སྤྱི་འཐུས་དམ་འབུལ། བསམ་ཚུལ་ཞིག་གི་ལྷན་ཐབས།

(འཕྲལ་བྲིས་པའི་ཚིག་དོན་ན་ནོར་བ་ཡོད་ན་བཟོད་གསོལ་ཞུ། )

དེ་རིང་ཞོགས་པ་ནང་ཅ་འཐུང་ཞོར་ངས་ངོ་དེབ་ཀྱི་ཐོག་ཏུ། ༼ངས་བསམ་ན། ཁྲིམས་མཐུན་གྱི་ཁྲིམས་དཔོན་ཞིག་གི་མདུན་དམ་འབུལ་གོ་སྐབས་བྱུང་ན་ལེགས། གཞན་ད་ལྟའི་ཆར་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་དང་བཅའ་ཁྲིམས་རིན་པོ་ཆེའི་མདུན་དམ་འབུལ་ཞུ་རྒྱུ་ནི། སྤྱི་འཐུས་རྣམ་པའི་འབྱུང་འགྱུར་གྱི་ལམ་བུའི་ངོས་ནས་གདམ་ཀ་ཡག་ཤོས་སུ་མཐོང་། ཁ་ཆེ་ཕ་ལུའི་སྙིང་གཏམ་བཤད་ཡོད་དོ། །ཉན་དང་མི་ཉན་སོ་སོས་དགོངས་པ་བཞེས། །རྫ་ཚེ་རིང་བཀྲ་ཤིས།༽ཞེས་པའི་ཡིག་ཐུང་ཞིག་བཏང་བ་ཡིན།

འཆར་ཅན་ལྟར་ཡག་པོ་འདུག་གསུང་མཁན་དང་། ཕྱོགས་ཞེན་གྱི་སྐད་ཆ་རེད་གསུང་མཁན། ནམ་རྒྱུན་ཁྱོད་ཀྱི་རྩོམ་ཡིག་ལ་དགའ་མོས་ཡོད་དེ། ད་ནི་བློ་ལོག་སོང་ཟེར་མཁན། རྡ་སའི་རྩོད་རྙོག་ལ་ཇུས་གཏོགས་བྱས་ན་ཆེ་མཐོང་བརླག་འགྲོ་ཞེས་བསླབ་བྱ་གནང་མཁན་བཅས་ཁག་སོ་སོ་ནས་བྱུང་།

ལར་ངས་ངོས་ནས་བསམ་ཚུལ་འདི་འབྲི་སྐབས་ཆེད་དུ་ཕྱོགས་ཞེན་དགོས་པའི་བསམ་བློ་ཕལ་ཆེར་མེད་པ་ལྟ་བུ་ཡིན། རྒྱ་ནག་གི་དྲག་པོའི་འཇིགས་སྐུལ་གྱི་འོག་ནས་ང་ཚོས་བསམ་ཚུལ་དྲང་བརྗོད་མི་ཆོག་པའི་མནོན་ཤུགས་དེ་བཙན་བྱོལ་འདིར་མེད་ན་ཡང་། གལ་ཏེ་བསམ་ཚུལ་དངོས་ཤིག་བཤད་ན་སོ་སོའི་འདོད་པ་དང་མ་མཐུན་པ་ཙམ་གྱིས་དེ་མ་ཐག་བཤད་མཁན་དེ་ཤོག་ཁག་གང་རུང་ཞིག་གི་མིའི་ངོ་བོར་གཏན་ཁེལ་བྱེད་པ་དང་། དེ་ནས་ལུ་གུ་རྒྱུད་དུ་བཀའ་བཀྱོན་དང་སྡིག་དམོད་སོགས་ཡོང་གིན་ཡོད་པ་འདི་ཤེས་ཡོན་པ་ཞིག་ལ་མཚོན་ན་སེམས་ནང་གི་དཀའ་ངལ་ཆེ་ཤོས་སུ་གྱུར་ཡོད། ང་ལ་ཡང་རྩོམ་ཡིག་རེ་འབྲི་འདོད་སྐབས་བསམ་བློ་གཏོང་དགོས་ས་དང་། ཐ་ན་རྩོམ་ཡིག་འབྲི་རྒྱུ་བསྐྱུར་དགོས་པའི་རྒྱུ་རྐྱེན་ལྟེ་བ་དེའང་འདི་རིགས་ཆགས་ཀྱི་འདུག །དེ་ནི་སེམས་གཏམ་རང་ཡིན།

