དེ་རིང་རྒྱལ་བའི་ཕོ་བྲང་ནས་དྲ་ལམ་ཐད་གཏོང་བརྒྱུད་༧གོང་ས་མཆོག་གིས་བོད་རིགས་གཞོན་སྐྱེས་རྣམས་ལ་རྗེ་ཙོང་ཁ་པ་ཆེན་པོས་མཛད་པའི་རྟོགས་བརྗོད་མདུན་ལེགས་མའི་ཉིན་གྲངས་གཉིས་རིང་གི་གསུང་ཆོས་དབུ་འཛུགས་གནང་བ་དང་སློབ་མ་རྣམས་ཀྱི་བཀའ་འདྲིར་བཀའ་ལན་གནང་སོང་།
ཐོག་མར་༧གོང་ས་མཆོག་གིས། དེ་རིང་ཕྱི་ཟླ་ ༦ ཚེས་ ༡ ཉིན་ནམ་རྒྱུན་སློབ་ཕྲུག་ཚོ་དང་ཐུག་གི་ཡོད་པ་རེད། འོན་ཀྱང་ད་ལྟའི་ཆར་ནད་ཡམས་ཀྱི་རྐྱེན་གྱིས་ཕྱི་ལ་ཐོན་གྱི་མེད་སྟབས་དྲ་རྒྱའི་ཐོག་ནས་སློབ་ཕྲུག་ཚོ་དང་ལྷན་དུ་སྐད་ཆ་བཤད་ཀྱི་ཡོད། དེ་རིང་གི་བཀའ་ཆོས་དེ་རྟོགས་བརྗོད་མདུན་ལེགས་མའི་བཤད་ལུང་སྐོར་ཞུ་རྒྱུ་དང་དྲི་བ་དྲིས་ལན་བྱེད་ཀྱི་ཡོད་པ་རེད། ང་ཚོ་བོད་རིགས་ཆགས་ཀྱི་ཡོད་རེད། ཧི་མ་ལ་ཡའི་རི་རྒྱུད་ཀྱི་མི་ཡོད་ཀྱི་རེད། གང་ལྟར་ང་ཚོ་ཆོས་རྒྱལ་སྲོང་བཙན་སྒམ་པོའི་རྒྱ་བཟའ་དང་བལ་བཟའ་གཉིས་ལ་འཁྲུངས་ས་བསྐྱོན་ཡོད་པ་རེད། ཡིན་ནའང་། ང་ཚོ་བོད་པ་ལ་བོད་ཡིག་ཟུར་དུ་དགོས་ཀྱི་ཡོད་པ་དེ་རླབས་ཆེན་པོ་མཐོང་གི་ཡོད། བོད་ཡིག་དེ་རྒྱ་ཡིག་ལ་དཔེ་བལྟས་མེད་པར་རྒྱ་གར་ཆོས་ཀྱི་འབྱུང་ཁུངས་ཡིན་པས་རྒྱ་གར་གྱི་དབྱངས་དང་གསལ་བྱེད་ཡོད་པའི་ཡི་གེ་ལ་དཔེ་བཤུས་ཏེ་ང་རང་ཚོ་བོད་པའི་ཡི་གེ་དེ་བཟོས་པ་རེད། དེ་ནས་ཆོས་རྒྱལ་ཁྲི་སྲོང་ལྡེའུ་བཙན་ཕེབས་པའི་སྐབས་སུ་ང་ཚོའི་བོད་ཡིག་ཟུར་དུ་ཡོད་པས་ཁོང་གིས་ལེགས་སྦྱར་སྐད་དང་པཱ་ལིའི་སྐད་སོགས་བསླབ་མི་དགོས་པ་བྱས་ནས་ལེགས་སྦྱར་དང་པཱ་ལིའི་གཞུང་ནང་ཡོད་པ་རྣམས་བོད་ཡིག་ལ་བསྒྱུར་ཏེ་བོད་ཡིག་རང་གི་ཐོག་ནས་སློབ་སྦྱོང་བྱེད་དགོས་པ་ཞིག་བཟོས་པ་རེད། ངོས་ནས་ངོ་ཤེས་པ་ཁ་ཤས་ལ་ཞུས་མྱོང་། མཁན་ཆེན་ཞི་བ་འཚོས་བོད་ཡིག་ལ་དོ་སྣང་གནང་བ་རེད། ང་ཚོ་བོད་པ་གྱོང་པོ་རེད་འདུག