ཧོང་ཀོང་གི་འོས་བསྡུའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་མང་མོས་གཏན་འབེབ་གནང་།

ཧོང་ཀོང་གི་འོས་འདེམས་ལྷན་ཚོགས་(Election Committee) ནས་རྒྱ་ནག་གཞུང་ལ་དགའ་ཞེན་གྱི་ཆབ་སྲིད་ལངས་ཕྱོགས་བཟུང་བའི་ཐོག་ནས་གྲོང་ཁྱེར་སྤྱི་ཁྱབ་པ་དང་གྲོས་ཚོགས་འཐུས་མིའི་འོས་མི་སོགས་འདེམས་སྒྲུག་བྱ་རྒྱུའི་ཁྲིམས་འཆར་མང་མོས་གཏན་འབེབ་བྱས་འདུག

ཁ་སང་ཧོང་ཀོང་གྲོས་ཚོགས་ཀྱིས། ཧོང་ཀོང་གི་གཞུང་འཛིན་མགོ་འཁྲིད་ཁྲོད་རྒྱལ་ཞེན་མེད་པའི་མི་སྣ་རྣམས་ལ་ཚོད་འཛིན་བཀག་འགོག་བྱ་རྒྱུར་དམིགས་པའི་འོས་བསྡུའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་དེ་ཉིད་མང་མོས་ཀྱི་ཐོག་ནས་གཏན་འབེབ་བྱས་ཏེ། མི་རིང་བར་གྲོང་ཁྱེར་གྱི་སྤྱི་ཁྱབ་མ་ཁེ་རི་ལེམ་གྱིས་མིང་རྟགས་བཀོད་དེ་དངོས་སུ་ལག་བསྟར་བྱ་རྒྱུ་ཡིན་ཞིང་། གནད་དོན་དབྱེ་ཞིབ་པ་རྣམས་ཀྱིས་ཁྲིམས་འཆར་དེ་ནི་རྒྱ་ནག་གཞུང་གིས་ཧོང་ཀོང་ལ་སྔར་ལས་སྟངས་འཛིན་བྱེད་ཐབས་དང་། དམངས་གཙོ་དོན་གཉེར་བས་མཚོན་པའི་ཁ་གཏད་ཚོགས་པ་རྣམས་གྲོས་ཚོགས་འཐུས་མིའི་འོས་བསྡུའི་ནང་ཞུགས་མི་ཐུབ་པའི་ཆེད་དུ་ཡིན་སྐོར་བརྗོད་འདུག

ཧོང་ཀོང་གཞུང་གིས་འདི་ལོའི་ཕྱི་ཟླ་ ༣ པའི་ནང་བཏོན་པའི་འོས་བསྡུའི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་དེའི་ནང་། ད་བར་ཧོང་ཀོང་གི་འོས་འདེམས་ལྷན་ཚོགས་(Election Committee) ཀྱིས་གྲོང་ཁྱེར་གྱི་སྤྱི་ཁྱབ་མ་གཏོགས་འདེམས་ཀྱི་མེད་ནའང་། ད་ལན་སྤྱི་ཁྱབ་ཙམ་དུ་མ་ཟད། ཧོང་ཀོང་གི་གྲོས་ཚོགས་འཐུས་མིའི་འོས་མི་དང་། འོས་འདེམས་ལྷན་ཚོགས་ཀྱི་ཚོགས་མིའི་འོས་མི་རྣམས་ཀྱང་ལྷན་ཚོགས་དེས་འདོན་རྒྱུ་ཡིན་འདུག དེ་ཙམ་དུ་མ་ཟད། རྒྱ་ནག་གཞུང་གི་ཕྱོགས་གཏོགས་ཡིན་པའི་འོས་འདེམས་ལྷན་ཚོགས་ལ་ད་ལྟའི་ཆར་ཚོགས་མི་ ༡༢༠༠ ཡོད་ཅིང་། དེ་ཉིད་ ༡༥༠༠ ལ་སྤར་རྒྱུ་ཡིན་འདུག དེ་བཞིན་ཧོང་ཀོང་གི་དམངས་གཙོ་དོན་གཉེར་བ་རྣམས་ལ་བློ་འཚབ་སྐྱེ་གཞིའི་གནད་དོན་ཆེ་ཤོས་ཤིག་ནི། ཁྲིམས་ཡིག་དེའི་དགོངས་དོན་གཞིར་བཟུང་། ཧོང་ཀོང་གཞུང་གིས་བསྐོ་གཞག་བྱས་པའི་ཚོགས་ཆུང་ཞིག་གིས། གྲོང་ཁྱེར་གྱི་གྲོས་ཚོགས་འཐུས་མིའི་འོས་མི་དང་། འོས་འདེམས་ལྷན་ཚོགས་ཀྱི་ཚོགས་མི། སྤྱི་ཁྱབ་ཀྱི་འོས་མི་ཚང་མའི་རྒྱབ་ལྗོངས་དང་བཅས་པར་རྟོག་ཞིབ་བྱ་རྒྱུ་ཡིན་སྟབས། དམངས་གཙོ་དོན་གཉེར་བས་མཚོན་པའི་དུས་རྒྱུན་རྒྱ་ནག་གཞུང་ལ་སྐྱོན་བརྗོད་དང་ཁ་གཏད་གཅོག་མཁན་གྱི་མི་སྣ་ཞིག་འོས་མིའི་ཁོངས་སུ་སླེབ་ཐབས་མེད་པར་བརྟེན། འབྱུང་འགྱུར་ཧོང་ཀོང་གྲོས་ཚོགས་དང་གཞུང་འཛིན་ནང་ཁ་གཏད་ཚོགས་པའི་འཐུས་མི་ཞིག་སླེབ རྒྱུ་ཧ་ཅང་ཁག་པོ་ཆགས་ཡོད་འདུག

