དེ་རིང་ས་ག་ཟླ་བའི་ཚེས་བཅོ་ལྔ་དང་བསྟུན་བཀའ་ཤག་སྐབས་ ༡༥ པའི་སྲིད་སྐྱོང་དང་བཀའ་བློན་རྣམ་པའི་ལས་འཁྱུར་གྱི་གསུང་བཤད་གནང་འདུག
དེ་རིང་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། འཕོ་ལ་ཉེ་བའི་སྲིད་སྐྱོང་བློ་བཟང་སེང་གེ་མཆོག་གི་དབུས་བཀའ་བློན་རྣམ་པ་ལྷན་འཛོམས་ཐོག བཀའ་ཤག་སྐབས་ ༡༥ པའི་ལས་འཁྱུར་གསུང་བཤད་གནང་བའི་ནང་། བཀའ་ཤག་སྐབས་ ༡༤ དང་ ༡༥ པའི་བཀའ་བློན་རྣམ་པ་དང་། སྲིད་སྐྱོང་གི་སློབ་སྟོན་པ་རྒན་པ། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ལ་ཐུགས་རྗེ་ཆེ་ཞུས་ཡོད་པ་དང་། དེ་བཞིན་བདམས་ཐོན་སྲིད་སྐྱོང་སྤེན་པ་ཚེ་རིང་མཆོག་ལ་སྲིད་སྐྱོང་གི་འགན་དབང་རྩིས་སྤྲོད་ཚུལ་བཞིན་བྱེད་རྒྱུ་བྱུང་བར་དགའ་ཚོར་ཆེན་པོ་ཡོད་པ་དང་། བོད་མི་ཚང་མས་བདམས་ཐོན་སྲིད་སྐྱོང་ལ་ཕྱར་གྲུ་མཉམ་འདེགས་གནང་དགོས་པའི་འབོད་སྐུལ་ཞུས་གནང་འདུག
དེ་ཡང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་བའི་སྟེང་སྤེལ་བའི་ལས་འཁྱུར་གསུང་བཤད་ནང་སྲིད་སྐྱོང་མཆོག་གིས། འདས་པའི་ལོ་ངོ་བཅུ་སྐོར་ནང་རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་མང་གཙོའི་ཐོག་གྲོས་བསྡུར་བྱེད་རྒྱུར་ངོས་ལེན་བྱེད་ཀྱི་མེད་པ་མ་ཟད། ཕྱིའི་རྒྱལ་ཁབ་ཁག་ལ་བོད་མིའི་སྒྲིག་འཛུགས་ཁ་བྲལ་བ་ཡིན་པར་སྙོན་འཛུགས་ཀྱིས་འབྲེལ་བ་བྱེད་མི་རུང་བའི་ཉེན་བརྡ་གཏོང་གི་ཡོད། རྒྱ་ནག་གཞུང་གི་གནོན་ཤུགས་ལ་བརྟེན་ནས་སྔོན་ནས་མི་སྣ་མཇལ་འཕྲད་ཀྱི་དུས་ཚོད་བཟོས་ཟིན་པ་མཇལ་འཕྲད་ཞུ་ཁར་ཕྱིར་འཐེན་བྱས་པའམ། གནས་རིམ་དམའ་བའི་ལས་བྱེད་དང་ཐུག་འཕྲད་དགོས་པའི་འགྱུར་བ་གཏོང་བ་སོགས་ཡོང་གི་ཡོད་པ་རང་གི་ཉམས་མྱོང་ངོ་མའི་ཐོག་ནས་ཤེས་ཀྱི་ཡོད། ཅེས་དང་། ཉམས་མྱོང་དེ་དག་ལ་བརྟེན་ནས་བོད་མིའི་རྩ་དོན་ཆེད་དུ་ཐབས་བྱུས་གསར་པ་བསྟེན་དགོས་པའི་སེམས་ཚོར་བྱུང་ཞིང་། དེ་འདྲའི་གནས་སྟངས་འོག་ནས་གླེང་སྟེགས་ལས་ནང་དོན་གལ་ཆེ་བ་བརྩིས་ནས་མི་སྣ་མཇལ་འཕྲད་རིགས་ཟ་ཁང་དང་། མི་ཚོགས་ཆེ་བའི་ཇ་ཁང་བཅས་སུ་བྱ་དགོས་ཀྱང་ངོས་ལེན་བྱས་ཏེ། མི་དང་མིའི་འབྲེལ་ཟམ་འཛུགས་རྒྱུར་དམ་དོན་བྱས་པ་ཡིན་པ་དང་། ལོ་ངོ་བཅུ་ཙམ་རིང་ཆོད་སེམས་བརྟན་པོས་ལས་དོན་ཐོག་དངོས་སུ་ཞུགས་ནས་རྒྱལ་སྤྱིའི་ནང་ང་ཚོ་ཁ་བྲལ་བ་མིན་པར་ཁྲིམས་མཐུན་གྱི་བཙན་བྱོལ་བོད་མིའི་ངོ་ཚབ་ཅིག་ཡིན་པར་ངོས་འཛིན་ཐོབ་སྟེ། བོད་མིའི་སྒྲིག་འཛུགས་ཀྱི་སྲིད་སྐྱོང་གི་མིང་ཐོག་ནས་རིམ་པས་ཨ་རིའི་ཕྱི་སྲིད་ལས་ཁུངས་དང་ཕོ་བྲང་དཀར་པོའི་ནང་འགྲོ་ཐུབ་པ་བྱུང་ཡོད། དེ་དང་ལྷན་དུ་ཨ་རིའི་གྲོས་ཚོགས་ཀྱི་ཕྱི་ལོ་ ༢༠༢༠ ལོའི་བོད་དོན་སྲིད་བྱུས་དང་རྒྱབ་སྐྱོར་ཁྲིམས་ཡིག་ལ་བརྟེན་ནས་ཨ་རི་གཞུང་དང་བོད་མིའི་སྒྲིག་འཛུགས་གཉིས་དབར་དཔེ་མཚོན་འོས་པའི་འབྲེལ་ལམ་གསར་པ་མངོན་གསལ་ཅན་ཞིག་གཏོད་ཐུབ་ཡོད། ཅེས་གསུངས་ཡོད་འདུག
ཡང་སྲིད་སྐྱོང་བློ་བཟང་སེང་གེ་མཆོག་གིས། བོད་ཀྱི་གྲོགས་པོ་གསར་རྙིང་མང་པོས་ང་ཚོ་ལ་བདེན་པའི་རྒྱབ་ལངས་བརྟན་པོ་གནང་བ་ལའང་ཐུགས་རྗེ་ཆེ་ཞུ་རྒྱུ་ཡིན། ངས་སོ་སོའི་མི་ཚེར་བསམ་ཞིབ་བྱེད་སྐབས། རང་ཉིད་རྡོ་རྗེ་གླིང་གི་བོད་མིའི་གཞིས་ཆགས་ཆུང་ངུ་དེ་འདྲའི་ཕྲུ་གུ་ཞིག་བཙན་བྱོལ་བོད་མིའི་སྲིད་སྐྱོང་གི་མིང་གནས་འཛིན་མཁན་དང་པོར་གྱུར་སྲིད་པ་དེ་འདྲ་ནི། ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་གཟིགས་རྒྱང་ཁོ་ན་ལ་བརྟེན་ནས་བྱུང་བ་ཞིག་ཡིན་པ་ཚོར་གྱི་ཡོད་པས། ༸གོང་ས་༸སྐྱབས་མགོན་ཆེན་པོ་མཆོག་ལ་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན། ཞེས་གསུངས་འདུག
དེ་བཞིན་ཁོང་གིས་རང་གི་སྲིད་སྐྱོང་ལས་ཡུན་རིང་ཐུགས་སྣང་བྱུང་བའི་གནད་དོན་ཁྲོད་ནས་མི་རབས་གཞོན་པའི་སྐོར་ལ། མི་རབས་རྒན་པ་མང་པོས་ང་ལ་བཙན་བྱོལ་ནང་གི་གཞོན་སྐྱེས་ཚོའི་སྐོར་ལ་བཀའ་འདྲི་གནང་མྱོང་ཡོད། གཞོན་སྐྱེས་མང་པོས་བོད་དངོས་སུ་མཐོང་མེད་ཀྱང་ཁོང་ཚོའི་གནས་ལུགས་གསལ་པོ་རྟོགས་པའི་བསམ་བློའི་འཆར་སྒོ་དང་བོད་དོན་ཐོག་སེམས་ཁུར་བྱེད་སྟངས་བཅས་མཐོང་སྐབས་སེམས་འགུལ་ཆེན་པོ་ཐེབས་ཤིང་། ཁོང་ཚོས་བོད་མིའི་འགྲོ་བ་མིའི་ཐོབ་ཐང་དང་ཆེ་མཐོང་