༧གོང་ས་མཆོག་སོགས་ཆོས་ལུགས་ཀྱི་དབུ་ཁྲིད་ཁག་ཅིག་ནས་སྟོབས་འབྱོར་ཞན་པའི་རྒྱལ་ཁབ་ནང་འགོག་ཁབ་བརྒྱ་ཆའི་ ༡ དང་སྟོབས་ལྡན་རྒྱལ་ཁབ་ནང་འགོག་ཁབ་ཀྱི་བརྒྱ་ཆའི་ ༨༣ བརྒྱབས་ཟིན་པའི་ཧེ་བག་དེ་སེལ་ཐབས་གནང་དགོས་པའི་གསུང་འཕྲིན་སྩལ།
དེ་རིང་ཕྱི་ཚེས་ ༡༡ ནས་ཉིན་གསུམ་རིང་དབྱིན་ཡུལ་གྱི་ཀར་བྷིས་མཚོ་ཁུལ་ (Carbis Bay) དུ། འཛམ་གླིང་གི་སྟོབས་ཆེན་རྒྱལ་ཁབ་བདུན་གྱི་ཚོགས་འདུ་འཚོག་གི་ཡོད་པ་དང་། ཟླ་འདིའི་ཕྱི་ཚེས་ ༩ ཉིན་༧གོང་ས་རྒྱལ་བ་རིན་པོ་ཆེ་སོགས་འཛམ་གླིང་གི་ཆོས་ལུགས་ཀྱི་དབུ་ཁྲིད་ཁག་ཅིག་ནས་འཛམ་གླིང་གི་སྟོབས་འབྱོར་ཞན་པའི་རྒྱལ་ཁབ་ཁག་གི་ནང་ཏོག་དབྱིབས་གཉན་རིམས་ཀྱི་འགོག་ཁབ་སླེབ་ཐབས་བྱེད་དགོས་པ་དང་། ཏོག་དབྱིབས་གཉན་སྲིན་གྱི་རྣམ་པ་གཞན་ལ་འགྱུར་བར་སྔོན་འགོག་བྱེད་དགོས་སྐོར་གྱི་ཡོངས་ཁྱབ་གསུང་འཕྲིན་ཞིག་དབྱིན་ཡུལ་གྱི་སྲིད་བློན་བྷོ་རི་སི་ཇོན་སན་ (Boris Johnson) མཆོག་དང་སྟོབས་ཆེན་རྒྱལ་ཁབ་བདུན་གྱི་དབུ་ཁྲིད་ཀྱི་མཚན་ཐོག་ལ་གནང་ཡོད་འདུག
ཡོངས་ཁྱབ་གསུང་འཕྲིན་དེའི་ནང་། ད་བར་འཛམ་གླིང་ཁྱོན་ཡོངས་སུ་འགོག་ཁབ་ས་ཡ་ ༩༠༠ ཙམ་བརྒྱབས་ཡོད་པའི་ཁྲོད་སྟོབས་འབྱོར་ཞན་པའི་རྒྱལ་ཁབ་ཀྱི་ནང་འགོག་ཁབ་བརྒྱ་ཆའི་ ༡ དང་སྟོབས་འབྱོར་ཅན་གྱི་རྒྱལ་ཁབ་ནང་འགོག་ཁབ་ཀྱི་བརྒྱ་ཆའི་ ༨༣ བརྒྱབས་ཟིན་ཡོད་པས། འཛམ་གླིང་གི་སྟོབས་འབྱོར་ཞན་པ་དང་སྟོབས་འབྱོར་ཅན་གཉིས་ཀྱི་འགོག་ཁབ་བརྒྱབས་ཡོད་མེད་ཀྱི་བར་སྟོང་ཉིན་རེར་ཆེ་རུ་འགྲོ་བཞིན་ཡོད་སྐོར་དང་། བར་སྟོང་དེ་ཆུང་དུ་གཏོང་རྒྱུ་དཔལ་འབྱོར་ལ་རག་ལུས་ཡོད་པ་དང་། སྟོབས་ཆེན་རྒྱལ་ཁབ་བདུན་གྱིས་ནུས་ཤུགས་བཏོན་ཏེ་འགོག་ཁབ་མང་དུ་རྒྱག་ཐབས་དགོས་པ་མ་ཟད། འགོག་ཁབ་བཟོ་བསྐྲུན་གྱི་བདག་དབང་གཞན་ལ་སྤྲོད་པ་དང་བཟོ་བསྐྲུན་ཀྱི་ལག་ཤེས་དང་ཐོན་ཁུངས་མཉམ་སྤྱོད་བྱས་ཏེ་འགོག་ཁབ་ཀྱི་རིན་གོང་ཆུང་དུ་གཏོང་དགོས་སྐོར་གསུངས་འདུག