དུས་རབས་བདུན་པའི་སྐབས་སུ་ཆོས་རྒྱལ་སྲོང་བཙན་སྒམ་པོས་བོད་ཡིག་བཟོས། དེ་ནས་དུས་བརྒྱད་པའི་ནང་ཆོས་རྒྱལ་ཁྲི་སྲོང་ལྡེའུ་བཙན་གྱིས་ང་ཚོར་བོད་ཡིག་ཡོད་པར་བརྟེན། ལེགས་སྦྱར་ནང་ཡོད་པའི་ནང་པའི་གཞུང་དང་པཱ་ལིའི་གཞུང་ནང་ཡོད་པ་རྣམས་བོད་ཡིག་ནང་བསྒྱུར་རྒྱུ་བྱས་ནས་རིམ་པས་ལོ་ཙཱ་བ་ཚོས་བསྒྱུར་ཏེ། བཀའ་འགྱུར་པུ་ཏི་བརྒྱ་ལྷག་དང་བསྟན་འགྱུར་པུ་ཏི་གཉིས་བརྒྱ་ལྷག་ཁྱོན་པུ་ཏི་གསུམ་བརྒྱ་ལྷག་ནང་པའི་གཞུང་གལ་ཆེ་བ་ཚང་མ་ཡོད་པ་ཆགས་འདུག ང་ཚོ་བོད་པ་ཚོས་སོ་སོའི་སྐད་ཡིག་རང་གི་ཐོག་ནས་རང་མགོ་ཆ་ཚང་ཐོན་ཐུབ་པ་ཞིག་ཡོད་རེད། སྐད་ཡིག་འདིའི་ཐོག་ནས་ས་སྐྱ་བཀའ་བརྒྱུད་རིས་སུ་མ་ཆད་པའི་མཁས་སྒྲུབ་གཉིས་ལྡན་གྱི་སྐྱེས་བུ་དམ་པ་ག་ཚོད་བྱུང་ཡོད་པ་རེད། ལྷག་པར་དུ་ས་པཎ་ཡབ་སྲས་ནས་རིགས་ལམ་དང་ཚད་མ་རིག་པའི་སྐོར་ལ་དམིགས་བསལ་གྱིས་ཐུགས་སྣང་གནང་ཡོད་རེད། དེ་ནས་རྗེ་རིན་པོ་ཆེས་ཚད་མའི་གཞུང་ལ་དམིགས་བསལ་གྱིས་ཐུགས་སྣང་གནང་བ་རེད། དེར་བརྟེན་དེང་སང་ང་ཚོས་སངས་རྒྱས་ཀྱི་ཆོས་ཚད་མ་རིག་པའི་ཐོག་ནས་འགྲེལ་བཤད་བརྒྱབ་རྒྱུ་ཡོད་པ་ཞིག་ཕལ་ཆེར་བོད་པ་གཅིག་པུ་མ་གཏོགས་ཡོད་མ་རེད། རྒྱ་ནག་ལ་སྒོམ་བརྒྱབ་རྒྱུ་མ་གཏོགས་དེ་འདྲའི་སློབ་སྦྱོང་དམིགས་བསལ་བྱེད་ཀྱི་མི་འདུག པཱ་ལིའི་ཆོས་བརྒྱུད་འཛིན་གནང་མཁན་གྱི་འབར་མ་དང་ཐའེ་ལེན་ཌི། ཤྲི་ལངྐ་དེ་ཚོར་ཚད་མ་རིག་པའི་སློབ་སྦྱོང་ཡོད་མ་རེད། ཅེས་སོགས་གསུངས་སོང་།
