ཉེ་ཆར་རྒྱ་ནག་བཅིངས་གྲོལ་དམག་ཟེར་བས་བོད་ཁུལ་དུ་རྟེན་གཞི་བྱས་པའི་དམག་སྡེ་རྣམས་ལ་དམིགས་ཏེ་མཐོ་ཚད་སྨི་ ༣༧༠༠ ལྷག་ཡོད་པའི་བོད་མཐོ་སྒང་གི་ས་ཁུལ་ཞིག་ཏུ་ས་མཐོར་དམག་འཐབ་བྱེད་ཐབས་དང་གོ་མཚོན་བཀོལ་ཐབས་ཀྱིས་མཚོན་པའི་དམག་སྦྱོང་ལས་འགུལ་གཞི་རྒྱ་ཆེ་བ་ཞིག་སྤེལ་ཡོད་འདུག
ཁ་སང་རྒྱ་ནག་རྒྱལ་སྲུང་ལྷན་ཁང་གིས་གསལ་བསྒྲགས་བྱས་པ་ལྟར་ན། ད་ཐེངས་ཀྱི་དམག་སྦྱོང་ལས་འགུལ་དེ་རྒྱ་ནག་བཅིངས་གྲོལ་དམག་གི་ནུབ་རྒྱུད་དམག་ཁུལ་གྱི་ཁོངས་གཏོགས་བོད་རྒྱུད་དམག་སྡེས་གོ་སྒྲིག་བྱས་པ་ཞིག་ཡིན་སྐོར་དང་། དམག་སྦྱོང་དེའི་ནང་བོད་ཁུལ་དུ་བགོ་འགྲེམ་བྱས་པའི་དམག་སྡེ་འདྲ་མིན་མཉམ་ཞུགས་ཀྱིས། མཉམ་འབྲེལ་གྱི་ཐོག་ནས་དམག་ཇུས་གཙོ་བོ་གསུམ་སྟེ། དངོས་སུ་དམག་འཐབ་བྱེད་ཐབས་དང་། དམག་དོན་གྱི་འཕྲུལ་རིག་དང་གོ་མཚོན་བཀོལ་ཐབས། མཐོ་སྒང་གི་ས་བབ་གཞིར་བཟུང་དམག་འཐབ་བྱེད་ཐབས་བཅས་ཀྱི་ཐད་ལ་སྦྱོང་བརྡར་སྤྲད་ཡོད་འདུག
ད་ལན་གྱི་དམག་སྦྱོང་དེ་བོད་ཀྱི་ས་ཁུལ་གང་དུ་སྤེལ་ཡོད་མེད་གསལ་ཁ་མི་འདུག་ཀྱང་། དེ་ནི་འདས་ལོར་བོད་ཧིན་ས་མཚམས་སུ་རྒྱ་དཀར་ནག་གི་དམག་མིའི་བར་གདོང་ཐུག་བྱུང་ནས་ད་ལྟའང་གནས་ཚུལ་ཞི་འཇགས་བྱུང་མེད་པའི་དུས་སྐབས་འདིར་སྤེལ་བ་ཞིག་ཡིན་ཞིང་། གནས་ཚུལ་དབྱེ་ཞིབ་པས་རྒྱ་ནག་གིས་འདས་པའི་ལོ་ཤས་རིང་ནས་བོད་ཧིན་ས་མཚམས་ཁུལ་དུ་དམག་དོན་བྱ་འགུལ་ཚ་ཚ་འུར་འུར་དུ་སྤེལ་བཞིན་པ་མ་ཟད། རྒྱ་ནག་རྒྱལ་སྲུང་ལྷན་ཁང་གིས་འདི་ལོ་གཅིག་པུར་རྒྱ་ནག་གིས་དམག་སྦྱོང་ཆེ་ཆུང་ ༡༠༠ ལས་མང་བ་སྤེལ་ཟིན་སྐོར་ཡང་བརྗོད་འདུག
གཞན་ཡང་བརྒྱུད་ལམ་ཁག་ཏུ་གནས་ཚུལ་ཐོན་བཞིན་པ་ལྟར་ན། རྒྱ་ནག་གིས་བོད་ཀྱི་ས་བབ་ལ་བརྟེན་ནས་བོད་ནང་གི་བོད་མི་གཞོན་སྐྱེས་ལས་མེད་རྣམས་གཅིག་ཏུ་བསྡུས་ཏེ། བོད་མི་ཁོ་ན་ལས་གྲུབ་པའི་དམག་སྡེ་ཞིག་ལོགས་སུ་བཙུགས་ཡོད་པ་མ་ཟད། ད་བར་དམག་མི་ ༡༠༠ ལས་གྲུབ་པའི་རུ་ཁག་གཉིས་བསྡུས་ཟིན་པའི་ཁྲོད་ནས། སྦྱོང་བརྡར་ཐོན་པའི་རུ་ཁག་དང་པོ་དེ་རྒྱ་གར་དང་ས་འབྲེལ་ཆགས་པའི་གྲོ་མོ་རྫོང་གི་ཆུ་འབི་རུ་བགོ་འགྲེམ་བྱས་ཟིན་པ་དང་། རུ་ཁག་གཞན་དེ་གྲོ་མོ་རྫོང་ཁོངས་ཀྱི་ཕག་རི་ཁུལ་དུ་དམག་སྦྱོང་བྱེད་མུས་ཡིན་འདུག