ཡང་ཡོངས་ཁྱབ་གསུང་འཕྲིན་དེའི་ནང་། འཛམ་གླིང་གི་ཆབ་སྲིད་ཀྱི་མགོ་ཁྲིད་ཚང་མས་རྒྱལ་ཁབ་སོ་སོའི་མི་མང་ལ་འགོག་ཁབ་རྒྱག་འདུན་བྱེད་ཀྱི་ཡོད་ནའང་། གོ་ལ་རང་བཞིན་གྱི་གཉན་རིམས་ཤིག་ལ་གདོང་ལེན་བྱེད་སྐབས་ང་ཚོ་ནི་འགྲོ་བ་མིའི་རིགས་ཀྱི་སྤྱི་ཚོགས་གཅིག་ཡིན་པའི་ངེས་ཤེས་རྙེད་དགོས་པ་མ་ཟད། མི་སྒེར་རེ་རེའི་བདེ་འཇགས་ནི་གོ་ལ་ཧྲིལ་བོའི་འགོག་ཁབ་ཇི་ཙམ་ལེགས་འགྲུབ་བྱུང་བར་འབྲེལ་བ་དམ་ཟབ་ཡོད་པས། འགོག་ཁབ་བཟོ་བསྐྲུན་གྱི་ནུས་ཤུགས་ཆེ་རུ་བཏང་བའི་ཐོག་ནས་ཏོག་དབྱིབས་གཉན་རིམས་ཀྱི་ཉེན་ཁའི་དུས་ཡུན་ཐུང་དུ་བཏང་སྟེ། ཏོག་དབྱིབས་གཉན་སྲིན་གྱི་རང་བཞིན་ཉེན་ཁ་ཆེ་བའི་གཉན་སྲིན་གཞན་ཞིག་ཏུ་མི་འགྱུར་བའི་ཐད་སྔོན་འགོག་དང་འབད་བརྩོན་བྱེད་དགོས་སྐོར་དང་། སྟོབས་འབྱོར་ཞན་པའི་རྒྱལ་ཁབ་ཀྱི་མི་མང་ལ་འགོག་ཁབ་གང་ཐུབ་བརྒྱབ་རྒྱུ་ནི་བཟང་སྤྱོད་ཡིན་པ་ཙམ་དུ་མ་ཟད། གཉན་རིམས་ལ་གདོང་ལེན་བྱེད་པའི་བྱེད་ཐབས་གལ་ཆེན་ཞིག་ཡིན་པ་དང་། འགྲོ་བ་མིའི་སྒེར་གྱི་འཚོ་གནས་ནི་རང་ཉིད་ཀྱི་ཁྱིམ་མཚེས་ལ་འབྲེལ་བ་དམ་ཟབ་ཡོད་པས་ཏོག་དབྱིབས་གཉན་རིམས་ལ་གདོང་ལེན་བྱེད་པར་གང་མགྱོགས་གནད་ལ་འཁེལ་བའི་ལས་དོན་སྒྲུབ་དགོས་སྐོར་བཀོད་འདུག
རྒྱལ་ཚོགས་ཀྱི་འཕྲོད་བསྟེན་སྒྲིག་འཛུགས་ངོས་ནས་འཛམ་གླིང་གི་ཚོགས་སྡེ་ཁག་ལ་མཉམ་འབྲེལ་བྱས་ཏེ་འཛམ་གླིང་གང་སར་གཉན་རིམས་ལ་གདོང་ལེན་བྱེད་པའི་མཉམ་འབྲེལ་ ( Access to Covid-19 Tools Accelerator) ཞིག་བཙུགས་ཡོད་པ་དང་། མཉམ་འབྲེལ་དེས་འདས་པའི་ལོ་གཅིག་ལྷག་གི་རིང་འགོག་ཁབ་བགོ་འགྲེམས་དང་གཉན་རིམས་ཕོག་མཁན་ལ་བརྟག་དཔྱད། བཅོས་ཐབས་བྱེད་པར་རམ་འདེགས་ཤུགས་ཆེན་བྱེད་བཞིན་པར་འཛམ་གླིང་གི་ཆོགས་ལུགས་ཀྱི་དབུ་ཁྲིད་རྣམས་ནས་བསྔགས་བརྗོད་གནང་འདུག