ཆབ་མདོ་ངག་ཕུན།
༄༅། །ས་ཟླའི་དུས་ཆེན་ནི་ནང་པ་སངས་རྒྱས་པའི་དུས་ཆེན་ཁྱད་པར་འཕགས་ཅན་ཞིག་བརྩི་སྲོལ་ཡོད་ཅིང་། ས་གའི་ཟླ་བ་ནང་དུ་དགེ་བ་སྣེ་གཅིག་བསྒྲུབ་ན་དགེ་བ་ལྡབ་འགྱུར་འཕེལ་བ་དང་། སྡིག་པ་སྣེ་གཅིག་བྱས་ཚེ་སྡིག་པ་ལྡབ་འགྱུར་འགྲོ་བ་ཞིག་ཏུ་ངོས་འཛིན་གནང་སྲོལ་ཡོད། དེ་ཡང་བདག་ཅག་གི་སྟོན་པ་ཤཱཀྱ་ཐུབ་པས་མཛད་པ་མཐའ་ལས་འདས་པ་བཞེས་ཡོད་པ་ནང་ནས། སྐུ་བལྟམས་པ་མཛད་པ་དང་། རབ་ཏུ་བྱུང་བའི་མཛད་པ། བདུད་བཏུལ་བའི་མཛད་པ། སངས་རྒྱས་པའི་མཛད་པ། མྱ་ངན་ལས་འདས་པའི་མཛད་པ་བཅས་དུས་ཆེན་ལྔ་འཛོམས་ཀྱི་ཟླ་བ་ཞིག་ཡིན་པ་ལ་དམིགས་བསལ་ཚེས་པ་ ༡༥ ཉིན་སྐུ་བལྟམས་པའི་མཛད་པ་དང་། སངས་རྒྱས་པའི་མཛད་པ། མྱ་ངན་ལས་འདས་པའི་མཛད་པ་བཅས་ཀྱི་དུས་ཆེན་གསུམ་འཛོམས་ཀྱི་དུས་ཆེན་ཁྱད་འཕགས་ཅན་གྱི་ཉིན་མོ་ཞིག་ཡིན་པས་རྣམ་དཀར་དཀར་དགེ་བའི་བྱ་བ་སྤེལ་ན་བྱིན་རླབས་དང་ཕན་ཡོན་ཤིན་ཏུ་ཆེ་བ་ཞིག་ཏུ་ངོས་འཛིན་གནང་སྲོལ་ཡོད། ཅེས་གསལ་དོན་ལྟར་ས་ཟླའི་ཚེས་པ་བཅོ་ལྔ་ཉིན་མོ་དེར་མི་རྣམས་ཀྱིས་ཞོགས་པ་ལངས་ཏེ་དགོན་པ་ཁག་ཏུ་ཕྱག་དང་མཆོད་འབུལ་བྱེད་ཅིང་། དེ་དག་ཚར་རྗེས་ལུས་ལ་གཟབ་མཚོར་ལེགས་པ་སྤྲས་པ་དང་སྦྲགས་ཞིམ་བཟས་ཁྱེར་ཏེ་གླུ་གཞས་དང་། སྟོན་པའི་རྣམ་ཐར་སོགས་ལེན་ནས་སྤྲོ་སྐྱིད་གཏོང་སྲོལ་ཡོད་པ་རེད།
ལོ་ལྟར་བོད་ཕྱི་ནང་གཉིས་ནས་ས་ག་ཟླ་བ་ནང་དུ་དམར་བཟས་འཛེམ་གང་ཐུབ་གནང་དགོས་པ་དང་། ས་ཟླ་རིང་ལ་དམར་བཟས་རིགས་བཟའ་མི་ཉན་ཡང་ཡང་གསུང་གི་ཡོད། དེ་དག་ནི་དགའ་འོས་པའི་གནས་སྟངས་ཤིག་རེད་སྙམ། འོན་ཀྱང་ལོ་སྔོན་མ་ཉ་མང་པོ་ས་ཁུལ་དམའ་ས་འཁྱེར་