ཐོག་རྩོད་གླེང་བྱེད་རྒྱུའི་ཆོད་སེམས་དང་། ནུས་རྩལ། སེམས་ཁུར་ཇི་ལྟར་ལེན་བཞིན་ཡོད་པའི་བདེན་དཔང་ངས་བྱེད་ཐུབ་ཀྱི་ཡོད། ཁོང་ཚོས་སོ་སོ་བོད་གངས་ཅན་པ་ཞིག་ཡིན་བསམ་པ་ལས་ཨ་མདོ་དང་། ཁམས་པ། དབུས་གཙང་པ་ཞིག་ཡིན་པ་བསམ་གྱི་མེད། དེར་བརྟེན་ང་ཚོས་ནུས་པ་མཉམ་སྤུངས་དང་རྡོག་རྩ་ཆིག་སྒྲིལ་སྒོ་ནས་བོད་ཀྱི་རྩ་དོན་ཐོག་ནུས་པ་འདོན་དགོས།
ཡང་ཁོང་གིས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུ་སྐབས། བོད་མིའི་རང་དབང་ལས་འགུལ་གྱི་ལོ་རྒྱུས་ཆ་ཚང་བ་ཞིག་འགྲུབ་པ་ལ། ང་ཚོའི་མཐུན་གྲོགས་ཉེ་ཤོས་ངོ་མཚར་ཅན་གྱི་རྒྱལ་ཁབ་རྒྱ་གར་གྱི་རྒྱབ་སྐྱོར་མེད་པར་ཡོང་ཐབས་མེད་པས། ངས་དེ་རིང་རྒྱ་གར་གཞུང་དང་མི་མང་ཡོངས་ལ་ད་བར་མི་ལོ་ ༦༠ བརྒལ་བའི་རིང་གང་ཅིའི་རོགས་མགོན་དང་རྒྱབ་སྐྱོར་གནང་བར་བཀའ་དྲིན་ཤིན་ཏུ་ཆེ་ཞུ་རྒྱུ་དང་། དེང་གི་ཆར་རྒྱ་གར་དང་འཛམ་གླིང་ཡུལ་གྲུ་གང་སར་རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་༡༩ ལ་བརྟེན་ནས་འཆི་སྐྱོན་དང་ནད་མནར་གྱི་སྡུག་བསྔལ་ཚབས་ཆེན་མྱོང་བཞིན་ཡོད་པར། ངས་བོད་མི་ཡོངས་ཀྱི་ཚབ་ཞུས་ཏེ་ཚང་མར་ཐུགས་གསོ་དང་གདུང་སེམས་མཉམ་བསྐྱེད་ཞུ་རྒྱུ་ཡིན། ཞེས་གསུངས་ཡོད་འདུག
མཐའ་མཇུག་དེར་སྲིད་སྐྱོང་ནས་ཁྱུར་རྗེས་གང་གནང་འཆར་ཡོད་མེད་སྐོར་ནས་སྲིད་སྐྱོང་མཆོག་ནས། དེ་རིང་ནས་རང་ཉིད་སྲིད་སྐྱོང་གི་ལས་འགན་མཇུག་སྒྲིལ་གྱི་ཡོད་པ་བཞིན། དེ་རྗེས་ཁྱེད་རང་ལས་དོན་གང་བྱེད་འདོད་ཡོད་དམ་ཞེས་འདྲི་མཁན་མང་པོ་བྱུང་བར། དེ་རྗེས་རང་གི་ཁྱིམ་ཚང་ལྷན་དུ་དུས་ཚོད་གཏོང་རྒྱུ་དང་། ལྷག་པར་དུ་རང་གི་བུ་མོ་དང་ལྷན་དུ་དྲྭ་ཐོག་རྩེད་མོ་རྩེ་དགོས་བསམ་བཞིན་ཡོད། ཅེས་དང་། ངའི་སྲིད་སྐྱོང་ལས་འགན་དེ་རིང་ནས་ཟིན་ཀྱང་། བོད་ཀྱི་རྩ་དོན་ཆེད་དུ་ལས་ཀ་མུ་མཐུད་བྱེད་རྒྱུའི་ཆོད་སེམས་བརྟན་པོ་ཡོད་ལ། རང་ཉིད་རང་དབང་འཐབ་རྩོད་པའི་ངོ་བོར་སྐྱེས་པ་བཞིན། མ་འཆི་བར་དུ་རང་དབང་འཐབ་རྩོད་པའི་ངོ་བོར་གནས་རྒྱུ་ཡིན། ཞེས་གསུངས་ཡོད་འདུག
གསར་འགོད་པ། པ་སངས་ཚེ་རིང་།
