རྒྱ་ནག་གཞུང་གིས་ཧི་མ་ཅལ་མངའ་སྡེའི་ས་མཚམས་སུའང་རྒྱ་སྐྱེད་ཀྱི་ལས་གཞི་སྤེལ་གྱི་ཡོད་འདུག

རྒྱ་ནག་གཞུང་གིས་བོད་ཀྱི་མཐའ་འབྲེལ་ཁྱིམ་མཚེས་རྒྱལ་ཁབ་ཁག་ལ་བཙན་འཛུལ་རྒྱ་སྐྱེད་ཀྱི་སྲིད་ཇུས་ལག་བསྟར་བྱེད་བཞིན་ཡོད་པ་ལྟར་ཧི་མ་ཅལ་མངའ་སྡེའི་བོད་ཧིན་ས་མཚམས་སུའང་འཛུགས་སྐྲུན་རྒྱ་ཆེན་པོ་བྱེད་བཞིན་ཡོད་འདུག

ཉེ་ལམ་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐཱ་ཀོར་ (Jai Ram Thakur) མཆོག་མངའ་སྡེའི་ཁུ་ནུ་དང་སྤི་ཏི་རྫོང་གཉིས་སུ་ཕེབས་ཏེ་བོད་ཧིན་ས་མཚམས་ཉེན་རྟོག་ཁང་གི་གནད་ཡོད་མི་སྣ་སོགས་ལ་ཐུག་འཕྲད་གནང་ཡོད་པ་དང་། ཁ་སང་ཕྱི་ཚེས་ ༣༡ ཉིན་གསར་འགོད་གསལ་བསྒྲགས་ཤིག་གི་སྐབས། སྤྱི་ཁྱབ་བློན་ཆེན་མཆོག་ནས་མངའ་སྡེ་དང་ས་འབྲེལ་ཡིན་པའི་བོད་ཧིན་ས་མཚམས་སུ་རྒྱ་ནག་གཞུང་གིས་གཞི་རྒྱ་ཆེན་པོའི་ཐོག་ནས་འཛུགས་སྐྲུན་རྒྱ་སྐྱེད་ལས་གཞི་སྤེལ་བཞིན་ཡོད་སྐོར་གསུངས་འདུག

རྒྱ་གར་གྱི་ཨ་ནི་ (ANI) གསར་ཁང་གི་གནས་ཚུལ་ལྟར་ན། གསར་འགོད་ལྷན་ཚོགས་ཐོག་སྤྱི་ཁྱབ་བློན་ཆེན་མཆོག་གིས། རྒྱ་ནག་གཞུང་གིས་བོད་དང་ས་འབྲེལ་དུ་ཡོད་པའི་ང་ཚོའི་ས་ཁུལ་དུ་འཛུགས་བསྐྲུན་རྒྱ་སྐྱེད་བྱེད་ཀྱི་ཡོད་པ་དང་། རྒྱ་གར་གྱི་མཐའ་སྲུང་ས་ཚིགས་དག་ལས་མཐོ་ས་ཞིག་ཏུ་རྒྱ་ནག་གཞུང་གིས་འོས་འཚམ་གྱི་མཐའ་སྲུང་ས་ཚིགས་ཤིག་འཚོལ་ཐབས་བྱེད་ཀྱི་ཡོད་པ་ཤེས་རྟོགས་བྱུང་ཡོད་སྐོར་དང་། ས་མཚམས་གཟིགས་སྐོར་སྐབས་མངའ་སྡེའི་ནང་ཛ་དྲག་ཆེ་བའི་གནད་དོན་ཆེན་པོ་ཤེས་རྟོགས་བྱུང་མེད་ནའང་། རྒྱ་ནག་གཞུང་གིས་ཧི་མ་ཅལ་མངའ་སྡེ་དང་ས་འབྲེལ་དུ་ཡོད་པའི་བོད་ཀྱི་མཐའ་མཚམས་སུ་གཞི་རྒྱ་ཆེན་པོའི་ཐོག་ནས་འཛུགས་བསྐྲུན་གྱི་ལས་གཞི་ཁག་རྒྱ་སྐྱེད་བྱེད་ཀྱི་ཡོད་སྐོར་གསུངས་འདུག

ཡང་སྤྱི་ཁྱབ་བློན་ཆེན་མཆོག་གིས།  རྒྱ་ནག་གཞུང་གིས་ད་ལྟའི་འཛུགས་བསྐྲུན་དང་ལམ་བཟོའི་ལས་གཞི་ཁག་བོད་ཕྱོགས་སུ་བྱེད་ཀྱིན་ཡོད་པ་དང་། རྒྱ་གར་གྱི་ཕྱོགས་ནས་དཀའ་ཁག་ཆེ་བའི་གནས་སྟངས་ཤིག་གི་འོག རྒྱ་གར་གྱི་མཐའ་སྲུང་དམག་དཔུང་གིས་འབད་བརྩོན་གདོང་ལེན་བྱེད་བཞིན་ཡོད་པ་དང་། ཁོང་གི་ལས་འགན་ནི་དམག་མི་དག་ལ་སྙིང་སྟོབས་སྦྱིན་པ་དང་ཆོད་སེམས་ཇེ་བརྟན་དུ་གཏང་རྒྱུ་དེ་ཡིན་སྐོར་དང་། ཐེངས་འདིའི་བོད་ཧིན་ས་མཚམས་གཟིགས་སྐོར་ཀྱི་སྙན་ཐོ་དབུས་གཞུང་ལ་ཡར་ཞུ་གནང་ངེས་ཡིན་སྐོར་གསུངས་འདུག