གཞན་ཡང་། ད་ལྟའི ཆར་ཧོང་ཀོང་གི་གྲོས་ཚོགས་ནང་ཁྱོན་འཐུས་མིའི་ཞབས་བཀྱག་ ༧༠ ཡོད་པ་དེ་ ༩༠ ལ་སྤར་ཡོད་ཀྱང་། མི་མང་གིས་ཐད་ཀར་འོས་འདེམས་བྱས་པའི་འཐུས་མིའི་གྲངས་དེ་ ༣༥ ནས་ ༢༠ ལ་མར་བཅག་ཡོད། གཞན་ཞབས་བཀྱག་ ༤༠ འོས་འདེམས་ལྷན་ཚོགས་ཀྱིས་འདེམ་རྒྱུ་དང་། ལྷག་འཕྲོ་ཞབས་བཀྱག་ ༣༠ རྣམས་ཧོང་ཀོང་གི་ཚོང་དོན་དང་། དངུལ་གཉེར་སོགས་ལ་པའི་ཤོག་ཁག་དམིགས་བསལ་རྣམས་ཀྱིས་འདེམ་སྒྲུག་བྱ་རྒྱུ་ཡིན་འདུག འོས་འདེམས་ལྷན་ཚོགས་ལྟར་ཤོག་ཁག་དམིགས་བསལ་བ་དེ་དག་ཀྱང་སྔར་ནས་རྒྱ་ནག་གཞུང་དང་ཉེ་བོ་ཡིན་འདུག