དེ་བཞིན་རྒྱལ་ཁབ་སོ་སོས་གཉན་རིམས་སྔོན་འགོག་བྱེད་བཞིན་ཡོད་ནའང་། རྒྱལ་ཁབ་མང་པོས་ནང་ད་ལྟའང་གཉན་རིམས་འགོས་ཁྱབ་རྒྱ་ཆེར་འགྲོ་བཞིན་ཡོད་སྟབས། སྲོག་རླུང་དང་སྨན་བཅོས་ཀྱི་མཁོ་ཆས་འདང་ངེས་མེད་པའི་དཀའ་ངལ་ཆེན་པོ་འཕྲད་དེ་འགྲོ་བ་མིའི་དཀའ་ཁག་མུ་མཐུད་གནས་བཞིན་ཡོད་སྐོར་དང་། ཉེ་ལམ་འཛམ་གླིང་འཕྲོད་བསྟེན་སྒྲིག་འཛུགས་ཀྱིས་འདི་ལོའི་གཉན་རིམས་ཁྲོད་བྱུང་བའི་རྐྱེན་འདས་ཀྱི་གྲངས་ཚད་ནི་སྔོན་ལོ་ལས་མང་བ་ཡོང་ངེས་ཡིན་པའི་ཉེན་བརྡ་བཏང་ཡོད་སྟབས། དེ་ལྟ་བུའི་འཛམ་གླིང་འཕྲོད་བསྟེན་སྒྲིག་འཛུགས་ཀྱི་མཉམ་འབྲེལ་ལ་སྟོབས་ཆེན་རྒྱལ་ཁབ་ཁག་གིས་རོགས་དངུལ་འཕར་མ་གནང་སྟེ་གཉན་རིམས་ལ་གདོང་ལེན་བྱེད་དགོས་སྐོར་བཀོད་འདུག
ཡོངས་ཁྱབ་གསུང་འཕྲིན་དེའི་ཐོག་༧གོང་ས་རྒྱལ་བ་རིན་པོ་ཆེ་མཆོག་དང་དབྱིན་ཡུལ་གྱི་ཡི་ཤུ་ཆོས་དཔོན་ཟུར་པ་རོའུ་ཝན་ཝེ་ལིམ་ (Rowan Williams) མཆོག ཊུར་ཀི་རྒྱལ་ཁབ་ཀྱི་ཡི་ཤུ་ཆོས་དཔོན་ (Emmanuel)མཆོག ཡི་ཤུ་ལྷ་ཁང་ ༡༤༨ ཙམ་གྱི་མཉམ་འབྲེལ་ཚོགས་པ་འཛམ་གླིང་ལོ་ཐི་རམ་མཉམ་འབྲེལ་ (Lutheran World Federation) ཡི་དྲུང་ཆེ་མུར་ཊིན་ཇན་ཇི་ (Martin Junge) དང་། ལྷོ་ཨ་ཧྥི་རི་ཀའི་རྒྱལ་སའི་ཡི་ཤུ་ལྷ་ཁང་གི་ཆོས་དཔོན་ཐ་བྷོ་མག་གྷོ་བྷ་ (Thabo Makgoba) སོགས་འཛམ་གླིང་གི་ཆོས་ལུགས་ཀྱི་དབུ་ཁྲིད་དང་ཚོགས་པ་བཅས་ལྔ་ཡིས་མཚན་རྟགས་བསྐྱོན་གནང་ཡོད་འདུག
སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་ཐོག་གོ་ལའི་གནམ་གཤིས་འགྱུར་ལྡོག་དང་། དཔལ་འབྱོར། ཏོག་དབྱིབས་གཉན་རིམས་དང་། ས་ཁམས་ཆབ་སྲིད་ཀྱི་གནད་དོན་སོགས་ཀྱི་ཐོག་གླེང་སློང་བྱ་རྒྱུ་ཡིན་འདུག་ལ། ཚོགས་པ་དེའི་ཁོངས་སུ་ཧྥ་རན་སི་དང་འཇར་མན། ཨ་རི། དབྱིན་ཇི། ཁེ་ན་ཌ། ཨེ་ཊ་ལེ། ཉི་ཧོང་བཅས་འཛམ་གླིང་གི་སྟོབས་ཆེན་རྒྱལ་ཁབ་བདུན་ཡོད་པ་དང་། ཚོགས་ཆེན་ཐོག་རྒྱ་གར་དང་ཨོ་གླིང་། ལྷོ་ཀོ་རི་ཡ། ལྷོ་ཨ་ཧྥི་རི་ཀ། ཡུ་རོབ་མཐུན་ཚོགས་བཅས་ཀྱི་དབུ་ཁྲིད་ཁག་གདན་ཞུ་བྱས་ཡོད་འདུག
གསར་འགོད་པ། ཀླུ་མགོན་ཐར།
