ད་ལོ་རྒྱ་ནག་གིས་བོད་ཞི་བས་བཅིངས་གྲོལ་བཏང་སྟེ་ལོ་ངོ་བདུན་ཅུ་འཁོར་བའི་ཟེར་དུས་དྲན་དང་བསྟུན་རྒྱལ་སྤྱིའི་སྟེང་བོད་དོན་ལ་འཁྱོག་བརྗོད་ནན་བཤད་དང་ལོ་ངོ་བདུན་ཅུའི་རིང་བོད་ཡུལ་འཕེལ་རྒྱས་བཏང་ཡོད་ལུགས་སོགས་འཁོད་པའི་རྒྱབ་ཤ་དཀར་པོའི་དེབ་ཟེར་བ་དེ་བཏོན་འདུག
འདི་ལོ་ནི་རྒྱ་ནག་གཞུང་གིས་བོད་ཞི་བས་བཅིངས་གྲོལ་བཏང་སྟེ་ལོ་ངོ་ ༧༠ འཁོར་གྱི་ཡོད་ཟེར་བའི་དུས་དྲན་དང་བསྟུན། དེ་རིང་ཞོགས་པར་རྒྱ་ནག་གཞུང་གིས་ཕྱི་ལོ་ ༡༩༥༡ ནས་བོད་ཞི་བས་བཅིངས་གྲོལ་བཏང་སྟེ་འཛུགས་སྐྲུན་དང་འཕེལ་རྒྱས་ཅན་དུ་གྱུར་ཡོད། ཅེས་ཁྱོན་ཡིག་འབྲི་ ༡༥༣༣༠ ཅན་གྱི་བོད་དོན་འཁྱོག་བརྗོད་སྐོར་ཚུད་པའི་རྒྱབ་ཤ་དཀར་པོའི་དེབ་ཟེར་བ་བཏོན་འདུག་པ་དང་། དེབ་དེར་ཁྱོན་དོན་ཚན་བཅུ་ཡོད་པའི་ནང་བོད་ཞི་བས་བཅིངས་གྲོལ་མ་བཏང་གོང་དང་བོད་ཞི་བས་བཅིངས་གྲོལ་བཏང་བའི་བརྒྱུད་རིམ། དེ་བཞིན། བོད་ལ་དམངས་གཙོའི་བཅོས་སྒྱུར་དང་འཛུགས་སྐྲུན་འཕེལ་རྒྱས། བོད་ནང་དབུལ་སྐྱོབ་ལས་གཞི་དང་མི་རིགས་དང་ཆོས་ལུགས་ཀྱི་ལས་དོན་ལེགས་པོ་འགྲུབ་ཡོད་ཚུལ། བོད་ཀྱི་སྲོལ་རྒྱུན་རིག་གཞུང་སྲུང་སྐྱོབ་དང་འཕེལ་རྒྱས། ཁོར་ཡུག་སྲུང་སྐྱོབ། སེམས་ཐག་གཙང་བཅད་ཀྱིས་སྤྱི་ཚོགས་བརྟན་བརླིང་དང་རྒྱལ་ཁབ་གཅིག་གྱུར་སྲུང་སྐྱོབ། དེ་བཞིན། བོད་ནང་སྤྱི་ཚོགས་རང་ལུགས་ཀྱི་དུས་རབས་གསར་པའི་ལེའུ་གསར་པ་ཞིག་བརྩམས་ཡོད་ཚུལ་སོགས་བཀོད་འདུག
