ཨ་རིའི་གློག་ནུས་རླངས་འཁོར་བཟོ་ཚོང་ཁང་(electric vehicle maker Tesla Inc)གིས་ལྷ་ས་རུ་ཉི་འོད་གློག་ནུས་གསོག་ཉར་ལྟེ་གནས་ཤིག་བཙུགས་ཡོད་པ་དང་བཟོ་ཚོང་ཁང་དེས་བོད་དང་རྒྱ་ནག་ནང་ལྟེ་གནས་དེ་བཙུགས་པ་ཐེངས་དང་པོ་ཡིན་སྐོར་བསྒྲགས་འདུག
ད་ལྟའི་ཆར་ཨ་རིའི་གློག་ནུས་རླངས་འཁོར་བཟོ་ཚོང་ཁང་དེར་བོད་ནང་ཆེད་གཉེར་ཚོང་ཁང་མེད་ཀྱང་། འདས་ལོར་བཟོ་ཚོང་ཁང་དེས་རྒྱ་ནག་ཧྲང་ཧེ་གྲོང་ཁྱེར་དུ་ཚོང་ལས་གཉེར་སྐབས་ཉི་འོད་གློག་ནུས་གསོག་ཉར་གྱི་ལས་གཞིའི་ཆེད་འགན་འཛིན་ལས་མི་བསྡུ་རྒྱུ་ཡིན་པའི་གསལ་བརྡ་བཏང་ཡོད་པ་དང་། ཟླ་འདིའི་ཕྱི་ཚེས་ ༢༣ ཉིན་ཉི་འོད་ཆེས་བཟང་བའི་བོད་མཐོ་སྒང་དུ་ཉི་འོད་གློག་ནུས་གསོག་ཉར་གྱི་ལྟེ་གནས་དང་པོ་བཙུགས་ཡོད་པའི་གསལ་བསྒྲགས་ཤིག་བཟོ་ཚོང་ཁང་དེའི་སྤྱི་ཚོགས་དྲ་ལམ་དུ་སྤེལ་ཡོད་པ་མ་ཟད། མུ་མཐུད་ཉི་འོད་གློག་ནུས་ཀྱི་ཚོང་འབྲེལ་ཡར་རྒྱས་སུ་གཏོང་འདོད་ཡོད་སྐོར་བརྗོད་ཡོད་པ་རེད།
རྒྱ་ནག་ནི་ཨ་རིའི་རླངས་འཁོར་བཟོ་ཚོང་ཁང་དེའི་ཁྲོམ་ར་ཆེ་ཤོས་གཉིས་པ་དེ་ཆགས་ཡོད་ཀྱང་། ཨ་རྒྱ་གཉིས་བར་ཚོང་དོན་གསང་བ་རྐུ་འཁྱེར་བྱས་ཡོད་པའི་སྐྱོན་འཛུགས་དང་བཀག་སྡོམ་རིགས་རིམ་པར་བྱུང་ཡོད་པ་ལྟར། འདི་ལོའི་ཕྱི་ཟླ་ ༣ ཚེས་ ༢༠ ཉིན་རྒྱ་ནག་གི་དམག་སྡེ་འགའ་ཤས་ནང་བཟོ་ཚོང་ཁང་དེས་བཟོས་པའི་པར་ཆས་ཅན་གྱི་རླངས་འཁོར་དེ་བེད་སྤྱོད་ལོག་པར་གཏང་སྟེ། རྒྱལ་ཁབ་ཀྱི་བདེ་འཇགས་དང་སྲུང་སྐྱོབ་ལ་གནོད་སྐྱོན་བཟོ་ཉེན་ཡོད་པའི་དོགས་གཞིའི་འོག་བཀག་སྡོམ་བྱས་ཡོད་པ་མ་ཟད། འདི་ལོའི་ཕྱི་ཟླ་ ༥ ཚེས་ ༢༡ ཉིན་དྲ་ལམ་ཁག་ཏུ་གནས་ཚུལ་ཐོན་པ་ལྟར་ན། པེ་ཅིན་དང་ཧྲང་ཧེ་སོགས་ཀྱི་གཞུང་ཞབས་པ་ཚོས་ཨ་རིའི་རླངས་འཁོར་དེ་སྲིད་གཞུང་གི་ས་ཁོངས་སུ་འཇོག་མི་ཆོག་པའི་བཀའ་བཏང་ཡོད་འདུག
ཉི་འོད་གློག་ནུས་ནི་དེང་རབས་ཀྱི་འཚོ་བའི་ཁྲོད་ཁ་འབྲལ་ཐབས་མེད་པ་ལྟ་བུའི་ཐོན་ཁུངས་གལ་ཆེན་ཞིག་ཆགས་ཡོད་ཀྱང་། གནམ་གཤིས་རིག་པ་བ་ཁག་ཅིག་ནས་ཉི་འོད་འགྱེད་འཕྲོ་ནི་ས་ཁམས་ཁོར་ཡུག་གྲུབ་ཚུལ་དང་འགྱུར་ལྡོག་གི་རྐྱེན་རྩ་གཙོ་བོ་ཞིག་ཡིན་སྟབས། ཉི་འོད་གློག་ནུས་འབོར་ཆེན་གསོག་ཉར་དང་བེད་སྤྱོད་གཏོང་བ་དེས་གནམ་གཤིས་ཀྱི་ཚ་དྲོད་རྒྱས་ཤིང་ཆར་ཆུ་ཇེ་ཉུང་དུ་འགྲོ་བའི་གནོད་སྐྱོན་ཡོང་བ་དང་། ཉི་འོད་གློག་ནུས་ཀྱིས་བཟོ་སྐྲུན་བྱས་པའི་ཐོན་རྫས་ཀྱིས་རང་བྱུང་ཁོར་ཡུག་འབག་བཙོག་དང་མིའི་རིགས་ཀྱི་འཕྲོད་བསྟེན་ལའང་གནོད་སྐྱོན་ཡོང་གི་ཡོད་སྐོར་རྗོད་ཀྱི་ཡོད་པ་རེད།
བསྟན་འཛིན་ཕུར་བུ།
