས་གསུང་གི་ཡོད། ཡང་རེ་ཟུང་ཞིག་གིས་བྱིས་པ་གཅར་རྡུང་བྱས་ན་མཇུག་འབྲས་ངན་པ་ཡོད་པའི་གནས་ཚུལ་བགྲོ་གླེང་བྱེད་རྒྱུ་མང་ན་མི་རིགས་ལ་ཕན་ཐོགས་མེད་ཚུལ་བཤད་ཀྱི་ཡོད་པ་རེད། རེ་ཟུང་ཞིག་གིས་དེ་ནི་ཕྱི་རྒྱལ་གྱི་ལམ་ལུགས་ཤིག་ཡིན་པས་བོད་པའི་སྤྱི་ཚོགས་ལ་འཚམ་པོ་མེད་པ་དང་ཕྱི་རྒྱལ་དུ་ཡོད་པའི་བོད་པའི་ཕ་མ་ལབ་རྒན་ཚོའི་ཁ་ལ་ཉན་རྒྱུ་ཡོད་པ་མ་རེད་ཅེས་རྒོལ་གྱིན་ཡོད།  དྲང་མོ་བཤད་ན། བྱིས་པའི་སྟེང་དུ་དྲག་སྤྱོད་བཀོལ་བའི་གོམས་གཤིས་ངན་པ་དེ་ནི་འཛམ་གླིང་མི་རིགས་ཚང་མ་ལ་ཡོད་པའི་གནད་དོན་ཞིག་ཡིན་པ་ལས་ང་ཚོ་བོད་མི་ཁོ་ནའི་ངན་གཤིས་ཞིག་རྩ་བ་ཉིད་ནས་མ་རེད། རྒྱལ་ཁབ་གཞན་དང་མི་རིགས་གཞན་གྱིས་བྱིས་པར་སྡུག་སྦྱོང་གནར་གཅོད་གཏོང་བཞིན་པའི་གནས་སྟངས་ནི་སྐྱི་གཡའ་ཞིང་ཉན་མི་བཟོད་པ་ཞིག་ཡིན། དཔེར་ན་བྱིས་པ་དམག་ལ་དེད་པ་དང་། བྲན་གཡོག་ཏུ་བཀོལ་བ། བཙན་གཡེམ་བྱེད་པ་དང་ཚོང་རྫས་བྱེད་པའི་གནས་ཚུལ་མང་པོ་འཛམ་གླིང་ཤར་ནུབ་ཚང་མའི་སྤྱི་ཚོགས་ཁྲོད་དུ་ཡོད། ཡིན་ནའང་འཛམ་གླིང་དམག་ཆེན་གཉིས་པ་མཇུག་སྒྲིལ་བའི་རྗེས་སུ་འཛམ་གླིང་མཉམ་འབྲེལ་རྒྱལ་ཚོགས་གསར་འཛུགས་གནང་སྟེ་ཡོངས་ཁྱབ་འགྲོ་བ་མིའི་ཐོབ་ཐང་གསལ་བསྒྲགས་གནང་བ་ནས་བཟུང་། རྒྱལ་སྤྱིའི་ཁྱོན་ཡོངས་ཀྱི་འགྲོ་བ་མིའི་ཐོབ་ཐང་ཡར་རྒྱས་གོང་འཕེལ་དུ་སོང་ཡོད་པ་དང་། ལྷག་པར་བྱིས་པའི་ཐོབ་ཐང་སྲུང་སྐྱོབ་ལྷན་ཚོགས་དག་གིས་བྱིས་པའི་སྟེང་དུ་མནར་གཅོད་གཏོང་མ་ཉན་པའི་བྱ་འགུལ་རིམ་པར་སྤེལ་བར་བརྟེན་བྱིས་པའི་ཐོབ་ཐང་གི་བྱ་བཞག་ཡར་རྒྱས་གོང་འཕེལ་དུ་འགྲོ་བཞིན་པའི་དུས་སྐབས་ཤིག་ཡིན་པར་གྲགས་སོ།།