དེབ་དེའི་ནང་། འདས་པའི་ལོ་མང་རིང་༧གོང་མཆོག་དང་བཙན་བྱོལ་བོད་མི། དེ་བཞིན་བོད་དོན་རྒྱབ་སྐྱོར་བ་སོགས་ཀྱིས། བོད་རང་བཙན་ལ་སྐུལ་འདེད་དང་ལས་འགུལ་སོགས་སྤེལ་ཏེ། བོད་ནང་གི་ཞི་བདེ་དང་བརྟན་བརླིང་ལ་ཉེན་ཁ་བསྐྲུན་ཡོད་ལུགས་དང་། ཕྱི་ལོ་ ༡༩༥༩ ལོར་བོད་ས་ཡོངས་སུ་ཞི་བས་སྒེར་ལངས་བྱས་རྗེས་༧གོང་ས་མཆོག་གི་དབུས་པའི་བོད་མི་རྣམས་བྱུང་རྗེས་རྒྱ་གར་རུ་བྲོས་བྱོལ་དུ་ཕྱིན་པ་ནས་དྲག་པོའི་ཐོག་ནས་རང་བཙན་རྩོད་ཀྱི་ཡོད་ཚུལ། དེ་བཞིན། ཕྱི་ལོ་ ༡༩༧༠ ཙམ་ནས་༧གོང་ས་མཆོག་དང་བཙན་བྱོལ་བོད་མི་ཚོས་ཕྱོགས་གཅིག་ནས་དྲག་པོའི་ལས་འགུལ་སྤེལ་ཏེ་རྒྱ་ནག་དབུས་གཞུང་ལ་གནོན་ཤུགས་སྤྲོད་ཐབས་བྱས་པ་དང་ཕྱོགས་གཞན་ཞིག་ནས་འཚེ་མེད་ཞི་བ་དང་དབུ་མའི་ལམ་ཐོག་ཤར་བསྐྱོད་བྱ་རྒྱུ་ཡིན་སྐོར་བརྗོད་དེ་འཛམ་གླིང་ལ་མགོ་སྐོར་བཏང་ཡོད་ལུགས་སོགས་ཀྱིས་སྐྱོན་བརྗོད་བྱས་འདུག་པ་མ་ཟད། ཕྱི་ལོ་ ༢༠༡༡ ལོ་ནས་༧གོང་ས་མཆོག་དང་བཙན་བྱོལ་བོད་མི་ཚོས་བོད་ནང་གི་བླ་མ་གྲྭ་བ་དང་མང་ཚོགས་ནས་རང་ལུས་མེར་སྲེག་གཏོང་དགོས་པའི་སྐུལ་མ་བཏང་སྟེ་དྲ་རྒྱའི་སྟེང་ལམ་སྟོན་སོགས་བཞག་པར་བརྟེན། བོད་ཀྱི་ས་ཁུལ་ཁག་ཅིག་ཏུ་རང་ལུས་མེར་སྲེག་གཏོང་མཁན་ཇེ་མང་དུ་ཕྱིན་ཡོད་པའི་སྐྱོན་བརྗོད་ཀྱང་བྱས་འདུག
ཡང་དེབ་ཀྱི་ཚན་པ་དགུ་བ་སྟེ། སེམས་ཐག་གཙང་བཅད་ཀྱིས་སྤྱི་ཚོགས་བརྟན་བརླིང་དང་རྒྱལ་ཁབ་གཅིག་གྱུར་སྲུང་སྐྱོབ་ཞེས་པའི་ནང་། ཕྱི་ལོ་ ༡༩༥༠ ནང་ཨ་རིའི་གསང་བའི་ལས་ཁུངས་ཀྱིས་བོད་མིར་རོགས་སྐྱོར་བྱས་པའི་ལོ་རྒྱུས་བརྗོད་པ་དང་སྦྲགས། ནུབ་ཕྱོགས་པས་བོད་ཀྱི་ཞི་བདེ་བརྟན་བརླིང་ལ་གནོད་པ་རྒྱ་ཆེ་སྐྱེལ་ཞིང་། བོད་དོན་ལ་ཁ་གཡར་ཏེ་ཨ་རིའི་གཞུང་གིས་ཕྱི་ལོ་ ༢༠༠༢ ལོའི་བོད་དོན་སྲིད་ཇུས་དང་ཕྱི་ལོ་ ༢༠༡༨ ལོར་བོད་ནང་འགྲོ་འོང་འདྲ་མཉམ་གྱི་སྲིད་ཇུས། དེ་བཞིན། ཕྱི་ལོ་ ༢༠༢༠ ལོའི་བོད་དོན་སྲིད་ཇུས་དང་རྒྱབ་སྐྱོར་ཁྲིམས་ཞེས་པ་གཏན་འབེབ་བྱས་པར་སྐྱོན་བརྗོད་བྱས་འདུག
