ཁ་སང་རྒྱ་ནག་གཞུང་གིས་ཐའེ་ཝན་གྱི་མཁའ་ལམ་དུ་དམག་དོན་གནམ་གྲུ་ ༢༨ སྡེབ་གཅིག་ཏུ་བཏང་སྟེ་འདས་པའི་ལོ་ངོ་ ༧༠ ལྷག་ནང་དཔུང་འཇུག་གི་དྲག་ཤུལ་ཤུགས་ཆེ་ཤོས་དེ་ངོམས་ཡོད་འདུག
དེ་རིང་རྒྱལ་སྤྱིིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ཉེ་ལམ་དབྱིན་ཡུལ་དུ་ཚོགས་པའི་སྟོབས་འབྱོར་ལྡན་པའི་རྒྱལ་ཁབ་ ༧ གྱི་ཚོགས་འདུའི་སྟེང་རྒྱ་ནག་གི་དམག་དོན་བྱ་འགུལ་ལ་སྐྱོན་བརྗོད་དང་སྦྲགས། ཐའེ་ཝན་མཚོ་འགག་ཁུལ་དུ་བརྟན་བརླིང་དགོས་གལ་ཆེ་བའི་སྐོར་ནས་ཡོངས་ཁྱབ་ཀྱི་བསྒྲགས་གཏམ་ཤིག་སྤེལ་བ་དང་བསྟུན། ཁ་སང་རྒྱ་ནག་གིས་ཐའེ་ཝན་གྱི་རྒྱལ་སྲུང་མཁའ་དབྱིངས་ཁུལ་དུ་དམག་དོན་གནམ་གྲུ་ ༢༨ འཕུར་སྐྱོད་བྱས་ཏེ་ཐའེ་ཝན་ལ་འཇིགས་སྐུལ་བྱས་ཡོད་འདུག
ཐའེ་ཝན་གྱི་རྒྱལ་སྲུང་ལྷན་ཁང་གིས་བསྒྲགས་པ་ལྟར་ན། ཁ་སང་རྒྱ་ནག་གིས་བཏང་བའི་གནམ་གྲུའི་ཁྲོད། J-16 རྟགས་ཅན་གྱི་འཐབ་འཁྲུག་གནམ་གྲུ་ ༡༤ དང་། J-11 རྟགས་ཅན་གྱི་འཐབ་འཁྲུག་གནམ་གྲུ་དྲུག ད་དུང་ H-6 རྟགས་ཅན་གྱི་རྡུལ་ཕྲན་མཚོན་ཆ་བཀོལ་སྤྱོད་ཐུབ་པའི་འབར་མདེལ་གཡུག་མཁན་གྱི་གནམ་གྲུ་བཞི་དང་། མཚོ་འོག་གྲུ་གཟིངས་ལ་འགོག་རྒོལ་གྱི་གནམ་གྲུ་བཅས་ཡོད་པ་དང་། རྒྱ་ནག་གིས་འཐབ་འཁྲུག་གནམ་གྲུ་དེ་དག་ཐའེ་ཝན་གྱི་རྒྱལ་སྲུང་མཁའ་དབྱིངས་ཁུལ་དུ་བཏང་བ་མ་ཟད། ཐའེ་ཝན་གྱི་སྟངས་འཛིན་འོག་ཡོད་པའི་ལྷོ་ཕྱོགས་ཀྱི་པ་ར་ཊ་སི་གླིང་ཕྲན་ (Pratas Islands) ཁུལ་དུའང་འཕུར་སྐྱོད་བྱས་ཡོད་འདུག