དེ་ནས་བཀའ་འདྲི་བཀའ་ལན་གྱི་ལས་རིམ་ནང་སྦེལ་ཀོབ་བོད་ཕྲུག་ཁྱིམ་སྡེའི་སློབ་མ་བསྟན་འཛིན་ཚེ་རིང་ལགས་ཀྱིས། དེང་སང་འཛམ་གླིང་སྤྱི་དང་ལྷག་པར་དུ་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་ཛ་དྲག་གི་དུས་སུ་ནང་པ་སངས་རྒྱས་ཤིག་ཡིན་པའི་ཆ་ནས་སེམས་ལ་དཀའ་ངལ་མི་འཕྲད་པའི་ཆེད་དུ་བསམ་བློ་གཏོང་སྟངས་གང་འདྲ་ཞིག་དགོས་སྐོར་བཀའ་འདྲི་ཞུས་པར་༧གོང་ས་མཆོག་གིས། དེང་སང་ནད་ཡམས་འདིས་འཛམ་བུ་གླིང་སྤྱི་དང་ལྷག་པར་དུ་རྒྱ་གར་ནང་ཤུགས་ཆེན་པོ་ཡོད་པ་རེད། འདིས་མི་མང་པོ་ཞིག་གི་སེམས་ལ་དཀའ་ངལ་འཕྲད་ཀྱི་ཡོད་རེད། ནད་ཀྱིས་ལུས་ལ་སྡུག་བསྔལ་སྐྱེད་པ་གཅིག་དང་སེམས་ལ་དངངས་སྐྲག་སྐྱེས་པ་བཅས་ཁག་གཉིས་ཡོད་པ་རེད། སེམས་ནས་ནད་ཡམས་འདི་ལ་ཞེད་སྣང་བྱས། ནད་ཡམས་ཕོག་པ་ཡིན་ནའང་སེམས་ལ་དངངས་སྐྲག་བྱས་པ་དང་ནད་ཕོག་མེད་ནའང་ན་ཚ་འདིས་གང་འདྲ་བྱས་ཡོང་བསམ་པའི་དངངས་སྐྲག་བྱས་པ་སོགས་སེམས་ཀྱིས་དངངས་སྐྲག་བྱས་པ་འདིའི་ཐོག་ལ་ང་ཚོས་ཚེ་རབས་ནས་ཚེ་རབས་བཤད་ཀྱི་ཡོད་པ་རེད། ཕྱོགས་གཅིག་ནས་རྗེ་རིན་པོ་ཆེས་ལམ་གཙོའི་ནང་གསུངས་པ་བཞིན་ལེགས་ཉེས་ཀྱི་གཞན་དབང་ལ་ཕྱིན་ནས་སེམས་ཀྱི་ཉོན་མོངས་དུག་གསུམ་ཡོད་པས་ཕྱིའི་ནད་ཡོང་གི་ཡོད་རེད། དེ་འདྲ་ཡིན་དུས། ང་ཚོ་ནང་པ་གཅིག་གི་ངོས་ནས་དུག་གསུམ་གྱི་ཉོན་མོངས་སེལ་ནས་ཐར་པ་ཐོབ་ཐུབ་པའི་བསམ་བློ་བཏང་བ་ཡིན་ན། སྤྱིར་བཏང་ནད་ཡམས་དེ་ཚོོའི་གྲས་རྩ་བ་འགག་འགྲོ་ཡི་རེད། ནང་པ་གཅིག་གི་ངོས་ནས་ནད་ཡམས་དེ་ཚོ་སྲིད་པ་འཁོར་བའི་ཉེས་དམིགས་ཀྱི་ནད་ཀྱི་སྡུག་བསྔལ། སྐྱེ་རྒ་ན་འཆིའི་སྡུག་བསྔལ་སོགས་གསུང་གི་ཡོད་པ་རེད། སྐྱེ་རྒ་ན་འཆིའི་སྡུག་བསྔལ་གྱི་རྩ་བ་དེ་སྐྱེ་བ་ལ་ཐུག་པ་རེད། སྐྱེ་བ་དེ་ལས་དང་ཉོན་མོངས་ཟད་པས་ཐར། ལས་དང་ཉོན་མོངས་རྣམ་རྟོག་ལས། དེ་དག་སྤྲོས་ལས་སྤྲོས་པ་ནི། སྟོང་པ་ཉིད་ཀྱིས་འགག་པར་འགྱུར། ཞེས་མགོན་པོ་ཀླུ་སྒྲུབ་ཀྱིས་གསུངས་པ་དེ་ང་ཚོའི་སེམས་རྒྱུད་ཀྱི་ལས་དང་ཉོན་མོངས་མེད་པ་བཟོ་མ་ཐུབ་ན། ཚེ་རབས་ནས་ཚེ་རབས་ནད་ཡམས་ཀྱིས་མཚོན་པའི་དེ་ཚོའི་གྲས་ཡོང་བསྡད་ཀྱི་རེད། དམྱལ་བའི་སྡུག་བསྔལ། ཡི་དྭགས་ཀྱི་སྡུག་བསྔལ། དུད་འགྲོའི་སྡུག་བསྔལ། མིའི་ལུས་ལ་ཡིན་ནའང་སྐྱེ་རྒ་ན་འཆིའི་སྡུག་བསྔལ་དེ་ཚོ་ཡོང་གི་རེད། དེར་བརྟེན་ཆེ་ས་ནས་བསམ་བློ་བཏང་ན་ནད་ཡམས་དེ་འདྲ་མཐོང་དུས། ལས་ཉོན་ཟད་པའི་ཐར་པ་ཐོབ་དགོས་ཀྱི་འདུག་བསམ་པའི་སེམས་ཤུགས་སྐྱེད་པ་ཡོང་གི་རེད། འཕྲལ་དུ་ཡིན་ནའང་ནད་ཡམས་དེ་འདྲ་ཡོང་བ་ཡིན་ན་སྔར་བསགས་པའི་སྡིག་པ་དག་པར་ཤོག་ཟེར་ནས་བསམ་བློ་བཏང་ན་ནད་ན་ཚ་བྱུང་བ་དེ་གོ་ཆོད་པ་ཡོང་གི་རེད། ངན་འགྲོ་ངན་སོང་གི་གནས་ལ་སྐྱེས་པའི་ལས་ངན་ཡོད་པ་དེ་ནད་ཡམས་ཀྱིས་དག་ནས་ཡོང་ཐུབ་ཀྱི་རེད། ལས་ངན་འབྲས་བུ་ཟད་པའི་རྒྱུར་མཐོང་ནས། རྐྱེན་ངན་ལམ་དུ་ལོངས་པར་བྱིན་གྱིས་རློབས། གསུངས་ཀྱི་ཡོད་པ་རེད། སེམས་ཀྱི་ཞི་བདེ་མ་འཁྲུག་པར་བསམ་བློ་གཏོང་སྟངས་ཐོག་ནས་ནད་ཡམས་ཡོང་བའི་སྐབས་སུ་སེམས་ཀྱི་དངངས་སྐྲག་ཉུང་དུ་གཏོང་ཐུབ་ཀྱི་རེད། ཅེས་བཀའ་སློབ་ལམ་སྟོན་གནང་སོང་།
ཡང་སི་ལ་ཀུ་བོད་ཁྱིམ་གྱི་སློབ་མ་བསྟན་འཛིན་ཚེ་འཕེལ་ལགས་ཀྱིས། དེང་སང་གོ་ལ་འདིའི་སྟེང་གི་སྲོག་ཆགས་འདྲ་མིན་སྣ་ཚོགས་ཤིག་མིའི་རིགས་ཀྱི་བྱ་སྤྱོད་ལ་བརྟེན་ནས་རྩ་མེད་དུ་འགྲོ་བཞིན་ཡོད་པ་རེད། དེར་བརྟེན་སྨྲ་མི་ཤེས་པའི་སེམས་ཅན་གང་རུང་ཞིག་ཐ་ན་འབུ་སྲིན་ཆུང་ཆུང་ཞིག་བསད་པ་ཡིན་ནའང་དེ་ལ་སྡིག་པ་ཇི་ཙམ་ཡོད་མེད་བཀའ་འདྲི་ཞུས་པར་༧གོང་ས་མཆོག་གིས། སྡིག་པའི་ལས་གང་ཡིན་རུང་བྱས་ལ་མ་བསགས་པ། བསགས་ལ་མ་བཞག་པ་ཟེར་བ་ཡོང་གི་འདུག དེ་འདྲ་ཡིན་དུས་གཙོ་བོ་བསམ་བློ་དེ་གལ་ཆེན་པོ་རེད་འདུག དཔེར་ན་ཞིང་པ་ལྟ་བུར་ཆ་བཞག་ན། ཞིང་ལས་བྱས་པའི་སྐབས་སུ་འབུ་སྲིན་ཤི་ཡི་རེད། ཐབས་ཤེས་གང་ཡང་མེད་པས་མ་ཎི་བགྲང་བཞིན་སྨོན་ལམ་བརྒྱབ་ནས་བསྡད་པ་མ་གཏོགས་འབུ་སྲིན་གྱི་སྲོག་ལ་ཉེན་ཁ་ཡོད་རེད་ཟེར་ནས་ངས་ཞིང་ལས་བྱེད་ཀྱི་མིན་ལབ་ན་མཐར་ལྷུང་བ་རེད། དེར་བརྟེན་བསམ་བློའི་ཐོག་ནས་བསམ་བཞིན་དུ་མི་བྱས་པར་གཞན་གྱིས་བཙན་ཤེད་ཐོག་ནས་བྱས་པ་ཡིན་ན་བྱས་ལ་མ་བསགས་པ་ཆགས་ཀྱི་ཡོད་པ་རེད། སྡིག་པ་ལྗིད་པོ་ཆགས་ཀྱི་ཡོད་མ་རེད། ལས་ངན་པ་བྱས་རེད་དེ་སེམས་ནང་དུ་ལས་ངན་པ་བྱེད་འདོད་ཀྱི་བསགས་པའི་བློ་མེད་ན་གཞན་གྱི་དབང་གིས་བྱས་བཅུག་པ་དེ་ཚོ་བྱས་ལ་མ་བསགས་པ་རེད། ང་ཚོའི་སེམས་ནང་ཉོན་མོངས་དུག་གསུམ་སྐྱེས་ནས་གཞན་ལ་གནོད་པ་སྐྱེལ་བ་དང་སྲོག་བཅད་པའི་བསམ་བློ་འཁོར་ན་སེམས་ནས་སྲོག་བཅད་པའི་བསམ་བློ་བསགས་པ་དང་དངོས་སུ་བྱས་མེད་པ་བསགས་ལ་མ་བཞག་པ་རེད། བྱས་ལ་མ་བསགས་པ་དང་བསགས་ལ་མ་བཞག་པ་གཉིས་ཀྱི་ནང་ནས་བསགས་ལ་མ་བཞག་པ་ཉེས་པ་ལྗིད་པ་རེད། ཅེས་བཀའ་ལན་གནང་སོང་།