ཡང་། རྒྱ་ནག་ནི་མི་རིགས་སྣ་མང་འདུས་པའི་རྒྱལ་ཁབ་ཅིག་ཡིན་པ་ལོ་རྒྱུས་ནང་གསལ་ཞིང་། བོད་ནི་ལོ་རྒྱུས་དང་སྐད་ཡིག་རིག་གཞུང་། རིགས་རྒྱུད་སོགས་གང་ཐད་ནས་རྒྱའི་མངའ་ཁོངས་སུ་གཏོགས་ཤིང་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཤིག་ཡིན་ནའང་། དུས་རབས་བཅུ་དགུ་བའི་དུས་དཀྱིལ་ཙམ་ནས་དབྱིན་ཇིའི་བཙན་རྒྱལ་རིང་ལུགས་ཀྱིས། རྒྱ་ནག་གི་མངའ་ཁོངས་དང་མཐའ་མཚམས་གཅིག་གྱུར་ལ་དམིགས་ཚད་བཟུང་སྟེ་བོད་རང་བཙན་ཡིན་པའི་བསམ་བློ་བསྐྲུན་ཡོད་སྐོར་སོགས་བརྗོད་དེ་དོན་དངོས་དང་མི་མཐུན་ཞིང་ལོ་རྒྱུས་ལ་འཁྱོག་བརྗོད་ནན་མོ་བྱས་འདུག
དེ་བཞིན་དུ། རྒྱ་ནག་གིས་བོད་ཞི་བས་བཅིངས་གྲོལ་བཏང་སྟེ་བོད་ཀྱི་གནས་སྟངས་ཕྱོགས་ཡོངས་ནས་འཕེལ་རྒྱུས་སུ་ཕྱིན་ཡོད་སྐོར་བརྗོད་པའི་ནང་། ཕྱི་ལོ་ ༡༩༥༡ ལོར་བོད་ཁམས་ཡོངས་ཀྱི་ཐོན་སྐྱེད་ཀྱི་སྤྱི་འབོར་རྒྱ་སྒོར་ས་ཡ་ ༡༢༩ ཡིན་པ་དང་ཕྱི་ལོ་ ༢༠༢༠ ལོར་རྒྱ་སྒོར་ཐེར་འབུམ་ ༡༩༠ ཟིན་ཞིང་། བཟོ་གྲྭའི་ཐོན་སྐྱེད་རྒྱ་སྒོར་ས་ཡ་ ༡།༤ ནས་ཐེར་འབུམ་ ༢༧།༤ ཆགས་ཡོད་པ་དང་། ཕྱི་ལོ་ ༡༩༧༨ ནས་ ༢༠༢༠ བར་བོད་མི་རེའི་ལོ་རེའི་ཡོང་འབབ་རྒྱ་སྒོར་ ༡༧༥ ནས་ ༢༡༧༤༤ བར་བསྐྲུན་ཐུབ་ཡོད་ཚུལ་དང་དེ་མཚུངས་བཞིན་མེ་འཁོར་ལྕགས་ལམ་དང་གཞུང་ལམ། གྲོང་ཁྱེར་ཁག་ ༦༦ ནང་གནམ་ཐང་ཆེན་པོ་ ༥ དང་རྒྱལ་ནང་གནམ་ཐང་ ༡༤༠ འཛུགས་སྐྲུན་གྱིས་འཕེལ་རྒྱས་བཏང་ཡོད།