འདི་ལོའི་ཕྱི་ཟླ་ ༥ ཚེས་ ༢༩ ཉིན་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐཱ་ཀོར་མཆོག་བོད་དང་ས་འབྲེལ་ཡིན་པའི་ཁུ་ནུ་དང་སྤི་ཏི་རྫོང་གཉིས་སུ་གཟིགས་སྐོར་དུ་ཕེབས་ཡོད་པ་དང་། གཟིགས་སྐོར་དང་འབྲེལ་ཕྱི་ཚེས་ ༣༠ ཉིན་མངའ་སྡེའི་ཀོང་རེ་སི་ཚོགས་པའི་ཚོགས་གཙོ་ཁུལ་ཌིཔ་སིང་ར་ཐོར་ (kuldeep singh rathore) གྱིས། སྤྱི་ཁྱབ་བློན་ཆེན་མཆོག་མཐའ་མཚམས་སུ་ཕེབས་ཡོད་པ་དང་། དེ་ནི་མངའ་སྡེ་གཞུང་ངོས་ནས་མངའ་སྡེའི་མི་མང་ལ་མཐའ་མཚམས་དང་འབྲེལ་ནས་ལངས་ཕྱོགས་གསལ་པོ་བཟོ་ཡི་ཡོད་པ། དེ་བཞིན་ཁུ་ནུའི་ས་འབྲེལ་དུ་ཡོད་བའི་བོད་ནང་དུ་གནད་དོན་ཆེན་པོ་འབྱུང་བཞིན་བའི་གནས་ཚུལ་དང་། རྒྱ་ནག་གཞུང་གིས་བོད་ཧིན་ས་མཚམས་སུ་འཛུགས་བསྐྲུན་རྒྱ་ཆེན་པོ་བྱེད་ཀྱི་ཡོད་པར་བརྟེན། མངའ་སྡེའི་མཐའ་མཚམས་མི་མང་བདེ་འཇགས་ཐད་སེམས་འཚབ་ཡོང་གི་ཡོད་པའི་གནས་ཚུལ་འབྱོར་ཡོད་སྐོར་འགྲེལ་བརྗོད་བྱས་འདུག

འདས་ལོའི་ཕྱི་ཟླ་ ༥ པ་ཙམ་ནས་བོད་ཧིན་ས་མཚམས་ཀྱི་ལ་དྭགས་ཁུལ་དུ་རྒྱ་དཀར་ནག་གཉིས་ཀྱིས་ཕན་ཚུན་ལ་ངེས་གཏན་གྱི་ས་མཚམས་ (Line of Actual Control) བརྒལ་ཚུལ་དང་། མཐའ་མཚམས་སུ་འཛུགས་སྐྲུན་གྱི་ལས་གཞི་རྒྱ་སྐྱེད་བྱེད་ཀྱི་ཡོད་པའི་དཀའ་རྙོག་འོག མཐའ་སྲུང་མིའི་བར་འདས་པའི་ལོ་ངོ་བཅུ་ཕྲག་འགའི་རིང་བྱུང་མ་མྱོང་བའི་དམར་འཛིང་གདོང་ཐུག་བྱུང་ནས་རྒྱ་གར་གྱི་མི་གྲངས་ ༢༠ ཙམ་རྐྱེན་འདས་སུ་ཕྱིན་ཡོད་པའི་གནས་ཚུལ་ཐོན་ཡོད་པ་དང་། བོད་མི་དྭང་ཞབས་དམག་མི་ཉི་མ་བསྟན་འཛིན་ལགས་ཀྱང་མཐའ་སྲུང་ལས་དོན་ཁྲོད་རྐྱེན་འདས་སུ་ཕྱིན་ཡོད་པ་རེད་ལ། རྒྱ་ནག་ཕྱོགས་ནས་དམག་མི་གྲངས་ ༥ རྐྱེན་འདས་སུ་ཕྱིན་སྐོར་བསྒྲགས་ཡོད་པ་རེད། མཐའ་མཚམས་ཀྱི་རྩོད་རྙོག་ཞི་འཇམ་ཡོང་སླད་ཟླ་ངོ་ ༡༠ ཙམ་གྱི་རིང་ཕྱོགས་གཉིས་ཀྱི་རིམ་པ་འདྲ་མིན་གྱི་དཔོན་རིགས་ཀྱིས་གྲོས་མོལ་བྱས་ཡོད་པ་དང་། དམག་དཔོན་རིམ་པའི་གྲོས་མོལ་ཐེངས་བཅུ་ཙམ་བྱས་མཐར། ཕྱོགས་གཉིས་ཀས་མཐའ་མཚམས་ཀྱི་དམག་མི་ཕྱིར་འཐེན་བྱ་རྒྱུ་ཡིན་པ་བསྒྲགས་ཡོད་པ་རེད།

གསར་འགོད་པ། ཀླུ་མགོན་ཐར།