ལྕམ་ནན་སེ་པོལ་སི་མཆོག་ནས་རྒྱལ་སྤྱིའི་མགོ་ཁྲིད་ཚོ་རྒྱ་ནག་གི་ཨོ་རྩལ་འགྲན་ཚོགས་ནང་མཉམ་ཞུགས་བྱས་ཚེ་སོ་སོའི་བཟང་སྤྱོད་ཀྱི་འགན་འཁྲི་འཁུར་གྱི་མེད་པས་མཉམ་ཞུགས་མི་གནང་བའི་འབོད་སྐུལ་གནང་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཨ་རིའི་གྲོས་ཚོགས་ནང་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་རྒྱ་ནག་འཚོག་རྒྱུའི་ཐད་ཉན་ཞིབ་བྱས་སྐབས། གྲོས་ཚོགས་འོག་མའི་ཚོགས་གཙོ་ལྕམ་ནན་སེ་པོལ་སི་མཆོག་གིས། རྒྱ་ནག་གིས་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པའི་སྐྱོན་བརྗོད་དང་སྦྲགས། རྒྱལ་སྤྱིའི་མགོ་ཁྲིད་རྣམས་ནས་རྒྱ་ནག་ལ་ཨོ་རྩལ་འགྲན་ཚོགས་གོ་སྒྲིག་བྱེད་པའི་རིན་ཐང་གི་གནས་བབ་མེད་པ་མཁྱེན་པའི་ཐོག ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་རྒྱ་ནག་ནང་འཚོག་རྒྱུར་ངོ་རྒོལ་དང་བཀག་སྡོམ་གནང་དགོས་པའི་འབོད་སྐུལ་གནང་འདུག
དེ་འབྲེལ་གྱི་གནས་ཚུལ་ནང་། ལྕམ་ནན་སེ་པོལ་སི་མཆོག་གིས། རྒྱ་ནག་ནང་རིགས་རྒྱུད་རྩ་གཏོར་གྱི་བྱ་སྤྱོད་འགྲོ་བཞིན་པའི་སྐབས་ཤིག་ལ་རྒྱལ་སྤྱིའི་སྲིད་གཞུང་ཁག་གི་མགོ་ཁྲིད་ཚོ་རྒྱ་ནག་ནང་ཕྱིན་ཚེ། དེ་ནི་འཛམ་གླིང་ས་ཕྱོགས་གང་དུའང་འགྲོ་བ་མིའི་ཐོབ་ཐང་སྐོར་གླེང་སློང་བྱེད་པར་ཁྱེད་ཀྱིས་བཟང་སྤྱོད་ཀྱི་འགན་འཁྲི་ག་ཚོད་ཅིག་འཁྱེར་ཡོད་མེད་ཀྱི་དྲི་གཞི་ཆེན་པོ་ཞིག་ཆགས་ཀྱི་ཡོད། ཅེས་རྒྱལ་སྤྱིའི་མགོ་ཁྲིད་ཚོས་རྒྱ་ནག་ལ་དགུན་ཁའི་ཨོ་རྩལ་འགྲན་ཚོགས་ཀྱི་ཆེ་མཐོང་དེ་མི་སྤྲོད་པའི་འབོད་སྐུལ་གནང་ཡོད་པ་རེད།
ཕྱི་ ༢༠༢༢ ལོའི་རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་དང་འབྲེལ། ཨ་རིའི་གྲོས་ཚོགས་འཐུས་མི་མང་པོས་རྒྱ་ནག་གིས་ཡུ་གུར་མི་རིགས་རྩ་མེད་དང་རྒྱའི་འོག་ཏུ་ཚུད་པའི་གྲངས་ཉུང་མི་རིགས་ཁག་གི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་གི་ཡོད་པའི་སྐྱོན་བརྗོད་བྱེད་ཀྱི་ཡོད་ཅིང་། སྤྱི་མཐུན་ཚོགས་པའི་གྲོས་ཚོགས་འཐུས་མི་སི་མེ་ཐི་ (Chris Smith) ལགས་དང་། ཇིམ་མག་གྷོ་ཝན་ (Jim McGovern)ལགས། དེ་བཞིན། མེ་ཊི་རོམ་ནེ་(Mitt