དེ་ཡང་རྒྱ་གར་གྱི་གསང་བའི་ལས་ཁུངས་ནས་ཤེས་རྟོགས་བྱུང་བ་ལྟར་ན། རྒྱ་ནག་གཞུང་གིས་བོད་མི་ལས་གྲུབ་པའི་དམག་སྡེ་ཞིག་ལོགས་སུ་བཙུགས་དགོས་དོན་ནི། བོད་མི་རྣམས་ལ་ས་གནས་ཀྱི་གནས་སྟངས་དང་། སྐད་ཡིག གནམ་གཤིས་བཅས་ལ་རྒྱུས་མངའ་ཡོད་པར་བརྟེན་ཆེད་མངགས་བོད་ཀྱི་ས་མཚམས་ས་ཁུལ་ཁག་ཏུ་བགོ་འགྲེམ་བྱེད་ཀྱི་ཡོད་འདུག གཞན་ཡང་རྒྱ་གར་གྱི་ཧིན་དྷུ་སི་ཐན་དུས་བབ་ཀྱིས་རྒྱ་གར་གྱི་གསང་བའི་མི་སྣ་བརྒྱུད་ཤེས་རྟོགས་བྱུང་བ་ལྟར་ན། འདི་ལོའི་ཕྱི་ཟླ་ ༤ པའི་ནང་ལྷ་སར་ཡོད་པའི་རྒྱའི་དམག་དཔོན་སྐོར་ཞིག་བོད་མངའ་རིས་ཁུལ་གྱི་རུ་ཐོག་རྫོང་དང་། རྩ་མདའ་རྫོང་དུ་ཡོད་པའི་བཅིངས་གྲོལ་དམག་གི་དམག་སྡེར་ཆེད་སྐྱོད་ཀྱིས། དེའི་ནང་ཡོད་པའི་བོད་རིགས་དམག་མི་རྣམས་བོད་མི་ཁོ་ན་ལས་གྲུབ་པའི་དམིགས་བསལ་དམག་སྡེའི་ནང་འཇུག་ཐབས་བྱས་ཡོད་འདུག འོན་ཀྱང་སྐབས་དེར་བསྡུས་པའི་དམིགས་བསལ་དམག་སྡེ་དང་ད་ལན་གྱི་དམག་སྡེ་གཉིས་འདྲ་ཡི་མེད་སྐོར་བརྗོད་འདུག
རྒྱ་གར་གྱི་ཧིན་དྷུ་གསར་ཁང་ (The Hindu) གིས་དེ་འབྲེལ་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་བོད་མི་ལས་གྲུབ་པའི་དམིགས་བསལ་དམག་སྡེའི་རུ་ཁག་གཅིག འདས་ལོར་རྒྱ་དཀར་ནག་གི་དམག་མིའི་བར་གདོང་ཐུང་འབྱུང་སའི་དཔལ་མགོན་མཚོ་དང་རྒྱང་ཐག་ཉེ་བོ་ཡིན་པའི་རུ་ཐོག་རྫོང་དུ་བགོ་འགྲེམ་བྱ་རྒྱུ་ཡིན་འདུག་ལ། བོད་མིའི་དམིགས་བསལ་དམག་སྡེ་དེའི་བྱ་འགུལ་གཙོ་བོ་ནི་རྒྱ་ནག་བཅིངས་གྲོལ་དམག་ལ་གོ་མཚོན་དང་ཅ་དངོས་སོགས་སྐྱེལ་འདྲེན་དང་། ས་གནས་ཀྱི་གནས་ཚུལ་ལ་སོ་ལྟ་བྱ་རྒྱུ་བཅས་ཡིན་འདུག གཞན་ཡང་མཐོ་སྒང་གི་ས་བབ་དང་བསྟུན་ནས་དྲེལ་དང་རྟ་ཞོན་ནས་འགྲུལ་བཞུད་བྱེད་པ་དང་། ཕྱོགས་གཞན་ནས་མཁའ་སྐྱོད་པར་ཆས་ (Drone) ལྟ་བུ་ཡང་བཀོལ་སྤྱོད་བྱེད་སྟངས་སློབ་ཀྱི་ཡོད་འདུག རྒྱ་དཀར་ནག་གི་དམག་དོན་དབྱེ་ཞིབ་པས། ད་ལན་རྒྱ་ནག་གིས་འདི་ལྟ་བུའི་བོད་མིའི་དམག་སྡེ་ཞིག་བཙུགས་དགོས་དོན་གཅིག་ནི། རྒྱ་གར་གྱིས་བཙན་བྱོལ་བོད་མི་ཁོ་ན་ལས་གྲུབ་པའི་དམག་སྒར་ཨང་ ༢༢ ལ་འགྲན་སློང་བྱས་པ་ཞིག་ཡིན་སྐོར་རྗོད་ཀྱིན་འདུག
གསར་འགོད་པ། པ་སངས་ཚེ་རིང་།
