ཧི་མ་ཅལ་ནང་ཏོག་དབྱིབས་འགོས་ཁྱབ་ཚོད་འཛིན་གང་ལེགས་ཡོང་བཞིན་ཡོད་པས་དེ་རིང་ནས་མངའ་སྡེ་གཞན་དང་འགྲོ་འོང་ཆོག་པ་དང་ཚོང་ར་རྣམས་རྒྱུན་ལྡན་ལྟ་བུ་བྱས་ནས་སྒོ་འབྱེད་ཆོག་སྐོར་བསྒྲགས་འདུག་ཀྱང་རེས་གཟའ་སྤེན་པ་དང་ཉི་མར་མུ་མཐུད་སྒོ་རྒྱག་རྒྱུ་ཡིན་མིན་ཁ་གསལ་མི་འདུག
ཁ་སང་ཕྱི་ཚེས་ ༢༢ ཉིན་ཧི་མ་ཅལ་མངའ་སྡེ་གཞུང་གིས་ཏོག་དབྱིབས་གཉན་རིམས་དང་འབྲེལ་བའི་བཀོད་ཁྱབ་ཅིག་བཏང་བའི་ནང་། དེ་རིང་ཕྱི་ཚེས་ ༢༣ ཉིན་གྱི་ཞོགས་པའི་ཆུ་ཚོད་ ༩ པ་ནས་དགོང་མོའི་ཆུ་ཚོད་ ༨ པ་བར་ཚོང་ཁང་དང་ཁྲོམ་ར་རྣམས་སྒོ་འབྱེད་ཆོག་པ་དང་། ཟ་ཁང་དང་ཇ་ཁང་། ཆང་ཁང་སོགས་མཚན་མོའི་ཆུ་ཚོད་ ༡༠ བར་དུ་སྒོ་འབྱེད་ཆོག་གི་ཡོད་འདུག དེ་བཞིན། ཕྱི་ཟླ་ ༧ ཚེས་ ༡ ཉིན་ནས་གཞུང་གི་ལས་ཁུངས་ཁག་དང་ཆོས་ལུགས་ཀྱི་ལྟེ་གནས་ཁག་སྒོ་འབྱེད་ཆོག་པ་དང་། མངའ་སྡེ་ཕན་ཚུན་བར་འགྲོ་སྐྱོད་ཆོག་པ་མ་ཟད། ས་གནས་གཞན་ནས་ཧི་མ་ཅལ་མངའ་སྡེའི་ནང་འཛུལ་བར་དམིགས་བསལ་ཆོག་མཆན་ (E-pass) དགོས་ཀྱི་མེད་སྐོར་བསྒྲགས་འདུག
མངའ་སྡེ་གཞུང་གི་བཀོད་ཁྱབ་དེའི་ནང་། གཉེན་སྟོན་ཚུད་པའི་སྤྱི་ཚོགས་དང་རིག་གནས། རིག་གཞུང་དང་ཆབ་སྲིད་ཀྱི་འདུ་འཛོམས་རིགས་བྱེད་ཆོག་ནའང་། ཁང་མིག་གཅིག་གི་ནང་མང་མཐར་མི་གྲངས་ ༥༠ ལས་འཛོམས་མི་ཆོག་ཅིང་། སྤྱིའི་ཤོང་ཚད་ཀྱི་བརྒྱ་ཆའི་ལྔ་བཅུ་ལས་བརྒལ་མི་ཆོག་པ། ཕྱིའི་ཁོད་ཡངས་པའི་གནས་སུ་མི་གྲངས་ ༡༠༠ འཛོམས་ཆོག་སྐོར་དང་། འདས་མཆོད་བསྒྲུབ་པ་དང་ཕུང་བོ་ཞུགས་འབུལ་སོགས་ཀྱི་སྐབས་མི་གྲངས་ ༥༠ ལས་བརྒལ་མི་ཆོག་སྐོར་བཀོད་འདུག དེ་བཞིན་གློག་བརྙན་ཁང་དང་སྤྱི་གླིང་། ཟློས་གར་ཁང་དང་ལུས་སྦྱོང་ཁང་སོགས་སྤྱིའི་ཤོང་ཚད་ཀྱི་བརྒྱ་ཆའི་ལྔ་བཅུ་ལས་མ་བརྒལ་བའི་ཐོག་ནས་མཚན་གྱི་ཆུ་ཚོད་ ༡༠ བར་དུ་སྒོ་འབྱེད་ཆོག་སྐོར་དང་། ཕྱི་ཟླ་ ༧ ཚེས་ ༡ ཉིན་ནས་གཞུང་གི་ལྷན་ཁང་ཁག་དང་ས་གནས་ལས་ཁུངས་ཁག རང་སྐྱོང་སྡེ་ཚན་ཁག་གི་ལས་མི་ཡོངས་ལས་ཞུགས་བྱེད་དགོས་ཀྱི་ཡོད་འདུག
