བལ་ཡུལ་གྱི་རྫོང་ཞིག་ནང་ཆུ་ལོག་གནོད་སྐྱོན་ཆེན་པོ་བྱུང་།

ཉེ་ལམ་བལ་ཡུལ་གྱི་སིན་དྷུ་དཔལ་མཆོག་རྫོང་(Sindhupalchok) ཞེས་པའི་ནང་དྲག་ཆར་བསྟུད་མར་བབས་པར་བརྟེན། ཁུལ་དེའི་མེ་ལམ་ཆི་རྒྱུག་ཆུའི་ (Melamchi river) སྟོད་བརྒྱུད་དུ་ས་ཉིལ་གྱིས་རྒྱུག་ཆུ་འགག་པ་ཤོར་ཏེ་ཉུང་མཐར་མི་གྲངས་ ༢༠ གར་སོང་ཆ་མེད་དུ་གྱུར་ཡོད་པ་དང་། ཁྱིམ་ཚང་ ༢༠༠ ལྷག་ལ་ཆུ་ལོག་གིས་གནོད་སྐྱོན་ཆེན་པོ་ཐེབས་ཡོད་འདུག

སིན་དྷུ་དཔལ་མཆོག་རྫོང་གིས་ཁ་སང་བསྒྲགས་པའི་གནས་ཚུལ་ལྟར་ན། ཆུ་ལོག་གི་དོན་རྐྱེན་ཁྲོད་ཉུང་མཐར་མི་གྲངས་ ༢༠ གར་སོང་ཆ་མེད་དུ་གྱུར་ཡོད་པའི་ཁྲོད་རྒྱ་རིགས་གཉིས་དང་རྒྱ་གར་བ་གཅིག་བཅས་ཀྱི་བེམ་པོ་རྙེད་ཡོད་སྐོར་དང་། བལ་ཡུལ་གྱི་དམག་མི་དང་ཉེན་རྟོག་མི་སྣས་མི་གྲངས་ ༧༤ ཙམ་ཆུ་ལོག་གི་གནོད་སྐྱོན་ཁྲོད་ནས་བསྐྱབས་ཡོད་ནའང་། ད་ལྟ་གར་སོང་ཆ་མེད་དུ་གྱུར་བའི་གྲངས་ཐོ་ཇེ་མང་དུ་འགྲོ་བཞིན་ཡོད་སྟབས། རྐྱེན་འདས་སུ་ཕྱིན་པའི་མི་གྲངས་མུ་མཐུད་ཡར་འཕར་ངེས་ཡིན་སྐོར་བརྗོད་འདུག

ཆུ་ལོག་དེ་ལ་བརྟེན་ནས་རྒྱུག་ཆུ་དེའི་སྨད་བརྒྱུད་ཀྱི་ཁྱིམ་ཚང་ ༢༠༠ ལྷག་གནས་ཡུལ་མེད་པར་གྱུར་པ་དང་། ཁྱིམ་ཚང་ ༡༠༠༠ ལྷག་ཆུ་ལོག་གི་ཉེན་ཁར་གཡོལ་ཆེད་ས་གནས་གཞན་ལ་གནས་སྤོ་བྱེད་དགོས་བྱུང་ཡོད་པ་དང་།  ཟམ་པ་གྲངས་  ༤ དང་ཐག་ཟམ་ ༥ བེད་མེད་དུ་གྱུར། ཉ་གསོ་ཁང་ ༧ དང་ཁུལ་དེའི་འཐུང་ཆུའི་ལས་གྲྭ་བཅས་ཆུ་ལོག་གྱིས་འཁྱེར་ཡོད་པ་དང་། དེ་བཞིན་ཁུལ་དེའི་གློག་ཁང་ལ་ཆག་སྐྱོན་བྱུང་ཡོད་སྟབས། གནས་སྐབས་ས་གནས་ལ་གློག་མེད་པར་གྱུར་ཡོད་འདུག

ཧི་མ་ལ་ཡའི་དུས་བབ་གསར་ཁང་གི་གནས་ཚུལ་ལྟར་ན། ཆུ་ལོག་དེའི་འབྱུང་རྐྱེན་ནི་ཟླ་འདིའི་ཕྱི་ཚེས་ ༡༥ ཉིན་ནས་བསྟུད་མར་ཆར་བ་བབས་སྟབས། རི་ངོས་ཀྱི་གྲོག་རོང་ཞིག་གི་ནང་ས་ཉིལ་བྱུང་སྟེ། མེ་ལམ་ཆི་རྒྱུགས་ཆུ་ (Melamchi river) འགག་ཡོད་པ་དང་། རྒྱུག་ཆུ་དང་ཆར་ཆུ་གཉིས་འཁྱིལ་ནས་གློ་བུར་དུ་ཤོར་བ་ལ་བརྟེན། མེ་ལམ་ཆི་རྒྱུག་ཆུ་ཡི་སྨད་བརྒྱུད་དུ་ཆུ་ལོག་བྱུང་བ་ཞིག་ཡིན་སྐོར་བཀོད་འདུག་ལ། སིན་དྷུ་དཔལ་མཆོག་རྫོང་གི་རྫོང་དཔོན་ཨ་རུན་པོག་རལ་ (Arun Pokhrel) གྱིས། ཆུ་ལོག་འདིའི་འབྱུང་རྐྱེན་ནི་ཕྱི་ལོ་ ༢༠༡༥ ལོར་བྱུང་བའི་ས་ཡོམ་གྱིས་ཁུལ་དེའི་རི་བརྒྱུད་དུ་ཆགས་པའི་འཁྱག་རོམ་དང་ས་འདམ་གཉིས་ལ་གཡོ་འགུལ་ཐེབས་སུ་བཅུག་ཡོད་པ་དང་། ཉེ་ལམ་རི་བརྒྱུད་དེར་ཆར་ཆེན་བབས་པ་དང་འབྲེལ་བ་ཡོད་པའི་དོགས་གཞི་ཡོད་སྐོར་བརྗོད་འདུག

