ཁ་སང་ཕྱི་ཚེས་ ༡ ཉིན་ཨ་རིའི་གྲོས་ཚོགས་ཀྱི་རྒྱ་ནག་ཚན་པས་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ (National Basketball Players Association) ལ་ཡི་གེ་ཞིག་བཏང་སྟེ། སིལ་སྤོལ་རྩེད་འགྲན་པས་ད་ལྟའང་ཡུ་གུར་མི་རིགས་ལ་བཙན་དབང་གིས་ངལ་རྩོལ་བསྒྱུར་བཀོད་བྱེད་བཞིན་པའི་བཟོ་ལས་ཁང་ཁག་ཅིག་ལ་མུ་མཐུད་མཉམ་འབྲེལ་བྱེད་བཞིན་ཡོད་སྟབས། མཉམ་འབྲེལ་བྱེད་མཚམས་འཇོག་དགོས་སྐོར་གསུངས་འདུག
རྒྱ་ནག་ཚན་པའི་གྲོས་ཚོགས་འོག་མའི་འཐུས་མི་མི་ཇེམ་སི་མེག་གྷོ་ཝན་ (Jim McGovern) ལགས་དང་གྲོས་ཚོགས་གོང་མའི་འཐུས་མི་ (Jeff Merkley) ལགས་སོགས་ཀྱིས་བཏང་གནང་བའི་ཡི་གེ་དེའི་ནང་། རྒྱལ་ཡོངས་སིལ་སྤོལ་ལྷན་ཚོགས་ཀྱི་རྩེད་འགྲན་པ་བཅུ་ལྷག་གིས་རྒྱ་ནག་ནང་བཅའ་སྡོད་བྱེད་བཞིན་པའི་ལུས་རྩལ་གྱོན་གོས་བཟོ་ཚོང་ཁང་ (ANTA) དང་། (Li-Ning) ། (Peak) བཅས་སུ་མཉམ་འབྲེལ་བྱེད་ཀྱི་ཡོད་པ་མ་ཟད། མུ་མཐུད་ལུས་རྩལ་གྱོན་གོས་བཟོ་ཚོང་ཁང་ (ANTA) དང་མཉམ་འབྲེལ་གྱི་ཆོད་གན་གསར་པ་བཞག་ཡོད་པ་དང་། རྩེད་འགྲན་པས་ཤར་ཏུར་ཀི་སི་ཐན་ནས་བྱུང་བའི་སྲིན་བལ་དང་འབྲེལ་བ་ཡོད་པའི་བཟོ་ཚོང་ཁང་ཁག་ལ་འབྲེལ་བ་བྱས་པར་བརྟེན། རྩེད་འགྲན་པ་དང་རྒྱལ་ཡོངས་སིལ་སྤོལ་ལྷན་ཚོགས་གཉིས་ཀའི་མཚན་སྙན་ཉེན་ཁའི་གནས་སུ་སྐྱེལ་གྱི་ཡོད་པ་དང་། རྒྱལ་ཡོངས་སིལ་སྤོལ་ལྷན་ཚོགས་དང་དེའི་རྩེད་འགྲན་པ་གཉིས་ཀས་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་ཚོང་ལས་དེའི་རིགས་ལ་རྒྱབ་སྐྱོར་ཙམ་ཡང་བྱེད་མི་འོས་པ་ཞིག་ཡིན་སྐོར་བཀོད་འདུག
