ཨོ་གླིང་གི་རྒྱ་རིགས་སློབ་མ་ཚོར་བོད་སོགས་ཀྱི་གནད་དོན་ཐོག་ནས་གནོན་ཤུགས་ཆེན་པོ་སྤྲོད་ཀྱི་ཡོད་འདུག

ཕྱི་ལོ་ ༢༠༡༣ ཙམ་ནས་བཟུང་རྒྱ་ནག་གཞུང་གིས་ཨོ་གླིང་གི་སློབ་ཆེན་ཁག་ཏུ་ཡོད་པའི་རྒྱ་རིགས་སློབ་མ་ཚོར་བོད་དང་ཐའེ་ཝན་སོགས་ཀྱི་གནད་དོན་དང་འབྲེལ་ཏེ་གནོན་ཤུགས་ཆེན་པོ་སྤྲོད་བཞིན་ཡོད་པའི་སྙན་ཐོ་བཏོན་འདུག

ཁ་སང་ཕྱི་ཚེས་ ༢༩ ཉིན་ཨ་རིར་ཡོད་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་ (Human Rights Watch) གིས་ཨོ་གླིང་ནང་སློབ་གཉེར་བྱེད་བཞིན་པའི་རྒྱ་ནག་སྐམ་སའི་སློབ་མ་རྣམས་ཀྱི་རང་དབང་དང་འབྲེལ་ནས་སྙན་ཐོ་ཞིག་བཏོན་པའི་ནང་། ཨོ་གླིང་དུ་སློབ་གཉེར་བྱེད་མཁན་རྒྱ་ནག་གི་སློབ་མ་ཚོས་བོད་དང་ཐའེ་ཝན་སོགས་དང་འབྲེལ་ཏེ་རྒྱ་ནག་དམར་གཞུང་ལ་སྐྱོན་བརྗོད་བྱས་ཚེ་འཇིགས་སྐུལ་དང་བརྙས་བཅོས་ཐེབས་ཀྱི་ཡོད་སྐོར་དང་། འདས་པའི་ལོ་ངོ་བཅུ་ཕྲག་འགའི་གོང་ནས་རྒྱ་ནག་གཞུང་གིས་ཨོ་གླིང་གི་སློབ་ཆེན་ཚོར་གནོན་ཤུགས་སྤྲོད་མགོ་བཙུགས་པ་བཀོད་འདུག

སྙན་ཐོའི་ནང་ཕྱི་ལོ་ ༡༩༨༠ ནས་ ༡༩༩༠ གོ་གྲངས་ཙམ་བར་དུ་ཨོ་གླིང་གི་གཙུག་ལག་སློབ་ཆེན་ཁག་གི་ནང་བོད་དང་ཐའེ་ཝན། གནམ་བདེ་སྒོ་མོ་ཆེའི་དོན་རྐྱེན་སོགས་དང་འབྲེལ་ངོ་རྒོལ་དང་ལས་རིམ་གང་འདྲ་ཞིག་སྤེལ་ཡང་། དེར་རྙོག་གླེང་མེད་ནའང་། ཕྱི་ལོ་ ༢༠༡༣ ཙམ་ནས་རྒྱ་ནག་གི་དོན་གཅོད་ཁག་གིས་གནད་དོན་དེ་དག་དང་འབྲེལ་ནས་ཨོ་གླིང་གི་སློབ་ཆེན་ཁག་ལ་སྐྱོན་བརྗོད་དང་། གཏམ་བཤད་པ་དང་ལས་འགུལ་ཁག་ལ་ཚོད་འཛིན་ཤུགས་ཆེར་བྱེད་མགོ་བཙུགས་ཡོད་སྐོར་དང་། ཕྱི་ལོ་ ༢༠༡༣ ལོར་སི་ཌི་ནི་གཙུག་ལག་སློབ་གྲྭ་ (University of Sydney) ཡིས་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་ཀྱི་ལས་རིམ་ཞིག་བཟོས་པ་སློབ་རྭའི་ནང་འཚོགས་ཐུབ་མེད་པ་དང་། སྐབས་དེར་སློབ་ཆེན་དེས་༧གོང་ས་རྒྱལ་བ་རིན་པོ་ཆེ་མཆོག་དང་འབྲེལ་བའི་པར་རིས་མི་སྤྱོད་པ་དང་། བོད་དོན་ལས་འགུལ་བ་མཉམ་ཞུགས་མི་ཆོག་པ། དེ་བཞིནགསར་འགོད་པ་ཚོས་ཡོང་མི་ཆོག་པ་བཟོས་པའི་གནས་སྟངས་བྱུང་ཡོད་པ་དང་། ཕྱིས་སུ་སློབ་ཆེན་དེའི་དགེ་རྒན་ཆེན་མོ་ཞིག་གིས་དེ་ནི་སྐབས་དེར་རྒྱ་ནག་དོན་གཅོད་ཁང་གི་ལས་མི་ཞིག་སློབ་ཆེན་དེར་ཡོང་ནས་གནོན་ཤུགས་སྤྲད་པ་ཞིག་ཡིན་པ་དང་། འདས་པའི་ལོ་ངོ་བཅུ་ཕྲག་འགའི་རིང་རྒྱ་ནག་གི་གནོན་ཤུགས་ཆེ་རུ་ཕྱིན་ཏེ་ཨོ་གླིང་གི་སློབ་གཉེར་རང་དབང་ལ་ཉེན་ཁའི་ནང་ལྷུང་གི་ཡོད་སྐོར་བཀོད་འདུག

ཡང་སྙན་ཐོ་དེའི་ནང་། སློབ་མ་ཞིག་གིས་རྒྱ་ནག་དམར་ཤོག་ཚོགས་པར་སྐྱོན་བརྗོད་བྱེད་པའམ། བོད་དང་ཤར་ཏུར་ཀི་སི་ཐན། ཐའེ་ཝན་དང་ཧོང་ཀོང་བཅས་ཀྱི་ཐོག་བགྲོ་གླེང་བྱས་ཏེ་རྒྱ་ནག་གཞུང་གིས་དྲིལ་བསྒྲགས་དང་མ་མཐུན་ཚེ། རྒྱ་ནག་ལ་དགའ་ཞེན་ཆེ་བའི་སློབ་མ་དང་སྤྱི་ཚོགས་དྲ་ལམ་ཁག་ནས་བརྙས་བཅོས་དང་འཇིགས་སྐུལ། དྲ་ཐོག་ནས་ཁ་རྡུང་གཏོང་བ་སོགས་བྱེད་ཀྱི་ཡོད་པ་དང་། དེ་ལ་གཡོལ་ཐབས་སུ་སློབ་མ་མང་པོ་ཞིག་གིས་བོད་སོགས་ཚོར་བ་བསྐྱེན་པོ་ཡིན་པའི་གནད་དོན་ཁག་ལ་གཡོལ་ཐབས་བྱེད་ཀྱི་ཡོད་པ་དང་། ཨོ་གླིང་དུའང་སློབ་གཉེར་དང་ཉམས་ཞིབ་ཀྱི་བརྒྱུད་རིམ་ཁྲོད་རང་དབང་མེད་པ་ཚོར་གྱི་ཡོད་པ་མ་ཟད། དེ་ཡིས་སློབ་གཉེར་རང་དབང་ལ་དོ་ཕོག་གཏོང་གི་ཡོད་སྐོར་བཀོད་འདུག