ཡོང་ནས་གནམ་གཤིས་གྲང་སའི་མཚོ་ཆུ་ནང་དུ་ཚེ་ཐར་བཏང་བས་ཉ་རྣམས་ཚ་དྲོད་མ་མཉམ་ནས་ཤི་བའི་བརྙན་ཐུང་མང་པོ་ཞིག་དྲ་ལམ་ཁག་ཏུ་མཐོང་རྒྱུ་འདུག་པས། དེ་དག་མཐོང་དུས་སེམས་ནང་དུ་ཉ་སྲིན་རིགས་ཚེ་ཐར་བཏང་བ་ཡག་པོ་རེད་མོད། དེ་འདྲའི་ཉ་སྲིན་ཤི་སོང་ན་དེ་ནི་སྡིག་ཉེས་འཚབ་ཆེན་ཞིག་བསགས་པ་མ་གཏོགས་དགེ་བ་ཞིག་ག་ལ་ཡོད། ང་ཚོའི་དེ་དག་ཐོག་ཏུ་ངེས་པར་དགོངས་པ་བཞེས་དགོས་ཀྱི་འདུག་སྙམ་པ་ཚོར་སྣང་ཞིག་སྐྱེས་བྱུང་། དེ་བཞིན་གནད་ཡོད་མི་ཚོས་དེ་དག་ཐོག་ཏུ་ལམ་སྟོན་འདྲ་གནང་ཐུབ་ཚེ་དགེ་མཚན་མེད་དམ་སྙམ།
ལྷག་པར་གོང་ཞུས་ལྟར་ང་ཚོའི་ཉ་སྲིན་ཚེ་ཐར་བཏང་བ་ནི་ཧ་ཅང་གི་དགའ་འོས་པའི་གནས་སྟངས་ཤིག་རེད་མོད། དེ་ལས་གལ་གནད་ཆེ་བའི་ང་ཚོ་ཚང་མ་འཚོ་སྡོད་བྱེད་སའི་ཁྱིམ་གཞིས་ལྟ་བུ་ནི་སའི་གོ་ལ་འདི་ཡིན་དུས་མི་དང་དུད་འགྲོ་ཚང་མ་ལུས་ཁམས་བདེ་པོ་གནས་དགོས་ན་འཇིག་རྟེན་གྱི་ཁམས་འདི་གནས་དགོས་པ་ཞིག་རེད། འཇིག་རྟེན་གྱི་ཁམས་འདི་མ་གནས་ཚེ་ང་ཚོ་སུ་ཞིག་འཚོ་གནས་མི་ཐུབ་པ་དེ་རེད། རྒྱུ་མཚན་དེར་བརྟེན་འཇིག་རྟེན་ཁམས་འདི་ཡུན་གནས་ཡོང་བར་ཤིང་ནགས་འདེབས་འཛུགས་བྱས་པ་ཡིན་དགེ་མཚན་ཆེ་བ་ཞིག་མེད་འགྲོ་སྙམ། དེང་སྐབས་གནམ་གཤིས་འཕོ་འགྱུར་གྱིས་ཚ་རླབས་འཕྱུར་ནས་ཕྱི་ནང་གཉིས་ལ་དཀའ་ངལ་ཚད་མེད་འཕྲད་བཞིན་ཡོད། དེ་དག་ཤིང་ནགས་བཅད་བྲེག་བྱེད་ཆེ་བའི་དབང་གིས་འཇིག་རྟེན་ཁམས་ཀྱི་ཚ་དྲོད་རྒྱས་ནས་ལོ་རེ་ནས་ལོ་རེ་དཀའ་ངལ་ཆེ་རུང་འགྲོ་བཞིན་ཡོད།