ང་སྒེར་གྱི་ངོས་ནས་ཀྱང་སྤྱི་ལོ་ཉིས་སྟོང་བཅུ་དྲུག་ནས་ད་ལྟའི་བར་གྱི་བཀའ་ཤག་དང་དོན་གཅོད། ཁྲིམས་ཁང་དང་གྲོས་ཚོགས་སོགས་ཀྱི་གནང་ཕྱོགས་ལ་བསམ་ཚུལ་མང་པོ་འདོད་འདོད་བྱུང་མོད། གང་བཤད་པ་དེ་སྒེར་གྱི་ལྷད་མེད་ཀྱི་བསམ་ཚུལ་གྱི་ངོ་བོར་འགྲོ་ཐུབ་པའི་ཁོར་ཡུག་མེད་པའི་ཆ་ནས་བསམ་ཚུལ་ཕལ་ཆེར་འདོན་མ་ཕོད་ལ། བཤད་འདོད་པ་མང་པོ་ཞིག་བཏང་སྙོམས་སུ་བཞག་པ་ཡིན། ལར་ང་ལྟ་བུ་ཞིག་གི་བསམ་ཚུལ་མ་བཤད་པ་དེས་སྤྱི་ཚོགས་ལ་ཕན་གནོད་གང་ཡང་མེད་ན་ཡང་། དངོས་གནས་ཀྱི་ཤེས་ཡོན་ཡོད་པ་མང་པོ་ཞིག་ལ་དཀའ་ངལ་འདིས་ཁྱད་པར་བྱེད་ཀྱི་ཡོད། དེ་ཡང་ཁོང་དག་གིས་རང་གི་བསམ་ཚུལ་རྣལ་མ་ནི་བཤད་ས་མེད། བརྫུས་མའི་སྐད་ཆ་ལ་ནི་དབྱིངས་མེད། མཐར་ཁ་ཁུ་སུམ་པོར་བཞུགས་ཀྱིན་ཡོད། དེ་ནས་དེང་གི་གཙོ་རྒྱུག་གི་སྡིང་ཆ་ཡོད་ཚད། གལ་ཆེའི་གླེང་སྟེགས་ཡོད་ཚད། བསམ་བློའི་གད་སྙིགས་ཀྱིས་གང་འགྲོ་བ་དེ་བྱུང་བ་རེད་ལ། འདིས་ཕུགས་རྒྱང་རིང་པོའི་ཆ་ནས་བོད་ཀྱི་སྤྱི་ཚོགས་ཁྱོན་ཡོངས་ལ་གྱོང་གུད་ཆེན་པོ་ཞིག་ཡིན་པ་ཅིས་ཀྱང་ཚོར་ཡོང་གིན་འདུག་སྟེ་ཅི་བྱ།

དེ་རིང་གི་ངའི་བསམ་ཚུལ་དེའི་རྒྱབ་ལྗོངས་ལ་ཡར་དེད་ན་ཡང་། ཁར་ཉིན་ཡང་དྲ་ཐོག་ནས་ཞུས་པ་ལྟར། སྤྱིར་དང་ཐོག་སྤྱི་འཐུས་དང་ཁྲིམས་ཞིབ་ཁང་གཉིས་ཀྱི་སུ་ལ་ལན་པ་མང་བ་ཡོད། སུས་འགྲིགས་ཡོད་མེད་རང་ངོས་ནས་ཡག་པོ་ཞིག་མི་ཤེས། མི་ཤེས་པ་ལ་མི་ཤེས་པར་ལབ་རྒྱུ་དེ་བཟང་སྤྱོད་ཀྱི་འགན་འཁྲི་ཞིག་རེད།