ཕྱི་ལོ་ ༡༩༥༡ ནས་ ༢༠༡༥ བར་གཞོན་སྐྱེས་དང་ངལ་རྩོལ་བའི་སྡེ་ཁག་ནང་ཡིག་རྨོངས་པའི་བརྒྱ་ཆ་ ༩༥ ནས་ཚགས ༠།༥༢ བར་མར་ཆགས་པ་དང་། ཕྱི་ལོ་ ༡༩༥༡ ནས་ ༢༠༢༠ བར་སློབ་ཞུགས་མཁན་བརྒྱ་ཆ་ ༢ ནས་ ༩༩།༧༡ བར་འཕེལ་ཡོད་སྐོར་དང་། ཕྱི་ལོ་ ༡༩༩༤ ནས་ ༢༠༢༠ བར་རྒྱ་ནག་དབུས་གཞུང་དང་དེའི་ཁྱབ་ཁོངས་སུ་གཏོགས་པའི་བཟོ་གྲྭ་ཁག་ནས་འགྲོ་གྲོན་རྒྱ་སྒོར་ཐེར་འབུམ་ ༥༢།༧ བཏང་སྟེ་བོད་ནང་འཛུགས་སྐྲུན་གྱི་ལས་གཞི་ཁྱོན་ ༦༣༣༠ སྤེལ་ཞིང་། དེ་དང་འབྲེལ་བའི་དམར་ཤོག་ཚོགས་པའི་ཁྱད་དུ་འཕགས་པའི་དམིགས་བསལ་ལས་བྱེད་གྲངས་ ༩༦༨༢ རོགས་སྐྱོར་སླད་བོད་ནང་མངགས་གཏོང་བྱས་ཡོད་སྐོར་སོགས་བརྗོད་འདུག
ཡང་དེབ་དེའི་ནང་གསལ་ལྟར་ན། ད་ལྟའི་ཆར་བོད་ཀྱི་རྫོང་དང་ཞིང་། ཁུལ་སོགས་རིམ་པ་འདྲ་མིན་ནང་ཁྱོན་སློབ་གྲྭ་ཁག་ ༣༡༩༥ དང་སློབ་མ་ཁྱོན་ ༧༩༠༠༠༠ ལྷག་ཡོད་པ་དང་། སློབ་གྲྭ་ཁག་གི་ཁྲོད་དུ་མཐོ་རིམ་གཙུག་ལག་སློབ་གྲྭ་ ༧ དང་། འབྲིང་རིམ་སློབ་གྲྭ་ ༡༤༣། དམའ་རིམ་ ༨༢༧ དང་དེ་བཞིན་འབྲིང་རིམ་གྱི་ལག་ཤེས་སློབ་གྲྭ་ ༡༢ བཅས་ཡོད་པ་རེད་ལ། བོད་ཁུལ་གྱི་སློབ་མ་ཁྱོན་ ༩༢༠༠༠ ལྷག་གིས་རྒྱ་ནག་ཏུ་སློབ་གཉེར་བྱེད་ཀྱི་ཡོད་འདུག གཞན་བོད་ནང་ཁྱོན་དགོན་སྡེ་ཁག་ ༡༧༠༠ ལྷག་དང་དགེ་འདུན་པ་དང་བཙུན་མ་ཁྱོན་ ༤༦༠༠༠། བོད་རིགས་ཁ་ཆེའི་ལྷ་ཁང་བཞི་དང་ཁ་ཆེ་བ་ ༡༢༠༠༠ དང་ཡེ་ཤུ་ཆོས་ལུགས་པ་ཁྱོན་ ༧༠༠ ལྷག་ཡོད་པ་སོགས་བཀོད་ཡོད་པ་ལས། བོད་ཀྱི་གྲྭ་བཙུན་དང་དགོན་སྡེ་ཁག་གྲངས་འབོར་ཇེ་ཉུང་དུ་ཕྱིན་པ་མངོན་གསལ་དོད་ཅིང་། མི་འབོར་གྱི་ཆ་ནས་མི་གྲངས་ས་ཡ་ ༣ ལྷག་འཕེལ་ཡོད་ཟེར།
གསར་འགོད་པ། སྐལ་བཟང་སྦྱིན་པ།
Good 👍 འདིའི་སྒང་ལ་་་ སྲིད་སྐྱོང་གཙོ་བོ་བྱས་པས་ སྤྱི་འཐུས་རྒྱུན་ལས་ཚོས་ བཙན་བྱོལགཞུང་གཏོར་ཤིག་བཏང་།