ཆུ་ལོག་དོན་རྐྱེན་བྱུང་ཁུལ་གྱི་ཡུལ་མི་རཱ་དྷི་ཀ་ཤེ་རེས་ཐ་ (Radhika Shrestha) ཞེས་པ་ཞིག་གིས། ང་ཞིང་ཁ་ནས་ཕྱིར་ཁྱིམ་དུ་ལོག་ཚར་ཙམ་ཡིན་པ་དང་། སྐབས་དེར་གཉེན་ཉེ་ཞིག་གི་ཁ་པར་འབྱོར་ཏེ། མེ་ལམ་ཆི་རྒྱུག་ཆུ་ (Melamchi river) ཡི་སྟོད་བརྒྱུད་དུ་ས་ཉིལ་བྱུང་ནས་རྒྱུག་ཆུ་འགག་ཡོད་པ་དང་། དེ་ཤོར་ཉེན་ཡོད་པས་ས་མཐོ་སར་ཉེན་གཡོལ་དུ་འགྲོ་དགོས་པ་བརྗོད་བྱུང་བ་དང་། སྐབས་དེར་ངའི་བཟའ་ཟླས་ཞིང་ཁའི་ནང་ཞིང་ལས་བྱེད་བཞིན་ཡོད་སྟབས། འཕྲལ་དུ་ངའི་བཟའ་ཟླར་ཁ་པར་བཏང་སྟེ་ཉེན་བརྡ་བཏང་ནས་རི་མཐོ་སར་བྲོས་བ་ཡིན། ཞེས་བརྗོད་འདུག

ཁ་སང་ཕྱི་ཚེས་ ༡༧ ཉིན་བལ་ཡུལ་གྱི་གྷན་དྷ་ཀི་ (Gandaki) ཞིང་ཆེན་གྱི་སྤྱི་ཁྱབ་པ་ཀི་རི་ཤི་ན་ཅན་དྷ་ར་(Krishna chandra) ཞེས་པ་ཞིག་གིས། སིན་དྷུ་དཔལ་མཆོག་རྫོང་གི་ཆུ་ལོག་གི་དོན་རྐྱེན་བྱུང་ཁུལ་དུ་བསྐྱོད་ཡོད་པ་དང་། ཞིང་ཆེན་སྲིད་གཞུང་གིས་བལ་སྒོར་ས་ཡ་ ༥༠ བཏང་སྟེ་ངལ་སེལ་དང་མྱུར་སྐྱོབ་ཀྱི་ལས་དོན་བསྒྲུབ་རྒྱུ་དང་། བདེ་སྲུང་མི་སྣ་དང་མྱུར་སྐྱོབ་ཐད་བསྐོས་མི་སྣ། གཞུང་འབྲེལ་མིན་པའི་ཚོགས་སྡེ་ཁག་བཅས་ས་གནས་སུ་བསྡད་དེ་ཆར་དུས་ཀྱི་སྐབས་འདིར་མུ་མཐུད་མྱུར་སྐྱོབ་ཀྱི་ལས་དོན་གཉེར་རྒྱུ་ཡིན་སྐོར་བརྗོད་འདུག

ཁ་སང་བལ་ཡུལ་ཀྱི་དབུས་གནམ་གཤིས་སྔོན་བརྡ་ལས་ཁུངས་ཀྱིས་བཏང་བའི་ཉེན་བརྡའི་ནང་། མ་འོངས་ཉིན་ཤས་རིང་ཆུ་ལོག་གི་ཉེན་ཁའི་ནང་ཡོད་པའི་ས་ཁུལ་ཁག་ནས་མུ་མཐུད་ཡིད་གཟབ་བྱེད་དགོས་པ་དང་། བལ་ཡུལ་གྱི་ཞིང་ཆེན་ཚང་མའི་ནང་ཆར་བ་འབབ་ཚད་ནི་ཆེན་པོ་དང་ཧ་ཅང་ཆེན་པོ་ཡིན་པའི་སྔོན་བརྡ་བཏང་ཡོད་འདུག

གསར་འགོད་པ། ཀླུ་མགོན་ཐར།