རྒྱ་ནག་དམར་གཞུང་བཙུགས་ནས་ལོ་ ༡༠༠ ལོན་པར་རྟེན་འབྲེལ་མཚོན་བྱེད་དུ་བོད་ཀྱི་དགོན་པ་ ༣༠ ཙམ་ལ་མར་རྒྱན་མེ་ཏོག་ཏང་ལ་འབུལ་ཟེར་བ་དང་ལོ་བརྒྱའི་ཀྲུང་གོའི་ཕུགས་འདུན་ལས། ནང་བསྟན་དུས་རབས་གསར་པར་བསྐྱོད་ཟེར་བའི་ཡིག་གཟུགས་འགྲན་བསྡུར་བྱེད་དུ་བཅུག་ཡོད་འདུག
རྒྱ་ནག་གི་གཞུང་འབྲེལ་དྲ་བའི་སྟེང་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༩ ཉིན་བོད་དར་རྩེ་མདོའི་ས་གནས་སྲིད་གཞུང་དང་། ས་གནས་ཀྱི་ནང་བསྟན་མཐུན་ཚོགས་གཉིས་ཀྱི་གོ་སྒྲིག་འོག རྒྱ་ནག་དམར་གཞུང་བཙུགས་ཏེ་ལོ་ ༡༠༠ ལོན་པར་རྟེན་འབྲེལ་དུ། མར་རྒྱན་མེ་ཏོག་ཏང་ལ་འབུལ་ཟེར་བའི་དྲིལ་བསྒྲགས་རང་བཞིན་གྱི་འགྲན་བསྡུར་ལས་འགུལ་ཞིག་སྤེལ་ཡོད་པ་དང་། ལས་འགུལ་དེའི་ནང་ས་གནས་ཀྱི་བོད་དགོན་ཁག་ ༣༠ ཡིས་བོད་ཀྱི་སྲོལ་རྒྱུན་མར་རྒྱན་མེ་ཏོག་མཆོད་པ་བཞེངས་སྐྲུན་གྱི་ལག་རྩལ་དང་། རྒྱ་ནག་དམར་གཞུང་གི་དྲིལ་བསྒྲགས་ཀྱི་ནང་དོན་ལྡན་པའི་བོད་ཡིག་ཡིག་གཟུགས་འགྲན་བསྡུར་བྱེད་དུ་བཅུག་སྟེ་བྱ་དགའ་སྤྲད་ཡོད་འདུག
མར་རྒྱན་མེ་ཏོག་མཆོད་པ་འགྲན་བསྡུར་དེའི་སྟེང་དཀར་མཛེས་ཁུལ་སྲིད་གྲོས་ཀྱི་ཚོགས་གཙོ་གཞོན་པ་དང་དར་མདོ་གྲོང་ཁྱེར་གྱི་ནང་བསྟན་མཐུན་ཚོགས་ཀྱི་ཚོགས་གཙོ་མཆོག་སྤྲུལ་རྡོ་རྗེ་བཀྲ་ཤིས་ལགས་ཀྱིས། ཐེངས་འདིར་རང་རེ་དར་མདོ་གྲོང་ཁྱེར་ནང་བསྟན་འཐུན་ཚོགས་ཀྱིས། དགོན་ཁག་སོ་སོའི་མར་རྒྱན་ལག་རྩལ་རྒྱུན་འཛིན་དར་སྤེལ་ཡོང་ཆེད་དང་། ཀྲུང་གོ་གུང་ཁྲན་ཏང་དབུ་བརྙེས་ནས་ལོ་བརྒྱ་ལོན་པར་དགའ་སྟོན་རྟེན་འབྲེལ་དུ། མཐོང་བརྒྱུད་ཀྱི་ཕྱག་བཞེས་མ་ཉམས་པའི་མར་རྒྱན་ལག་རྩལ་ལ་བྱང་ཆ་ལྡན་པའི་དགེ་རྒན་གྱི་མཛུབ་སྟོན་འོག དགོན་ཁག་སོ་སོས་ལག་རྩལ་སློབ་སྦྱོང་དང་བསྐྱར་སྦྱོང་གི་བྱ་འགུལ་སྔོན་དུ་སོང་ནས། ཀྲུང་གོ་གུང་ཁྲན་ཏང་གི་བཀའ་དྲིན་དང་བསམ་བློའི་སྙིང་སྟོབས་ལ་མཆོད་པའི་མར་རྒྱན་སྒྱུ་རྩལ་འགྲེམ་སྟོན་གྱི་བྱ་བ་དེ་གཉེར་བ་ཡིན་སྐོར་འགྲེལ་བརྗོད་གནང་ཡོད་འདུག