གང་ལྟར། མཐར་སྤྱི་འཐུས་ལྷན་ཚོགས་ཀྱི་གྲུབ་ཆ་མང་ཤོས་ཀྱིས་གསང་བའི་འོས་ཤོག་འཕངས་པའི་ཐག་གཅོད་དེ་སྤྱི་འཐུས་ལྷན་ཚོགས་ཀྱི་ཐག་གཅོད་དུ་བརྩི་གིན་ཡོད། དེ་ནི་ཆོལ་ཁ་དང་ཆོས་ལུགས་བྱེ་བྲག་པའི་སྤྱི་འཐུས་ཀྱི་དབང་ཤུགས་ཁྱབ་ཚད་ལས་བརྒལ་བའི་ཐག་གཅོད་ཅིག་རེད།

དེ་ནས་གྲོས་ཚོགས་ཀྱི་ཐག་གཅོད་ལྟར་ཁྲིམས་ཞིབ་པ་གསུམ་གྱིས་ཀྱང་ལས་གནས་འཕོ་འགྱུར་ལ་ངོས་ལེན་གནང་བ་རེད། དེ་ནས་ལེའུ་དེ་མཇུག་རྫོགས་པ་ལྟ་བུ་ཞིག་རེད། སྐབས་དེར་ངས་ཁྲིམས་ཞིབ་པ་གསུམ་གྱི་གནང་ཕྱོགས་དེའང་ཁ་ཞེ་གཉིས་མེད་དུ་ངོས་འཛིན་ཞུས་པ་ཡིན།

དེ་རྗེས་ཟམ་གདོང་རིན་པོ་ཆེ་ཕེབས་ནས་ཡང་བསྐྱར་མི་དགོས་ས་ནས་དོན་ལ་མི་གནས་པའི་ཁྲིམས་དོན་འགྲེལ་བཤད་ལོག་པ་ཅི་རིགས་ཤིག་གནང་བ་དེ་ད་ལྟའང་གཏན་ནས་ཁས་ལེན་ཐུབ་ཀྱི་མི་འདུག །བློ་ཕམ་ཡང་ཆེན་པོ་བྱུང་། ཁ་ནས་ཁས་ལེན་ཆོག་མོད། ངའི་རང་གི་དཔྱོད་ཤེས་ཀྱི་བློ་ཉག་མ་གཅིག་པོ་འདིས་ང་ལ་ཁས་ལེན་བྱེད་རོགས་གཏན་ནས་བྱེད་ཀྱི་མི་འདུག དེ་ལ་དགོངས་དག་ཞུ་ཡ་ལས་གང་ཡང་མེད། འོན་ཀྱང་། དེ་ལ་ཡང་ཆོལ་ཁ་སོགས་ཀྱི་གནད་དོན་གང་ཡང་མེད། མ་མཐའ་ཡང་ངའི་ངོས་ནས་མེད། ལར་ང་ཡང་རིན་པོ་ཆེ་ལ་གུས་ཞབས་ཆེན་པོ་ཞུ་མཁན་གྱི་གྲས་ཤིག་ཡིན་མོད། བཀའ་མོལ་བདེན་པ་མ་ཡིན་པ་གསུངས་ན་ཁས་ལེན་ཐུབ་ཀྱི་མི་འདུག །ཉི་མ་གཅིག་ལ་ང་ཁོང་གི་སྐུ་མདུན་ལ་ཐོན་ནས་གོ་སྐབས་ཤིག་རག་པ་ཡིན་ན་ཡང་། ངས་རང་གི་བསམ་ཚུལ་ཆ་ཚང་བཤད་ནས་རྩོད་གླེང་ཞུ་ས་རེད། གང་ལྟར་ཁོང་གི་བཀའ་མོལ་དེའི་རྐྱེན་གྱིས་སླར་ཡང་ཁྲིམས་ཞིབ་པ་ཟུར་བ་གསུམ་རང་འགུལ་གྱིས་ཁྲིམས་ཁང་ནང་དུ་འཛུལ་བ་རེད། འདི་ལ་ངས་ཁྲིམས་དང་སྒྲིག་གཞིའི་གཞི་འཛིན་ས་ཞིག་མེད་པར་མཐོང་གིན་ཡོད། མེད་བཞིན་འདི་འདྲ་བྱེད་པ་དེ་སྡུག་ས་ནས་བཤད་ན་བཙན་འཛུལ་ཞིག་རེད།
ཡིན་ན་ཡང་། ཡག་ས་ནས་བཤད་ན་ད་ལྟའི་གནས་བབ་འདིར་ཕྱོགས་མང་པོ་ཞིག་ནས་དེ་ལས་ལྷག་པའི་གདམ་ཀ་མེད་པའི་ཐོག་ནས་ཁྲིམས་དང་སྒྲིག་གཞི་བཏང་སྙོམས་སུ་བཞག་པའི་ཐག་གཅོད་གནང་སྟངས་གཞན་པ་ཞིག་ཡིན་རྒྱུ་རེད། དེ་ཡང་ཡིན་རྒྱུ་གྱིས། རྩོད་པ་རྒྱག་འདོད་མེད། ཚང་མ་ལ་འགྲིགས་ན་ང་ལ་མི་འགྲིགས་པ་གང་ཡང་མེད།