ད་ཐེངས་ཀྱི་ཁྲིམས་ཡིག་འདི་ནི་འདས་ལོའི་རྒྱལ་ཁབ་བདེ་འཇགས་ཀྱི་ཁྲིམས་ཡིག་(National Security Law) ལས་ལྷག་རྒྱ་ནག་གཞུང་གིས་ཧོང་ཀོང་ལ་ཕྱོགས་ཡོངས་ནས་སྟངས་འཛིན་བྱེད་པའི་སྲིད་ཇུས་ཤིག་ཡིན་འདུག ཕྱི་ལོ་ ༢༠༡༩ ལོར་ཧོང་ཀོང་ནང་གཞི་རྒྱ་ཆེ་བའི་གཞུང་རྒོལ་ལས་འགུལ་བྱུང་བ་མ་ཟད། ལོ་དེའི་མཇུག་ཙམ་ལ་ཧོང་ཀོང་གི་གྲོང་སྡེ་ལྷན་ཚོགས་ཀྱི་འོས་བསྡུའི་ནང་དམངས་གཙོ་དོན་གཉེར་བར་རྒྱལ་ཁ་ཆེན་པོ་ཐོབ་པར་བརྟེན། རྒྱ་ནག་གཞུང་གིས་རྒྱལ་སྤྱིའི་སྤྱི་ཚོགས་ཀྱི་གནོན་ཤུགས་སོགས་ལ་མ་འཛེམ་པར་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཡིག་ཟེར་བ་ལག་བསྟར་བྱས་ཏེ། ཁྲིམས་ཡིག་དེའི་མིང་ཐོག་ནས་ཧོང་ཀོང་གི་དམངས་གཙོ་དོན་གཉེར་བ་རྣམས་གཅིག་རྗེས་གཉིས་མཐུད་ཀྱིས་འཛིན་བཟུང་དང་བཙོན་འཇུག་བྱས་པ་མ་ཟད། འདས་ལོའི་ཕྱི་ཟླ་ ༡༡ ནང་ཧོང་ཀོང་གཞུང་གིས་ཁྲིམས་ཡིག་དེར་ཁ་གཡར་ཏེ། ཧོང་ཀོང་གྲོས་ཚོགས་ཀྱི་དམངས་གཙོ་དོན་གཉེར་བའི་འཐུས་མི་སྐོར་ཞིག་རྒྱལ་ཁབ་ཀྱི་བདེ་འཇགས་ལ་ཉེན་ཁར་བརྩིས་ཏེ་ཕྱིར་འབུད་བཏང་ཡོད་ཅིང་། དེར་ངོ་རྒོལ་ཆེད་གྲོས་ཚོགས་ཀྱི་དམངས་གཙོ་དོན་གཉེར་བའི་འཐུས་མི་རེ་གཉིས་མ་གཏོགས་ཚང་མས་རྩ་དགོངས་ཞུས་པར་བརྟེན། ད་ལྟའི་ཆར་ཧོང་ཀོང་དེ་པེ་ཅིན་གཞུང་དང་ཉེ་བོ་ཡིན་པའི་འཐུས་མིའི་སྟངས་འཛིན་འོག་ཡོད་པ་རེད།

ཧོང་ཀོང་གི་འོས་བསྡུའི་སྒྲིག་གཞི་བསྐྱར་བཅོས་ཀྱི་ཁྲིམས་ཡིག་དེ། འདི་ལོའི་ཕྱི་ཟླ་ ༣ པའི་ཚེས་ ༡༡ ཉིན་རྒྱ་ནག་མི་མང་འཐུས་མིའི་ཚོགས་ཆེན་ (NPC) གྱིས་རྒྱལ་ཞེན་པས་ཧོང་ཀོང་འཛིན་སྐྱོང་བྱ་(Patriots governing Hong Kong) ཞེས་པའི་གྲོས་ཆོད་ཅིག་གཏན་འབེབ་བྱས་པ་དེར། འཐུས་མིའི་ཚོགས་ཆེན་གྱི་རྒྱུན་ལས་ཀྱིས་མོས་མཐུན་རྒྱབ་སྐྱོར་བྱས་པ་བརྒྱུད་བྱུང་བ་ཞིག་ཡིན་ཞིང་། རྒྱ་ནག་གཞུང་གིས་གྲོས་ཆོད་དེ་འདོན་སྐབས། དབྱིན་ཡུལ་དང་། ཨ་རི། ཡུ་རོབ་མཐུན་ཚོགས་ཀྱིས་གཙོས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་གིས་རྒྱ་ནག་ལ་སྐྱོན་བརྗོད་ཤུགས་ཆེན་པོ་བྱས་ཡོད་ནའང་། རྒྱ་ནག་གཞུང་གིས་ཁྲིམས་ཡིག་དེ་རྒྱལ་ཁབ་ཀྱི་མངའ་དབང་སྲུང་སྐྱོབ་དང་ཧོང་ཀོང་གི་བདེ་འཇགས་དང་སྤྱི་ཚོགས་བརྟན་བརླིང་ཆེད་གཏན་འབེབ་བྱས་པ་ཞིག་ཡིན་སྐོར་འགྲེལ་བརྗོད་བྱས་ཡོད་པ་རེད།

རྒྱ་ནག་གཞུང་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཡིག་ཟེར་བ་དངོས་སུ་ལག་བསྟར་བྱས་པ་ནས་བཟུང་། ཧོང་ཀོང་གི་ན་གཞོན་ལས་འགུལ་བ་ཇོ་ཧྲ་ཝོང་(Joshua Wong) གྱིས་མཚོན་པའི་སྣེ་ཁྲིད་པ་བརྒྱ་ཕྲག་སྐོར་ཞིག་ཁྲིམས་འགལ་གྱི་འདུ་འཛོམས་ལ་ཞུགས་པ་དང་། སྲིད་དབང་མགོ་གཏིང་སློག་པ། ཕྱིའི་སྒྲིག་འཛུགས་དང་ངན་སྦྲེལ་བྱེད་པ། རྒྱལ་ཁབ་ཀྱི་བདེ་འཇགས་ལ་གནོད་འཚེ་གཏོང་ཐབས་བྱེད་པ་སོགས་ཀྱི་དོགས་གཞིའི་འོག་འཛིན་བཟུང་བྱེད་མུས་ཡིན་པ་ལྟར། དེ་རིང་ཧོང་ཀོང་གི་དམངས་གཙོ་དོན་གཉེར་བ་དང་རྒྱ་ནག་གི་དྲག་གནོན་ལ་སྐྱོན་བརྗོད་ཤུགས་ཆེར་བྱེད་མཁན་གྱི་ཕྱུག་བདག་ཇི་མི་ལའེ་ (Jimmy Lai) ད་ལྟ་བཙོན་ཁང་ནང་ཡོད་མུས་ཐོག ཁོ་པ་ཕྱི་ལོ་ ༢༠༡༩ ཟླ་ ༡༠ ཚེས་ ༡ ཉིན་ཏེ། རྒྱ་ནག་གི་རྒྱལ་སྟོན་ཉིན་མོར་གཞུང་གི་ཆོག་མཆན་མེད་པའི་འདུ་འཛོམས་ནང་མཉམ་ཞུགས་བྱས་པའི་ནག་ཉེས་འོག་བསྐྱར་དུ་ལོ་ ༡ དང་ཟླ་ ༢ ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་དང་ལྷན་དུ་དམངས་གཙོ་དོན་གཉེར་གྱི་ལས་འགུལ་བ་ ༩ ལའང་བཙོན་འཇུག་ཁྲིམས་ཐག་བཅད་ཡོད་འདུག

ད་ལྟ་རང་ལོ་ ༧༣ ཡིན་པའི་ཧོང་ཀོང་གི་ཀུ་ཤུ་ཉིན་རེའི་གསར་ཤོག་ (Apple Daily) གི་སྦྱིན་བདག་ཇི་མི་ལའེ་ལ་བསྟུད་མར་ཁྲིམས་ཆད་གཉིས་ཕོག་ཡོད་ཀྱང་། ད་དུང་ཁོ་པའི་ཐོག་རྒྱལ་ཁབ་བདེ་འཇགས་ཀྱི་ཁྲིམས་ཡིག་འོག་ཉེས་མིང་མི་འདྲ་བ་གཉིས་བཀལ་ཡོད་པ་ཅིང་། ཉེ་ཆར་ཧོང་ཀོང་གཞུང་གིས་ཇི་མི་ལའེ་ཡི་དངུལ་ཁང་གི་ཁ་བྱང་ཚུད་པའི་དངོས་ཟོག་ཐམས་ཅད་བཀོལ་སྤྱོད་མི་ཆོག་པའི་བཀའ་རྒྱ་བསྒྲགས་ཡོད་པ་རེད། བྷི་བྷི་སི་གསར་ཁང་གིས་ཇི་མི་ལའེ་བཙོན་ཁང་དུ་མ་འཇུག་གོང་ཏག་ཏག་དེར་བཅར་འདྲི་ཞིག་བྱེད་སྐབས་ཁོ་པས། གལ་ཏེ་ཁོ་ཚོས་ཁྱེད་ལ་འཇིགས་སྐུལ་བྱས་ཚེ། དེ་ནི་ཁོ་ཚོས་ཁྱེད་རང་སྟངས་འཛིན་བྱེད་ཐབས་སླ་ཤོས་དང་ལེགས་ཤོས་དེ་ཡིན་པ་མ་ཟད། ཁོ་ཚོས་དེ་ཤེས་ཀྱི་ཡོད། དེར་ཁ་གཏད་གཅོག་རྒྱུའི་ཐབས་ཤེས་ཉག་གཅིག་ནི། འཇིགས་སྐུལ་ལ་གདོང་གཏད་དེ་ཁྱེད་རང་ཞེད་སྣང་འོག་མི་ཚུད་རྒྱུ་དེ་རེད། ཅེས་བརྗོད་ཡོད་པ་རེད།

གསར་འགོད་པ། པ་སངས་ཚེ་རིང་།