སྤྱི་ལོ་༢༠༢༠་ལོའི་ཟླ་བ་༡་པོའི་ནང་དུ་འཛམ་གླིང་འཕྲོད་བསྟེན་ལྷན་ཚོགས་ཀྱིས་གནས་ཚུལ་སྤེལ་བ་ལྟར་ན། ལོ་སྔོན་མར་འཛམ་གླིང་ཁྱོན་ཡོངས་ཀྱི་ནང་དུ་ལོ་༡༨་མ་སོན་པའི་བྱིས་པ་དུང་ཕྱུར་གཅིག་ཙམ་གྱིས་དྲག་སྤྱོད་ཀྱི་ཉེར་ལེན་ལས་བྱུང་བའི་ལུས་སེམས་ཀྱི་སྡུག་བསྔལ་མྱོང་བཞིན་ཡོད་པར་བརྗོད་འདུག་པ་དང་། བྱིས་པའི་སྟེང་དུ་དྲག་སྤྱོད་བཀོལ་བའི་རྐྱེན་རྩ་གཙོ་བོ་སློབ་སྦྱོང་གི་གནས་ཚད་ཞན་པ་དང་ཡོང་འབབ་ཉུང་བ། དབང་བོ་སྐྱོན་ཅན་ཡིན་པ་དང་། དུད་ཆང་དང་རྫས་ངན་ལ་ལོངས་སུ་སྤྱོད་པ་ལ་གོམས་པ། བཟའ་ཚང་ཁ་བྲལ་བ་དང་བཟའ་འཁོན་མང་བ། བྱིས་སྐྱོང་ཉམས་མྱོང་མེད་པ་དང་བྱིས་པའི་སྟེང་དུ་དྲག་སྤྱོད་བཀོལ་ན་མི་སྐྱོན་སྙམ་པའི་འདུ་ཤེས་སོགས་ཡིན་པར་བརྗོད་འདུག ལྷག་པར་དུ་བྱིས་པའི་སྟེང་དུ་དྲག་སྤྱོད་བཀོལ་ན་མཇུག་འབྲས་ཡ་ང་བ་མང་བོར་ཡོད་པའི་ཉམས་ཞིབ་ཀྱི་སྙན་ཐོ་སྟོང་ཕྲག་མང་བོ་ཡོད་པར་བཤད། འདིར་དཔེ་མཚོན་ཤ་ཆས་བཀོད་པ་ཡིན་ན། ང་ཚོ་དང་ཁ་ཐག་ཉེ་བའི་རྒྱལ་ཁབ་ཀོ་རི་ཡའི་ནང་གི་རྒྱལ་ཡོངས་ན་གཞོན་གྲོས་ཚོགས་ཞེས་པས་སྤྱི་ལོ་༢༠༡༨ ལོའི་ཟླ་བ་༨ པའི་ནང་སློབ་མ་༩༠༦༠ ལ་བཅར་འདྲི་བརྒྱུད་དེ་ཞིབ་འཇུག་གི་གྲུབ་དོན་ནི་སློབ་མ་བརྒྱ་ཆའི་༢༩ ལ་རང་ཤི་རྒྱག་པའི་བསམ་འདུན་སྐྱེས་མྱོང་ཡོད་པ་དང་། སློབ་མ་བརྒྱ་ཆའི་༡༩ ཡིས་སེམས་ཀྱི་སྡུག་བསྔལ་མྱོང་བཞིན་པ་དང་།  སློབ་མ་བརྒྱ་ཆའི་༡༢ ཀྱིས་ལུས་ཀྱི་སྡུག་བསྔལ་མྱོང་བཞིན་ཡོད་པར་བརྗོད་འདུག  ཡང་ཀོ་རི་ཡའི་དུས་བབ་ཅེས་པའི་གསར་ཤོག་དེས་སྤྱི་ལོ་༢༠༡༩ ལོའི་ཟླ་༧་པའི་ནང་དུ་གནས་ཚུལ་སྤེལ་བ་ལྟར་ན། ལོ་དེར་སློབ་མ་བརྒྱ་ཆའི་༣༣་ལ་རང་ཤི་རྒྱག་པའི་བསམ་འདུན་སྐྱེས་མྱོང་བ་དང་དེ། སྔར་ལོ་དང་བསྡུར་ན་རང་ཤི་རྒྱག་པའི་བསམ་འདུན་སྐྱེས་མྱོང་བའི་སློབ་མ་བརྒྱ་ཆའི་༥ ཡར་འཕར་ཡོད་པར་བརྗོད་པ་དང་། གནས་སྟངས་ཇེ་སྡུག་ཏུ་སོང་བའི་དབང་གིས་སྤྱི་ལོ་༢༠༢༡་ལོ་ཀོ་རི་ཡའི་མི་དམངས་ཚོགས་ཆེན་གྱིས་བྱིས་པའི་སྟེང་དུ་དྲག་སྤྱོད་གཏན་ནས་བཀོལ་ན་མི་ཆོག་པའི་ཁྲིམས་སྒྲིག་གཏན་འབེབས་བྱས་ཡོད་འདུག དེ་བཞིན་ང་ཚོའི་ཁྱིམ་མཚེས་རྒྱལ་ཁབ་ཉི་ཧོང་ནང་དུའང་དཀའ་ངལ་གཅིག་མཚུངས་སུ་འཕྲད་དེ་སྤྱི་ལོ་༢༠༢༠ ལོའི་ཟླ་བ་ ༤་བའི་ནང་དུ་བྱིས་པའི་སྟེང་དུ་དྲག་སྤྱོད་རྩ་བ་ནས་བཀོལ་མི་ཆོག་པའི་ཁྲིམས་ལུགས་གཏན་འབེབས་བྱས་ཡོད་འདུག དེ་ནས་གོ་ལ་མཉམ་འབྲེལ་གྱིས་བྱིས་པའི་སྟེང་དུ་དྲག་སྤྱོད་བཀོལ་མཚམས་འཇོག་པ་ཞེས་པའི་ཚོགས་པ་དེས་སྤྱི་ལོ་༢༠༢༡་ལོའི་ཟླ་བ་༤་བའི་ནང་དུ་བཏོན་པའི་སྙན་ཐོ་ལྟར་ན། སྤྱི་ལོ་༢༠༡༦ ལོར་ཚོགས་པ་དེ་བཙུགས་པ་ནས་བཟུང་ད་ལྟའི་བར་དུ་འཛམ་གླིང་གིི་རྒྱལ་ཁབ་༦༨ ཀྱིས་བྱིས་པའི་སྟེང་དུ་དྲག་སྤྱོད་གཏན་ནས་བཀོལ་མི་ཆོག་པའི་ཁྲིམས་ལུགས་རྒྱལ་ཁབ་ཀྱི་བཅའ་ཁྲིམས་ནང་དུ་གཏན་འབེབས་བྱས་ཏེ་ལག་ལྟར་བྱེད་བཞིན་ཡོད་པ་དང་། རྒྱལ་ཁབ་༢༧་གྱིས་བྱིས་པའི་སྟེང་དུ་དྲག་སྤྱོད་རྩ་བ་ནས་བཀོལ་མི་ཆོག་པའི་བཅའ་ཁྲིམས་གཏན་འབེབས་བྱེད་རྒྱུ་ཡིན་པའི་ཁས་ལེན་བྱས་པ། རྒྱལ་ཁབ་༡༣༤་ཡིས་སློབ་གྲྭའི་ནང་ནས་སློབ་མའི་སྟེང་དུ་དྲག་སྤྱོད་བཀོལ་ན་ཁྲིམས་འགལ་ཡིན་པའི་བཅའ་ཁྲིམས་བཟོས་ཡོད་པར་བརྗོད་འདུག  ཡང་ཚོགས་པ་དེའི་དྲ་ཚུགས་ལྟར་ན་ཁོ་ཚོས་འཛམ་གླིང་མཉམ་འབྲེལ་རྒྱལ་ཚོགས་ཀྱི་བྱིས་པའི་ཐོབ་ཐང་ལྷན་ཚོགས་ཀྱིས་ཁོངས་གཏོགས་རྒྱལ་ཁབ་༡༩༠་ལ་བྱིས་པའི་སྟེང་དུ་དྲག་སྤྱོད་བཀོལ་བ་བཀག་སྡོམ་བྱེད་དགོས་པའི་ལམ་སྟོན་དོན་ཚན་༤༨༠་མཚམས་སྦྱོར་བྱས་ཡོད་ཅེས་བརྗོད་འདུག འོན་ཀྱང་། བྱིས་པའི་སྟེང་དུ་དྲག་སྤྱོད་བཀོལ་བའི་གནད་དོན་དེ་ནི་ཧ་ཅང་གཞི་རྒྱ་ཆེ་ཞིང་། ཆེད་མཁས་པ་དང་བྱིས་པའི་ཁེ་དབང་སྲུང་སྐྱོབ་ཚོགས་པ། ཕ་མ་དང་དགེ་རྒན་སོགས་སྤྱི་ཚོགས་ཁྲོད་ཀྱི་གླེང་རྙོག་ཚ་བོ་ཞིག་ཡིན་པའི་གནས་ཚུལ་བྲིས་འདུག་གོ།

བྱིས་པའི་ཐོབ་ཐང་སྲུང་སྐྱོབ་ཀྱི་ཁྲིམས་ལུགས་ཀྱི་བྱུང་རབས་དང་འབྲེལ་བའི་གནས་ཚུལ་ལ་ཕྱི་མིག་ཅིག་བལྟས་པ་ཡིན་ན། སྤྱི་ལོའི་དུས་རབས་བཅོ་བརྒྱད་པའི་ནང་དུ་ཕལ་ཆེར་བྱིས་པའི་ཐོབ་ཐང་སྲུང་སྐྱོབ་སྐོར་གྱི་ཁྲིམས་ལུགས་སོགས་ཕལ་ཆེར་མེད་པར་སྣང་། ཡིན་ནའང་བྱིས་པ་ངལ་རྩོལ་ལ་ཞུགས་པ་མང་ཞིང་། ངལ་རྩོལ་ཁྲོད་དུ་བྱིས་པའི་བདེ་འཇགས་སྲུང་སྐྱོབ་དང་འབྲེལ་བའི་ཁྲིགས་སྒྲིག་རེ་ཡོད་པ་དཔེར་ན། སྤྱི་ལོ་༡༩༠༤་ལོར་ཨ་རིའི་སྤྱི་ཚོགས་གསར་བརྗེ་བ་ཧྥུ་ལོ་རན་སུ་ཁྭ་ལས་(florence Kelley)་ཞེས་པའི་བུད་མེད་ཅིག་གིས་རྒྱལ་ཡོངས་བྱིས་པའི་ངལ་རྩོལ་ཚོགས་ཆུང་ཞེས་པ་ཞིག་བཙུགས་པ་དང་། དེ་ལ་བརྟེན་ནས་སྤྱི་ལོ་༡༩༡༢་ལོར་ཨ་རིའི་གཞུང་གིས་བྱིས་པའི་བདེ་འཇགས་ལྟ་རྟོག་བྱེད་མཁན་གྱི་ཚོགས་པ་( U.S. Childfren’s Bureau) ཞེས་པ་གསར་འཛུགས་བྱས་པར་གྲགས། འཛམ་གླིང་དམག་ཆེན་དང་པོ་མཇུག་རྫོགས་རྗེས། ཡོ་རོབ་ཀྱི་རྒྱལ་ཁབ་རྣམས་གཙོས་པའི་མཐུན་ཕྱོགས་རྒྱལ་ཁབ་ཚོས་མཉམ་དུ་རྒྱལ་མང་མཐུན་ཚོགས་(League of Nations) ཞེས་པའི་རྒྱལ་ཁབ་༦༠ ལས་གྲུབ་པའི་ཚོགས་པ་ཞིག་བཙུགས་པ་དང་། སྤྱི་ལོ་༡༩༢༤་ལོར་རྒྱལ་མང་མཐུན་ཚོགས་ཀྱིས་(Geneva Declaration of