ཁ་སང་རྒྱ་ནག་གིས་དོན་རྐྱེན་དེ་དང་འབྲེལ་ནས་གསལ་བཤད་ལྟ་བུ་གང་ཡང་བྱས་མེད་ནའང་། དེ་རིང་གསར་འགོད་གསལ་བསྒྲགས་ཤིག་གི་སྟེང་རྒྱ་ནག་གི་ཐའེ་ཝན་ལས་དོན་ཁང་གི་མགྲིན་ཚབ་པ་མཱ་ཤའོ་ཀོང་(Ma Xiaoguang) ཟེར་བ་དེས། གལ་ཏེ་ཕྱིའི་རྒྱལ་ཁབ་ཀྱིས་ཐའེ་ཝན་རང་བཙན་ཡོང་ཐབས་དང་། ཐའེ་ཝན་གྱི་གནད་དོན་ལ་ཐེ་ཇུས་བྱེད་བཞིན་པར་དེར་རྒྱ་ནག་ངོས་ནས་གུ་ཡངས་གཏོང་ཐབས་རྩ་ནས་མེད་པ་དང་། རྒྱ་ནག་ངོས་ནས་ཐའེ་ཝན་དང་ཕྱིའི་རྒྱལ་ཁབ་དབར་གྱི་མཉམ་འབྲེལ་ལ་ངོས་ལེན་མེད་པའི་བརྡ་ལན་སྤྲོད་དགོས་ཀྱི་ཡོད་སྐོར་བརྗོད་འདུག
འདས་པའི་ལོ་ཤས་ནང་རྒྱ་ནག་གིས་ཐའེ་ཝན་གྱི་མངའ་ཁོངས་མཁའ་དབྱིངས་དང་མཚོ་རྒྱུད་ཁུལ་དུ་དམག་དོན་གྱི་གནམ་གྲུ་དང་འཐབ་འཁྲུག་གྲུ་གཟིངས་སོགས་བཏང་ཏེ་ཐའེ་ཝན་ལ་སྡིགས་ར་ལྟ་བུ་སྐུལ་ཤུགས་ཆེ་རུ་བཏང་ཡོད་ཅིང་། ཉེ་ཆར་འདི་ལོའི་ཕྱི་ཟླ་ ༤ ཚེས་ ༡༢ ཉིན་རྒྱ་ནག་གིས་ཐའེ་ཝན་གྱི་རྒྱལ་སྲུང་མཁའ་ལམ་ཁུལ་དུ་གནམ་གྲུ་ ༢༥ དང་། ཡང་འདི་ལོའི་ཕྱི་ཟླ་ ༡ ཚེས་ ༢༤ ཉིན་གནམ་གྲུ་ ༡༥ བཏང་ཡོད་པ་རེད། འོན་ཀྱང་ཁ་སང་གི་དོན་རྐྱེན་དེ་ནི་འདས་པའི་ལོ་ངོ་ ༧༠ ལྷག་ནང་རྒྱ་ནག་གིས་ཐའེ་ཝན་གྱི་མཁའ་ལམ་སྟེང་གནམ་གྲུ་མང་ཤོས་འཕུར་སྐྱོད་བྱས་པ་ཞིག་ཆགས་ཡོད་འདུག
ཉེ་སྔོན་བཞག་པའི་སྟོབས་འབྱོར་ཅན་པའི་རྒྱལ་ཁབ་ ༧ གྱི་གྲོས་ཆོད་ནང་། རྒྱ་ནག་ངོས་ནས་ཤར་ཊུར་ཀི་སི་ཐན་ཁུལ་དུ་འགྲོ་བ་མིའི་ཐོབ་ཐང་དང་གཞི་རྩའི་རང་དབང་ལ་བརྩི་སྲུང་དགོས་སྐོར་དང་། རྒྱ་གར་ཞི་བདེ་རྒྱ་མཚོ་ཁུལ་དེ་རང་དབང་དང་གུ་ཡངས་ཀྱི་གནས་སྟངས་སྒང་གནས་རྒྱུ་གལ་ཆེན་ཡིན་པ་བསྐྱར་ནན་ཞུ་ཡི་ཡོད་པ་དང་། དེ་བཞིན་ཐའེ་ཝན་མཚོ་འགག་ཁུལ་དེ་ཞི་བདེ་ལྷིང་འཇགས་ཐོག་གནས་རྒྱུ་དང་། ཕྱོགས་གཉིས་(རྒྱ་ནག་དང་ཐའེ་ཝན་)བར་གྱི་གནད་དོན་རྣམས་ཞི་བདེའི་སྒོ་ནས་འགྲིག་མཐུན་ཡོང་རྒྱུར་འབད་དགོས་པ། དེ་བཞིན་རྒྱལ་ཁབ་ ༧ ངོས་ནས་ཤར་བརྒྱུད་དང་ལྷོ་བརྒྱུད་རྒྱ་ནག་རྒྱ་མཚོའི་ཁུལ་གྱི་གནས་སྟངས་ལ་བློ་འཚབ་ཆེན་པོ་བྱེད་ཀྱི་ཡོད་པ་ལྟར། ཕྱོགས་ཚང་མའི་མོས་མཐུན་མེད་པར་ཕྱོགས་གཅིག་ཁོ་ནའི་ངོས་ནས་ད་ལྟའི་གནས་བབ་ལ་འགྱུར་ལྡོག་གཏོང་རྒྱུར་མཐའ་གཅིག་ཏུ་ངོ་རྒོལ་ཡོད་སྐོར་བཀོད་ཡོད་དུག
གནད་དོན་དབྱེ་ཞིབ་པས་ད་ཐེངས་ཀྱི་རྒྱ་ནག་གི་བྱེད་སྟངས་དེས་ཨ་རི་དང་ཐའེ་ཝན་གྱི་མཉམ་འབྲེལ་ལ་ངོ་རྒོལ་ཤུགས་ཆེར་བྱེད་ཀྱི་ཡོད་པ་དང་། རྒྱལ་ནང་ནས་རྒྱ་ནག་བཅིངས་གྲོལ་དམག་ལ་ཨ་རི་དང་ཐའེ་ཝན་གྱི་སྟོབས་ཤུགས་འགྲན་ཐུབ་པའི་སྟོབས་ཤུགས་ངོམ་གྱི་ཡོད་སྐོར་འགྲེལ་བརྗོད་བྱེད་ཀྱིན་འདུག་ལ། ལྷག་པར་དུ་ཉེ་ཆར་ཕྱི་ཚེས་ ༡༣ ཉིན་གྲུབ་པའི་འཛམ་གླིང་གོ་སྟོབས་འབྱོར་རྒྱལ་ཁབ་ ༧ གྱི་མཉམ་འབྲེལ་བསྒྲགས་གཏམ་ལ་མངོན་གསལ་དོད་པོའི་ཐོག་ནས་ངོས་ལེན་མེད་པའི་རྣམ་པ་བསྟན་པ་ཞིག་ཡིན་སྐོར་དང་། ཡང་དབྱེ་ཞིབ་པ་རེ་འགས་ཁ་སང་ཕྱི་ཚེས་ ༡༥ ཉིན་ཨ་རིའི་མཚོ་དམག་གིས། ཨ་རིའི་འཐབ་འཁྲུག་གནམ་གྲུ་དབོར་འདྲེན་གྲུ་ཆེན་ USS Ronald Reagan ཞེས་པ་དེ་ལྷོ་བརྒྱུད་རྒྱ་ནག་རྒྱ་མཚོ་ཁུལ་དུ་བཏང་ཡོད་པའི་གནས་ཚུལ་སྤེལ་བར་བརྟེན། རྒྱ་ནག་གིས་དེར་ཡ་ལན་གྱི་ཚུལ་དུ་བཏང་བ་ཞིག་ཡིན་སྲིད་པའི་ཚོད་དཔག་བྱེད་ཀྱིན་འདུག
གསར་འགོད་པ། པ་སངས་ཚེ་རིང་།