ད་ལན་གྱི་མར་རྒྱན་མཆོད་པ་དེ་དག་བོད་ཀྱི་སྲོལ་རྒྱུན་རིག་གནས་གཞིར་བཟུང་། མཐུན་པ་སྤུན་བཞི་དང་། ཚེ་རིང་རྣམ་དྲུག སྡོམ་བརྩོན་དམ་པ། བཀྲ་ཤིས་རྟགས་བརྒྱད་སོགས་བཀོད་ཡོད་ནའང་། དེ་དག་ནི་རྒྱ་ནག་དམར་ཤོག་གཞུང་མགོ་བརྩམས་ནས་མི་ལོ་ ༡༠༠ འཁོར་བར་རྟེན་འབྲེལ་གྱི་ཆེད་དུ་བསྐྲུན་པ་ཞིག་ཡིན་སྐོར་བཀོད་འདུག་ལ། མར་རྒྱན་མཆོད་པའི་སྒྱུ་རྩལ་འགྲན་བསྡུར་དེའི་ཁྲོད་ནས་མི་ཉག་གནས་འགོ་དགོན་གྱིས་བཅའ་བཟོ་གནང་བའི་མར་རྒྱན་མཆོད་པ་ལ་ཨང་དང་པོ་དང་། བྲག་མཁར་བཤད་གྲྭ་དང་ལྷ་སྒང་དགོན། འགེ་བ་ཁ་དགོན་པ་བཅས་ཀྱིས་བཅའ་བཟོ་གནང་བའི་མར་རྒྱན་མཆོད་པ་ལ་ཨང་རིམ་གཉིས་པའི་བྱ་དགའ་ཐོབ་ཡོད་འདུག
ཡང་ཉིན་དེའི་ཕྱི་དྲོར་་བསྡུས་ཡོད་པ་དང་། ཡིག་གཟུགས་ཀྱི་ཚིག་གཞི་ཕལ་ཆེ་བ་རྒྱ་ནག་གཞུང་ལ་ཆེ་བསྟོད་དམ། ཡང་ན་རྒྱ་ནག་གཞུང་གིས་དུས་རྒྱུན་བོད་ས་ཡོངས་སུ་དྲིལ་བསྒྲགས་བྱེད་བཞིན་པ་རྐྱང་རྐྱང་ཡིན་པ་རེད། དེ་ཡང་གཞུང་འབྲེལ་གནས་ཚུལ་དེའི་ནང་སྤེལ་བའི་འགྲན་བསྡུར་གྱི་ཡུལ་དངོས་པར་རིས་ཁྲོད། རྒྱལ་ཁབ་སྟོབས་འབྱོར་ཁྲིམས་ཀྱིས་སྐྱོང་། །སྤྱི་ཚོགས་འདྲ་མཉམ་འཆམ་མཐུན་ལྡན། །དམངས་ནི་རྒྱལ་གཅེས་མཛའ་མཐུན་ཅན། །སྲིད་འབྱོར་རིག་གསུམ་རྒྱས་གྱུར་ཅིག།།ཅེས་པ་དང་། ཡང་གཞན་དུ། ཏང་གི་ལོ་རྒྱུས་སྦྱོངས། །བསམ་བློའི་གོ་རྟོགས་བསྐྱེད། །དོན་དངོས་ཡང་དག་སྒྲུབས། །རྣམ་པ་གསར་པར་འབྱེད། །ཅེས་སོགས་བཀོད་ཡོད་འདུག
འདས་པའི་ལོ་ཤས་རིང་ནས་རྒྱ་ནག་གཞུང་གིས་བོད་ནང་ཀྲུང་གོའི་སྤྱི་ཚོགས་རིང་ལུགས་དང་མཐུན་པའི་བོད་བརྒྱུད་ནང་བསྟན་ཟེར་བའི་སྲིད་ཇུས་འོག བོད་ནང་གི་དགོན་པ་ཁག་གི་འཛིན་སྐྱོང་ལས་དོན་བཅས་པར་ཐེ་བྱུས་ཚབས་ཆེན་བྱས་པས་མི་ཚད། དགེ་འདུན་པ་རྣམས་ལ་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་དུ་འཇུག་གི་ཡོད་པ་དང་། མངོན་གསལ་དོད་པོའི་ཐོག་ནས་བོད་ཀྱི་སྲོལ་རྒྱུན་རིག་གནས་ཐང་ཀའི་སྟེང་རྒྱ་ནག་གི་མགོ་འཁྲིད་ཚོའི་པར་བཀོད་པ་དང་། མཆོད་རྟེན་ངོས་སུ་ཆབ་སྲིད་ཀྱི་འབོད་ཚིག་སྣ་ཚོགས་བཀོད་པའི་གནས་ཚུལ་རིམ་པར་ཐོན་ཡོད་པ་ལྟར། ཨ་རི་སོགས་ཀྱི་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་སྙན་ཐོའི་ནང་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་ལྟེ་གནས་དགོན་སྡེ་ཁག་ལ་དམ་དྲག་སྟངས་འཛིན་བྱེད་བཞིན་ཡོད་པ་མ་ཟད། ཆབ་སྲིད་ཀྱི་བྱ་འགུལ་སྣ་ཚོགས་སྤེལ་བཞིན་ཡོད་པའི་གྲུབ་དོན་བཏོན་ཡོད་པ་རེད།
གསར་འགོད་པ། པ་སངས་ཚེ་རིང་།
