བོད་འབྲི་རུ་རྫོང་ཙཱ་ལ་ཡུལ་ཚོ་མེ་རི་གྲོང་ཚོའི་བོད་མི་བརྒྱ་བྱིན་ལགས་དང་བོད་མི་གཞན་ཁག་ཅིག་རྒྱ་གཞུང་གིས་འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་འདུག
རྒྱ་ནག་གཞུང་གིས་བོད་ནག་ཆུ་ས་ཁུལ་གྱི་འབྲི་རུའི་ཕྱོགས་སུ་དམ་དྲག་ཤུགས་ཆེན་བྱེད་བཞིན་ཡོད་པ་ལྟར། འདི་ལོའི་ཕྱི་ཟླ་ ༤ བའི་ནང་རྒྱ་གཞུང་ཉེན་རྟོག་པས། འབྲི་རུ་རྫོང་ཁོངས་ནས་བོད་མི་བརྒྱ་བྱིན་ལགས་གཙོས་པའི་བོད་མི་གཞན་ཁག་ཅིག་བཅས་འཛིན་བཟུང་བཙན་འཁྲིད་བྱས་ཡོད་པ་དང་། ད་ལྟའི་ཆར་བོད་མི་དེ་དག་གི་གནས་སྟངས་དང་ས་གནས་གང་དུ་བཙོན་འཇུག་བྱས་ཡོད་མེད་སོགས་ཀྱི་ཞིབ་ཕྲའི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
འདི་གའི་གསར་འགོད་པར་བོད་མི་ཡར་དར་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་གཞུང་ཉེན་རྟོག་པས་ཁམས་འབྲི་རུ་རྫོང་ཙཱ་ལ་ཡུ་ཚོ་མེ་རི་གྲོང་ཚོ་ནས་ཡིན་པའི་བོད་མི་བརྒྱ་བྱིན་ལགས་དང་ལྷན་དུ་བོད་མི་གཞན་ཁག་ཅིག་ཀྱང་འཛིན་བཟུང་བྱས་ཡོད་ཀྱང་། འདས་པའི་ལོ་མང་རིང་རྒྱ་ནག་གིས་འབྲི་རུའི་ཕྱོགས་སུ་དམིགས་བསལ་དམ་དྲག་བྱས་རྐྱེན་དང་ད་ལྟའི་ཆར་གུང་ཁྲན་ཏང་བཙུགས་ནས་ལོ་བརྒྱ་འཁོར་གྱི་ཡོད་ཟེར་བའི་ཆབ་སྲིད་དྲིལ་བསྒྲགས་སོགས་སྤེལ་གྱི་ཡོད་པའི་གནས་སྟངས་འོག བརྒྱ་བྱིན་ལགས་དང་ལྷན་དུ་འཛིན་བཟུང་བཙན་འཁྲིད་བྱས་པའི་བོད་མི་དེ་དག་སུ་ཡིན་གྱི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།
གསར་འགོད་པས་ཁོང་ཚོ་འཛིན་བཟུང་བྱེད་དོན་གང་ཡིན་དྲིས་པར་ཡར་དར་ལགས་ཀྱིས། བོད་མི་བརྒྱ་བྱིན་ལགས་ནས་ཕྱི་ཕྱོགས་སུ་ཡོད་པའི་རང་ཉིད་ཀྱི་གཉེན་ཉེ་དང་འབྲེལ་འདྲིས་བྱས་པའི་རྒྱུ་མཚན་ལ་བརྟེན་ནས་འཛིན་བཟུང་བྱས་པ་རེད། ཅེས་བརྗོད་བྱུང་བ་དང་། ད་ལྟའི་ཆར་བོད་མི་བརྒྱ་བྱིན་ལགས་ནི་རང་ལོ་ ༤༤ ཡིན་ཞིང་། དུས་རྒྱུན་དུ་བོད་མི་རིགས་ཀྱི་སྐད་ཡིག་རིག་གཞུང་ལ་དུང་བ་ཟབ་ཅིང་ཁོར་ཡུག་སྲུང་སྐྱོབ་སོགས་ཀྱི་ལས་ལ་བརྩོན་མཁན་ཞིག་ཡིན་འདུག་ལ། ཁོང་ད་ལྟ་ཕྲུ་གུ་གསུམ་གྱི་ཨ་ཕ་ཡིན་པ་རེད།
ཡང་ཉེ་སྔོན་འདི་གའི་གསར་འགོད་པས། བོད་རང་སྐྱོང་ལྗོངས་ཟེར་བའི་ནག་ཆུའི་ཁོངས་གཏོགས་སོག་རྫོང་ཕྱོགས་ཀྱི་བོད་མི་ཞིག་དང་ལྷན་དུ་ཁ་བརྡ་བྱེད་སྐབས། ཁོང་ནས་རང་ཉིད་ཀྱི་ནང་མི་དང་ལྷན་དུ་ཁ་བརྡ་བྱེད་མ་ཐུབ་པར་ལོ་མང་ཕྱིན་ཡོད་པ་མ་ཟད། རྒྱ་ནག་གིས་ཁོང་གི་ནང་མིར་ཆབ་སྲིད་ཀྱི་ནག་ཉེས་བཙུགས་ཏེ་ཁྱིམ་མི་གཅིག་བཙོན་འཇུག་བྱས་པ་དང་། ཁྱིམ་མི་གཅིག་ལས་གནས་ནས་ཕུད་ཡོད་འདུག་ལ། ད་ལྟའང་རྒྱ་ནག་གིས་ཁོང་གི་ནང་མིར་ལྟ་སྲུང་ནན་མོ་བྱེད་བཞིན་ཡོད་སྐོར་སོགས་བརྗོད་བྱུང་།
གསར་འགོད་པ། སྐལ་བཟང་སྦྱིན་པ།