ཡང་ཡི་གེ་དེའི་ནང་། ཕྱི་ལོ་ ༢༠༡༨ ལོར་རྒྱ་ནག་གཞུང་གིས་ཤར་ཏུར་ཀི་སི་ཐན་ནང་གི་ཁ་ཆེ་གྲངས་ཉུང་མི་རིགས་རྣམས་ལ་བཙན་དབང་གིས་ངལ་རྩོལ་བསྒྱུར་བཀོལ་བྱེད་བཞིན་པའི་གནས་ཚུལ་ཐོན་ཡོད་པ་དང་། ས་ཁུལ་དེའི་སྲིན་བལ་ཐོན་ལས་དང་འབྲེལ་བཙན་དབང་གིས་ངལ་རྩོལ་བསྒྱུར་བཀོལ་བྱེད་བཞིན་ཡོད་པ་ར་སྤྲོད་བྱུང་ཡོད་པ་དང་། ལུས་རྩལ་གྱོན་གོས་བཟོ་ཚོང་ཁང་ (ANTA) ཁང་ལ་སོགས་པས་མངོན་གསལ་དོད་པོའི་ཐོག་ནས་ཁུལ་དེའི་སྲིན་བལ་བེད་སྤྱོད་བྱེད་ཀྱི་ཡོད་པ་ཕྱིར་བསྒྲགས་བྱས་ཡོད་སྟབས། བཟོ་ཚོང་ཁང་དེ་དག་ནི་ཁུལ་དེའི་བཙན་དབང་གིས་ངལ་རྩོལ་བསྒྱུར་བཀོལ་བྱེད་བཞིན་པའི་གནས་ཚུལ་དང་འབྲེལ་བ་ཡོད་སྐོར་དང་། རྒྱལ་ཡོངས་སིལ་སྤོལ་ལྷན་ཚོགས་ངོས་ནས་རྩེད་འགྲན་པ་རྣམས་པ་ཤར་ཏུར་ཀི་སི་ཐན་ནང་རྒྱ་ནག་གཞུང་གིས་མི་རིགས་རྩ་མེད་བཟོ་བཞིན་པ་དང་། བཙན་དབང་གིས་ཡུ་གུར་མི་རིགས་ལ་ངལ་རྩོལ་བསྒྱུར་བཀོལ་བྱས་ཏེ་སྲིན་བལ་གྱི་གྱོན་གོས་བཟོ་བཞིན་པའི་གནས་ཚུལ་ཐོག་གོ་རྟོགས་སྤེལ་དགོས་སྐོར་སོགས་བཀོད་འདུག
གནས་ཚུལ་དེ་དང་འབྲེལ་རོའུ་ཊུར་སོགས་རྒྱལ་སྤྱིའི་གསར་ཁང་ཁག་གིས་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ལ་འབྲེལ་བྱས་ཏེ། གྲོས་ཚོགས་ཀྱི་རྒྱ་ནག་ཚན་པའི་ཡི་གེ་དེ་ལ་ལྟ་ཚུལ་ཇི་ཡོད་དྲིས་པར་ལན་འདེབས་གང་ཡང་བྱས་མི་འདུག
ཨ་རིའི་གྲོས་ཚོགས་ཀྱི་རྒྱ་ནག་ཚན་པའི་ཡི་གེ་དེ་དང་འབྲེལ་ཝ་ཤིན་ཊོན་དུ་བཅའ་སྡོད་རྒྱ་ནག་གཞུང་ཚབ་ཁང་གིས་ཤར་ཏུར་ཀི་སི་ཐན་ནང་བཙན་དབང་གིས་ངལ་རྩོལ་བསྒྱུར་བཀོལ་བྱེད་བཞིན་པའི་གནས་ཚུལ་དེ་ནི་རྫུན་གཏམ་ཁོ་ན་ཡིན་པ་དང་། ཨ་རི་དང་རྒྱ་ཁབ་གཞན་ཁག་ཅིག་གིས་ཤར་ཏུར་ཀི་སི་ཐན་ནང་རྙོག་གླེང་བཟོ་བཞིན་པ་མ་ཟད། རྒྱ་ནག་ལ་སྟངས་འཛིན་བྱ་ཐབས་བྱེད་བཞིན་པ་ནི་ལེགས་འགྲུབ་འབྱུང་མི་སྲིད་པ་ཞིག་ཡིན་ལ། ཨ་རི་སོགས་ཀྱིས་ཡར་འཇོག་བཞིན་པའི་ཕ་བོང་དེ་ཕྱིར་རང་ཉིད་ཀྱི་རྐང་མགོར་ལྷུང་ངེས་ཡིན་སྐོར་གྱི་ཉེན་བརྡ་ཡང་བཏང་ཡོད་འདུག