དེ་ཡང་”རྩི་ཤིང་ལ་བརྟེན་ནས་སའི་གོ་ལའི་སྟེང་ཚེ་སྲོག་གནས་ཐུབ་ཅིང་། མི་རྣམས་ཀྱིས་རྔུབ་པའི་འཚོ་རླུང་ནི་རྩི་ཤིང་ལས་ཐོབ་ཀྱི་ཡོད། རྩི་ཤིང་གིས་ཤིང་ཏོག་དང་སྔོ་ཚལ་ཐོན་སྐྱེད་བྱེད་ལ། དེ་དག་མི་རྣམས་ཀྱིས་ཟས་ཀྱི་འབྱུང་ཁུངས་ཤིག་ཆགས་ཡོད། ད་དུང་སྲོག་ཆགས་རྣམས་ཀྱིས་རྩི་ཤིང་ཟས་སུ་བརྟེན་ཅིང་། རྩི་ཤིང་ནི་ཟས་ཀྱི་རྒྱུན་འཁོར་གྱི་ཆ་ཤས་གལ་ཆེན་ཞིག་ཀྱང་ཆགས་ཡོད། དེ་མིན་རྩི་ཤིང་ལ་བེད་སྤྱོད་གཞན་ཡང་ཡོད་དེ། ཤོག་བུ་དང་། གྱོན་ཆས་དང་། ཁང་པ་བཟོ་བ་སོགས་ལའང་བེད་སྤྱོད་ཡོད་པ་མ་ཟད། སྨན་གྱི་འབྱུང་ཁུངས་ཕུན་སུམ་ཚོགས་པ་ཞིག་ཀྱང་ཡིན།” ཞེས་གསལ་དོན་ལྟར། ང་ཚོས་རྩི་ཤིང་འདེབས་འཛུགས་གནང་བ་ཡིན་ད་ལྟ་དང་མ་འོངས་པར་མི་དང་དུད་འགྲོ་གཉིས་ཀར་དགེ་ཕན་ཧ་ཅང་ཆེན་པོ་ཡོད་པ་ཞིག་མངོན། དེ་ཡང་། “ཁོར་ཡུག་སྐྱོན་མེད་གཙང་མར་གནས་པའི་དགེ་མཚན་ནི། དཔེར་ན། ལྗོན་ཤིང་བཟང་པོས་རླུངས་ཁམས་གཙང་བར་བྱེད་ཅིང་། དེས་སྐྱེ་པོའི་སྲོག་རླུང་གཏོང་ལེན་ལ་རམ་འདེམས་ཀྱིས་འབྱུང་ཁམས་ཆ་སྙོམས་ཚེ་བསྲིངས་བར་བྱེད་པ། གྲིབ་བསིལ་སྣུམ་པོ་ངལ་གསོ་བའི་གནས་སུ་གྱུར་ཅིང་། ཆར་ཆུ་དུས་སུ་བབས་པ། ལོ་ཕྱུགས་ལེགས་པ། ཚ་གྲང་སྙོམས་པ། ཡུལ་ཁམས་ཀྱང་བལྟ་ན་སྡུག་པས་ཕྱིའི་ལྗོངས་རྒྱུ་བ་དག་རྒྱུན་མི་ཆད་དུ་ཡོང་ནས་ཤེས་རིག་དང་། དཔལ་འབྱོར་གྱི་འདུ་འགོད་སོགས་རང་བཞིན་གྱིས་འཕེལ་བར་བྱེད་དོ།” ཡང་། “ཁོར་ཡུག་སྦག་བཅོག་གི་ཉེས་པ་ནི། མཚོ་དང་མཚེའུ་དྭངས་བསིལ་གྱི་ཡོན་ཏན་ཉམས་ཤིང་། དེ་དག་ལ་གནས་པའི་སྲོག་ཆགས་ལ་བར་དུ་གཅོད་པ། རྩི་ཤིང་ནགས་ཚལ་སྟོངས་པས་ས་ཡིན་བཅུད་ཉམས་ཤིང་། ཆར་ཆུ་དུས་སུ་མི་བབས། སྔོན་མེད་ཀྱི་རླུང་འཚུབ་དྲག་པོ་ལྡང་བ་སོགས་ཀྱི་འགལ་རྐྱེན་མཐའ་ཡས་སོ།” ཞེས་གསལ་དོན་ལྟར། བྱེ་ཐང་ཅན་དུ་གྱུར་བཞིན་པའི་ས་ཁུལ་དེ་དག་ཏུ་རྩི་ཤིང་འདེབས་འཛུགས་ཐོག་ཏུ་འགྲོ་སོང་བཏང་ཐུབ་ཚེ་ཉ་སྲིན་སྲོག་བླུ་ལས་དངོས་གནས་དགེ་མཚན་ཆེ་བ་ཞིག་ཏུ་མཐོང་། ང་ཚོའི་གནས་སའི་ཁྱིམ་གཞིས་ཡིན་ན་ཁོར་ཡུག་སྲུང་སྐྱོབ་ལ་ངེས་པར་དོ་སྣང་དང་། དེའི་ཐོག་ཏུ་རྒྱུ་གྲོན་མང་ཙམ་ཞིག་བཏང་ནས་ལས་འགུལ་སྤེལ་ཐུབ་ན་དོན་སྙིང་ལྡན་པ་ཞིག་ཏུ་མཐོང་། དེ་སྐབས་སྤང་གཞུང་སྟེང་དུ་རླངས་འཁོར་འགྲོ་ས་བཟོ་བའི་སྐབས་ངེས་པར་ལམ་ཁའི་གཡས་གཡོན་གྱི་མཐའ་དེ་དག་ཡག་པོ་བྱས་ཏེ་ཁ་སུབ་ཐབས་བྱེད་དགོས་པ་ཞིག་ལས་དེ་མུ་བཞིན་བཞག་ཚེ་ཤུལ་རོང་ཆེ་རུང་ཕྱིན་ནས་རྗེས་ཕྱོགས་ཁོར་ཡུག་ལ་གནོད་ཀྱི་ཡོད་པ་རེད། དེ་དག་གནས་ཚུལ་ཆུང་ཆུང་རེད་སྙམ་ནས་སྣང་ཆུང་གཏན་ནས་གཏོང་མི་རུང་བ་ཞིག་རེད།
དེ་བཞིན་ནམ་ཞག་རྒྱུན་དུ་ཤོག་སྙིགས་རིགས་གང་བྱུང་དུ་མི་གཡུག་མི་ཉན་པ་དང་། ལྷག་དོན་རྩྭ་ཐང་སྟེང་དུ་སྤྲོ་སྐྱིད་ལ་ཕྱིན་ནས་བརྔན་པ་རིགས་བླུགས་སྣོད་འགྱིག་ཤོག་དེ་དག་གང་བྱུང་དུ་གཡུག་མི་ཉན་པ་ཞིག་རེད། འགྱིག་ཤོག་དེ་དག་ལམ་སང་མེད་པ་ཆགས་ཐུབ་ཀྱི་མེད་ཚུལ་དང་། ཁོར་ཡུག་ལ་ཧ་ཅང་གི་གནོད་འཚབ་ཆེན་པོ་བྱེད་ཀྱི་ཡོད་རབས་ཚན་རིག་པ་ཚོས་འགྲེལ་བརྗོད་བཞིན་མཆིས། རྒྱུ་མཚན་དེ་དག་བརྟེན་ངེས་པར་དོ་སྣང་དགོས་པ་ཞིག་རེད། དེ་བཞིན་གོང་དུ་རུབ་ཙམ་ཞིག་ཞུས་ཟིན་ལྟར་དེ་མི་རྒྱུ་གཉིས་ཀྱི་འགྲོ་གྲོན་ཕོན་ཆེ་བཏང་ནས་ས་ག་ཟླ་བ་ཉིན་མོར་ཉ་སྲིན་ས་ཐག་རིང་པོ་འཁྱེར་ཡོང་ནས་ས་ཆ་གཞན་གྱི་རྒྱུག་ཆུ་ནང་དུ་ཚེ་ཐར་བཏང་ནའང་ཉ་སྲིན་དེ་དག་ཚ་གྲང་འཐབ་ནས་སྲོག་མགོ་མཐོན་གྱི་མེད། དེ་བཞིན་ས་ཟླའི་དུས་ཆེན་ཉིན་མོར་ཡུལ་ཕྱོགས་གཞན་ནས་རྐང་བཙུགས་ནས་ཉ་སྲིན་དུ་མ་འཁྱེར་ཡོང་གི་ཡོད། འགའ་ཤས་བོད་ཀྱི་ས་ཁུལ་དུ་མ་སླེབས་གོང་ནས་དབུགས་ཀྱི་མི་འདང་ནས་ཤི་འགྲོ་ཡི་ཡོད། དེ་དག་ཐོག་ཏུ་ང་ཚོ་ཚང་མས་དགོངས་པ་བཞེས་དགོས་པ་ཞིག་རེད། དེ་དག་ནི་དགེ་བ་བསགས་རྒྱུ་ཚབ་ཏུ་སྡིག་ཉེས་འཚབ་ཆེན་བསགས་ཀྱི་ཡོད། དངུལ་དངོས་ཕོན་ཆེ་གཏང་ས་མ་ནོར་བ་ཞིག་གནང་དགོས་པ་མཐོང་གི་འདུག །
ལྷག་དོན་གྲོང་གསེབ་ཁག་ཏུ་ན་གཞོན་མཐོ་སློབ་ཁག་ཏུ་འགྲོ་མ་ཐུབ་པ་དང་། དེ་བཞིན་ལོ་ཆུང་འགའ་ཤས་སློབ་གྲྭ་འགྲོ་སྙིང་འདོད་རུང་མཐུན་རྐྱེན་གྱིས་མ་འདང་བ་དེ་འདྲའི་རིགས་ཡོད་ན། དེ་དག་ལ་སློབ་ཡོན་གྱིས་མཐུན་རྐྱེན་སྦྱར་ཐུབ་ཚེ་ཚེ་འདི་ཕྱི་གཉིས་ལ་དགེ་བ་རླབས་ཆེན་ཞིག་བསགས་པ་རེད་བསམ་གྱི་ཡོད། ན་ཆུང་མང་པོ་ཞིག་གྲོང་གསེབ་ཁག་ཏུ་སློབ་གྲྭ་འགྲོ་བའི་གོ་སྐབས་མ་རག་པ་ཡོད་ངེས་རེད། དེ་དག་ལ་སློབ་ཡོན་གྱི་མཐུན་རྐྱེན་སྦྱར་ནས་སློབ་གྲྭ་བཏང་ཐུབ་ཚེ་དེ་ལས་ཀྱང་དགེ་ཕན་ཆེན་པ་ཞིག་ག་ལ་ཡོད། ལྷག་པར་སྐུ་བརྙན་དེ་འདྲ་ལ་དངུལ་སྒོར་འབུམ་ཕྲག་བཏང་ནས་ཞལ་གསེར་ཚད་ལས་འདས་པ་སྒྲོན་པ་ལས། དེའི་དངུལ་འབོར་དེ་དག་གིས་དབུལ་འཕོང་གི་བུ་ཕྲུག་གི་སློབ་ཡོན་གྱི་ཆེད་དུ་གཏང་གནང་བ་ཡིན་ན་དགེ་མཚན་ཆེ་བ་མེད་དམ་སྙམ། རྒྱལ་ཁབ་དང་མི་རིགས་ཤིག་གསོན་གནས་ཐུབ་དགོས་ན་མ་འོངས་པ་ན་གཞོན་རྣམས་ཡིན་དུས་དེ་དག་སློབ་ཡོན་གྱི་མཐུན་རྐྱེན་སྦྱར་ཐུབ་ན་དགེ་མཚན་ཧ་ཅང་ཆེན་པོ་ཡོད་པ་ཞིག་ཏུ་མཐོང་གི་འདུག ། དེ་དག་ང་རང་གི་སེམས་ཁོངས་ནས་བསམ་ཚུལ་ཞིག་ཡིན་པས་དེ་དགོངས་འཇགས་འཚལ།