ཕྱི་ལོ་ ༢༠༡༨ ལོར་ཨོ་གླིང་གི་ཉམས་ཞིབ་པ་གསུམ་དང་རྒྱ་ནག་གི་སློབ་ཆེན་ཞིག་གི་སློབ་མ་གཅིག་བཅས་བཞི་ལ་ཨོ་གླིང་གི་ཉམས་ཞིབ་ཁང་ཞིག་ནས་བོད་ཀྱི་སྐོར་ཉམས་ཞིབ་ཀྱི་སློབ་ཡོན་ཐོབ་ཡོད་ནའང་། ཕྱི་ལོ་ ༢༠༡༨ ལོར་རྒྱ་ནག་གཞུང་གིས་བོད་སྐོར་གྱི་ཉམས་ཞིབ་དེར་རྒྱ་ནག་དབུས་བདེ་སྲུང་ལྷན་ཁང་དང་ཉེན་རྟོག་ལས་ཁུངས་ཀྱིས་རྟོག་ཞིབ་བྱེད་ཀྱི་ཡོད་སྐོར་བརྗོད་དེ་རྒྱ་ནང་སྡོད་པའི་ཉམས་ཞིབ་སློབ་མ་གཅིག་ལ་ཉེན་བརྡ་བཏང་ཡོད་འདུག དེ་བཞིན་ཨོ་གླིང་དུ་བཅའ་སྡོད་དོན་གཅོད་ཞིག་གིས་འབྲེལ་བ་བྱས་ཏེ་ཉམས་ཞིབ་ཀྱི་ལས་གཞི་དེ་མཚམས་འཇོག་བྱེད་དགོས་པ་དང་། ལས་གཞི་དེ་ནི་རྒྱལ་ཁབ་གཉིས་ཀྱི་འབྲེལ་ལམ་དོ་ཕོག་འགྲོ་གཞི་ཞིག་ཡིན་སྐོར་བརྗོད་ཡོད་འདུག་ལ། ཕྱིས་སུ་ཨོ་གླིང་གི་ཉམས་ཞིབ་སློབ་མ་གཉིས་ལ་བོད་ནང་འགྲོ་བསྐྱོད་ཆོག་པའི་ཆོག་མཆན་སྤྲད་མེད་པ་བཀོད་འདུག

སྙན་ཐོ་དེ་བརྒྱུད་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་ཨོ་གླིང་གཞུང་དང་གཙུང་ལག་སློབ་ཆེན་ཁག་ལ་ཞུ་སྐུལ་བྱས་པའི་ནང་། ཨོ་གླིང་གི་སློབ་མ་རྣམས་ལ་རྒྱལ་ཁབ་ཕྱི་ནས་སླེབས་པའི་བརྙས་བཅོས་དང་གནས་ཚུལ་བཀག་བསྡོམས། འཇིགས་བསྐུལ་བྱེད་པ་སོགས་ཀྱི་དོན་རྐྱེན་ཁག་ཞུ་གཏུག་བྱེད་སའི་ལས་ཁུངས་ཤིག་ཨོ་གླིང་གཞུང་གིས་ཆེད་འཛུགས་བྱས་ཏེ་གདོང་ལེན་བྱེད་དགོས་པ་དང་། ཨོ་གླིང་གི་གཙུག་ལག་སློབ་ཆེན་ཁག་གིས་རྒྱ་ནག་ནས་ཡོང་བའི་སློབ་མ་དང་ཞིབ་འཇུག་པ། དེ་བཞིན་རྒྱ་ནག་གི་གནད་དོན་ཐོག་ཉམས་ཞིབ་བྱེད་མཁན་གྱི་བདེ་འཇགས་ལ་ཞིབ་འཇུག་དང་གཙུགས་སུ་འཛིན་དགོས་པ་དང་། རྒྱ་ནག་ནས་ཡོང་བའི་སློབ་མ་དང་ཉམས་ཞིབ་པ་ཚོའི་བདེ་འཇགས་ལ་སྲུང་སྐྱོབ་དགོས་སྐོར་སོགས་བཀོད་འདུག

ཕྱི་ལོ་ ༢༠༢༠ ལོར་རྒྱ་ནག་སྐམ་ས་ནས་ཨོ་གླིང་གི་གཙུག་ལག་སློབ་ཆེན་ཁག་ལ་སློབ་འཇུག་ཐོ་འགོད་བྱེད་མཁན་གྲངས་ཁྲི་ ༡༦ བྱུང་ཡོད་འདུག་པ་དང་། ཏོག་དབྱིབས་གཉན་རིམས་མ་བྱུང་གོང་དུ་ལོ་རེའི་ཨོ་གླིང་གི་ཕྱི་འབྱོར་མཐོ་རིམ་སློབ་མའི་བརྒྱ་ཆའི་ ༤༠ རྒྱ་ནག་སྐམ་ས་ནས་ཡོང་བ་ཡིན་འདུག་པ་དང་། ཨོ་གླིང་རྒྱལ་ཡོངས་ཀྱི་མཐོ་རིམ་སློབ་མའི་བརྒྱ་ཆའི་བཅུ་ཙམ་རྒྱ་ནག་ནས་ཡོང་བ་ཡིན་འདུག

གསར་འགོད་པ། ཀླུ་མགོན་ཐར།