ད་ནི་སྤྱི་འཐུས་དམ་འབུལ་གྱི་སྐོར་རེད། དེ་ལ་ད་ནང་ཚོགས་དྲུང་གི་ཡི་གེ་དེ་མཐོང་སྐབས་འདིའི་ཐད་གདམ་ང་གཉིས་ཤིག་ཡོད་པ་མཐོང་བྱུང་། དེའི་ནང་ནས་༧གོང་ས་མཆོག་དང་བཅའ་ཁྲིམས་རིན་པོ་ཆེའི་མདུན་ནས་དམ་བཅའ་ལེན་རྒྱུ་དེ་ཅིག་བྱས་ན་བཅའ་ཁྲིམས་ཀྱི་དངོས་བསྟན་ཡིན་གྱི་མ་རེད། ཡག་པོ་ཞིག་ཧ་མི་གོ །འོན་ཀྱང་གང་ལྟར་སྤྱི་འཐུས་དམ་འབུལ་ནི་ཧ་ཅང་ཁ་ཚ་དགོས་གཏུགས་སུ་གྱུར་འདུག །དམ་འབུལ་ལམ་དུ་སོང་ན་སྤྱི་འཐུས་འཚོགས་ཐུབ། བཀའ་བློན་བསྐོ་ཐུབ། སྒྲིག་འཛུགས་ཀྱི་ལས་དོོན་འགྲོ་ཐུབ་པ་སོགས་ཡོང་གི་རེད་ལ། ཁྱད་པར་དུ་སྐུ་པར་མཐོང་གྲོལ་རིན་པོ་ཆེ་དང་བཅའ་ཁྲིམས་ཀྱི་མདུན་ནས་དམ་འབུལ་ཞུ་བའི་གདམ་ང་འདི་ནི་ཁྲིམས་སྒྲིག་ཁ་གསལ་མེད་པ། བསམ་ཚུལ་གཅིག་མཐུན་མེད་པ་སོགས་ཀྱི་གནས་བབ་འོག །དམ་བཅའ་ལེན་ཡུལ་གྱི་གདམ་ང་ཡག་ཤོས་དེ་རེད་སྙམ་པའི་བསམ་བློ་འཁོར་བྱུང་།

འདིས་སྤྱི་འཐུས་སོ་སོའི་མ་འོངས་པར་སོ་སོའི་ཁྱབ་ཁོངས་སུ་ཕྱག་ལས་གནང་སྐབས་འགོག་རྐྱེན་དང་སུན་ཙེར་ཉུང་གི་རེད་སྙམ་པ་ཞིག་བྱུང་། སྐད་ཆ་ཁ་ཐུག་བཤད་ན། ཁྲིམས་མཐུན་ཡིན་མིན་ལ་རྩོད་པ་ཡོད་པའི་ཁྲིམས་དཔོན་དང་། ཡང་ན་དེ་དང་འབྲེལ་བའི་ཐོག་ནས་དམ་བཅའ་བླངས་པ་ལ་མི་ཚོས་ངོ་རྒོལ་བྱེད་བསླ་བ་དང་། སྐབས་འཚོལ་བ་ཚོར་ཡང་གོ་སྐབས་མང་བ་ཡོང་གིན་ཡོད་པ་རེད།