Romney) སོགས་ཀྱིས། རྒྱ་ནག་ལ་སྐྱོན་བརྗོད་དང་སྦྲགས་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་རྩེད་འགྲན་རྒྱ་ནག་ཏུ་འཚོག་རྒྱུ་མཚམས་འཇོག་གིས། རྒྱལ་སྤྱིའི་མདུན་ནས་རྒྱ་ནག་གིས་རིགས་རྒྱུད་རྩ་མེད་དང་གྲངས་ཉུང་མི་རིགས་ཀྱི་འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པར་འགན་ལེན་བྱེད་དུ་འཇུག་དགོས་སྐོར་སོགས་བརྗོད་ཡོད་པ་རེད།
གནས་ཚུལ་དེའི་ཐད་ཨ་རིར་གནས་པའི་རྒྱ་ནག་གཞུང་ཚབ་ཁང་གི་མགྲིན་ཚབ་པ་ལའོ་ཕེང་ཡོ་ཟེར་བས་ལན་འདེབས་བྱས་པའི་ནང་། ཨ་རིའི་ཆབ་སྲིད་པ་ཁག་ཅིག་གིས་ཁོ་ཚོར་བཟང་སྤྱོད་ཀྱི་འགན་འཁྲི་ཡོད་པའི་བསམ་བློ་ཇི་ལྟར་འཁོར་གྱི་ཡོད་དམ། ཡང་འགྲོ་བ་མིའི་ཐོབ་ཐང་གི་གནད་དོན་ཐད་ཁོ་ཚོར་འོས་བབ་དེ་མེད་ལ། དེ་བཞིན་ལོ་རྒྱུས་དང་ད་ལྟའི་གནས་བབ་གང་ཐད་ནས་ཨ་རིས་རྒྱ་ནག་ལ་ཚོད་མེད་བསྙོན་འཛུགས་བྱེད་དགོས་དོན་མེད། ཅེས་བརྗོད་ཡོད་པ་རེད།
ད་རེས་ལྕམ་ནན་སེ་པོལ་སི་མཆོག་ནས་རྒྱལ་སྤྱིའི་མགོ་ཁྲིད་ཁག་ལ་འབོད་སྐུལ་གནང་གི་ཡོད་པ་དེ་ནི། རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་ལ་རྒྱལ་འབྲེལ་གྱི་ཐོག་ནས་ངོ་རྒོལ་དང་བཀག་སྡོམ་གནང་བའི་འབོད་སྐུལ་ཞིག་ཡིན་པ་ནན་བརྗོད་དང་འབྲེལ། རྒྱལ་སྤྱིའི་མགོ་ཁྲིད་སུ་ཞིག་རྒྱ་ནག་གི་ཨོ་རྩལ་འགྲན་ཚོགས་ཐོག་ཞུགས་ཚེ། དེས་རང་གི་བཟང་སྤྱོད་ཀྱི་འགན་འཁྲི་བརླག་གི་ཡོད་པ་བསྟན་ཡོད་སྐོར་གསུངས་ཡོད་པ་རེད་ལ། ལྕམ་ནན་སེ་པོལ་སི་མཆོག་ནས་རྒྱལ་སྤྱིའི་མགོ་ཁྲིད་ཁག་ལ་འབོད་སྐུལ་དེ་གནང་བ་དང་ལྷན་དུ། འགྲོ་བ་མིའི་ཐོབ་ཐང་བརྩོན་ལེན་
རྒྱ་ནག་གི་དགུན་ཁའི་ཨོ་རྩལ་འགྲན་ཚོགས་ཐད་འདས་ལོར་བོད་དང་ཐའེ་ཝན། ཧོང་ཀོང་དང་ཡུ་གུར་སོགས་ཀྱི་ཚོགས་པ་ ༡༦༠ ལྷག་མཉམ་འབྲེལ་གྱིས་ཨོ་རྩལ་མཐུན་ཚོགས་ཀྱི་འགན་འཛིན་ལྷན་ཚོགས་དང་རྒྱལ་སྤྱིའི་སྲིད་གཞུང་ཁག་དང་ཨོ་རྩལ་རྩེད་འགྲན་པ་སོགས་ལ་ཞུ་ཡིག་ཕུལ་ཏེ། རྒྱ་ནག་ཏུ་འཚོག་གཏན་འཁེལ་བའི་ཕྱི་ལོ་ ༢༠༢༢ ལོའི་ཨོ་རྩལ་འགྲན་ཚོགས་མཚམས་འཇོག་དགོས་པའི་ལས་འགུལ་སྤེལ་ཡོད་པ་རེད། འོན་ཀྱང་། ཨོ་རྩལ་མཐུན་ཚོགས་ཀྱི་འགན་འཛིན་ལྷན་ཚོགས་ནས་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩལ་འགྲན་ཚོགས་མཚམས་འཇོག་བྱ་རྒྱུ་མིན་སྐོར་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