the Rights of the Child)་ཇི་ནཱེ་ཝ་བྱིས་པའི་ཐོབ་ཐང་གསལ་བསྒྲགས་ཐེངས་དང་པོར་གནང་བར་གྲགས། གསལ་བསྒྲགས་དེའི་ཟིན་བྲིས་འབྲི་མཁན་ནི་ཨ་སྒུ་ལན་ཀྲིན་ཅེ་བྷི་(Eglantyne Jebb) ཞེས་པའི་དབྱིན་ཇིའི་བུད་མེད་སྤྱི་ཚོགས་གསར་བརྗེ་བ་ཞིག་ཡིན་པར་བཤད། མོས་འཛམ་གླིང་དམག་ཆེན་དང་པོའི་རྗེས་སུ་(Save the Children) བྱིས་པ་སྲུང་སྐྱོབ་ཚོགས་པ་ཞེས་པ་ཞིག་གསར་བཙུགས་བྱས་ཡོད་པར་བཤད། འཛམ་གླིང་དམག་ཆེན་གཉིས་པ་མཇུག་སྒྲིལ་བའི་རྗེས་སུ། སྤྱི་ལོ་༡༩༤༥་ལོར་འཛམ་གླིང་མཉམ་འབྲེལ་རྒྱལ་ཚོགས་གསར་འཛུགས་གནང་ཞིང་སྤྱི་ལོ་༡༩༤༧་ལོར་རྒྱལ་སྤྱིའི་བྱིས་པའི་ཛ་དྲག་ཐེབས་རྩ་(UNICEF)་ཞེས་པ་གསར་འཛུགས་གནང་། སྤྱི་ལོ་༡༩༤༨་ལོའི་ཟླ་བ་༡༢་བའི་ནང་རྒྱལ་སྤྱིའི་འགྲོ་བ་མིའི་ཐོབ་ཐང་ཡོངས་ཁྱབ་ཏུ་གསལ་བསྒྲགས་གནང་། འགྲོ་བ་མིའི་ཐོབ་ཐང་གི་ཁྲིམས་ལུགས་ཀྱི་ནང་གསེས་དོན་ཚན་དང་པོའི་ནང་དུ་འགྲོ་བ་མིའི་རིགས་ཐམས་ཅད་ལ་སྐྱེས་ཙམ་ཉིད་ནས་ཆེ་མཐོང་དང༌ཐོབ་ཐང། རང་དབང་དང་འདྲ་མཉམ་དུ་ཡོད་ཅེས་དང་། དོན་ཚན་གསུམ་པའི་ནང་དུ་སྐྱེ་བོ་རེ་རེ་ལ་སྲོག་འཚོ་བ་དང༌རང་དབང་ལ་སྤྱོད་པ། ལུས་ཕུང་བདེ་སྲུང་བཅས་ཀྱི་ཐོབ་ཐང་ཡོད་ཅེས་བཤད་ཡོད། ཡང་དོན་ཚན་ལྔ་བའི་ནང་དུ་མི་སུ་ཞིག་ཡིན་ཀྱང་མི་སྤྱོད་ལས་འདས་པའི་སྡིག་སྦྱོང་མནར་གཅོད་མྱོང་མི་དགོས་ཞེས་དང་། དོན་ཚན་བཅུ་དགུ་བའི་ནང་དུ་མི་ཚང་མ་ལ་བསམ་བློའི་རང་དབང་། གཏམ་བརྗོད་རང་དབང་ཡོད་ཅེས་བསྟན་ཡོད། དོན་ཚན་ཉེར་དྲུག་པའི་ནང་དུ་མི་ཚང་མ་ལ་སློབ་གསོ་མྱོང་བའི་ཐོབ་ཐང་ཡོད་ཅེས་བསྟན་ཡོད་པ་རེད། ཁྱད་པར་དུ་སྤྱི་ལོ་༡༩༨༩་ལོའི་ཟླ་བ་༡༡་པའི་ནང་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་བྱིས་པའི་ཐོབ་ཐང་ལྷན་ཚོགས་ཀྱིས་རྒྱལ་སྤྱིའི་བྱིས་པའི་ཐོབ་ཐང་མོས་མཐུན་ཡིག་ཆ་དོན་ཚན་༥༤་ལས་གྲུབ་པ་ཞིག་གསལ་བསྒྲུགས་གནང་ཞིང་། ཡིག་ཆ་དེར་མཉམ་འབྲེལ་རྒྱལ་ཚོགས་ཀྱི་ཁོངས་གཏོགས་རྒྱལ་ཁབ་༡༩༦་གིས་མཚན་རྟགས་བཀོད་ཡོད་པར་བཤད། ཁྲིམས་ལུགས་དེའི་ནང་དུ་གཙོ་ཆེ་ཤོས་བྱིས་པ་ཚོས་དབྱེ་འབྱེད་ཀྱི་སྡུག་བསྔལ་མྱོང་མི་དགོས་པ་དང་བྱིས་པ་དང་འབྲེལ་བའི་ཐག་གཅོད་གང་ཞིག་ཡིན་ཀྱང་བྱིས་པའི་འདོད་འདུན་གཙོ་བོར་འཛིན་དགོས་པ་སོགས་ཡིན། སྤྱི་ལོ་༢༠༡༤་ལོར་བྱིས་པའི་ཐོབ་ཐང་གྲོས་མཐུན་ཡིག་ཆ་དེ་ཡོངས་ཁྱབ་གསལ་བསྒྲགས་བྱས་ནས་མི་ལོ་༢༥་འགོར་བའི་དུས་དྲན་ཚོགས་འདུ་ཚོགས་ཏེ། ཨ་རི་དང་སོ་མ་ལེ་ཡ་རྒྱལ་ཁབ་གཉིས་མ་གཏོགས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁོངས་གཏོགས་རྒྱལ་ཁབ་ཚང་མས་སླར་ཡང་གཞུང་འབྲེལ་མོས་མཐུན་དང་ཁས་ལེན་བྱས་ཡོད་པར་གྲགས། དེ་ལྟར་ནའང་གོ་ལ་མཉམ་འབྲེལ་གྱིས་བྱིས་པའི་སྟེང་དུ་དྲག་སྤྱོད་བཀོལ་མཚམས་འཇོག་པ་ཞེས་པའི་ཚོགས་པ་དེའི་དྲ་ངོས་སུ་གསལ་བ་ལྟར་ན། ད་ལྟའི་གནས་སྐབས་སུ་འཛམ་གླིང་ཁྱོན་ཡོངས་ལ་དྲག་སྤྱོད་ཀྱི་སྡུག་བསྔལ་རྩ་བ་ནས་མྱོང་མི་དགོས་པའི་བྱིས་པ་བརྒྱ་ཆའི་༡༣་ལས་མེད་པ་དང་། སློབ་གྲྭ་དང་བྱིས་སྐྱོང་ཁང་སོགས་སུ་དྲག་སྤྱོད་ཀྱི་སྡུག་བསྔལ་མྱོང་མི་དགོས་པའི་བྱིས་པ་བརྒྱ་ཆའི་༧༧་ཡོད་པར་བཤད། བྱིས་པ་བརྒྱ་ཆའི་༡༠ ཡིས་དྲག་སྤྱོད་ཀྱི་སྡུག་བསྔལ་མྱངས་དང་མྱོང་བཞིན་ཡོད་པའི་གནས་ཚུལ་བཀོད་འདུག་གོ།།