ཡང་བཀོད་ཁྱབ་དེའི་ནང་། སྤྱིར་མངའ་སྡེའི་ནང་ཉིན་རེའི་ཏོག་དབྱིབས་གཉན་རིམས་ཀྱི་འགོས་ཚད་དང་། དེ་ལ་བརྟེན་ནས་རྐྱེན་འདས་སུ་འགྲོ་བའི་གྲངས་ཚད་དམའ་རུ་འགྲོ་བཞིན་ཡོད་ནའང་། ཚོང་ཁང་དང་ཁྲོམ་ར། མི་མང་འདུ་འཛོམས་བྱེད་སར་ངེས་པར་དུ་ཁ་རས་གྱོན་པ་དང་། ཁ་རས་ཚུལ་མིན་གྱིས་གྱོན་ཚེ་ཉེས་ཆད་གཅོད་པ། ཁ་རས་མ་གྱོན་ཚེ་ཞབས་ཕྱི་མི་བྱེད་པ། མི་ཕན་ཚུན་བར་རྒྱང་ཐག་ཧྥི་ཊི་ ༦ འཛིན་པ། མི་མང་འདུ་འཛོམས་བྱེད་སའི་ས་གནས་ཁག་ཏུ་ཁ་ལུད་དང་མཆིལ་མ་མི་གཡུགས་པ་སོགས་ཀྱི་ལམ་སྟོན་ཁག་མུ་མཐུད་ལག་བསྟར་ནན་མོ་བྱེད་དགོས་པ་དང་། མ་འོངས་པར་མངའ་སྡེ་གཞུང་གི་ཏོག་དབྱིབས་གཉན་རིམས་དང་འབྲེལ་བའི་བཀོད་ཁྱབ་ཅིག་མ་ཡོང་བར་དུ་ཐེངས་འདིའི་བཀོད་ཁྱབ་མུ་མཐུད་ལག་བསྟར་བྱ་རྒྱུ་ཡིན་སྐོར་བཀོད་འདུག
ཁ་སང་ཕྱི་ཚེས་ ༢༢ ཉིན་ཧི་མ་ཅལ་མངའ་སྡེའི་ནང་ཏོག་ནད་འགོས་པའི་མི་གྲངས་ ༡༨༨ དང་རྐྱེན་འདས་སུ་ཕྱིན་པ་གྲངས་ ༤། དྲག་སྐྱེད་བྱུང་བ་གྲངས་ ༣༡༤ བྱུང་ཡོད་འདུག་ལ། ད་ལྟ་ནད་གཞི་ཅན་གྲངས་ ༢༢༧༦ ཡོད་འདུག དེ་བཞིན་རྒྱ་གར་རྒྱལ་ཡོངས་སུ་འདས་པའི་ཉིན་གཅིག་གི་རིང་མི་གྲངས་ཁྲི་ལྔ་ཙམ་ (༥༠༨༤༨) དང་རྐྱེན་འདས་སུ་ཕྱིན་པ་གྲངས་ ༡༣༥༨ བྱུང་ཡོད་འདུག འདས་པའི་ཉིན་གྲངས་ ༤ རིང་ཉིན་རེའི་ནད་པ་གསར་པའི་གྲངས་ཁྲི་ ༦ གི་མན་དང་། འདས་པའི་ཉིན་གྲངས་ ༣ རིང་ཉིན་རེའི་རྐྱེན་འདས་སུ་ཕྱིན་པའི་གྲངས་ ༡༥༠༠ མན་ལ་ཡོད་སྟབས། རྒྱ་གར་རྒྱལ་ཡོངས་སུ་སྤྱི་ཡོངས་ཀྱི་ནད་གཞིའི་འགོས་ཚད་དང་རྐྱེན་འདས་སུ་འགྲོ་ཚད་གཉིས་འདས་པའི་ཟླ་ཤས་དང་བསྡུར་ན་མར་ཆགས་ཀྱི་ཡོད་པ་རེད།
གསར་འགོད་པ། ཀླུ་མགོན་ཐར།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