དྷ་སྟེང་བོད་ཁྱིམ་གྱི་སློབ་མ་ཀརྨ་ཆོས་སྒྲོན་ལགས་ཀྱིས། སྤྱིར་བཏང་མི་མང་པོ་ཞིག་གིས་ཕྱིའི་དངོས་པོ་ཡར་རྒྱས་ཕྱིན་པ་ཡིན་ན་དཀའ་ངལ་ཚང་མ་སེལ་ཐུབ་པར་ངོས་འཛིན་བྱེད་མཁན་མང་པོ་འདུག འོན་ཀྱང་དེ་ཙམ་གྱིས་ནང་སེམས་ཀྱི་དཀའ་ངལ་སེལ་ཐུབ་ཀྱི་མེད་པས་ནང་སེམས་ཀྱི་དཀའ་ངལ་སེལ་ཐབས་སྐོར་བཀའ་འདྲི་ཞུས་པར་༧གོང་ས་མཆོག་གིས། སེམས་ཀྱི་ཞི་བདེ་དཀྲུག་མཁན་དེ་ལུས་ཀྱི་ནད་ན་ཚ་བྱུང་བ་གཅིག་པོ་མ་རེད། ལུས་པོ་བདེ་ཐང་ཡོད་རུང་སེམས་མ་སྐྱིད་པ་ཡོད་པ། དཔེར་ན་དེང་སང་འཛམ་བུ་གླིང་འདིའི་ནང་དུ་དཔལ་འབྱོར་གྱི་བདག་པོ་དེ་ཚོ་དཔལ་འབྱོར་ཡག་པོ་ཡོད་པ་དང་སྨན་བཅོས་སོགས་ཡག་པོ་ཡོད་པ་རེད། འོན་ཀྱང་སེམས་ལ་མ་སྐྱིད་པ་ཡོང་བསྡད་ཀྱི་འདུག ལུས་པོའི་འཕྲོད་བསྟེན་གཅིག་པོས་མི་ཆོག་པར་སེམས་ཀྱི་འཕྲོད་བསྟེན་གལ་ཆེན་པོ་རེད། སེམས་ཀྱི་འཕྲོད་བསྟེན་དེ་ནུབ་ཕྱོགས་ནས་ཡོང་བའི་དེང་དུས་ཀྱི་ཤེས་ཡོན་གྱིས་ཕན་ཐོགས་གང་ཡང་ཡོད་མ་རེད། རྒྱ་གར་གྱི་ཤེས་ཡོན་ནང་ནས་དཀོན་མཆོག་ལ་སྐྱབས་སུ་མཆི་ཟེར་བ་འདི་མེད་པར་སོ་སོའི་སེམས་དཀྲུག་མཁན་དེ་ཆགས་སྡང་གི་དབང་གིས་ཡོང་གི་ཡོད་པ་དང། ཆགས་སྡང་ཟེར་བ་དེ་རྒྱུ་དང་རྐྱེན་ལ་བརྟེན་ནས་ཡོང་གི་ཡོད་པ་རེད། སྤྱིར་རྒྱ་གར་གྱི་སེམས་ཁམས་རིག་པ། ལྷག་པར་དུ་ནང་པའི་གཞུང་ནས་གསུངས་པའི་སེམས་ཁམས་རིག་པའི་སྐོར་ཤེས་པ་ཡིན་ན་སེམས་ཀྱི་ཞི་བདེ་དཀྲུག་མཁན་གྱི་ཆགས་སྡང་ཡོད་པ་དེ་ལ་བསམ་བློ་བཏང་ནས་ཤུགས་ཆུང་དུ་བཏང་ཐུབ་ཀྱི་རེད། འདི་བྱེད་པ་ལ་ཆོས་པ་དང་ནང་པ་བྱེད་དགོས་རེད་ནམ་ཡང་ཟེར་གྱི་མེད། སེམས་དཀྲུག་མཁན་གྱི་ཆགས་སྡང་ཤུགས་ཆུང་དུ་གཏོང་བར་ནང་པའི་གཞུང་གི་ནང་ནས་རིག་པ་མང་པོ་བཀོད་བཞག་པ་དེ་ཚོ་དང་། ལྷག་པར་དུ་ཞི་བ་ལྷས་སྤྱོད་འཇུག་ཕན་ཐོགས་ཆེན་པོ་ཡོད་པ་རེད། སྤྱོད་འཇུག་གི་ལེའུ་དྲུག་པ་དེས་ཁོང་ཁྲོའི་ཉེས་དམིགས་གསུངས་ཡོད་རེད། དེ་ནས་ལེའུ་བརྒྱད་པ་དེ་རང་གཅེས་འཛིན་གྱི་སྐྱོན་དང་གཞན་གཅེས་འཛིན་གྱི་ཡོན་ཏན་དེ་ཚོའི་གྲས་ཆོས་ཀྱི་སྐད་ཆ་དང་སྐྱེ་བ་ཕྱི་མའི་སྐོར་བཤད་མི་དགོས་པར་ཉིན་རེ་ཉེན་རེའི་སེམས་མ་འཁྲུག་པའི་ཆེད་དུ། རང་གཅེས་འཛིན་བྱས་ན་སེམས་འཁྲུག་གི་ཡོད་པས་རང་གཅེས་འཛིན་གྱི་སྐྱོན་དང་གཞན་གཅེས་འཛིན་གྱི་ཡོན་ཏན། ཁོང་ཁྲོ་ཟ་ན་མ་སྐྱིད་པ་ཡོང་གི་ཡོད་པ་ཁོང་ཁྲོའི་ཉེས་དམིགས་སོགས་སྤྱོད་འཇུག་གི་ལེའུ་དྲུག་པ་དང་ལེའུ་བརྒྱད་པ་དེ་ཚོས་ཆོས་ཁས་མ་ལེན་མཁན་ཞིག་ཡིན་རུང་འདི་ཀློག་པ་ཡིན་ན་བསམ་བློ་གཏོང་བར་ཁྱད་པར་ཞེ་དྲགས་ཡོད་རེད། བསམ་བློ་བཏང་ན་མ་གཏོགས་སྤྱོད་འཇུག་སྔོན་ལ་སྦྱངས་ནས་ཁོང་ཁྲོ་ལངས་མཁན་ཡོང་མི་སྲིད་པ་མ་རེད། དཔེ་ཆའི་ནང་བཤད་པ་དེ་ཚོར་རྒྱུ་མཚན་གང་འདྲ་འདུག་བསམ་བློ་བཏང་དགོས་པ་དེ་གལ་ཆེན་པོ་རེད། ཐོག་མར་ཐོས་བྱུང་གི་ཤེས་རབ་སྐྱེས། དེ་ནས་ཐོས་པའི་དོན་ལ་ཡང་ནས་ཡང་དུ་བསམ་ནས་བསམ་བྱུང་གི་ཤེས་རབ་སྐྱེས། བསམ་པའི་སྐབས་སུ་ཚན་རིག་པའི་སྐད་ཆ་བླངས་ཏེ་ག་ལེར་སེམས་ལ་མྱོང་བ་སྐྱེས་ནས་སེམས་ལ་འགྱུར་བ་ཐེབས་ནས་སྒོམ་བྱུང་གི་ཉམས་མྱོང་སྐྱེས་ཏེ་མི་ཚེར་འགྱུར་བ་འགྲོ་རྒྱུ་དང་ཁྱིམ་ཚང་ལ་འགྱུར་བ་འགྲོ་རྒྱུ། སྤྱི་ཚོགས་ལ་འགྱུར་བ་འགྲོ་རྒྱུ་སོགས་ཡོང་གི་རེད། ང་ཚོ་བོད་པ་དེ་ཚོ་སྙིང་རྗེ་ཆེ་བ་དང་སེམས་ལྷོད་ལྷོད་ཡོད་པ་ཕལ་ཆེར་མཐོང་གི་འདུག བྱམས་བརྩེ་དགོས་པ་རེད། ཅེས་སྤྱོད་འཇུག་གི་ཚིག་རྣམས་ལ་ཉིན་ལྟར་བསམ་བློ་བཏང་ནས་འགྲོ་རྒྱུ་གལ་ཆེན་པོ་ཡིན་སྐོར་གསུངས་སོང་།
གསར་འགོད་པ། བསྟན་འཛིན་ཕུར་བུ།