མདོར་བསྡུས་ན་རྒྱ་གར་གྱི་མེས་པོ་དམ་པ་གན་རྡི་མཆོག་གིས་དྲང་ཚུགས་ཡོད་པའི་སྟེང་ནས་མོས་མཐུན་མི་བྱེད་པ་ནི་ཡར་རྒྱས་ཀྱི་མཚོན་རྟགས་རེད་ཅེས་གསུངས་ཡོད་པ་ལྟར། ཉེ་ཆར་འབྲོག་མོ་དཀྱུས་མ་ཞིག་གིས་སློབ་གྲྭའི་ཁོར་ཡུག་དང་འབྲེལ་བའི་དགོངས་ཚུལ་གསུངས་པ་དང་སློབ་མ་བུ་མོ་ཁ་ཤས་ཀྱིས་སློབ་གྲོགས་བུ་མོ་ཞིག་ལ་བརྙེས་བཅོས་བྱས་པའི་གནས་ཚུལ་དང་འབྲེལ་བོད་མི་མཁས་བླུན་མང་བོས་དྲང་ཕྱོགས་དང་ལྡོག་ཕྱོགས་གཉིས་ནས་འཛེམ་དོགས་མེད་པར་བགྲོ་གླེང་གནང་བའི་རྣམ་པ་དེ་བོད་མི་ཚོས་སྤྱི་ཚོགས་ལ་འགན་འཁུར་ཏེ་སྤྱི་ཚོགས་ཡར་རྒྱས་སུ་འགྲོ་བཞིན་པའི་མཚོན་རྟགས་ཤིག་ལོས་ཡིན་སྙམ། ཡིན་ནའང་། འགྲོ་བ་མིའི་ཐོབ་ཐང་ནི་བྱིས་པའི་ཐོབ་ཐང་ཡིན་ཞིང་། བྱིས་པའི་ཐོབ་ཐང་ལ་འགན་ལེན་བྱེད་མཁན་གྱི་མི་སྣ་གཙོ་བོ་དག་ནི་ཕ་མ་དང་དགེ་རྒན། བྱིས་སྐྱོང་སློབ་གསོ་བ་དག་ཡིན་པར་སྣང་། རྒྱུ་མཚན་ནི་བྱིས་པ་ཆུང་ཆུང་ཚོར་རང་གི་ཁེ་དབང་སྲུང་སྐྱོབ་དང་ཐོབ་ཐང་འཐབ་རྩོད་བྱེད་པའི་ནུས་པ་མེད། དེར་བརྟེན་ཕ་མ་དང་དགེ་རྒན། བྱིས་སྐྱོང་སློབ་གསོ་བ་དང་འབྲེལ་ཡོད་ཚང་མས་བྱིས་པའི་རང་གཤིས་གསོ་སྐྱོང་བྱེད་པའི་ཤེས་འཇོན་གཉིས་ཀ་ཡོད་དགོས་པ་ཡིན། དེ་ནས་ང་ཚོའི་སྤྱི་ཚོགས་ཁྲོད་དུ་བྱིས་པའི་སེམས་ཁམས་རིག་པ་དང་བྱིས་པའི་ཐོབ་ཐང་སྐོར་ཐོས་དུས་རྣམ་རྟོག་ལངས་མཁན་རེ་ཟུང་ཡོད་པ་དང་། ཁོ་ཚོ་ནི་ས་ཁ་རུབ་ཀྱི་མི་མིག་རུབ་ཟེར་བའི་གཏམ་དཔེ་ལས་མ་འདས་ཤིང་། ད་ལྟ་རྒྱལ་སྤྱིའི་ཁྱོན་ཡོངས་ལ་བྱིས་པའི་སློབ་གསོའི་ཁ་ཕྱོགས་སྒོ་ཀུན་ནས་ཡར་རྒྱས་སུ་འགྲོ་བཞིན་ཡོད་པ་དང་། ང་ཚོས་ཀྱང་ཁ་ཕྱོགས་དེ་ལ་བསྟུན་ཏེ་མདུན་སྐྱོད་བྱེད་དགོས་པ་ལས་ཁ་བྱང་བལྟས་ཀྱི་བྲག་ཁུང་ནང་དུ་གནས་ཐབས་གཞར་ནས་མེད་དོ།།