རྒྱ་གར་ནང་དངུལ་འབོར་ཆེན་གཡོ་ལེན་བྱེད་པའི་རྒྱའི་དྲ་ལམ་ཁེ་གཉེར་ཁང་ཡིན་ཟེར་བའི་དོན་རྐྱེན་དང་འབྲེལ་ནས་བོད་པའི་བུད་མེད་གཅིག་དང་རྒྱ་གར་བ་བརྒྱད་བཅས་འཛིན་བཟུང་བྱས་ཡོད་འདུག
རྒྱ་གར་ཧིན་རྡུན་སི་ཐན་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རྒྱ་གར་གྱི་རྒྱལ་ས་ལྡི་ལི་ཉེན་རྟོག་ལས་ཁུངས་ཀྱིས། འདས་པའི་ཟླ་གཉིས་རིང་རྒྱ་གར་རྒྱལ་ས་ལྡི་ལི་གཙོས་པའི་རྒྱ་གར་གྱི་མངའ་སྡེ་ཁག་ཅིག་གི་ནང་དྲ་ལམ་བརྒྱུད་རྒྱ་གར་མི་མང་ས་ཡ་ཕྱེད་ཀ་ཙམ་ལ་མགོ་སྐོར་བསླུ་བྲིད་ཀྱིས། ཧིན་སྒོར་ཀ་རོ་ ༡༥༠ ལྷག་གཡོ་ལེན་བྱས་པའི་དོན་རྐྱེན་ཞིག་རྩད་གཅོད་བྱུང་སྟེ། ཁྱོན་མི་ ༡༡ འཛིན་བཟུང་བྱས་ཡོད་པའི་ཁྲོད་བོད་པའི་བུ་མོ་དབང་ཆེ་ག་གེ་མོ་ཟེར་བ་ཞིག་ཀྱང་ཚུད་ཡོད་སྐོར་བསྒྲགས་འདུག་ལ། དྲ་ཐོག་ནས་དངུལ་གཡོ་ལེན་བྱེད་པའི་ལྐོག་ཇུས་དེའི་རྒྱབ་ཀྱི་མི་སྣ་གཙོ་བོ་ནི་རྒྱ་རིགས་ཡིན་པ་རེད།
དེ་འབྲེལ་ཐད་ལྡི་ལིའི་ཉེན་རྟོག་པས། ཟླ་འདིའི་ཕྱི་ཚེས་ ༢ ནས་བཟུང་ང་ཚོས་ནུབ་བྷང་གྷལ་དང་ལྡི་ལི། བྷང་ལོར་དང་ཨོ་ཌི་ཤ། ཨ་སམ་དང་སཱོ་རེ་ཊི་སོགས་སུ་རྟེན་གཞི་བྱས་པའི་དྲ་ལམ་བསླུ་བྲིད་པའི་ལས་ཁུངས་ལ་རྩད་ཞིབ་ཀྱིས། བོད་པའི་བུད་མེད་གཅིག་དང་རྩིས་ཞིབ་ཆེད་མཁས་རྒྱ་གར་བ་གཉིས་བཅས་ཁྱོན་མི་གྲངས་ ༡༡ འཛིན་བཟུང་ཡོད་ལ། རྩད་ཞིབ་བཅད་པ་བརྒྱུད་དྲ་ལམ་བསླུ་བྲིད་འདིའི་རྒྱབ་ཀྱི་ཉེས་ཅན་པ་གཙོ་བོ་རྒྱ་རིགས་ཡིན་པ་དང་ཁོ་ཚོ་ཁག་ཅིག་གི་མིང་ཐོ་འགོད་ཟིན་ཡོད། ཅེས་བརྗོད་ཡོད་པ་དང་། ད་ལྟའི་ཆར་དངུལ་གཡོ་ལེན་གྱི་དྲ་ལམ་རྩ་འཛུགས་བྱེད་མཁན་རྒྱ་རིགས་དེ་ཚོ་རྒྱ་ནག་རང་ལ་སྡོད་ཀྱི་ཡོད་པར་བརྟེན། རྒྱ་གར་གཞུང་ངོས་ནས་ཁོ་ཚོའི་ལས་ཁུངས་རྩ་མེད་གཏོང་བ་ཙམ་ལས་རྒྱ་རིགས་ཚོ་འཛིན་བཟུང་བྱེད་ཐུབ་ཀྱི་མེད་པ་རེད།
གནས་ཚུལ་ནང་། རྒྱ་རིགས་ཀྱི་ལག་འོག་ཏུ་ལས་ཀ་སྒྲུབ་མཁན་ཚོས་(Power Bank) ཞེས་པའི་མཉེན་ཆས་ཤིག་དང་(EZPlan)ཞེས་པའི་དྲ་ཚིགས་ཤིག་བརྒྱུད། མི་མང་ལ་དངུལ་གྱི་མ་འཛུགས་བྱེད་དུ་བཅུག་སྟེ་ཉིན་གྲངས་ ༢༤ ནས་ ༣༥ ནང་དུ། ཁོ་ཚོའི་མ་དངུལ་ལྡབ་འགྱུར་འཕར་གྱི་ཡོད་པ་དང་། རིམ་པའི་མ་དངུལ་འཛུགས་མཁན་ཇེ་མང་དུ་ཕྱིན་པ་དང་བསྟུན་མ་དངུལ་འབོར་ཆེན་འཛུགས་མཁན་གྱི་དྲ་རྒྱའི་ཐོ་འགོད་རྩིས་མེད་དམ་ནག་གསུབ་ཀྱིས། དངུལ་གཡོ་ལེན་བྱེད་ཀྱི་ཡོད་འདུག་ལ། རྩད་ཞིབ་བྱས་པ་བརྒྱུད། མཉེན་ཆས་དེ་རྒྱ་གར་ལྷོ་ཕྱོགས་བྷང་ལོར་གྲོང་ཁྱེར་རུ་རྟེན་གཞི་བྱས་པའི་འཕྲུལ་རིགས་ཁེ་གཉེར་ཁང་གསར་པ་ཞིག་ཡིན་ཁུལ་བྱེད་ཀྱི་ཡོད་མོད། དོན་དངོས་ཐོག་མཉེན་ཆས་ཀྱི་དྲ་གནས་གཙོ་བོ་རྒྱ་ནག་ཏུ་ཡོད་པ་དང་། མཉེན་ཆས་དེས་ཁ་པར་གྱི་པར་ཆས་དང་འབྲེལ་གཏུགས། དེ་བཞིན་ནང་མཛོད་སོགས་མི་སྒེར་གྱི་གནས་ཚུལ་ཆ་ཚང་ལྟ་ཀློག་ཐུབ་ཀྱི་ཡོད་པས་ཧ་ཅང་ཉེན་ཁ་ཆེ་བའི་དྲ་ལམ་བསླུ་བྲིད་ཀྱི་བྱ་སྤྱོད་ཅིག་ཡིན་སྐོར་སོགས་བརྗོད་འདུག
ཡང་རྒྱ་གར་གཞུང་གིས་དངུལ་འབོར་ཆེན་གཡོ་ལེན་གྱི་ནག་ཉེས་བྱ་འགུལ་དེའི་མཚང་འབྲིད་ཐབས་སུ། འབྲེལ་ཡོད་རྒྱ་གར་ཉེན་རྟོག་པ་ཞིག་ནས་མ་དངུལ་བཙུགས་ཏེ་ཆ་ཤས་བླངས་ཤིང་། ཁོ་ཚོས་དངུལ་གཏོང་ལེན་གྱི་འབྲེལ་ཐག་དང་དངུལ་བྱང་སོགས་ལ་རྗེས་འདེད་ཀྱིས། ཚོགས་པ་དེར་རྒྱ་གར་རྒྱལ་ཡོངས་སུ་དྲ་ཐོག་ཁེ་གཉེར་ཁང་ ༢༥ ཡོད་པ་དང་། དངུལ་བྱང་ ༢༩། ཁ་པར་༣༠ བཅས་རྩད་ཞིབ་ཐུབ་ཡོད་པ་མ་ཟད། རྒྱའི་ལག་འོག་ཏུ་ལས་ཀ་གཉེར་མཁན་རྒྱ་གར་བ་རོ་བྷིན་ (Robin) ཟེར་བ་གཙོས་པའི་བསླུ་བྲིད་པ་ཚོས་སྐད་འཕྲིན་དང་ཏར་འཕྲིན། རྒྱ་ནག་གི་(Dingtalk)མཉེན་ཆས་སོགས་བརྒྱུད་རྒྱ་ནག་ཏུ་ཡོད་པའི་ཁོ་ཚོའི་སྦྱིན་བདག་ལ་འབྲེལ་འདྲིས་དང་གསང་བའི་ཐོག་ནས་གཡོ་ལེན་བྱས་པའི་དངུལ་རྒྱ་ནག་ལ་གཏོང་གི་ཡོད་པ་ཤེས་རྟོགས་ཐུབ་ཡོད་པ་རེད།
སྤྱིར་རྒྱ་གར་ནང་རྒྱ་རིགས་ཚོས་ནག་ཚོང་བརྒྱབ་པའི་དོན་རྐྱེན་དང་འབྲེལ་ནས་རྒྱ་གར་བ་གཙོས་པའི་བོད་མི་མི་ཉུང་བ་ཞིག་འཛིན་བཟུང་བྱས་ཡོད་པ་དང་། ཕྱི་ལོ་ ༢༠༡༩ ཡས་མས་ནས་རྒྱ་དཀར་ནག་གཉིས་བར་ས་མཚམས་རྩོད་རྙོག་གཙོས་པའི་ཚོང་འབྲེལ་སོགས་ཀྱི་འཁྲུག་རྩོད་བྱུང་རྗེས། རྒྱ་གར་གཞུང་གིས་རྒྱ་གར་རུ་གནས་སྡོད་བྱེད་པའི་རྒྱ་རིགས་ཚོའི་ལས་དོན་ཐོག་དོ་སྣང་སྔར་ལྷག་བྱས་ཏེ། རྒྱའི་གསང་ཉུལ་བ་ལའོ་སང་གཙོས་པའི་ནག་ཚོང་དང་འབྲེལ་བའི་རིགས་ཁག་ཅིག་ཀྱང་འཛིན་བཟུང་བྱས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
ཐོག་མར་དུས་བབ་མགོ་ལས་ཡོངས་ལ་མཚམས་འདྲི་ཡོད།
ས་མཚམས་དེ་ཡག་པོ་བྲིས་མི་འདུག།