ཕྱི་ལོ་ ༢༠༡༩ ལོའི་ཟླ་ ༡༠ ནང་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཁོངས་སུ་ཡོད་པའི་ཧོ་སི་ཊོན་རོ་ཀེ་ཊི་ (Houston Rockets) རུ་ཁག་གི་སྤྱི་ཁྱབ་དོ་དམ་པ་ཌ་རིལ་མོ་རེ་ (Daryl Morey) ཡིས། ཧོང་ཀོང་མི་མང་གི་ཞི་བའི་ངོ་རྒོལ་ལས་འགུལ་ལ་རྒྱབ་སྐྱོར་ཡོད་སྐོར་བརྗོད་པ་ལ་བརྟེན། རྒྱ་ནག་གཞུང་དང་རྒྱ་རིགས་སིལ་སྤོལ་ལ་དགའ་མོས་བྱེད་མཁན་གྱིས་སྐྱོན་བརྗོད་དྲག་པོ་བྱས་ཡོད་ལ། སིལ་སྤོལ་ལྷན་ཚོགས་ངོས་ནས་རྒྱ་རིགས་མི་མང་ལ་དགོངས་སེལ་ཞུ་དགོས་སྐོར་བརྗོད་ཡོད་པ་མ་ཟད། རྒྱ་ནག་གཞུང་གི་བརྙན་འཕྲིན་བརྒྱུད་ལམ་ཁག་ཏུ་རྒྱལ་ཡོངས་སིལ་སྤོལ་ལྷན་ཚོགས་ཀྱི་རྩེད་འགྲན་ཁག་ཤར་གཏོང་བྱེད་མཚམས་བཞག་ཡོད་སྟབས། སྐབས་དེར་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱིས་དགོངས་སེལ་ཞུས་ཡོད་པ་དང་། དེའི་ཐད་ཡང་སྐབས་དེའི་ཨ་རིའི་སྲིད་འཛིན་གཞོན་པ་མེག་པེན་སི་མཆོག་ནས། རྒྱལ་ཡོངས་སིལ་སྤོལ་ལྷན་ཚོགས་ཀྱི་རྐང་རྩེད་པ་དང་སྦྱིན་བདག་ཁ་ཤས་ཀྱིས་རྒྱུན་དུ་རང་དབང་ཐོབ་ཐང་སྤྱད་དེ་རྒྱལ་ཁབ་ལ་སྐྱོན་བརྗོད་སོགས་བྱེད་ཀྱི་ཡོད་ནའང་། མི་གཞན་གྱི་ཐོབ་ཐང་དང་རང་དབང་གི་གནད་དོན་ལ་ཐུག་སྐབས་ཁ་ཁུ་སིམ་པོར་སྡོད་ཀྱི་ཡོད་པ་རེད། རང་དབང་གི་སྨྲ་བརྗོད་འགོག་གི་ཡོད་ནའང་རྒྱ་ནག་དམར་ཤོག་གཞུང་གི་ཕྱོགས་སུ་ལངས་བཞིན་ཡོད་པ་ནི་རྒྱལ་ཡོངས་སིལ་སྤོལ་ལྷན་ཚོགས་ཀྱིས་རང་ཉིད་ཀྱི་དབང་ཆ་ཡོད་ཚད་གཅིག་སྡུད་རིང་ལུགས་ཀྱི་རྒྱལ་ཁབ་ལ་ཡོད་པ་ལྟར་བྱེད་ཀྱི་འདུག་ཅེས་སྐྱོན་བརྗོད་གནང་ཡོད་པ་རེད།