གལ་ཏེ་༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་དང་བཅའ་ཁྲིམས་རིན་པོ་ཆེ་ལས་དམ་བཅའ་བླངས་ན་གཞན་པ་ཚོས་རྙོག་དྲ་བཤད་བསམ་ན་ཡང་མ་མཐའ་ཡང་ཁ་ལ་ཐོན་བདེ་མོ་ཞིག་ཡོད་རྒྱུ་མ་རེད། ཁྲིམས་དང་སྒྲིག་གཞི་སོགས་ཀྱི་བསམ་བློ་མགོ་རྙོག་ཚ་པོ་མང་པོ་མེད་པའི་མི་མང་དཀྱུས་མ་ཚོས་ཉན་ན་ཡང་ཉན་བདེ་བ་དང་། རང་བཞིན་གྱིས་ཡིད་ལ་འཕྲོད་པ་ཞིག་ཡོང་གིན་ཡོད་པ་རེད། དོན་ལ་ཡང་དེ་ལས་གཉན་པའི་ཡུལ་ཞིག་ང་ཚོ་ལ་མེད་པ་རེད། ཡང་ངེས་པར་འདི་ལྟར་དགོས་ཟེར་མཁན་གྱི་སྤྱི་འཐུས་དེ་དག་གི་ཀུན་སློང་དེ་གང་འདྲ་ཡིན། ཆབ་སྲིད་ཀྱི་རྩེད་མོ་བརྩེད་སྟངས་ཤིག་ཡིན་མིན་སོགས་འདྲ་མིན་སྣ་ཚོགས་ཡོད་རྒྱུ་རེད།

ཡིན་ན་ཡང་། ང་རང་གི་ངོས་ནས་གདམ་ཀ་འདི་ད་ཡོད་ཀྱི་གདམ་ཀ་གཉིས་ལས་ཡག་ཤོས་དེར་མཐོང་བ་དེ་གཙོ་བོ་སྤྱི་འཐུས་སོ་སོའི་མ་འོངས་པར་མང་ཚོགས་ལ་ཞལ་ཕྱོགས་ནས་ཕྱག་ལས་གནང་སྐབས་ཀྱི་ལམ་བུ་ཞིག་ལ་བསམ་བློ་མང་བ་བཏང་ནས་ལབ་པ་ཡིན། དེ་ཡང་། སྤྱི་ཚོགས་འདིའི་ནང་གི་སྤྱི་འཐུས་ཚོ་མ་འོངས་པར་ལས་དོན་བྱེད་སྐབས་ས་གནས་ཤིག་ལ་ཚོགས་འདུ་ཞིག་འཚོགས་ན་ཡང་གཅིག་མར་བསྡད་ན་གཅིག་ཡར་ལངས་ནས་ཕྱི་ཁ་རུ་མེད་ས་ལ་ནང་སྣ་རུ་བྱེད་སྡོད་པ་འདི་ལས་མཐོང་མི་བདེ་བ་དང་བློ་ཕམ་པ་ཞིག་མེད་པས། མདོར་ངས་ནི་གཙོ་བོ་སྤྱི་འཐུས་སོ་སོ་ལ་བསམ་པའི་ཁུལ་ཡིན་ལ།  འདི་ཡང་རྒྱང་ཐག་ཅུང་ཟད་རིང་པོར་བསམ་བློ་བཏང་བའི་ཁུལ་ཡིན།

ཟུར་པ་ཚོས་ག་རེ་གནང་ན་གནང་། ལས་ཐོག་པ་ཚོ་ནི་དོན་གྱིས་འབྱུང་འགྱུར་ལོ་ལྔའི་ནང་དང་ཡང་ན་དེ་ལས་མང་བའི་དུས་ཡུན་ནང་བོད་གཞུང་དམངས་གཉིས་ཀྱི་ལེགས་ན་ཐར་པའི་གྲུ་གཟིངས་དང་ཉེས་ན་འཁོར་བའི་གཏིང་རྡོ་རེ་འགྱུར་གྱི་ཡོད་པ་ཡིན་པས་ཁོང་རྣམ་པ་ཚང་མས་བསམ་བློ་ཞིབ་ཙམ་གཏོང་དགོས་པ་གནད་འགག་ཅིག་རེད།

