རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་གྲུབ་འབྲས་ཀྱི་ཆ་རྐྱེན་བཏོན།

དེ་རིང་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ (CBSE) དང་རྒྱ་གར་གྱི་གཞུང་འབྲེལ་མ་ཡིན་པའི་སློབ་གྲྭའི་ཤེས་ཡོན་དོ་དམ་ལྷན་ཚོགས་(Council For the Indian School Certificate Examinations) གཉིས་ཀྱིས་འདི་ལོར་རྒྱ་གར་རྒྱལ་ཡོངས་ཀྱི་འཛིན་རིམ་ ༡༢ པའི་ཡིག་རྒྱུགས་གྲུབ་འབྲས་ཀྱི་ཆ་རྐྱེན་རྣམས་ཆེས་མཐོའི་ཁྲིམས་ཞིབ་ཁང་ལ་སྙན་འབུལ་ཞུས་ཡོད་འདུག

དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༢༠ ལོའི་ལོ་མགོ་ནས་བཟུང་རྒྱ་གར་ནང་རྒྱ་ནག་ཝུའུ་ཧན་ནས་མཆེད་པའི་ཏོག་དབྱིབས་གཉན་རིམས་འགོས་ཁྱབ་ཏུ་ཕྱིན་ཡོད་པར་བརྟེན། རྒྱ་གར་རྒྱལ་ཡོངས་ཀྱི་སློབ་གྲྭ་ཆ་ཚང་སྒོ་བརྒྱབ་སྟེ་ཡིག་རྒྱུགས་གཏོང་ཐུབ་མེད་ནའང་དམིགས་བསལ་གྱི་གནས་བབ་འོག་ནས་འཛིན་རིམ་འཕར་རྒྱུ་ཡིན་པའི་ཡོངས་ཁྱབ་གསལ་བསྒྲགས་བཏང་ཟིན་པ་ལྟར། འདི་ལོའི་ཕྱི་ཟླ་ ༧ ཚེས་ ༣༡ སྔོན་ལ་འཛིན་རིམ་བཅུ་གཉིས་པའི་ཡིག་རྒྱུགས་གྲུབ་འབྲས་གསལ་བསྒྲགས་གནང་འཆར་ཡོད་འདུག་ལ། འདི་ལོའི་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ནང་སློབ་ཕྲུག་འབུམ་ ༡༤ ལྷག་ནས་མཉམ་ཞུགས་ཐོ་འགོད་བྱས་ཡོད་འདུག

རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱི་འཐུས་མི་ ༡༣ ནས་འདས་པའི་བདུན་ཕྲག་གཉིང་རིང་འཆར་གཞི་འགོད་འབུལ་གནང་བའི་འཛིན་རིམ་ ༡༢ པའི་ཡིག་རྒྱུགས་ཀྱི་བརྒྱ་ཆ་སྤྲོད་སྟངས་དེ་བརྒྱ་ཆ་ ༣༠ འཛིན་རིམ་ ༡༠ པའི་སློབ་ཚན་ལྔ་ལས་བརྒྱ་ཆ་མཐོ་ཤོས་ཀྱི་སློབ་ཚན་གསུམ་དང་། བརྒྱ་ཆ་ ༣༠ འཛིན་རིམ་ ༡༡ པའི་ཡིག་རྒྱུགས་མཐའ་མའི་བརྒྱ་ཆ། དེ་མིན་གྱི་བརྒྱ་ཆ་ ༤༠ འཛིན་རིམ་ ༡༢ པའི་དཔོད་བྲིས་(Unit Test) དང་དུས་ཚིགས་ཡིག་རྒྱུགས་ (Internal Exams)། དེ་བཞིན་ཚོད་ལྟའི་ཡིག་རྒྱུགས་ (Pre-board) ཀྱི་གྲུབ་འབྲས་ལ་གཞི་འཛིན་རྒྱུ་དང་། དེ་བཞིན་ (Practicals) བརྒྱ་ཆ་ ༡༠༠ ནས་ཡིན་ཞིང་སློབ་གྲྭ་ནས་ཕུལ་བའི་བརྒྱ་ཆ་ལྟར་སྤྲོད་རྒྱུ་ཡིན་འདུག

ཆེས་མཐོའི་ཁྲིམས་ཞིབ་ཁང་གི་ཁྲིམས་རྩོད་པ་གཙོ་བོ་ (Kottayan Katankot Venugopal) ལགས་ཀྱིས། གལ་ཏེ་སློབ་ཕྲུག་ཚོར་ཡིག་རྒྱུགས་གྲུབ་འབྲས་ཀྱི་ཆ་རྐྱེན་དེ་དག་མ་ཚང་བ་ཡིན་ན། ལོ་གསུམ་རིང་སློབ་སྦྱོང་བྱས་ཏེ་བསྐྱར་དུ་ཡིག་རྒྱུགས་གཏང་བའམ་ (Compartment) སྡེ་ཚན་ནང་བཞག་རྒྱུ་ཡིན་པ་དང་། སློབ་ཕྲུག་སུ་རུང་ཞིག་ཡིག་རྒྱུགས་ཀྱི་བརྒྱ་ཆ་ལ་འདོད་བློ་མ་ཚིམས་པ་དེ་འདྲ་བྱུང་ཚེ། ཡིག་རྒྱུགས་དངོས་སུ་གཏོང་བའི་གནས་སྟངས་ཡོད་སྲིད་སྐོར་བརྗོད་འདུག

གཞན་ཡང་། བོད་ཁྱིམ་ཤེས་ཡོན་སྡེ་ཚན་གྱི་འགན་འཛིན་བསོད་ནམས་སྲི་ཆོས་ལགས་ནས་འགྲེལ་བརྗོད་གནང་བ་ལྟར་ན། འདི་ལོའི་ཕྱི་ཟླ་ ༧ ནང་འཛིན་རིམ་བཅུ་པའི་རྒྱལ་ཡོངས་ཡིག་རྒྱུགས་ཀྱི་གྲུབ་འབྲས་གསལ་བསྒྲགས་གནང་འཆར་ཡོད་པ་དང་། འདི་ལོའི་ཕྱི་ཟླ་ ༥ ཚེས་ ༡ ཉིན་འཛིན་རིམ་བཅུ་པའི་བརྒྱ་ཆ་སྤྲོད་སྟངས་དེ་ཁྱོན་བརྒྱ་ཆ་ ༡༠༠ ནས་བརྒྱ་ཆ་ ༡༠ དཔོད་བྲིས་དང་། བརྒྱ་ཆ་ ༣༠ ལོ་ཕྱེད་ཡིག་རྒྱུགས་། དེ་བཞིན་བརྒྱ་ཆ་ ༤༠ ཚོད་ལྟའི་ཡིག་རྒྱུགས་བཅས་ཁྱོན་བརྒྱ་ཆ་ ༨༠ དང་། བརྒྱ་ཆ་ ༢༠ དུས་ཚིགས་ཡིག་རྒྱུགས་ཀྱི་གྲུབ་འབྲས་ནས་སྤྲོད་རྒྱུ་ཡིན་འདུག

གསར་འགོད་པ། བསྟན་འཛིན་ཕུར་བུ།