རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་གཞིས་ཆགས་ཀྱི་བོད་མི་བློ་བཟང་བསྟན་འཛིན་ལགས་ཀྱིས་སྤྱི་འཐུས་ཀྱི་དཀའ་རྙོག་ལ་བློ་ཕམ་བྱུང་སྟེ་རང་ལུས་མེར་སྲེག་བཏང་ནས་རང་སྲོག་གཅོད་རྩིས་བྱས་འདུག་ཀྱང་སྲོག་སྐྱོན་བྱུང་མི་འདུག
ཁ་སང་ཕྱི་ཚེས་ ༢༠ ཉིན་གྱི་ཉིན་གུང་ཆུ་ཚོད་ ༡༡ མ་ཟིན་ཙམ་དུ། རྒྱ་གར་ལྷོ་ཕྱོགས་ཧུན་སུར་རབ་རྒྱས་གླིང་གཞིས་ཆགས་ཀྱི་གྲོང་སྡེ་ཉ་པའི་སྤྱི་མི་བློ་བཟང་བསྟན་འཛིན་ལགས་ཀྱིས་རང་ཁྱིམ་དུ་ལུས་ལ་ས་སྣུམ་བླུགས་སྟེ་མེར་སྲེག་བཏང་ཡོད་པ་དང་། དེ་མ་ཐག་ཁོང་གི་བུ་མོས་མཐོང་སྟེ་མེ་བསད་ཡོད་པས་ཚེ་སྲོག་ལ་ཉེན་ཁ་བྱུང་མི་འདུག་ཀྱང་། གདོང་དང་ལག་པ་གཡས་པ། ཕྲག་པ་སོགས་ལ་ཚིག་སྐྱོན་ཆེན་པོ་བྱུང་འདུག
སྤྱི་ཚོགས་དྲ་ལམ་ཁག་ཏུ་ཁོང་གིས་རང་ལུས་མེར་སྲེག་བཏང་བའི་རྒྱུ་རྐྱེན་སྐོར་ལ་འགྲེལ་བཤད་མི་འདྲ་བ་སྤེལ་བཞིན་ཡོད་སྟབས། དེ་རིང་ཉིན་རྒྱབ་འདི་གའི་གསར་འགོད་པ་ཧུན་སུར་རབ་རྒྱས་གླིང་དུ་ཕྱིན་ཏེ་བློ་བཟང་བསྟན་འཛིན་ལགས་སུ་བཅར་འདྲི་བྱེད་སྐབས་ཁོང་གིས། ཉེ་སྔོན་བྱུང་བའི་བོད་མི་མང་སྤྱི་འཐུས་ཀྱི་རྙོག་དྲ་དེ་འགྲིག་འཇགས་མ་ཡོང་བར་ལྷག་སྟེ་༧གོང་ས་མཆོག་ཐུགས་ཕམ་ཡོང་གཞི་ཞིག་ཏུ་གྱུར་ཡོད་པའི་རྐྱེན་གྱིས་བློ་ཕམ་ཆེན་པོའི་ཐོག་ནས་སྲོག་བློས་གཏོང་གིས་རང་ལུས་མེར་སྲེག་བཏང་ཡོད་པ་ལས། རྒྱུ་མཚན་གཞན་གང་ཡང་མེད་སྐོར་འགྲེལ་བརྗོད་བྱས་བྱུང་།
རང་ལོ་ ༦༠ ཙམ་ཡིན་པའི་བློ་བཟང་བསྟན་འཛིན་ལགས་ནི་ཧུན་སུར་རབ་རྒྱས་གླིང་གི་གྲོང་སྡེ་ཉ་པ་ནས་ཡིན་ཞིང་། ཁོང་གིས་གྲོང་སྡེའི་སྤྱི་མིའི་ལས་འགན་ཁུར་བཞིན་ཡོད་པ་མ་ཟད། ཏོག་དབྱིབས་གཉན་རིམས་འགོས་ཁྱབ་སྐབས་སུ་ས་གནས་ཀྱི་ནད་ཡམས་ཛ་དྲག་ཚོགས་ཆུང་གི་ཚོགས་མིའི་འགན་འཁུར་ཏེ། ཏོག་དབྱིབས་ནད་པ་ཚོར་ལྟ་སྐྱོང་དང་སྐུ་ཕུང་ཞུགས་འབུལ་སོགས་ཀྱི་ལས་དོན་ལ་དྭང་བླངས་ཞབས་ཕྱི་ཞུས་ཡོད་འདུག ཁོང་ནི་དུས་རྒྱུན་བོད་དོན་དང་སྤྱི་ཚོགས་ཀྱི་གནད་དོན་རིགས་ལ་ཚོར་ཤུགས་ཆེན་པོའི་ཐོག་ནས་སོ་སོའི་བསམ་ཚུལ་འདོན་མཁན་གྱི་བོད་མི་ཞིག་ཡིན་འདུག་ལ། སྤྱི་ཚོགས་དྲ་ལམ་དུ་ཁོང་གིས་མཚོན་མདོག་དཀར་ནག་གཉིས་ཀྱི་མཚམས་སུ་བོད་ཅེས་བྲིས་ཡོད་པའི་མགོ་རས་དཀྲིས་པའི་འདྲ་པར་ཁག་ཅིག་དང་། སྐབས་བཅུ་དྲུག་པའི་བོད་མི་མང་སྤྱི་འཐུས་ཀྱི་གྲོས་ཚོགས་ནང་བྱུང་བའི་གནད་དོན་རེ་ཟུང་ཐོག་སོ་སོས་བསམ་ཚུལ་བརྗོད་པའི་བརྙན་ཐུང་དེ་འདྲཡང་འགྲེམ་སྤེལ་བྱེད་བཞིན་འདུག
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
ཡ་ཡ་གོ་སོང་།
བོད་ཀྱི་དུས་བབ་ནས་གནས་ཚུལ་གསལ་པོ་བཀོད་མི་འདུག གསར་འགོད་པ་ཡིན་པའི་ཆ་ནས་ཕྱོགས་ལྷུང་མེད་པར་གནས་ཚུལ་གསལ་པོ་དང་དྲང་བདེན་གང་ཡིན་པ་བཀོད་རོགས་གནང་།
དེའི་འགན་ཆ་ཚང་ཟམ་གདོང་ལ་ཡོད།