དེ་མིན་ངའི་ངོས་ནས་ད་ལྟའི་དབུ་སྲིད་སྐྱོང་ནས་སྤྱི་འཐུས་ཚང་མ་མང་གཙོའི་འགྲོ་ལུགས་ཚད་ལྡན་བརྒྱུད་ནས་མང་མོས་འདེམས་ཐོན་བྱུང་བ་རྐྱང་རྐྱང་ཡིན་པར་ངོས་འཛིན་དངོས་གནས་ཞུ་གིན་ཡོད། དེའི་ཆ་ནས་སྔར་རང་གི་རྒྱབ་སྐྱོར་ཞུ་ཡུལ་དེ་ཡིན་མིན་ལ་མ་ལྟོས་པར་གུས་ཞབས་དང་རྒྱབ་སྐྱོར་ཆ་ཚང་ཡོད་ལ། ལས་ཡུན་རིང་ཕྱག་ལས་དེ་དག་ཡག་པོ་ཡོང་ན་སྙམ་པའི་བསམ་བློ་ཡོད། ལར་སོ་སོའི་སྣང་བ་མི་འགྲོ་བའི་བཀའ་སྤྱི་སུ་ཞིག་གི་ལས་ཁུར་རིང་ལས་དོན་ཚ་མ་ལྡོག་ཕྱོགས་ནས་ལྟ་བ་དང་། དེ་ཡག་པོ་མ་བྱུང་བའི་སྣང་བརྙན་ཞིག་ལ་རེ་བ་རྒྱག་པ་འདི་ང་ཚའི་སྤྱི་ཚོགས་ན་མེད་པ་མིན་ན་ཡང་། ང་སྒེར་ངོས་ནས་དེ་ནི་ཆུ་ལ་ངན་བྱས། སློག་རུལ་ཆུས་སྦངས་ཞེས་པ་ལྟར། མཐར་བོད་ཀྱི་རྩ་དོན་དང་སྒྲིག་འཛུགས་ཀྱི་ལོ་རྒྱུས་དང་མདུན་ལྗོངས་ལ་གནོད་པ་ལས་གཞན་གང་ཟག་སྒེར་ལ་ཁྱད་པར་ཆེན་པོ་འགྲོ་གིན་མེད་པས། ང་ཚོས་བསམ་བློ་གཏོང་ས་དེ་ཁོང་ཚོའི་མ་འོངས་པ་དེ་ཡག་པོ་ཞིག་བྱུང་ན་སྙམ་པ་དང་། མ་མཐའ་ཡང་གནོད་མི་སྐྱེལ་བའི་བསམ་བློ་ཞིག་ཡོད་དགོས་སྙམ།

ཨ་ཅང་ཅང་། དེ་ལས་གདམ་ང་ཡག་པ་ཡོད་ན་ནི་ཅིས་ཀྱང་དེ་གནང་དགོས། ད་ལྟའི་གནས་བབ་དངོས་ཀྱི་ཆ་ནས་ངས་མཐོང་བའི་གདམ་ང་ནི་ཞོགས་པ་ལབ་ཡ་དེ་རེད། དེ་ལ་རྣམ་པ་ཚོས་དཔྱད་བརྗོད་གང་གནང་དང་། ལྟ་ཚུལ་གང་བཟུང་ལ་ང་ལ་ནི་ཁྱད་པར་དེ་ཙམ་མེད། གུས་བཀུར་ཡོད་པའི་ཐོག་ནས་བསམ་ཚུལ་མི་མཐུན་པ་དག་གསུངས་པ་ནི་ཕན་ཐོགས་ཡོད་པ་ཞིག་ཡིན། དབུགས་ཐོག་གཅིག་ལ་ཤར་མར་བཏགས། རྫོགས་སོ། །

མཆན། གོང་གི་བསམ་ཚུལ་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།